En portada (1184)

Iniciativa Xove é un programa da Consellería de Política Social da Xunta de Galicia, que concede axudas de ata 5.000 euros para que as persoas mozas poidan desenvolver ideas que, transformadas
en proxectos empresariais e/ou iniciativas de interese, poidan reverter na mocidade actual e na nosa sociedade.

Neste momento, a convocatoria de axudas para 2021 , á que poden concorrer tanto grupos informais de mozos e mozas, asociacións xuvenís e entidades legalmente constituídas, ten o prazo de solicitudes aberto ata o 14 de xuño. No marco deste programa, a Xunta de Galicia organiza a I Feira Iniciativa Xove, co fin de visibilizar os proxectos xurdidos ao abeiro desta iniciativa nos últimos anos e impulsar o desenvolvemento de ideas innovadoras por parte da mocidade. Esta feira terá lugar o vindeiro sábado 12 de xuño no Edificio Cinc da Cidade da Cultura de Galicia, en Santiago de Compostela.

Podes seguir a presentración das 11 horas e a rolda de pitchings das 18 horas en directo a través de este enlace!

Contidos da feira

Na feira, que combinará o formato presencial e en liña, levaranse a cabo as seguintes actividades:

  • Espazo expositivo de proxectos xurdidos ao abeiro do programa Iniciativa Xove, protagonizados por grupos informais de mozos e mozas. Con acceso libre para o público en xeral.
  • Talleres prácticos, tanto en formato dixital como presencial, sobre habilidades e competencias profesionais e para o desenvolvemento de modelos de negocio e marketing. Necesaria inscrición previa no formulario que aparece a continuación.
  • Rolda de presentacións de proxectos e networking, que se poderá seguir tamén en liña vía streaming.
  • Asesoramento e resolución de dúbidas acerca da presentación de iniciativas no marco do programa Iniciativa Xove. Para acceder a esta parte tamén é necesario realizar unha inscrición previa. Necesaria inscrición previa no formulario que aparece a continuación.

Consulta AQUÍ o programa detallado do evento.

Destinatarios e inscrición

As actividades están dirixidas a mozos e mozas, de entre 18 e 30 anos, con residencia en Galicia ou en Portugal.

As prazas para os talleres, tanto en formato presencial como en liña, son limitadas, así que non o dubides e formaliza a túa inscrición, totalmente gratuíta, no seguinte enlace. As prazas para estas actividades serán adxudicadas por rigorosa orde de inscrición.

FORMULARIO DE INSCRICIÓN

Consultas e información: xuventude@xunta.gal

PROXECTO LIDERA

Esta actividade enmárcase no proxecto “Catalizador de oportunidades de emprego e emprendemento xove transfronteirizo” (acrónimo LIDERA), aprobado ao abeiro do programa Interreg V A España Portugal 2014-2020 (POCTEP) e que ten como obxectivo promover o desenvolvemento económico transfronteirizo a través das capacidades laborais e de emprendemento dos mozos e mozas do
territorio.

Conta cun orzamento de 1.428.692,93 euros cunha financiación dun 75 % de fondos Feder e unha duración de catro anos (2016-2019).

Son socios do proxecto: a Dirección Xeral de Xuventude, Participación e Voluntariado, a FundaciónGalicia Europa, a Cámara de Comercio de Santiago de Compostela, o Instituto Português do Desporto e da Juventude (IPDJ), a Federación Nacional de Asociaciones Juveniles Portuguesas (FNAJ) e a Comunidade Intermunicipal do Ave.

 

  • A conselleira de Política Social, Fabiola García, asinou hoxe co presidente do Clúster de Turismo de Galicia, Cesáreo González, un convenio de colaboración no Hotel Meliá María Pita da Coruña
  • O Goberno galego está a enviar o Carné Xove, que xa é gratuíto e indefinido, ao 100% das mozas e mozos de entre 12 e 30 anos

A Xunta de Galicia e o Clúster de Turismo ofrecerán co Carné Xove un desconto do 10% en medio cento de establecementos turísticos da comunidade. A conselleira de Política Social, Fabiola García, acompañada do delegado da Xunta na Coruña, Gonzalo Trenor, asinou hoxe co presidente deste organismo, Cesáreo González, un convenio de colaboración no Hotel Meliá María Pita, na Coruña, polo que unhas 400.000 persoas de entre 12 e 30 anos terán vantaxes na hospedaxe, na compra de produtos ou na adquisición de servizos turísticos en hoteis, casas rurais, cámpings ou balnearios.

Trátase dunha das iniciativas postas en marcha polo Goberno galego o pasado mes de decembro para dar continuidade a este carné con tanta tradición na Comunidade e que inclúe descontos no ámbito cultural, no aloxamento, nos transportes, no comercio ou no ensino. Unhas vantaxes que son recoñecidas en toda España e nos 40 países europeos adheridos ao programa Carné Xove Europeo.

Fabiola García sinalou, entre outras novidades desta axuda, que pasará a ser gratuíta, indefinida e accesible ao 100% da xuventude galega. Así mesmo, a Xunta porá en marcha unha aplicación móbil que permitirá ter acceso a un listado de descontos e promocións xeolocalizados e ofreceranse descontos no establecementos locais adheridos á Federación Galega de Xoves Empresarios.

Establecementos adheridos

Os establecementos que ofrecerán descontos na provincia da Coruña serán: Altavela Servicios Náuticos (Sada), Casa Rural Muiño Das Cañotas (Cariño), Casa Lourán (Monfero), Casas Do Campo (Monfero), Hotel Hesperia A Coruña Centro (A Coruña), Grandes Pequeñas Casas (Santiago de Compostela), Hotel La Terraza (Miño), Hotel Alda El Suizo (Ferrol), Entre Os Ríos Casa Rural (A Pobra do Caramiñal), Vertigo Aventura (Lousame), Asociación Profesional De Guías De Turismo De Galicia (Santiago), Meliá Maria Pita (A Coruña), Hotel Oca Insua (Cee), Hotel Tryp Santiago (Santiago) e Viaxes Galitur (Ferrol).

En Lugo os establecementos dispoñibles: O Tumbin Ponte Dos Santos Restaurante (Ribadeo), Aisi Art (Ribadeo), Isla Nova Hotel (Foz), Duerming Villa De Sarria (Sarria), Hotel Pazo De Berbetoros (Portomarín), Balneario Do Río Pambre (Palas de Rei) e Hotel O Val De Naseiro (Viveiro).

Na provincia de Ourense faranse descontos en: apartamentos Ribeira Sacra (Parada de Sil), Xuresactivo Experiencias (Lobios), Adegas Celme (Castrelo de Miño), Complexo Turístico Do Couto Mixto (Baltar), Hotel O Balcón Da Ribeira (Parada de Sil) e Carrioza Aloxamento (Parada de Sil).

Por último, en Pontevedra atópanse os seguinte establecementos: Casa Rodiño (Meaño), Señorío De Rubiós (As Neves), Hotel Montemar (O Grove), Camping Muiñeira (O Grove), Essenzial Home Galicia (O Grove), Hotel Tryp Los Galeones (Vigo), Hotel Peregrina (Portonovo), Galiwonders (Pontevedra), Hotel Sena (Caldas de Reis), Viajes Fisterra Slu (Sanxenxo), Albergue Rincón Del Peregrino (O Porriño), Adrenalicia Parque De Paintball (O Grove), Alecrin Actividades Y Aventura (Vigo), Camping Liméns (Cangas), Hotel Ría Mar (Meaño), Hotel Gaivota (Sanxenxo), Hotel O Castro (O Grove) e Paris Dakart Área Recreativa (Sanxenxo).

NOVO SORTEO!

Utilizas o CarnéXove? Presume do que mercas e gaña un lote de produtos de Nela Gourmet por valor de 52€ (inclúe unha cesta de picnic de mimbre, seis marmeladas creativas, un bálsamo labial e un xampú sólido de mel e eucalipto)! Queremos saber para que usas #CarnéXove.
Para participar tes que:
1. Subir unha Story a Instagram dalgún produto/servizo adquirido co desconto do #CarnéXove
2. Utilizar o cancelo (hashtag) #CarnéXove, mencionar a @xuventudegalicia e indicar o nome do establecemento/marca onde fixeches a compra (se ten Insta, menciónaa tamén)
3. Facer captura da participación e enviala a @xuventudegalicia por mensaxería privada de Instagram.

IMPORTANTE: poden participar aquelas persoas mozas galegas co Carné Xove vixente.

O sorteo realizarase o 28 de maio!!

https://www.instagram.com/p/COuc_hlD-jf/

A Dirección Xeral de Xuventude, Participación e Voluntariado abre un prazo para solicitar o uso de instalacións xuvenís para a realización de programas de ocio educativo e tempo libre durante a campaña de verán 2021 para colectivos xuvenís.

Servizos ofertados:
a) Servizos de auga, gas, electricidade e alimentación en réxime de pensión completa.
b) Material, excepto o correspondente ás actividades que a entidade ou grupo vaia desenvolver na instalación e que, no caso dos campamentos, comprende tamén as tendas de campaña, colchóns e mantas.
c) Xerencia e persoal de servizo.

Quendas:

quendas

Tarifas: https://www.xunta.gal/dog/Publicados/2016/20160408/AnuncioG0425-010416-0001_gl.html

Entidades e grupos destinatarios:
1. As asociacións xuvenís, as entidades prestadoras de servizos á xuventude e as escolas de tempo libre, debidamente constituídas e legalizadas.
2. Os consellos locais e municipais de xuventude.
3. Outras entidades públicas ou privadas que realicen actividades coa xuventude.
4. Grupos de persoas mozas non asociadas que organicen actividades de tempo libre sen ánimo de lucro e, en todo caso, para efectos de realización dun programa de actividades para un mínimo de 15 persoas. Unha persoa integrante do grupo asumirá o papel de representante deste e con poderes suficientes para cumprir as obrigas que, como beneficiario, lle corresponden ao grupo e, en consecuencia, a todas as persoas que o forman. Será necesario que o grupo teña unha denominación que o identifique.

As solicitudes presentaranse en https://sede.xunta.es co procedemento BS304A
O prazo de presentación de solicitudes estará aberto ata o 28 de maio de 2021.
Máis información no DOG do 19 de maio de 2021 e en http://xuventude.xunta.es/accion-de-veran/oferta-concertada

A Consellería de Política Social, a través da Dirección Xeral de Xuventude, Participación e Voluntariado convoca a Campaña de verán 2021 cun programa de actividades cun claro compoñente de educación non formal destinadas á xuventude no ámbito do lecer e o tempo libre

Poden solicitar a súa participación nas actividades ofertadas nesta convocatoria as persoas mozas residentes en Galicia.

Requisitos:
- Idade mínima e máxima para participar na Campaña de verán 2021:
As persoas nacidas no ano 2003 non poderán cumprir 18 anos antes da finalización do campamento.
As persoas nacidas no ano 2012 deberán ter cumpridos 9 anos ao inicio do campamento.
- Para ser admitido/a no campamento será necesario non padecer enfermidade transmisible con risco de contaxio nin sintomatoloxía compatible co COVID-19.
- Saber nadar para os campamentos que inclúan na súa programación actividades de auga.
- Ningunha persoa participante poderá ser admitida en máis dun campamento por ano. A praza adxudicada será intransferible.

Prazas de inclusión: As persoas que teñan unha discapacidade igual ou superior ao 33 % poderán participar nesta convocatoria cumprindo os seguintes requisitos:
a) Facer constar a súa condición na solicitude, co fin de planificar os apoios persoais necesarios, se os precisar.
b) Que no certificado de recoñecemento de discapacidade non se recolla a necesidade de axuda de terceira persoa.
c) Ter capacidade de integración nun grupo e que as súas limitacións e/ou necesidades especiais lles permitan participar e beneficiarse das actividades que se van desenvolver no destino que soliciten.
En función do tipo de discapacidade, poderá exceptuarse, de ser o caso, o requisito de saber nadar. Neste suposto, a persoa menor con discapacidade non poderá participar nas actividades de auga.

As persoas menores en situación de tutela ou garda pola Administración e que se atopen en acollemento residencial poderán participar nesta convocatoria e deberán indicar esta condición no anexo de solicitude, marcando o recadro correspondente.

Tipos de solicitude:
As solicitudes poderán presentarse de forma individual ou múltiple
- As persoas que presenten unha solicitude individual de prazas deben utilizar o formulario BS303A
- As persoas con discapacidade que opten polo procedemento das prazas reservadas para inclusión deben utilizar o formulario BS303G
- As persoas que presenten unha solicitude múltiple deben empregar o formulario BS303F
- As persoas con discapacidade que presenten unha solicitude múltiple para prazas reservadas para inclusión deben utilizar o formulario BS303H

A solicitude múltiple admitirase para o suposto de dous/dúas, tres e ata catro irmáns/ás. As persoas menores que convivan no domicilio en situación de acollemento familiar tamén se poderán incluír na solicitude múltiple, equiparándose a súa situación a dos/as irmáns/as.

Oferta de prazas tanto para inclusión como prazas xerais: http://xuventude.xunta.es/accion-de-veran/anexos-accion-de-veran

Descontos:
As familias numerosas e familias monoparentais terán un desconto do 50 %
As persoas usuarias do Carné xove gozarán dun desconto do 25 %

O prazo de presentación de solicitudes estará aberto ata o 28 de maio de 2021

Máis información no DOG do 19 de maio de 2021 e en http://xuventude.xunta.es/accion-de-veran

A Dirección Xeral de Xuventude, Participación e Voluntariado convoca o programa Iniciativa Xove que consiste en axudas económicas para a posta en marcha de iniciativas xuvenís, entendidas estas como proxectos liderados pola mocidade de Galicia, que se desenvolvan durante o ano 2021, e nos cales as persoas novas sexan as verdadeiras protagonistas, que participarán activamente na planificación e na realización das actividades deseñadas por elas mesmas.

A finalidade das subvencións é fomentar e consolidar a participación libre e eficaz da mocidade no desenvolvemento político, social, económico e cultural, así como promover a adecuada utilización do lecer, a calidade de vida e o benestar dos mozos e mozas da nosa comunidade autónoma, a través de proxectos integrais e específicos de actuación.

Áreas de atención prioritaria:
a) Iniciativa Xove Emprendedora: proxectos que lle permitan á mocidade poñer en marcha as súas ideas no ámbito do emprendemento e da empregabilidade.
b) Promoción de hábitos saudables e prevención de condutas de risco ou violentas entre a poboación xuvenil, así como sensibilización e loita contra calquera forma de discriminación, en especial contra a violencia de xénero.
c) Posta en valor e promoción do Camiño de Santiago e do fenómeno xacobeo.
d) Fomento de actitudes creativas e innovadoras da mocidade na súa comunidade e na súa contorna.
e) Fomento da inclusión social e laboral e da accesibilidade dos mozos e mozas pertencentes a colectivos con dificultades de integración ou especialmente vulnerables.
f) Promoción de sectores emerxentes vinculados ao sector TIC.
g) Fomento da participación e do empoderamento das mulleres novas galegas.
h) Promoción de actitudes e hábitos sustentables e de concienciación sobre o cambio climático, así como de posta en valor do patrimonio cultural e natural.
i) Desenvolvemento e dinamización do medio rural.
j) Dinamización da lingua galega entre a mocidade.

Destinatarios/as:
a) Os grupos informais de mozos e mozas que desexen realizar unha iniciativa xuvenil.
b) As asociacións xuvenís, as entidades prestadoras de servizos á mocidade e as súas respectivas federacións, sempre que, no caso destas últimas, o proxecto que presenten sexa diferente do que presenten, se é o caso, as asociacións xuvenís ou entidades prestadoras que formen parte da federación.

Requisitos:
- As asociacións xuvenís e as entidades prestadoras de servizos á xuventude e as súas respectivas federacións deberán estar inscritas no censo oficial dependente organicamente da Dirección Xeral de Xuventude, Participación e Voluntariado.
- Os grupos informais deberán estar formados por un mínimo de 5 e un máximo de 8 mozas ou mozos con idades comprendidas entre os 18 e os 30 anos. Unha destas persoas asumirá o papel de representante único do grupo e con poderes suficientes para cumprir as obrigas que, como beneficiario, lle corresponden ao grupo. Será obrigatorio que o grupo teña unha denominación que o identifique. As persoas que o compoñan deberán de estar empadroadas nalgún dos municipios pertencentes á Comunidade Autónoma de Galicia no momento de presentación da solicitude. Non poderá modificarse a composición do grupo unha vez rematado o prazo de presentación de solicitudes.
- Non se admitirá que a mesma persoa forme parte ou pertenza a outro grupo ou asociación, de ámbito autonómico ou provincial, solicitante destas axudas.

Proxectos:
Os proxectos deberán levarse a cabo no ámbito territorial da Comunidade Autónoma de Galicia.
Só se poderá presentar un proxecto por solicitante e o seu orzamento total non poderá ser superior a 5.000 €.
Considéranse gastos subvencionables aqueles que de xeito indubitado respondan á natureza do proxecto presentado, resulten estritamente necesarios para levalo a cabo e financien actividades realizadas desde o 1 de xaneiro ata o 15 de outubro de 2021.

Neste enlace podedes ver proxectos subvencionados en edicións anteriores: http://xuventude.xunta.es/iniciativa-xove

O prazo para presentar solicitudes estará aberto ata o 14 de xuño de 2021.
Solicitudes: https://sede.xunta.es co procedemento BS306B.
Máis información no DOG do 14 de maio de 2021 e en http://xuventude.xunta.es/iniciativa-xove

A Conselleira de Política Social, Fabiola García, sinala que a campaña de verán ofrecerá un "lecer seguro" á mocidade galega tras os esforzos realizados no último ano.

- Contará con 7.830 prazas, mil máis que o ano pasado
- Haberá 185 prazas destinadas a persoas con discapacidade de entre 11 e 41 anos e outras 60 a menores tutelados
- O prazo de solicitude será de sete días hábiles e comezará o xoves 20 de maio, logo da súa publicación no Diario Oficial de Galicia
- Incorpóranse catro novas sedes de campamentos: Bande, Parada de Sil, Cabana de Bergantiños e Silleda
- Recupéranse os intercambios bilaterais con outras Comunidades Autónomas que se suspenderan o ano pasado por mor da pandemia
- Súmanse 13 novos campos de voluntariado ata chegar a un total de 40

O lema da campaña será ‘O verán que mereces’ para agradecer o comportamento exemplar da mocidade galega durante os últimos meses de pandemia

A conselleira de Política Social, Fabiola García, sinalou que a campaña de verán ofrecerá un “lecer seguro” á mocidade galega tras os esforzos realizados no último ano. Así o manifestou durante a presentación do programa de actividades que se desenvolverá nos meses de xullo, agosto e setembro e que porá á disposición da xuventude galega un total de 7.830 prazas, mil máis que o ano pasado.

O prazo para pedir solicitude será de sete días hábiles e comezará o vindeiro xoves 20 de maio, logo da súa publicación no Diario Oficial de Galicia.

Fabiola García sinalou que, como cada edición, inclúense tamén prazas reservadas para persoas con discapacidade de entre 11 e 41 anos —un total de 185—, así como para rapaces tutelados —outras 60 prazas—. Dentro da oferta desta campaña figuran campamentos para nenas e nenos de 9 a 17 anos, intercambios con outras comunidades autónomas, campos de voluntariado para maiores de 18 anos e minicampamentos ‘Coñece Galicia’ en establecementos turísticos.

Durante a presentación, realizada no campamento xuvenil Virxe de Loreto, en Porto do Son, a conselleira destacou tres novidades da campaña deste ano. Por un lado, incorpóranse catro novas instalacións de campamentos: Bande, Parada de Sil, Cabana de Bergantiños e Silleda; recupérase o programa de intercambios bilaterais que se suspendera o ano pasado por mor da pandemia; e sumaranse 13 novos campos de voluntariado, ata chegar a un total de 40.

‘O verán que mereces’

O Goberno galego manterá este ano o protocolo específico fixado no ano pasado para os campamentos de verán. Fabiola García apuntou que Galicia apostou polos campamentos de verán cando ninguén o facía e logrouse realizar unha campaña sen ningún caso positivo. Por este motivo, continuarase a implantar medidas a redución do aforo, a incorporación escalonada das rapazas e rapaces, o reforzo do persoal monitor ou o incremento das medidas hixiénicos-sanitarias.

A conselleira puxo en valor os esforzos realizados pola xuventude galega durante este último ano. “Lonxe dos estereotipos que a perseguen, hai unha mocidade responsable, consciente e comprometida”, apuntou. Por todo iso, esta campaña de verán ten por lema ‘O verán que mereces’, como recompensa por todos os esforzos, bo comportamento e exemplo que demostraron durante este tempo.

A conselleira de Política Social, Fabiola García celebrou durante a inauguración da exposición de Xuventude Crea no Mercado Municipal de Ribeira “os referentes novos cheos de talento e creatividade” dos que pode presumir Galicia. A mostra, que ten carácter intinerante, fai un percorrido polos últimos dez anos do certame e poderá visitarse en diferentes localizacións ata abril de 2022.

A exhibición, que se poderá ver cada mes nun lugar diferente ata chegar ás doce localizacións previstas, comeza en Ribeira, onde estará todo o mes de maio, e continuará en Lalín, onde permanecerá o mes de xuño; Vigo, en xullo; Tui, en agosto; Noia, en setembro; Lugo, en outubro; Ourense, en novembro; e, por último, estará en Santiago de Compostela todo o mes de decembro. De cara ao 2022 especificaranse as datas nas que recalará nos seus seguintes destinos: as cidades da Coruña, Pontevedra, Ferrol e Chantada.

Durante o acto inaugural da exposición, a conselleira de Política Social explicou que os obxectivos principais deste programa son, por unha banda, coñecer algunhas das mostras máis senlleiras da creatividade xuvenil e, por outra, permitir aos seus artífices amosar o seu talento en varios lugares da comunidade.

Récord de participación

Fabiola García recordou que o pasado ano medio milleiro de mozas e mozos se presentaron ao certame, o que supuxo un récord de participación do programa. Este feito, xunto ao compromiso do Goberno galego de seguir a fomentar a creatividade e o talento da mocidade galega, leva á Xunta de Galicia a continuar apoiando estas iniciativas, posto que se trata dun dos principais escaparates para “demostrar ao mundo enteiro que as xeracións máis novas teñen unha enorme puxanza”, recalcou.

Neste sentido, a titular de Política Social lembrou que nos últimos anos se foron incorporando novas categorías ao abano inicial, ata chegar ás 14 actuais. Entre outras disciplinas, o certame organizado pola Consellería premia os mellores traballos en artes plásticas, banda deseñada, cociña, danza moderna, deseño de xoias, fotografía, graffiti, moda, música, poesía, teatro e videocreación. As últimas en sumarse ao programa foron as de creación de videoxogos e novela curta.

Xa podes ver a entrevista con Dani a través do programa TalentoMozo,  en instagram de Xuventude ⁣⁣⁣⁣DANI2

 

⁣⁣⁣⁣Descubrirás unha historia de música, inspiración e emoción da man de Dani; que nos contará a súa experiencia como artista @danic0stas

 

Canle IGTV de Xuventude

No contexto actual, no que persisten certas restricións derivadas da pandemia da Covid-19, as opcións de lecer e ocio educativo seguen sendo reducidas. Por iso, e co fin de ofrecer novas iniciativas e alternativas saudables á mocidade para o seu tempo libre, a Consellería de Política Social da Xunta de Galicia pon en marcha este 2021 un novo programa especialmente pensado para esta situación, na que é preciso xerar espazos seguros, pero tamén divertidos, formativos e favorecedores da transferencia de valores e coñecemento

Tres formatos diferentes, dous meses e un só público: os mozos e mozas galegos

O novo programa chámase Primavera Xove e levarase a cabo entre os meses de maio a xuño. Está composto por tres formatos de accións diferentes totalmente gratuítas que buscan dar resposta aos gustos e necesidades dos mozos e mozas, con independencia da súa idade. Por iso, haberá accións concretas tanto para os rapaces máis novos como para os estudantes universitarios ou que xa remataran os seus estudos.

A programación desta nova iniciativa de educación non formal e entretemento saudable estará composta por:

  • Programa de fin de semana (de venres a domingo) en albergues xuvenís para mozos e mozas de 14 a 17 anos.
  • Encontros de desenvolvemento e aprendizaxe xuvenil nos campus universitarios de Santiago, A Coruña, Ourense e Vigo. Formación, charlas inspiradoras e networking.
  • Feiras Primavera Xove nos 12 espazos xove dependentes da Xunta de Galicia.

Todas as actividades levaranse a cabo seguindo as medidas de prevención, seguridade e hixiene establecidas polas autoridades sanitarias para facer fronte á Covid-19. Así mesmo, para a actividade nos albergues xuvenís que inclúe pernoita deberase achegar unha declaración responsable sobre condicións de saúde á entrada da estancia, que será facilitada con anterioridade pola Dirección xeral de Xuventude, Participación e Voluntariado.

 

1.Programación de fin de semana en albergues xuvenís

primaveraxove alberguesEste programa levarase a cabo nos albergues xuvenís LugII, localizado na cidade de Lugo, e en Gandarío, no concello de Bergondo. Ofertaranse un total de 160 prazas que permitirán aos mozos e mozas ampliar as súas habilidades e competencias, así como participar en actividades físico-deportivas, de aventura e tecnolóxicas, fomentando actitudes de cooperación e respecto.

Quen pode participar?

O programa está dirixido a mozos e mozas empadroados en Galicia que teñan entre 14 e 17 anos no momento da solicitude e queiran gozar dun programa de actividades de educación non formal nos albergues xuvenís.

Prazas

O número de prazas dispoñibles en cada unha das opcións e fins de semana é de 20, o que suma un total de 160 prazas dispoñibles.

Cando?

  • Do 14 ao 16 de maio
  • Do 21 ao 23 de maio
  • Do 28 ao 30 de maio
  • Do 04 ao 06 de xuño
  • Do 11 ao 13 de xuño

Prazo e método de inscrición

O prazo de inscrición comezará o día 7 de maio ás 13.00 horasFORMULARIO DE INSCRICIÓN

As prazas adxudicaranse, como se dixo anteriormente, por rigorosa orde de chegada dos formularios de inscrición ata esgotar todas as dispoñibles por programa.

No formulario de confirmación de solicitude só se poderá elixir unha quenda, se ben no caso de que queden prazas libres, ofreceráselles aos mozos e mozas que presentaran xa unha solicitude de participación a posibilidade de inscribirse noutro programa no que haxa vacantes.

Consulta todas as condicións de participación, requisitos e información sobre o programa no seguinte enlace

Declaración responsable sobre a covid-19

 

2. Encontros de desenvolvemento e aprendizaxe xuvenil nos campus universitarios

primaveraxove universidadeA través deste programa, a Xunta de Galicia busca ofrecer alternativas de ocio formativo e responsable en tempos de Covid-19 que poidan ser complementarias ao currículo académico dos mozos e mozas, ao mesmo tempo que se traballan habilidades e capacidades necesarias desde o ámbito da educación non formal para o seu desenvolvemento persoal e profesional.

Cada xornada enfocarase a un ámbito concreto e comezará cunha charla formativa e inspiradora a cargo dun ou varios relatores recoñecidos no seu eido. Serán profesionais, empresarios/as, creativos/as relevantes na contorna e no panorama nacional ou autonómico tales como os divulgadores científicos Jorge Mira e Deborah García, o consultor de márketing e emprendemento Javier Varela, a xornalista e influencer Patricia García @donkeycool; a experta en márketing responsable Jessica Bardanca @Jess.con.jota, ou o creador de contido en RRSS Coque Macho. Nun segundo ciclo falaremos de sustentabilidade e responsabilidade social, educación emocional, e cultura e creatividade, con idéntico formato e algunha sorpresa.

O obxectivo é favorecer o debate e o networking sobre a temática tratada a través de obradoiros en grupos reducidos en espazos diferentes, distendidos, abertos e innovadores.

Quen pode participar?

Estas xornadas están dirixidas principalmente a mozos e mozas universitarios, aínda que se pode inscribir a mocidade en xeral, de 18 a 30 anos.

Prazas

Estas xornadas terán un aforo reducido para garantir todas as medidas de seguridade e prevención fronte á Covid-19. Deste xeito, poderán asistir 20 persoas como máximo a cada sesión, seleccionadas por orde de inscrición. Cada persoa moza poderá participar en tantas xornadas como queira.

Cando?

Esta acción levarase a cabo todos os mércores de maio e xuño a partir do vindeiro mércores 12. A programación, totalmente gratuíta para as persoas participantes, será de tarde e cada xornada terá unha duración aproximada de 2 horas.

Consulta todas as condicións de participación, requisitos e información sobre o programa no seguinte enlace

Prazo e método de inscrición

O prazo de inscrición a cada acción abrirase a partir do 7 de maio ás 13.00 horas. FORMULARIO DE INSCRICIÓN

As prazas adxudicaranse por estrita orde de inscrición. As persoas que non obteñan praza pasarán á lista de reserva. Poderase escoller participar nunha ou en varias das accións contempladas na programación.

Actividade financiada no marco do proxecto Lidera, aprobado ao abeiro do programa Interreg V A España Portugal 2014-2020 (POCTEP).

 

3. Feiras Primavera Xove nos 12 Espazos Xoves

primaveraxove espazos xovesAo longo de todos os venres do mes de maio, cada Espazo Xove celebrará unha feira de ocio educativo para a mocidade da súa contorna. Aínda que cada unha terá as súas particularidades e nela participarán persoas diferentes, haberá varios denominadores comúns:

  • Venres pola mañá: charla formativa coa participación dos institutos de cada zona e convite a coñecer o espazo xove.
  • Venres ou sábado pola tarde: celebraranse varios obradoiros de cultura urbana, artes, emprendemento, etc. e tamén haberá actuacións musicais.

Quen pode participar?

A mocidade das contornas de cada espazo xove.

Cando?

  • 7 maio: Lalín (tamén 8 de maio), Pontedeume e Betanzos (tamén o 4 de xuño)
  • 14 maio: Curtis, Ourense e Vilalba
  • 21 maio: Viveiro, Noia e Chantada
  • 28 maio: Vilagarcía, Carballo e Tui

Prazo e método de inscrición

Estas xornadas terán un aforo reducido en cada un dos obradoiros para garantir todas as medidas de seguridade e prevención fronte á Covid-19. Pódese reservar praza nas diferentes actividades en cada espazo xove nos formularios dispoñibles na seguinte ligazón. As prazas adxudicaranse por rigorosa orde de inscrición.

Consulta todas as condicións de participación, requisitos e información sobre o programa no seguinte enlace