En portada (1167)
A Xunta abre o prazo para solicitar os campamentos e campos de voluntariado deste verán 2024
- A Xunta abre o prazo para solicitar os campamentos e campos de voluntariado deste verán 2024
- A campaña de verán deste ano conta con máis de 11.500 prazas, 300 máis que na pasada edición, cando xa se bateran todos os records
- O prazo dos campamentos permanecerá aberto ata o vindeiro 30 de abril e as solicitudes deberanse facer mediante a sede electrónica da Xunta
- Tamén se pode solicitar praza nos campamentos específicos destinados a persoas con discapacidade e cuxa oferta se poderá consultar na páxina web de Política Social
- Entre as novidades deste ano atópanse catro novos campamentos en Boiro, no Monte do Gozo (Santiago), Becerreá e Allariz
O Diario Oficial de Galicia publicou a orde de convocatoria dos campamentos de verán deste 2024. Ata o vindeiro 30 de abril, as familias poderán solicitar praza nunha das instalacións ofertadas pola Xunta de Galicia para este ano. A campaña de verán do Goberno galego contará con máis de 11.500 prazas, 300 máis que o pasado ano, batendo así con todos os récords.
Entre as novidades desta edición destacan catro novos campamentos: en Boiro, de índole artístico; no Monte do Gozo (Santiago), que terá como temática a música; no Centro de Formación e Experimentación Agroforestal de Becerreá; e tamén un novo campamento en Allariz, no Centro de Formación Valverde. Inclúe tamén unha convocatoria específica para persoas con discapacidade que volverá a contar con 250 prazas e que se poderá solicitar a través da páxina web de Política Social.
Con respecto aos campos de voluntariado, poderanse solicitar ata o 30 de abril en primeira convocatoria, a través da páxina web de Xuventude. Crearanse seis novos: cinco de carácter nacional: Aranga (A Coruña), Samos (Lugo), Ribadavia (Ourense), Poio (Pontevedra) e en Ponteareas (Pontevedra); e outro de carácter internacional, na Merca (Ourense). Tamén se repetirá o campo de voluntariado específico para persoas galegas no exterior no Castro de Viladonga (Castro de Rei), en colaboración coa Secretaría Xeral da Emigración e Patrimonio Cultura.
Cesión de instalacións xuvenís a entidades e grupos de mozos
Así mesmo, as entidades que desenvolven actividades para a xuventude e os grupos de persoas mozas non asociadas tamén poden solicitar a utilización das instalacións xuvenís das que é titular a Dirección xeral de Xuventude, Participación e Voluntariado co obxecto de que poidan desenvolver programas de lecer educativo e tempo libre, sen ánimo de lucro, dentro da programación da campaña de verán 2024. As solicitudes presentaranse por sede electrónica.
Novo programa de ocio alternativo
Ademais, impulsarase un novo programa de ocio alternativo, dirixido a mozos de entre 18 e 30 anos en cinco instalacións de toda Galicia de xoves a domingo. Terá lugar nos albergues xuvenís de Allariz, Cabana de Bergantiños e A Devesa (Ribadeo), así como no complexo Cemar de Mondariz e no albergue montañas de Trevinca (A Veiga).
Minicampamentos
Esta oferta compleméntase cos minicampamentos ‘Coñece Galicia’ cuxa oferta se dará a coñecer máis adiante; e cos intercambios con outras comunidades autónomas. Neste respecto, á oferta tradicional sumaranse novos campamentos en Estremadura e en Castela a Mancha, con temática teatral e que terá lugar no albergue de San Servando, en Toledo.
Campamentos específicos para mozos e mozas con discapacidade
Toda a información sobre a Campaña de Verán, no seguinte enlace: http://xuventude.xunta.es/accion-de-veran
17 de abril, Día Europeo da Información Xuvenil 2024
Cada 17 de abril celébrase o Día Europeo da Información Xuvenil, unha data que destaca a importancia dos servizos de información dirixidos á mocidade. Dende a Consellería de Cultura, Lingua e Xuventude compartimos a publicación do INJUVE con motivo desta efeméride.
O Día Europeo da Información Xuvenil é unha iniciativa establecida en 1983 pola Axencia Europea da Información e o Asesoramento Xuvenil (ERYICA) e o Instituto da Mocidade de España (INJUVE) que adquire especial relevancia este ano por coincidir coa Semana Europea da Mocidade.
O enfoque principal deste 2024 é promover a participación activa das persoas mozas na vida cívica e política como un elemento fundamental para fortalecer a democracia en Europa, especialmente no contexto das próximas eleccións ao Parlamento Europeo.
Os servizos de información xuvenil abarca unha ampla gama de temas relevantes para os mozos, proporcionando asesoramento, orientación, apoio, formación, actividades comunitarias e a conexión con servizos especializados, co propósito de involucrar e capacitar á mocidade. O Instituto da Mocidade de España resalta o papel crucial destes servizos en proporcionar información contrastada que capacita as persoas mozas para participar activamente na sociedade e exercer os seus dereitos.
A Xunta presenta a campaña de verán para o ano 2024 cun novo récord de prazas: máis de 11.500
- Son 300 prazas máis que na pasada edición, cando xa se bateran todos os récords
- Pódese consultar toda a oferta de campamentos na páxina web de http://xuventude.xunta.es
- O prazo para solicitar praza estará aberto desde o 17 ao 30 de abril de 2024
- Inclúense varias novidades como catro novos campamentos, seis novos campos de voluntariado e un novo programa de ocio alternativo para mozos de entre 18 e 30 anos
A conselleira de Política Social e Xuventude en funcións, Fabiola García, presentou a programación da campaña de verán para este ano 2024 que contará cun novo récord de prazas: serán máis de 11.500, 300 máis que na pasada edición. Ademais, contará con novas instalacións e actividades que lle permitirá á xuventude vivir ‘O teu mellor verán’, tal e como recolle o lema deste ano.
Entre as novidades destacan catro novos campamentos: en Boiro, de índole artístico; no Monte do Gozo (Santiago), que terá como temática a música; no Centro de Formación e Experimentación Agroforestal de Becerreá; e tamén un novo campamento en Allariz, no Centro de Formación Valverde. Incluirase tamén unha convocatoria específica para persoas con discapacidade que volverá a contar con 250 prazas.
Con respecto aos campos de voluntariado, crearanse seis novos: cinco de carácter nacional: Aranga (A Coruña), Samos (Lugo), Ribadavia (Ourense), Poio (Pontevedra) e en Ponteareas (Pontevedra); e outro de carácter internacional, na Merca (Ourense). Tamén se repetirá o campo de voluntariado específico para persoas galegas no exterior no Castro de Viladonga (Castro de Rei).
Novo programa de ocio alternativo
Ademais, impulsarase un novo programa de ocio alternativo, dirixido a mozos de entre 18 e 30 anos en cinco instalacións de toda Galicia de xoves a domingo. Terá lugar nos albergues xuvenís de Allariz, Cabana de Bergantiños e A Devesa (Ribadeo), así como no complexo Cemar de Mondariz ou no albergue montañas de Trevinca (A Veiga).
Esta oferta compleméntase cos minicampamentos ‘Coñece Galicia’ cuxa oferta se dará a coñecer máis adiante; e cos intercambios con outras comunidades autónomas. Neste respecto, á oferta tradicional sumaranse novos campamentos en Estremadura e en Castela a Mancha, con temática teatral e que terá lugar no albergue de San Servando, en Toledo.
Apertura de prazo
A oferta de campamentos publícase no Diario Oficial de Galicia do 16 de abril. A partir do día seguinte —do mércores 17— e ata o 30 de abril, permanecerá aberto o prazo para solicitar praza. Os campamentos deberán solicitarse a través da sede electrónica da Xunta de Galicia, mentres que os campos de voluntariado faranse a través dun formulario na páxina web de Xuventude.
Apertura da piscina en Marina Española
Fabiola García presentou esta nova oferta no albergue xuvenil Marina Española, unha das instalacións máis demandadas e con máis historia que tamén contará este ano cunha novidade moi agardada. Logo de doce anos pechada, os mozos que acudan a este campamento poderán volver desfrutar da súa emblemática piscina.
Campamentos específicos para mozos e mozas con discapacidade
Toda a información sobre a Campaña de Verán, no seguinte enlace: http://xuventude.xunta.es/accion-de-veran
Agora os Puntos Laranxas tamén os podes atopar nos Espazos Xove e Residencias xuvenís! Sabes o que son?
Nestes puntos atoparás unha caixa que funciona a modo de correo, e a través dela poderás comunicar ou denunciar situacións de acoso escolar ou ciberacoso.
Ante o acoso escolar, tolerancia cero.
A directora xeral de Xuventude, Participación e Voluntariado, Cristina Pichel, participou na inauguración do proxecto Atlic, un dos programas beneficiados do Programa Cooperación Territorial Europea (Interreg). Durante a súa intervención destacou a importancia de que a xuventude se involucre en proxectos coma este, que mesturen o crecemento económico e a sustentabilidade.
O proxecto Atlic aproveita as oportunidades da economía azul e reúne a mozos de distintos países como España, Portugal, Irlanda e Francia para idear medidas que axuden a potenciala. A directora xeral felicitounos pola súa iniciativa e lembrou que a economía azul é unha prioridade para Galicia, unha Comunidade referente internacional na exportación de produtos do mar e a primeira potencia pesqueira de Europa.
Recepción a unha vintena de mozos e mozas de Xapón
A conselleira de Política Social e Xuventude en funcións, Fabiola García e a Directora Xeral de Xuventude, Participacion e Voluntariado, Cristina Pichel, recibiron a unha vintena de mozos xaponeses que participan no programa da Xunta de Galicia A Xuventude no Mundo, que se recuperou o pasado ano logo do parón da pandemia. Fíxoo no espazo Galiverso da Cidade da Cultura no que se pode coñecer a través da realidade virtual o patrimonio artístico e paisaxístico galego.
O programa A Xuventude no Mundo permite o intercambio cultural entre a mocidade de Galicia e O Xapón, prestando especial atención ás rutas de peregrinación destes dous territorios. A ruta Xacobea e a ruta Kumano Kodo, son as únicas do mundo recoñecidas pola Unesco como Patrimonio da Humanidade. Así, mediante esta iniciativa fomentase o coñecendo por parte dos mozos de ambos territorios das similitudes e contrastes entre ambas culturas.
Os mozos xaponeses descubrirán durante unha semana a nosa Comunidade visitando distintos enclaves como a Costa da Morte, a cidade de Santiago ou partes do Camiño de Santiago. Do mesmo xeito, o pasado mes de setembro, un grupo de vinte mozos galegos viaxaron ata Wakayama para coñecer a ruta deste país e outras características da súa forma de vida. Desde a posta en marcha desta iniciativa, no ano 2010, beneficiáronse deste programa máis de 300 mozos.
Campos de voluntariado no estranxeiro
Xa está aberta a convocatoria para solicitar os campos de voluntariado no estranxeiro.
Consulta aquí a información.
A convocatoria para os campos de voluntariado en Galicia e noutras CCAA e para as demais actividades da Campaña de verán 2024 publicarase proximamente.
A Xunta difunde experiencias de éxito entre o alumnado do instituto IES de Viós de Abegondo
A directora xeral de Xuventude, Participación e Voluntariado, Cristina Pichel, e a directora xeral de Ordenación e Innovación Educativa, Judtih Fernández, participaron no Instituto IES de Viós na primeira xornada dos obradoiros ‘Talento Mozo’ deste curso 2023-2024, dirixidos a alumnado de secundaria de toda Galicia. Á sesión de asistiu unha trintena de estudantes de 4º de secundaria, que escoitaron as experiencias de Julio Martínez Rumbo, director de proxectos do Clúster Tecnolóxico Empresarial das Ciencias da Vida (Bioga) e Sara González Iglesias, terapeuta ocupacional.
A través de ‘Talento Mozo’, a Xunta quere dar visibilidade á creatividade, empuxe, potencial e capacidade de innovación que ten a xente moza. Ao abeiro desta iniciativa estanse a facer coloquios nos centros de secundaria galegos para presentarlle ao alumnado casos de éxito da mocidade e promover que sirvan de referencia. Así mesmo, nestes coloquios dáse resposta ás dubidas que as mozas e mozos poidan ter á hora de escoller estudos superiores e a súa posterior inserción no mercado de traballo.
Julio Martínez Rumbo, graduado en Bioloxía pola Universidade da Coruña e MBA en dirección de empresas e emprendemento, traballa desde hai seis anos en Bioga desenvolvendo a xestión integral de proxectos do clúster. Pola súa parte, Sara González Iglesias é terapeuta ocupacional e comezou a traballar en ENKI, entidade que impulsa a inserción de persoas con discapacidade.
Lingua de namorar é un concurso en liña de mensaxes de amor en lingua galega dirixido a todos os mozos e mozas de 14 a 35 anos.
O obxectivo principal de Lingua de namorar, organizado pola Dirección Xeral de Xuventude, Participación e Voluntariado e máis pola Secretaría Xeral de Política Lingüística, é dinamizar o uso da lingua galega entre os mozos e mozas nas súas relacións persoais e nas novas tecnoloxías, nomeadamente na Internet e na mensaxería instantánea.
Para participar no concurso nas categorías A (de 14 a 19 anos) e B (de 20 a 35 anos) só cómpre cubrir e enviar este formulario. As mensaxes que participen nestas dúas modalidades publicaranse na páxina do concurso:
http://xuventude.xunta.es/linguadenamorar
Para participar na categoría C (exclusiva para Instagram) cómpre ser seguidor/a de @xuventudegalicia e de @linguagalega.
As mensaxes publicaranse directamente na imaxe habilitada para o concurso #LinguaDeNamorar no perfil @xuventudegalicia. No texto indicarase en primeiro lugar un cancelo que recolla o título e despois a mensaxe. Ao final da publicación engadirase o cancelo #LinguaDeNamorar. Etiquetaranse tamén dúas amizades de IG.
Características das mensaxes
Cada participante poderá enviar ata dúas mensaxes, cunha extensión máxima de 350 caracteres no caso das categorías A e B e 200 caracteres na categoría C (de Instagram), incluídos os espazos en branco.
Categorías de idade e premios
Establécense tres premios por cada unha das categorías de idade A e B:
- 1º Patinete eléctrico
- 2º Altofalante bluetooth JBL
- 3º Cascos sen fíos
Establécese un premio para a categoría C:
- 1º Patinete eléctrico
Prazos de participación e votación
O prazo para enviar as mensaxes remata o 1 de abril.
Do 2 ao 7 de abril abrirase o período de votación. As persoas que desexen votar polas súas mensaxes favoritas nas categorías A e B deberán cubrir o formulario que se habilitará para o efecto na páxina do concurso.
No caso da nova categoría C a mensaxe gañadora seleccionarase en dúas fases:
1. O xurado do concurso fará unha preselección de 6 mensaxes de entre todas as presentadas en prazo e que respecten o indicado nestas bases.
2. O 15 de abril daranse a coñecer as 6 mensaxes preseleccionadas polo xurado, que concorrerán á votación final do público do 16 ao 21 de abril. Rematado o prazo de votación computaranse os gústame que reciba cada mensaxe e gañará aquela que acade un maior número de gústame por parte do público. No caso de que exista empate entre dúas ou máis mensaxes prevalecerán no cómputo o número de gústame dados por parte de seguidores/as de @xuventudegalicia e @linguagalega. A organización reserva para si o dereito de establecer calquera outro procedemento de desempate.
Resolución do concurso
A listaxe cos nomes das persoas gañadoras e finalistas nas tres categorías publicarase o 24 de abril. Tanto as mensaxes gañadoras como finalistas daranse a coñecer publicamente en http://xuventude.xunta.es/linguadenamorar e nos IG @XuventudeGalicia e @LinguaGalega.
Entrega de premios
A data da entrega de premios publicarase nesta páxina web con antelación suficiente á súa realización.
Primavera Xove 2024
A Xunta de Galicia pon en marcha a terceira edición do programa Primavera Xove, co fin de ofrecer actividades formativas e de lecer para a mocidade galega, así como un recurso de coidado para as familias galegas durante a Semana Santa e distintas fins de semana nos meses de marzo e abril, en instalacións da Xunta de Galicia.
Trátase dunha actuación da Xunta de Galicia co financiamento do Ministerio de Igualdade, en desenvolvemento do Plan Corresponsables.
O programa está dirixido a mozos e mozas empadroados en Galicia que teñan entre 14 e 30 anos no momento de asistencia á quenda adxudicada.
Os grupos de participación dividiranse en dous tramos de idade: de 14 a 17 anos e de 18 a 30 anos.
As actividades comezarán a partir do 8 de marzo.
Ofértanse 580 prazas en 29 quendas, nos 6 programas que conforman a actividade, cun máximo de 20 prazas en cada unha das opcións.
A cota de participación será de 25 euros para as actividades de fin de semana e de 75 euros para as quendas de Semana Santa.
Por ser membro de familia numerosa ou monoparental e por ser titular do Carné xove, sempre e cando a tarxeta estea debidamente activada, aplicarase un desconto do 25% sobre o prezo. As persoas participantes aboarán, nestes casos, 18,75 euros ou 56,25 euros
O desprazamento ata as instalacións onde se vai desenvolver o programa vai por conta das persoas que participan,tanto o día de incorporación como o día do remate da actividade.
MOI IMPORTANTE: O prazo de inscrición comeza o día 22 de febreiro ás 10.00 horas e será mediante o formulario en liña dispoñible nesta web.
No formulario só se poderá elixir unha quenda. As prazas asignaranse por estrita orde de chegada dos formularios.
Consulta aquí a toda a información do programa
NOTA INFORMATIVA: O folleto publicado inicialmente contiña un erro na descrición das actividades de Semana Santa do programa 4. LUGO TECH. As actividades do programa son as que figuran no folleto actual.
AVISO: Por motivos de seguridade no programa 6 “Natureza interior”, nas vindeiras quendas e ata novo aviso, substitúese a actividade de barranquismo pola de rafting no Río Ulla, dado que as actuais condicións meteorolóxicas fan impracticable a actividade inicialmente programada.