Na categoría A, de 14 a 19 anos, foron premiados a ourensá Alba Guzmán Falcón, o coruñés Santiago Sánchez Vilarino e a pantonesa Carla López Otero
Na categoría B, de 20 a 35 anos, os premios foron para Eva González Blanco, de Lalín; Clara Pérez Martínez, da Bola, e Andrea López Otero, de Pantón
Na modalidade de Instagram, que abrangue dos 14 aos 35 anos, a mensaxe mellor valorada polos usuarios da rede social foi a da ourensá Iria Cebreiros Trigo

O secretario xeral de Política Lingüística, Valentín García, e directora xeral de Xuventude, Participación e Voluntariado, Cristina Pichel, participaron no acto de entrega dos premios aos gañadores da duodécima edición de Lingua de namorar, o certame en liña impulsado pola Xunta que promove a creación de mensaxes de amor en galego entre a mocidade.

O representante da Consellería de Cultura, Educación, FP e Universidades deulles os parabéns aos gañadores e animounos a todos “a continuar empregando o galego para relacionarse coas persoas máis próximas e para comunicarse na rede” e lembroulles que a Xunta de Galicia “traballa, xunto con outras entidades galegas, no Proxecto Nós, que está destinado a fornecernos de ferramentas que nos permitan interactuar coa tecnoloxía en galego ao mesmo nivel ca nas linguas do mundo con maior número de falantes”.

Pola súa parte, a representante da Consellería de Política Social e Xuventude destacou que esta nova edición de Lingua de namorar puxo de manifesto, unha vez máis, que Galicia ten unha mocidade talentosa e creativa. Un enxeño que manifestan cada vez que teñen a ocasión de facelo, como no caso doutro certame impulsado pola Xunta como é Xuventude Crea.
No acto de entrega, que tivo lugar como de costume do Pazo de San Roque, tamén estiveron presentes membros do xurado do certame, así como das respectivas consellerías implicadas. Ademais, os gañadores, que puideron recitar os seus poemas aos asistentes, estiveron arroupadas polos seus familiares e amigos.

Os dous primeiros premiados de cada unha destas categorías reciben unha tableta, os segundos un libro electrónico e os terceiros uns cascos sen fíos. Ademais, recollen un lote de libros e un diploma acreditativo do certame.

Tanto as mensaxes gañadoras como as finalistas pode consultarse no Portal da Lingua Galega e na páxina web de Xuventude, así como nos Instagram de @XuventudeGalicia e @LinguaGalega

Promover a creatividade en galego na mocidade
Cada ano, arredor de San Valentín convocase este certame que promove o uso do galego ao tempo que permite amosar o talento literario e a creatividade da mocidade arredor do amor e das relacións persoais.