En portada (1151)
Un total de 7 grupos e asociacións xuvenís da provincia de Lugo participaron no programa da Xunta ‘Iniciativa Xove’
O director xeral de Xuventude e Voluntariado, Ovidio Rodeiro, reuniuse hoxe cos concelleiros da zona centro e sur de Lugo co obxectivo de impulsar as políticas de mocidade
A temática destes sete proxectos foi moi diversa, pasando por accións de difusión do xadrez á utilización do surf con nenos e nenas con autismo
As asociacións e entidades procedían de As Nogais, Sarria, Viveiro e Lugo capital (con 4 grupos)
Na zona centro e sur de Lugo hai un total de 340 establecementos adheridos ao carné xove e 3.286 usuarios
Un total de 7 grupos informais e asociacións xuvenís da provincia de Lugo participaron en 2012 no programa “Iniciativa Xove”, un proxecto que ten como obxectivo apoiar proxectos liderados, executados e protagonizados por grupos de mozos e mozas. Esta liña de actuación disporá en 2013 de 730.000 euros para toda Galicia, un 3,5 por cento máis que en 2012.
Os beneficiarios procedían de As Nogais, Sarria, Viveiro e Lugo capital (con catro grupos). Todos os proxectos que presentaron foron de temática moi diversa, e centráronse desde en accións de difusión do xadrez ata na utilización do surf con nenos e nenas con autismo.
Así o salientou hoxe o director xeral de Xuventude e Voluntariado, Ovidio Rodeiro, que se reuniu cos concelleiros da zona centro e sur de Lugo co obxectivo de impulsar as políticas de mocidade na provincia, así como para promover os distintos programas e recursos que ten a Consellería de Traballo e Benestar.
Unha das iniciativas que salientou durante a súa xuntanza foi o do Carné Xove. Neste sentido, informou de que nestas dúas zonas de Lugo hai un total de 340 establecementos adheridos e contan con 3.286 usuarios.
Tamén puxo en valor os cursos do servizo Quérote +, que ofrecen formación en distintos centros sobre conflitos de imaxe corporal, seguridade nas redes sociais, sexualidade, consumo de drogas ou bullying. Durante o ano pasado, un total de 24 centros destas dúas zonas dispuxeron destes cursos.
Rodeiro destacou tamén a importancia da incorporación da mocidade a labores voluntarias, a través do programa de Voluntariado Xuvenil. A meta é incorporar un total de 3.000 mozos e mozas a proxectos voluntarios de asociacións e concellos, cun orzamento de 440.500 euros. En 2012, participaron nesta iniciativa un total de 7 concellos da provincia (Mondoñedo, Sarria, Piñor, Viveiro, Quiroga, Rábade e Guitiriz).
Por último, informou tamén doutros programas como o Galeuropa de mobilidade xuvenil, o Xuventude en acción, as axudas para o mantemento das oficinas municipais de información xuvenil, a campaña de verán ou o plan de formación.
Beatriz Mato e Diego Calvo participaron hoxe na Coruña na semifinal da cuarta edición desta iniciativa posta en marcha pola Dirección Xeral de Xuventude e Voluntariado
Parlamento Xove é unha competición de debate, a maior de toda España, na que os equipos representantes de centros educativos de toda Galicia empregan a oratoria para defender un determinado posicionamento acerca dun tema proposto pola organización
A titular de Benestar subliñou que “nun momento como o actual, cunha situación económica tan adversa, e no que moitas persoas o están a pasar realmente mal, é importante que a sociedade non perda confianza nas institucións que nos representan”
Mato opinou que para os participantes non só é importante convencer coa retórica, senón tamén que sexan capaces de escoitar a aqueles que opinan distinto
A conselleira de Traballo e Benestar, Beatriz Mato, destacou que o programa Parlamento Xove permite aos mozos e mozas que se involucren na construción dunha sociedade máis tolerante e respectuosa, ao tempo que fortalece a súa capacidade de diálogo e axuda a que crezan no emprego de mecanismos democráticos.
Beatriz Mato participou hoxe na Coruña na semifinal da cuarta edición desta iniciativa posta en marcha pola Dirección Xeral de Xuventude e Voluntariado, dependente do departamento autonómico. O acto contou coa presenza do presidente da Deputación Provincial da Coruña, Diego Calvo. Hoxe debateron 24 equipos de 18 centros de ensino de 1º e 2º curso de Bacharelato, dos que 8 serán os que debaterán na fase final que descorrerá o 5 e 6 de abril no Salón do Pleno do Parlamento de Galicia.
En concreto os participantes foron o IES Alfonso X O Sabio (Cambre), IES Virxe do Mar (Noia), IES As Barxas (Moaña), Colexio La Salle (Santiago), IES Cidade de Antioquía (Xinzo de Limia), Colexio Divina Pastora (Ourense), IES A Pinguela (Monforte), IES Monte Castelo (Burela), IES Pintor Colmeiro (Silleda), IES de Melide, Colexio Internacional Sek Atlántico (Poio), IES de Fene e IES de Foz; IES Valle Inclán (Pontevedra), IES Becerreá, Colexio Galem (Lugo), IES Laxeiro (Lalín) e IES de Mugardos.
A titular de Benestar subliñou que “nun momento como o actual, cunha situación económica tan adversa, e no que moitas persoas o están a pasar realmente mal, é importante que a sociedade non perda confianza nas institucións que nos representan”.
Unha desas institucións é o Parlamento, que non só representa aos 75 deputados que o compoñen, senón a toda a sociedade. Trátase dun lugar “para o debate, para chegar a acordos que defendan os dereitos dos galegos e permitan crear novas oportunidades e mellorar a calidade de vida de todos”.
Neste sentido, Beatriz Mato opinou que para os participantes do Parlamento Xove non só é importante convencer coa retórica, senón tamén que sexan capaces de escoitar a aqueles que opinan distinto, prestar atención aos que defenden unha postura contraria e atopar os puntos que unen, máis que afondar naqueles que separan.
Mato engadiu que é preciso que desde os poderes públicos se estimule a participación da mocidade na sociedade, e que se lles outorguen responsabilidades e capacidade de decisión.
Parlamento Xove é unha competición de debate, a maior de toda España, na que os equipos representantes de centros educativos de toda Galicia empregan a oratoria para defender un determinado posicionamento acerca dun tema proposto pola organización. Os participantes de cada equipo (formado por catro alumnos e un profesor) investigan, escriben e, finalmente, debaten sobre o tema proposto, incluíndose tamén a elaboración de artigos en blog e a realización dun dossier de investigación.
Nesta edición a temática elixida é o consumo responsable entre a xuventude e así os debates preliminares xirarán sobre a interrogante: ‘Está a servir a crise económica global para que a xuventude tome conciencia dun consumo responsable?’.
En canto aos premios, o gañador de categoría de Educación Secundaria disfrutará dunha semana de multiaventura e actividades culturais no centro LUG II, dependente da Consellería de Traballo e Benestar. E o equipo gañador de Bacharelato terá como premio unha viaxe valorada en 5.000 euros.
O director xeral de Xuventude e Voluntariado, Ovidio Rodeiro, reuniuse hoxe con concelleiros das dúas zonas para impulsar políticas de mocidade e presentou a programación do Espazo Xove de Lalín
As entidades e grupos informais proceden dos concellos de Cercedo, A Estrada, Lalín, Silleda e Vila de Cruces
Estas asociacións realizaron, entre outros, tres intercambios multilaterais e un proxecto para crear unha rede de capitais europeas da xuventude
Nestas dúas bisbarras, hai un total de 826 carnés xove en vigor e 56 establecementos adheridos
No Espazo Xove de Lalín, destacan, entre outras, actividades como cursos de alemán ou inglés, obradoiros de debuxo e teatro, ou xornadas de xogos tradicionais
Un total de catro grupos empregan o local de ensaio desta instalación
Un total de 11 asociacións e grupos informais das comarcas de Deza e Terra de Montes participaron ao longo de 2012 nos programas Iniciativa Xove e o proxecto europeo Xuventude en Acción.
Así o destacou hoxe en Lalín o director xeral de Xuventude e Voluntariado, Ovidio Rodeiro, quen resaltou que este feito amosa un “importante desenvolvemento do tecido asociativo nestas dúas bisbarras”.
En canto ao programa Iniciativa Xove, recibiron financiamento un total de 7 asociacións e grupos informais de Cercedo, A Estrada, Vila de Cruces, Lalín (2) ou Silleda (2), que xestionaron en conxunto máis de 27.000 euros. Os proxectos que presentaron e levaron a cabo centráronse na organización dun verán cultural, no fomento do deporte ou na creación dunha rota de sendeirismo, entre outros.
Ao respecto do programa europeo Xuventude en Acción, foron 4 as entidades que participaron: tres de Lalín e unha de Vila de Cruces. Estes proxectos permitiron realizar tres intercambio multilaterais e poñer en marcha un proxecto para crear unha rede de capitais europeas da xuventude. Xestionaron en total preto de 60.000 euros.
Durante a xuntanza que mantivo hoxe o responsable autonómico con concelleiros da zona, animou aos gobernos locais a seguir difundindo tanto estes programas como outros destinados á mocidade e a continuar impulsando e coordinando estas políticas.
Entre elas, destacou a promoción do Carné Xove. Actualmente, nestas dúas comarcas hai un total de 826 carnés en vigor e 56 establecementos adheridos. O maior índice de penetración do Carné Xove entre a poboación xuvenil das zonas rexístrase en Focarei e na Estrada.
Na visita, tamén se presentou a programación do Espazo Xove de Lalín para este ano, unha instalación que se ocupa de ofrecer información xuvenil e asesoramento a mozos e mozas en materia de emprego, saídas académicas e profesionais, bolsas e axudas, ou ocio e tempo libre.
No primeiro trimestre, as actividades previstas son un taller de automaquillaxe, un obradoiro do día do pai, e actividades de maxia e xogos en inglés. Tamén se organizará un curso de alemán para persoas de entre 20 e 35 anos, que se pretende que se alongue durante todo o ano para que sexa efectivo.
No segundo trimestre, realizarase un taller día da nai, outro de repostería e un de risoterapia. Tamén haberá actividades sobre alimentación e nutrición; ou sobre o mal uso das redes sociais, así como un curso sobre técnicas para buscar emprego.
Xa no terceiro trimestre do ano, coincidindo coa tempada estival, realizaranse xornadas de xogos tradicionais destinados aos nenos e nenas de ata 15 anos, e cursos relacionados coas tecnoloxías e elaboración de páxinas web. Ademais, haberá dúas actividades formativas sobre información xuvenil especializada na área de educación –dirixido ao persoal da Rede galega de información e documentación xuvenil e universitarios- e outro curso sobre a elaboración de proxectos de animación sociocultural e turística para mozos e mozas de 18 a 30 anos.
Nos últimos meses de ano, está previsto, entre outras actividades, un taller sobre a prevención de hábitos nocivos, dirixido a mozos de entre 14 e 16 anos, e un curso de desenvolvemento persoal a través de coaching.
A todas estas actividades súmanse outras que se realizarán ao longo de todo o curso escolar como o taller de pintura e dibuxo ou o de teatro.
Por último cabe destacar que actualmente hai catro grupo que empregan o local de ensaios que existe neste instalación.
O prazo de inscrición para participar neste procedemento de acreditación será do 1 ao 31 de marzo de 2013
Rogelio Martínez asistiu á xornada celebrada no Espazo Xove de Ourense para informar sobre este proceso
Máis de 70 persoas na provincia de Ourense poderán acceder á certificación oficial de informador xuvenil, pioneira en España. A Consellería de Traballo e Benestar,a través da Dirección Xeral de Formación e Colocación, publicou no DOG do 16 de novembro de 2012 a convocatoria do procedemento de recoñecemento das competencias profesionais para os informadores xuvenís. Deste xeito, Galicia convértese na primeira Comunidade do Estado que lle vai a facilitar aos técnicos da información xuvenil a posibilidade de obter un certificado de profesionalidade.
O delegado territorial da Xunta en Ourense, Rogelio Martínez, achegouse esta mañá ao Espazo Xove da cidade das Burgas para participar na xornada que este departamento autonómico organizou para informar sobre o procedemento de asesoramento e avaliación a todos os informadores xuvenís, e aquelas persoas que reúnan os requisitos. No acto estivo acompañado polo xefe territorial de Traballo e Benestar, José Selas.
A cualificación profesional de informador xuvenil recoñeceuse no Catálogo Nacional de Cualificacións Profesionais, dentro da familia profesional de servizos socioculturais e á comunidade, que se publicou no BOE do 9 de maio de 2011.
Con este procedemento de recoñecemento de competencias profesionais Galicia convértese na primeira Comunidade Autónoma en ofrecerlle a posibilidade aos técnicos que levan máis de tres anos de profesión, cun mínimo de 2.000 horas traballadas en total nos últimos 10 anos de obter o certificado de profesionalidade a través da acreditación das súas competencias adquiridas pola súa experiencia laboral ou pola formación obtida a través da educación non formal (xustificaranse polo menos 300 horas nos últimos 10 anos).
A Rede Galega de Información Xuvenil está formada polas 244 oficinas municipais de información xuvenil dependentes dos concellos, os 56 puntos de información xuvenil dependentes de asociacións, os 12 Espazo Xove autonómicos e o Centro Coordinador de Información e Documentación Xuvenil.
Ourense representa o 22,33% destes Servizos de Información Xuvenil, con 59 OMIX e 8 puntos de información xuvenil, así como o Espazo Xove de Ourense. Deste xeito, Rogelio Martínez salientou que “con esta iniciativa, na provincia de Ourense, se poderán beneficiar desta medida máis de setenta informadores xuvenís”.
Neste procedemento poderán obter o certificado de profesionalidade as persoas que acrediten as catro unidades de competencia das que consta. Os técnicos que non poidan completar o proceso poderán obter unha acreditación parcial, podendo posteriormente adquirir as outras. O prazo de inscrición para participar neste procedemento prolongarase durante o vindeiro mes de marzo.
Máis de 300 persoas poderán acceder en Galicia á certificación oficial de informador xuvenil, pioneira en España
A Consellería de Traballo e Benestar organiza seis xornadas en diferentes cidades de Galicia para informar sobre este proceso
En concreto, hoxe ás 18,00 horas e mañá ás 11,00 horas terá lugar no centro coordinador de Santiago; o 28 de febreiro no Espazo Xove de Ourense; o 1 de marzo ás 11,30 horas no Centro LUG I de Lugo e no Espazo Xove de Vilagarcía; e o 14 de marzo ás 11,30 horas na Delegación Territorial de Vigo
O prazo de inscrición para participar neste procedemento de acreditación será do 1 ao 31 de marzo de 2013
Máis de 300 persoas poderán acceder á certificación oficial de informador xuvenil, pioneira en España. Neste senso, a Consellería de Traballo e Benestar organiza seis xornadas en diferentes cidades de Galicia para informar sobre este procedemento.
O departamento autonómico publicou no DOG do 16 de novembro de 2012 a convocatoria do procedemento de recoñecemento das competencias profesionais para os informadores xuvenís. Galicia é a primeira Comunidade do Estado que lle vai a facilitar aos técnicos da información xuvenil a posibilidade de obter un certificado de profesionalidade.
A Consellería está a levar a cabo xornadas informativas nos distintos Espazos Xove, co obxecto de facilitar información sobre o procedemento de asesoramento e avaliación a todos os informadores xuvenís, e aquelas persoas que reúnan os requisitos.
En concreto, hoxe ás 18,00 horas e mañá ás 11,00 horas terá lugar no centro coordinador de Santiago; o 28 de febreiro no Espazo Xove de Ourense; o 1 de marzo ás 11,30 horas no Centro LUG I de Lugo e no Espazo Xove de Vilagarcía; e o 14 de marzo ás 11,30 horas na Delegación Territorial de Vigo.
A Rede Galega de Información Xuvenil está formada polas 244 oficinas municipais de información xuvenil dependentes dos concellos, os 56 puntos de información xuvenil dependentes de asociacións, os 12 Espazo Xove autonómicos e o Centro Coordinador de Información e Documentación Xuvenil.
A cualificación profesional de informador xuvenil recoñeceuse no Catálogo Nacional de Cualificacións Profesionais, dentro da familia profesional de servizos socioculturais e á comunidade, que se publicou no BOE do 9 de maio de 2011.
Con este procedemento de recoñecemento de competencias profesionais Galicia convértese na primeira Comunidade Autónoma en ofrecerlle a posibilidade aos técnicos que levan máis de tres anos de profesión, cun mínimo de 2.000 horas traballadas en total nos últimos 10 anos de obter o certificado de profesionalidade a través da acreditación das súas competencias adquiridas pola súa experiencia laboral ou pola formación obtida a través da educación non formal (xustificaranse polo menos 300 horas nos últimos 10 anos).
Neste procedemento poderán obter o certificado de profesionalidade as persoas que acrediten as catro unidades de competencia das que consta. Os técnicos que non poidan completar o proceso poderán obter unha acreditación parcial, podendo posteriormente adquirir as outras. O prazo de inscrición para participar neste procedemento será do 1 ao 31 de marzo de 2013.
O director xeral de Xuventude e Voluntariado, Ovidio Rodeiro, mantivo hoxe unha xuntanza de traballo con concelleiros da zona no Espazo Xove de Carballo
Ademais, durante a súa visita expuxo a programación do centro para este ano
A instalación ofrecerá seis cursos que chegarán a preto de 250 mozos e mozas
Tamén se organizarán actividades de lecer entre as que se inclúen ballet, danza moderna baile galego e de salón, pintura e debuxo e ioga
Acollerá obradoiros do servizo Quérote+, que se centrarán nas relacións afectivo-sexuais, a imaxe persoal, a prevención da drogodependencia ou o uso seguro das redes sociais
As comarcas de Bergantiños e Terras de Soneira contan con preto de 700 usuarios do carné xove e cun total de 18 establecementos adheridos.
Así o destacou hoxe o director xeral de Xuventude e Voluntariado, Ovidio Rodeiro, que mantivo unha xuntanza de traballo con concelleiros destas dúas bisbarras no Espazo Xove de Carballo. Ademais, durante a súa visita anunciou tamén a programación deste centro para o ano 2013.
Ao longo da reunión, Rodeiro destacou que a promoción do carné xove vai ser un dos obxectivos para os próximos anos. Ademais, tamén abordou outros programas da área da mocidade, como o Iniciativa Xove, Xuventude en acción ou Voluntariado Xuvenil.
Sobre Iniciativa Xove, destacou que disporá de 730.000 euros para proxectos en toda Galicia, un 3,5 por cento máis que en 2012. Precisou tamén que o programa europeo Xuventude en acción priorizará este ano os proxectos que traten os temas de desemprego xuvenil, iniciativa da mocidade ou creatividade.
Polo que se refire ao Voluntariado Xuvenil, a meta este ano é que un total de 3.000 mozos e mozas se sumen aos proxectos voluntarios de asociacións e concellos. Conta cun orzamento de 440.500 euros.
Rodeiro adiantou tamén a programación do Espazo Xove de Carballo, unha instalación que forma parte da rede 12 centros xuvenís que hai en Galicia xunto con Lalín, Vilagarcía, Tui, Vilalba, Viveiro, Chantada, Betanzos, Curtis, Ourense, Noia e Pontedeume.
Ao longo deste ano, o Espazo Xove ofrecerá un total de 6 cursos de educación non formal para a mocidade, que sumarán máis de 450 horas lectivas e poderán chegar ata 250 mozos e mozas. Serán de carácter gratuíto e semipresenciais. Entre eles, destacan o de “animación cultural”, “desenvolvemento comunitario” ou o “teórico de monitor sociocultural”.
Ademais, neste centro tamén se realizarán obradoiros do servizo Quérote+, que se centrarán nas relacións afectivo-sexuais, a imaxe persoal, a prevención da drogodependencia ou o uso seguro das redes sociais. Os técnicos deste servizo prestarán atención os xoves aos mozos e mozas que demanden asesoramento nestas temáticas, sempre individualmente e garantindo a confidencialidade.
A estas actividades, súmanse as de lecer, moitas en colaboración con asociacións xuvenís. Entre elas, inclúense ballet, danza moderna, baile galego, bailes de salón, pintura, debuxo e ioga.
O Espazo Xove de Carballo realiza tamén os trámites para a obtención de carnés para a mocidade como o ISIC, Teacher, Alberguista ou carné xove. Tan só no 2012 expedíronse nestas instalacións 400 destes documentos.
Entre outras, haberá actividades de lingua de signos, de acompañamento a vítimas de violencia de xénero, de emprendemento ou de idiomas como o chinés
Nesta edición 2013 os participantes terán a súa disposición un conxunto de accións enfocadas todas elas á adquisición de coñecementos, reciclaxe e actualización das distintas temáticas que se van abordar nos diferentes cursos
Destaca tamén pola conxugación das metodoloxías das clases presenciais, semipresenciais e a distancia
O Plan de Formación da Dirección Xeral de Xuventude e Voluntariado, dependente da Consellería de Traballo e Benestar, constará este ano de 153 cursos de diferentes temáticas que beneficiarán a máis de 18.000 persoas, con máis de 7.000 horas de formación non formal. Isto supón un incremento de preto de 5.800 beneficiarios con respecto a 2012.
Os cursos de formación divídense nas áreas de xuventude e voluntariado. En xuventude o número de horas pasa de 1.249 a 6.638, e de 37 cursos de formación a 128; mentres que no eido do voluntariado case se duplica o número de horas e de persoas que poden beneficiarse desta formación. Programáronse para o 2013 un total de 25 cursos, dos cales cinco son presenciais e 20 en liña. Isto supón 624 horas de formación, e chegar a 14.325 persoas.
No ámbito de voluntariado, haberá cursos de lingua de signos, de acompañamento a vítimas de violencia de xénero, voluntariado ambiental o para persoas maiores, entre outras. No eido de lecer e tempo libre será de animación á lectura, dinamización do asociacionismo, ou novas tecnoloxías.
Desde a Rede Galega de Información e Documentación Xuvenil organizarase un curso de chinés, emprendemento e creación de autoemprego, animación e xestión cultural ou organización de accións socioeducativas. Mentres, os centros Quérote + acollerán cursos de mediación familiar e escolar, de diversidade funcional ou de intervención afectivo-sexual coa mocidade.
Doutra banda, os Espazo Xove de Betanzos, Carballo, Chantada, Curtis, Lalín, Noia, Ourense, Tui, Vilagarcía de Arousa, Vilalba, Viveiro ou Pontedeume terán tamén actividades formativas de idiomas, monitor sociocultural ou recoñecemento de competencias de información xuvenil.
Para o departamento autonómico a educación non formal é unha parte fundamental da formación integral dos mozos e mozas, xa que permite adquirir e asimilar valores, normas de vida, opinións e coñecementos que facilitan a participación na sociedade.
Nesta edición 2013 os técnicos de xuventude, a mocidade galega e os voluntarios terán a súa disposición un conxunto de accións formativas enfocadas todas elas á adquisición de coñecementos, reciclaxe e actualización das distintas temáticas que se van abordar nos diferentes cursos.
Este Plan Formativo 2013, destaca tamén pola conxugación das metodoloxías das clases presenciais, semipresenciais e a distancia. Estas últimas modalidades facilitan o acceso á formación a todos os mozos e mozas que debido ás barreiras xeográficas, de traballo ou de conciliación familiar, non poden asistir aos cursos na modalidade presencial, ao mesmo tempo que a modalidade teleformación, semipresencial e a distancia permiten ofrecer máis formación a un menor custo.
Os distintos cursos do Plan de Formación Xuventude 2013 incrementarán as potencialidades e competencias dos técnicos e mozos e mozas que os realicen, favorecendo o seu desenvolvemento persoal e posibilitándolles aumentar o seu currículo e maiores oportunidades de acceso a un emprego.
Preto de 7.500 mozos e mozas de Arousa, Pontevedra e Caldas son usuarios do Carné Xove de Benestar
O director xeral de Xuventude e Voluntariado, Ovidio Rodeiro, mantivo hoxe un encontro cos concelleiros da área de Arousa, Pontevedra e Caldas
A xuntanza tivo lugar no Espazo Xove de Vilagarcía, que ofrece información xuvenil e asesoramento aos mozos en materias como emprego, saídas académicas e profesional, bolsas e axudas ou ocio e tempo libre
Ovidio Rodeiro informou de que o programa Iniciativa Xove impulsou nestas comarcas un total de 10 proxectos, a través de asociacións e grupos informais xuvenís, cun orzamento de 37.150 euros
Preto de 7.500 mozos e mozas dos concellos das comarcas de Pontevedra, Arousa e Caldas contan xa co Carne Xove expedido pola Dirección Xeral de Xuventude e Voluntariado da Consellería de Traballo e Benestar.
Así o indicou hoxe o director xeral de Xuventude e Voluntariado, Ovidio Rodeiro, que mantivo unha xuntanza cos concelleiros da área de Arousa, Pontevedra e Caldas. A xuntanza cos concelleiros tivo lugar no Espazo Xove de Vilagarcía, unha instalación do departamento autonómico que ofrece información xuvenil e asesoramento aos mozos da zona en materias como emprego, saídas académicas e profesional, bolsas e axudas ou ocio e tempo libre.
Neste centro precisamente realízase o trámite para a obtención do Carné Xove, así como o dos carnés de Estudante Internacional, Teacher ou Alberguista, dos que se emitiron en 2012 un total de 614.
Doutra banda, Ovidio Rodeiro informou de que o programa Iniciativa Xove, dependente da Consellería de Traballo e Benestar, impulsou un total de 10 proxectos, a través de asociacións e grupos informais xuvenís, nestas comarcas. Para promover estas actividades, investíronse 37.150 euros.
En concreto, os dez proxectos financiados por Iniciativa Xove correspóndense con grupos e asociacións dos concellos de Cotobade, Pontevedra, Poio, Ribadumia, Sanxenxo, Valga e Vilagarcía. As iniciativas presentadas centrábanse en temas como a música, a horticultura ou asuntos históricos.
Ademais un total de 39 mozos e mozas destas comarcas participaron entre 2010 e 2012 en programas de mobilidade da Consellería, tales como Galeuropa, unha orde pola que se convocan axudas para prácticas laborais non remuneradas, que se realizan en empresas de países da Unión Europea.
No decurso da reunión tamén se presentou a programación para 2013 deste centro. O Espazo Xove de Vilagarcía contará en 2013 con actividades de carácter formativo, así como de lecer e tempo libre.
As actividades de lecer realízanse a maioría en colaboración coas asociacións xuvenís e outras entidades da comarca. Entre estas destaca a participación na Liga Galega de Xadrez dos asistentes aos cursos que se imparten no centro. Tamén se organizan talleres e obradoiros de coiro, bisutería, reciclado de aceites para xabón, pintura ou cerámica, así como cursos e actividades relacionadas coa informática, xa que o centro conta cunha aula dotada con once ordenadores e wifi libre.
Entre as accións formativas programadas para 2013 destacan un curso de elaboración de proxectos de animación sociocultural e turística, outro de animación cultural, un seminario para a elaboración de proxectos de animación sociocultural e turística e outro de animación de lecer e tempo libre.
Cada un dos cursos que se ofertan no Espazo Xove de Vilagarcía contarán con 25 prazas, serán gratuítos e impartiranse en modalidade semipresencial. Os interesados poderán inscribirse a través da páxina http://xuventude.xunta.es.
Benestar organiza unha nova edición do Parlamento Xove cun debate sobre consumo responsable no Pazo de Mariñán
Trátase dun proxecto que pretende potenciar o diálogo como ferramenta para argumentar as ideas propias entre a mocidade galega
Hoxe terá lugar o debate da fase preliminar para o grupo de Educación Secundaria (ESO) e o 2 de marzo será a quenda dos estudantes de Bacharelato
Parlamento Xove é unha competición de debate, a maior de toda España, na que os equipos representantes de centros educativos de toda Galicia empregan a oratoria para defender un determinado posicionamento acerca dun tema proposto pola organización
O equipo gañador de ESO terá como premio unha semana de multiaventura e actividades culturais no centro LUG II, dependente da Consellería de Traballo e Benestar
A Dirección Xeral de Xuventude e Voluntariado, dependente da Consellería de Traballo e Benestar, organiza hoxe unha nova edición do Parlamento Xove cun debate sobre consumo responsable entre a mocidade, que terá lugar no Pazo de Mariñán, en Bergondo (A Coruña).
Trátase dun proxecto que pretende potenciar o diálogo como ferramenta para argumentar as ideas propias entre a mocidade galega. Hoxe terá lugar o debate para o grupo de Educación Secundaria (ESO) e o 2 de marzo será a quenda dos estudantes de Bacharelato.
Parlamento Xove é unha competición de debate, a maior de toda España, na que os equipos representantes de centros educativos de toda Galicia empregan a oratoria para defender un determinado posicionamento acerca dun tema proposto pola organización. Os participantes de cada equipo (formado por catro alumnos e un profesor) investigarán, escribirán e, finalmente, debaterán sobre o tema proposto, incluíndose tamén a elaboración de artigos en blog e a realización dun dossier de investigación.
Nesta edición a temática elixida é o consumo responsable entre a xuventude e así os debates preliminares xirarán sobre a interrogante: ‘Está a servir a crise económica global para que a xuventude tome conciencia dun consumo responsable?’.
A dificultade da actividade está en que só cinco minutos antes de cada encontro dialéctico se procede ao sorteo da postura a adoptar por cada equipo, “a favor” ou “en contra”, en relación a cuestión formulada. Os equipos levaron a cabo unha labor de investigación previa e despois contrapoñen e discuten datos e ideas.
Ante o elevado número de centros participantes, a Dirección Xeral de Xuventude e Voluntariado decidiu incrementar a duración total da actividade e facer dúas categorías diferenciadas por idades, ampliando o tramo educativo: unha para alumnado de 3º e 4º da ESO e outra para o de 1º e 2º de Bacharelato. Esta última terá dúas fases.
Na competición relativa á categoría de ESO, que celebra os debates hoxe no Pazo de Mariñán, participarán 16 equipos dos seguintes centros educativos: IES Ramón Menéndez Pidal (A Coruña), IES Alfonso X O Sabio (Cambre), IES Melide, CPI Conde Fenosa (Ares), IES Porto do Son, IES Saturnino Montojo (Ferrol), IES Mugardos, CPI Vicente Otero Barcalcel (Lugo), IES Nosa Señora dos Ollos Grandes (Lugo). IES montecastelo (Burela), IES A Pinguela (Monforte de Lemos), Colexio Internacional Sek Atlántico (Poio), IES Pintor Colmeiro (Silleda), Colexio Filipense Sagrada Familia (Vilagarcía), Ies de Rodeira (Cangas) e IES Valle Inclán (Pontevedra).
O equipo gañador desta categoría terá como premio unha semana de multiaventura e actividades culturais no centro LUG II, dependente da Consellería de Traballo e Benestar.
A fase preliminar de Bacharelato terá lugar o vindeiro 2 de marzo, na Deputación da Coruña, no que debaterán 24 equipos de 1º e 2º curso, dos que 8 serán os que debaterán na fase final que descorrerá o 5 e 6 de abril no Salón do Pleno do Parlamento de Galicia.
A edición de Parlamento Xove 2013 empezou a súa andaina coa fase de formación no mes de outubro do ano anterior estendéndose ata o mes de xaneiro, formación na que que participaron un total de 56 centros educativos e na que os alumnos participantes recibiron coñecementos de oratoria enfocada ao funcionamento dos campionatos escolares de debate.
Parlamento Xove, como actividade na que participa alumnado e profesorado de centros educativos, contribúe ao desenvolvemento de practicamente todas as competencias básicas: competencia lingüística, nos seus catro ámbitos (expresión oral e escrita; e compresión oral e escrita): Competencia matemática: en todos os debates manexan datos e porcentaxes que avalan a súa argumentación. Tratamento da información e competencia dixital. Competencia social e cidadá: contribúe á convivencia dado que o traballo realízase en equipo. Competencia cultural e artística: nos debates esíxese o emprego de figuras estilísticas e capacidade de retórica. E competencia para aprender a aprender e iniciativa persoal
O director xeral de Xuventude e Voluntariado, Ovidio Rodeiro, participou hoxe na presentación de actividades do Espazo Xove de Pontedeume e reuniuse con concelleiros das comarcas de Ferrol, Eume e Ortegal
As seis actividades que obtiveron financiamento son de entidades e grupos dos concellos de Cabanas, Fene, Ferrol, Narón, Ortigueira e Pontedeume
Nestas tres comarcas, hai actualmente preto de 2.400 usuarios do carné xove e 155 establecementos adheridos
Con respecto á programación do Espazo Xove de Pontedeume, destácase os cursos gratuítos de inglés ou de animación cultural e de lecer
O programa Iniciativa Xove, dependente da Consellería de Traballo e Benestar, impulsou un total de seis proxectos, a través de asociacións e grupos informais xuvenís, nas comarcas de Eume, Ferrol e Ortegal. Para promover estas actividades, investíronse 24.000 euros.
O director xeral de Xuventude e Voluntariado, Ovidio Rodeiro, participou hoxe na presentación da programación para 2013 do Espazo Xove de Pontedeume e, posteriormente, reuniuse con concelleiros das tres comarcas para facer balance e avaliar as liñas estratéxicas en materia xuvenil de cara este ano.
En concreto, os seis proxectos financiados por Iniciativa Xove correspóndense con grupos e asociacións dos concellos de Cabanas, Fene, Ferrol, Narón, Ortigueira e Pontedeume. As iniciativas presentadas centrábanse en temas como a música, ruta de sendeirismo, ou asuntos históricos.
Rodeiro destacou tamén que nestas tres comarcas hai actualmente preto de 2.400 usuarios do carné xove e un total de 155 establecementos adheridos.
Con respecto ao Espazo Xove de Pontedeume, cabe destacar que esta instalación ofrece información xuvenil e asesoramento aos mozos e mozas da zona en materias como o emprego, saídas académicas e profesionais, bolsas e axudas, ou ocio e tempo e libre. Ademais, neste centro realízase tamén o trámite para a obtención do Carné Xove, ou os carnés de Estudante Internacional, Teacher ou Alberguista.
De luns a sábado lévanse a cabo actividades como teatro, artes plásticas, pilates, danza do ventre, hip hop, bailes latinos ou guitarra. Ademais, tamén hai formación relacionada coa informática, xa que o espazo conta cunha aula dotada con dez ordenadores e wifi libre.
Entre as accións formativas previstas para 2013, destaca un curso de inglés para a mocidade de 160 horas; un obradoiro para a elaboración de proxectos de animación sociocultural e turística; e un curso de animación cultural e outro de animación de lecer e tempo libre.
Cada un dos cursos contará con 25 prazas, serán gratuítos, e impartiranse en modalidade semipresencial.
O Espazo Xove disporá tamén da presenza o mércores de persoal técnico do servizo Quérote +, que informará e asesorará en temáticas xuvenís como as relacións afectivo-sexuais, a imaxe persoal, o uso seguro de internet ou a resolución de conflitos. A atención profesional é individual e garante en todo momento a confidencialidade.
Por último, adiantouse que o centro ten previsto organizar tres exposicións nas súas instalacións sobre “o movemento asociativo xuvenil no Espazo Xove de Pontedeume”, “o dereito á información da mocidade”, e “obras gañadoras de artes plásticas do certame Xuventude Crea”.