En portada (1167)
A Dirección Xeral de Xuventude e Voluntariado, a través do servizo Quérote +, desenvolveu ao longo de 2011 un total de 76 programas en materia afectivo sexual dos que se beneficiaron máis de 550 persoas con diversidade funcional. O responsable da área autonómica, Ovidio Rodeiro, presentou hoxe, Día Europeo da Saúde Sexual, un balance das actuacións levadas a cabo neste ámbito, xunto co presidente de Cogami, Anxo Queiruga, e o de Down Galicia, Delmiro Prieto.
Rodeiro apuntou que a través destas iniciativas se está a ofertar un servizo que facilita a este colectivo unha resposta as súa dúbidas e inquedanzas. Explicou que no caso concreto de Cogami, a Dirección Xeral leva 3 anos consecutivos realizando o programa ‘Afectividade e Autocoñecemento’ en varios dos centros que esta entidade ten en Galicia.
A través desta actuación, trabállase de forma grupal aspectos relacionados coa convivencia, a imaxe corporal, a sexualidade e a afectividade. Rodeiro apuntou que este ano incluirase dentro deste programa unha novidade para que os usuarios dispoñan dun espazo individualizado para que, unha vez realizadas as accións formativas, poidan resolver dúbidas ou curiosidades que non se desexan poñer en común no grupo. “Neste espazo de asesoramento garantirase, polo tanto, a confidencialidade”, incidiu o director xeral.
Con respecto ás accións que se desenvolven nos centros de Down Galicia, Rodeiro resaltou que a partir deste ano comezarase a desenvolver o programa integral ‘Vivíndonos na Diversidade’, no que se traballará cos mozos e mozas, cos profesionais que os atenden e coas propias familias.
Ademais, colaborarase cos equipos de Down Galicia para elaborar actividades o máis adaptadas aos grupos que xurdan. “Ademais está prevista unha publicación posterior destas actuacións para que poida ser de utilidade para futuros equipos profesionais”, subliñou.
“No novo programa recóllense as demandas das propias entidades coa finalidade de facilitar aos equipos profesionais ferramentas para a abordaxe da información e o asesoramento en materia de afectividade e sexualidade”, apuntou.
Así mesmo, Ovidio Rodeiro explicou que o servizo Quérote + tamén realiza accións neste ámbito con outras entidades como Feafes, Aspanemi, Aspromor, Aspronaga, Camp, Aspanaes ou a Federación de Asociacións de Xordos de Galicia.
Neste senso, afirmou que o obxectivo para este ano é o de seguir a colaborar con todas estas entidades. “Ampliaremos as liñas de traballo para poder ofrecer programas e talleres que tamén aborden outras cuestións de interese para estes mozos e mozas, como a convivencia e a imaxe corporal”, asegurou.
Por último, o director xeral afirmou que “o balance non pode ser máis que positivo, xa que cada ano son máis as entidades que queren contar co noso apoio para a implementación dun programa deste tipo” e concluíu reiterando que en 2012 seguirase a colaborar con todas aquelas entidades de persoas con diversidade funcional que o demanden para poñer o equipo técnico de Xuventude a súa disposición.
Estancia creativa para xóvenes
Estancia creativa para xóvenes: literatura. Un grupo de mozos e mozas compartiron durante tres días unha forma nova de creación literaria.
Esta fin de semana tivo lugar no Albergue Xuvenil de Gandarío (Bergondo) a estancia creativa na especialidade de literatura. Os mozos e mozas que participaron nesta fin de semana tiveron a oportunidade durante tres días de crear. A través da participación activa de todos se consegue un novo xeito de crear.
No Albergue realizaron pequenos obradoiros que espertaron a imaxinación dos participantes, pequenas dinámicas para avanzar na creación literaria: creación ambiental, creación de personaxes, creación de acción, creación a través dos sentidos, creación dende outros puntos de vista non habituais (co sentido da vista, do tacto,…).
Posteriormente activouse un obradoiro participativo e interactivo literario a través da dinamización das rúas da Coruña e de Cambre a través da literatura. O método foi a creación dun relato breve e a súa plasmación nun formato de marcapáxinas xigante e a invitación a súa lectura aos transeúntes.
Estamos a ver unha actividade moi distinta e unha dinamización moi innovadorra, definida por un participante como “literatura interactiva”
O programa Estancias creativas para xóvenes segue durante os meses de marzo a xuño en distintas especialidades. A próxima cita será o vindeiro 9 de marzo no Albergue de Gandarío para as categorías de graffiti e banda deseñada.
A Consellería de Traballo e Benestar colabora coa Universidade de Santiago no primeiro máster universitario especializado en xuventude e sociedade que se celebra en Galicia.
O director xeral de Xuventude e Voluntariado, Ovidio Rodeiro, participou hoxe como relator neste máster do que están a participar 25 alumnos e alumnas. No seu relatorio, titulado ‘Recursos e políticas públicas da xuventude en Galicia’, Rodeiro incidiu no impulso lexislativo que o Goberno galego realizou nos dos últimos anos para “modernizar, unificar e clarificar” a normativa autonómica en materia de xuventude.
Así, destacou que recentemente o Consello da Xunta aprobou a primeira Lei de Xuventude de Galicia que, segundo resaltou, garante a transversalidade e a coordinación entre os distintos departamentos da Xunta nas políticas dirixidas á mocidade. Entre outros aspectos, a normativa establece que os plans estratéxicos da Xunta sexan obrigatorios en cada lexislatura e que se tramiten como acordos no Consello da Xunta; e garante a participación dos mozos e mozas nas políticas públicas de xuventude, ao establecer un novo sistema de representación, coa incorporación e participación de todas as asociacións xuvenís no Consello Asesor e Consultivo da Xuventude de Galicia.
Rodeiro, ademais, lembrou que o pasado mes de decembro se aprobou por unanimidade no Parlamento de Galicia a Lei de Acción Voluntaria de Galicia, que lexisla a participación dos mozos e mozas en actividades de voluntariado. Con respecto a esta normativa, o director xeral resaltou a institucionalización da figura do voluntario xuvenil, xa que poderá recibir certificacións oficiais que demostren a experiencia adquirida a través da acción voluntaria.
Por último, Rodeiro referiuse á adaptación do decreto en materia de xuventude á directiva europea, que permitirá axilizar de 6 a 2 meses a tramitación de actividades vinculadas á mocidade. Neste senso, explicou que simplificaranse e flexibilizaranse os procedementos para recoñecer as distintas tipoloxías de instalacións e axilizaranse as expedicións dos títulos de monitores e directores de tempo libre, así como a homologación doutros títulos expedidos por órganos doutras comunidades autónomas ou de estados membros da Unión Europea.
A Dirección Xeral de Xuventude e Voluntariado, a través do servizo Quérote +, desenvolveu hoxe en colaboración co equipo de investigación tecnolóxica da Garda Civil un obradoiro de ciberbullying no colexio Manuel Peleteiro de Santiago con motivo do Día Mundial da Seguridade en Internet. ‘Convivencia e redes sociais’ é o título destes talleres onde se abordan os comportamentos e aptitudes para evitar casos de acoso escolar ou de acoso informático.
Trátaste dun dos 26 obradoiros deste tipo que se están a celebrar ao longo do curso escolar 2011-2012 na provincia da Coruña e que están dirixidos tanto a mozos e mozas como aos seus pais e nais. De feito, Xuventude e a Garda Civil xa realizaron 20 cursos e están pendentes a organización doutros 6 en diferentes institutos e escolas de pais e nais da provincia.
O responsable de Xuventude e Voluntariado, Ovidio Rodeiro, visitou o obradoiro celebrado no centro educativo Manuel Peleteiro co obxectivo de difundir entre os mozos e mozas a importancia de navegar con seguridade pola rede. “Con estes obradoiros queremos dotar aos alumnos da ESO das ferramentas necesarias para acadar esta seguridade tanto desde os ordenadores como desde os móbiles”, apuntou.
Rodeiro explicou, así mesmo, que a colaboración entre o servizo Quérote + e a Garda Civil xurdiu ao ser complementarios dous enfoques da seguridade en Internet. Desta forma, a Dirección Xeral de Xuventude centra o seu labor en reforzar certas habilidades e destrezas que lles axuden aos mozos e mozas a resolver os conflitos, sen que cheguen a producirse situacións máis graves.
Pola súa banda, a Garda Civil traballa desde a actuación ante situacións reais xa de conflito, é dicir, dando pautas de actuación e dando a coñecer o labor dos axentes ante este tipo de situacións. “Son polo tanto actuacións a niveis diferentes que se complementan e aportan ingredientes distintos”, subliñou Rodeiro.
Por outro lado, o director xeral de Xuventude lembrou que os obradoiros de ciberbullying non son os únicos que organiza o servizo Quérote +. Así, destacou que o curso 2011/2012 rematará coa celebración de máis de 2.300 talleres que versarán sobre tres temáticas diferentes: ‘Afectividade, sexualidade e imaxe corporal’ que aborda as problemáticas que xorden a través dos conflitos que teñan como base estas tres circunstancias; ‘Prevención de consumos’, que trata os problemas derivados das drogas e de outras substancias nocivas, poñendo en valor o ocio alternativo entre os mozos e mozas; e os centrados en ciberbullying.
No curso pasado, 2010-2011, os obradoiros de Xuventude chegaron a máis de 44.000 mozos e mozas de 243 institutos de Educación Secundaria e 178 centros de Formación Profesional, unha cifra que, segundo resaltou o director xeral, se prevé incrementar este curso poñendo a disposición de todos os centros de secundaria esta programación.
Así mesmo, Rodeiro explicou que, ademais dos centros educativos, estas iniciativas tamén se ofertan a outros colectivos como asociacións xuvenís, oficinas de información xuvenil, entidades ou ás asociacións de pais e nais dos propios colexios e institutos.
Por último, o director xeral de Xuventude sinalo que a intervención dos técnicos do servizo Quérote + realízase tanto a nivel individual como grupal. De maneira individual, a través de consultas dos usuarios, de xeito presencial nas oficias deste servizo, por medio de chamadas telefónicas ou preguntas on line. De maneira grupal, mediante accións formativas, a través das mesas informativas, da participación en congresos e eventos de interese para a mocidade e dos programas de mediación xuvenil.
- Unha das características máis salientables do anteproxecto de Lei de Xuventude de Galicia é o cambio do actual modelo de participación xuvenil cara “un verdadeiro” sistema de representación da mocidade
- O novo texto facilita a incorporación de todas as asociacións xuvenís ao Consello Asesor e Consultivo de Xuventude xa que se elimina o requisito actual polo que unha asociación non podía formar parte deste órgano sen contar co visto e prace das entidades preponderantes
- O Plan Estratéxico de Xuventude de Galicia, como instrumento de planificación plurianual, considérase un elemento de gran importancia para a toma de decisións a medio prazo e pasará a ter un carácter vinculante, xa que se deberá aprobar por acordo do Consello da Xunta
O Consello da Xunta deu hoxe luz verde ao anteproxecto de Lei de Xuventude de Galicia, que responde a unha débeda pendente coa mocidade galega, xa que desde a aprobación do Estatuto de Autonomía de Galicia no ano 1981, houbo varias tentativas de aprobar unha Lei para a xuventude, sen que chegasen a obter ningún resultado.
O anteproxecto da Lei de Xuventude de Galicia, promovido pola Consellería de Traballo e Benestar, garantirá a transversalidade administrativa das políticas da Xunta dirixidas á mocidade. O texto lexisla a acción unitaria de goberno e a coordinación dos diferentes departamentos da Administración á hora de poñer en práctica medidas que afecten á xuventude. Esta planificación das políticas de mocidade efectuarase a través da elaboración en cada lexislatura dun Plan Estratéxico de Xuventude, que pasará a ter un carácter vinculante, xa que se deberá tramitar como acordo do Consello da Xunta de Galicia.
Nesta materia, é necesario reforzar a transversalidade e coordinación das políticas públicas destinadas á xuventude. Deste xeito, o anteproxecto de Lei conta con dez eixos básicos vinculados ás directrices europeas en materia de xuventude e que deben ser potenciados a través da coordinación entre todos os axentes implicados. Estes eixos relaciónanse coa educación; emprego; creatividade e espírito emprendedor; vivenda; saúde e deporte; participación e asociacionismo; voluntariado; información e formación; mobilidade e turismo xuvenil; e normalización lingüística.
Ademais a nova Lei crea dous instrumentos que farán posible a consecución dos obxectivos de unificar a normativa e reforzar a transversalidade das políticas de mocidade: o Plan Estratéxico de Xuventude de Galicia e o Comité de Políticas de Xuventude de Galicia.
Unha das características máis salientables do anteproxecto de Lei de Xuventude de Galicia é o cambio do actual modelo de participación xuvenil cara “un verdadeiro” sistema de representación da mocidade. O texto propón a creación do Consello Asesor e Consultivo de Xuventude de Galicia, un órgano colexiado, independente e aberto a todas as asociacións xuvenís, que reforza e impulsa a participación da mocidade e da sociedade civil nos temas de interese para a xuventude.
Precisamente, o novo texto facilita a incorporación de todas as asociacións xuvenís ao Consello, xa que se elimina o requisito actual polo que unha asociación non podía formar parte deste órgano sen contar co visto e prace das entidades preponderantes. Tamén se facilita e se promove a creación dos consellos locais de xuventude, co obxectivo de achegar o novo modelo de participación e dar máis protagonismo aos concellos. As asociacións xuvenís e máis os consellos locais terán garantido con este anteproxecto unha representación de, polo menos, o 51% dos votos no Consello.
Ademais de fomentar a participación xuvenil, o anteproxecto tamén dota de máis competencias ao Consello, ao asumir este as funcións do Observatorio Galego de Xuventude, que na actualidade depende directamente da Dirección Xeral de Xuventude e Voluntariado.
O texto tamén contempla a creación da Escola Galega de Xuventude como órgano especializado na educación non formal relacionada coa mocidade. Esta escola velará polo nivel técnico das ensinanzas impartidas polas escolas de tempo libre, ademais de avaliar e conformar os cursos que impartan. Tamén elaborará a programación anual de cursos e actividades formativas para que teñan un carácter estratéxico e innovador, e emitir os informes e realizar os estudos que se lle soliciten.
Instituto da Xuventude
Outra das características desta Lei é a creación do Instituto da Xuventude de Galicia, como órgano técnico especializado, adscrito ao órgano directivo competente en materia de xuventude, e que terá como misión a materialización dos principios de información á xente nova, formación continua en materia de mocidade e asesoramento técnico en políticas públicas de xuventude. A posta en marcha do Instituto non suporá a creación dun novo ente administrativo, senón que terá unha configuración orgánica co nivel de subdirección xeral.
As funcións do Instituto da Xuventude de Galicia serán a planificación e supervisión das actividades formativas desenvolvidas pola Escola Galega de Xuventude; a planificación, promoción, organización e coordinación de actividades destinadas á xuventude, directamente ou en colaboración con asociacións xuvenís ou outras Administracións públicas, institucións e organismos públicos e privados; a coordinación, vixilancia e rexistro das instalacións xuvenís; e a coordinación da Rede de Albergues Xuvenís de Galicia, entre outras.
Ademais inclúe a coordinación das axudas para o acceso da xente nova a determinados bens e servizos a través do carné xove, entre outros instrumentos; o fomento e a promoción de intercambios e mobilidade dos mozos e mozas con outras comunidades autónomas e países estranxeiros; a emisión de cantos informes lle sexan solicitados polo departamento de adscrición; e todas cantas lle sexan atribuídas expresamente por disposicións de carácter legal ou regulamentario.
De outra banda, o texto lexislativo tamén dá resposta á necesidade técnica de unificar e harmonizar toda a normativa anterior, antes dispersa. Así, a futura Lei derrogará a actual regulación do Consello da Xuventude de Galicia e o Decreto polo que se creou o Observatorio da Xuventude de Galicia.
Achegas da sociedade
Máis de 1.500 persoas, na súa gran maioría mozos e mozas de asociacións e grupos informais, participaron nos 39 foros de debate e encontros organizados pola Dirección Xeral de Xuventude e Voluntariado, dependente da Consellería de Traballo e Benestar, para difundir e debater o texto do anteproxecto de Lei de Xuventude de Galicia.
Ademais, a información sobre esta Lei foi tamén enviada a todos os concellos da Galicia, ás asociacións xuvenís, as escolas de tempo libre, aos 20.000 mozos e mozas da base de datos de usuarios dos programas de Xuventude e aos 6.000 seguidores dos perfís da Dirección Xeral de Xuventude e Voluntariado nas redes sociais Facebook, Tuenti e Twiter.
Xuventude e Sociedade
A Facultade de Ciencias Políticas e Sociais da Universidade de Santiago de Compostela, a traves do Master Oficial en Xuventude e Sociedade organiza a Conferencia "Recursos e políticas públicas da xuventude en Galica".
Ponente:
Ovidio Rodeiro Tato
Director Xeral de Xuventude e Voluntariado da Xunta de Galicia.
Destinatarios: A comunidade universitaria e interesados en xeral.
Data: 09 de febreiro de 2012
Hora: 18:15 hrs.
Enderezo: Salón de Graos. Facultade de Ciencias Políticas e Sociais . USC.
Mais Información: felipeandres.aliaga@usc.es
Xuventude achégase a Padrón para explicar á mocidade da comarca os diferentes modelos de participación xuvenil
-
Estos encontros pretenden achegar a tódolos mozos emprendedores no mundo asociativo xuvenil o programa Iniciativa Xove.
-
Iniciativa Xove é o programa da Dirección Xeral de Xuventude que permite os mozos e mozas realizar os seus proxectos tanto dentro dunha asociación xuvenil coma dun grupo informal.
O pasado venres o Director Xeral de Xuventude, Ovidio Rodeiro, trasladouse ó Auditorio Municipal de Padrón para inaugurar o foro de mozos e mozas nos que explicou os diferentes modelos de participación xuvenil a disposición dos mozos e mozas galegos.
Esta iniciativa nace co obxectivo de achegar a toda a xuventude emprendedora no mundo asociativo xuvenil o programa Iniciativa Xove da Dirección Xeral de Xuventude e Voluntariado.
No encontro participaron máis de cincuenta rapaces e rapazas da comarca co fin de informarse das novidades deste ano 2012 dentro do programa e para por en común as inquedanzas e propostas ao departamento autonómico.
Rodeiro estivo acompañado polos alcaldes de Padrón e Dodro ademáis de varios concelleiros de xuventude.
Os asistentes foron tamén convidados a participar nos cinco futuros obradoiros “ Lidera a tua idea” que se celebrarán a comezos do vindeiro mes de febreiro. O obxecto destas xornadas non será outra que animar á participación e explicar dunha forma totlamente práctica cómo levar unha boa idea ao papel e presentar un proxecto de calidade.
Xuventude colabora na campaña ‘sen límites, máis que capaces’ para a visibilización da diversidade funcional
O Centro Quérote+ da Coruña, dependente da Consellería de Traballo e Benestar, e o Concello da cidade herculina puxeron en marcha a campaña ‘Sen límites...máis que capaces’ para a visibilización da diversidade funcional, que se prolongará ata mañá, domingo 4 de decembro.
Con motivo da celebración hoxe do Día Internacional das Persoas con Diversidade Funcional, esta campaña de tres días de duración, que se iniciou onte venres coa celebración no centro cívico dos Mallos da cidade herculina dunhas xornadas dirixidas as familias e que abordaron a diversidade funcional desde o punto de vista das Administracións Públicas e das asociacións.
Esta xornada contou coa presenza de máis dun centenar de asistentes que, a partir das diferentes intervencións, puideron reflexionar sobre os aspectos a ter en conta para fomentar a inclusión, tales como a diferenciación coa integración ou os dereitos civís da diversidade funcional e o papel das familias e das entidades nesta materia.
Ademais, ao longo de toda a fin de semana estará instalada unha carpa no Obelisco na que o centro Quérote+ difundirá as accións que leva a cabo no campo da diversidade funcional, mentres que outras seis entidades darán a coñecer o seu labor e venderán obxectos que realizan nos centros ocupacionais.
No eido da diversidade, o centro Quérote+ desenvolve programas nos que trata asuntos como os hábitos saudables, convivencia, hixiene e autoestima que se dirixen á mocidade, as familias e a técnicos.O labor deste centros destaca por contar con profesionais con 5 anos de experiencia nesta materia que se desprazan ata a entidade en calquera horario.
A organización prevé a presenza de arredor dun millar de persoas na carpa, que se pode visitar en horario de 12,00 a 20,00 horas. Nela están a participar o centro ocupacional Pascual Veiga, a Asociación para A Integración do Neno Diminuído (AIND), a Asociación Pro Enfermos Mentais (APEM-FEAFES), a Asociación de Pais para a Formación de Xóvenes Límite (Artefios), a Fundación ADCOR e a Asociación pro Persoas con Discapacidade Intelectual de Galicia (ASPRONAGA).
A campaña ‘Sen límites...máis que capaces’ reflicte a necesidade de romper coas dificultades que veñen impostas pola sociedade o polos propios afectados por algunha doenza. O eixo fundamental é o término inclusión, unha ferramenta fundamental para erradicar posibles desigualdades, discriminacións e exclusións e fomentar o respecto, a tolerancia e a diversidade.
Mato pon en valor o voluntariado como “un dos signos de madurez y solidariedade” da sociedade
A conselleira de Traballo e Benestar, Beatriz Mato, inaugurou hoxe o XIV Congreso Estatal do Voluntariado, que se celebra ata o xoves na Coruña
O Congreso, organizado pola Consellería de Traballo e Benestar coa colaboración do Ministerio de Sanidade, Política Social e Igualdade, reúne desde hoxe na cidade herculina a máis dun millar de participantes de toda España
A Lei Galega de Acción Voluntaria, que se aprobou no Parlamento e por unanimidade hai só uns días, garante por primeira vez ás persoas voluntarias a certificación oficial da súa labor e experiencia
O Plan de Voluntariado consta de 89 medidas repartidas en 3 áreas de intervención: a sensibilización, o apoio e a coordinación
Galicia conta con 40.000 voluntarios e con 800 entidades incluídas no Rexistro de Entidades de Acción Voluntaria
Máis de 10.000 voluntarios e voluntarias participaron nas diversas accións postas en marcha pola Consellería de Traballo e Benestar en Galicia neste Ano Europeo do Voluntariado, un ano que terá como broche de ouro a celebración do XIV Congreso Estatal de Voluntariado, que se está a celebrar desde hoxe e ata o xoves na Coruña.
A conselleira de Traballo e Benestar, Beatriz Mato, inaugurou hoxe o Congreso en Palexco e lembrou que nestes doce meses o departamento puxo en marcha numerosas iniciativas que abarcaron temáticas tan diversas como a educación ambiental, a protección ao patrimonio cultural ou o fomento do voluntariado entre os estudantes de Primaria e Secundaria.
Beatriz Mato confiou en que o programa do Congreso contribúa a fortalecer a posta en valor do voluntariado “como un dos signos da madurez e solidariedade das nosas sociedades” nun momento en que é necesaria a unión de esforzos para construír un novo modelo de sociedade integradora, inclusiva e participativa, máis humana e coa forza dos valores.
Segundo subliñou a titular de Benestar na súa intervención, Galicia conta con 40.000 voluntarios e con 800 entidades incluídas no Rexistro de Entidades de Acción Voluntaria. Así, estímase que o 17% da poboación a nivel nacional ten participado nalgunha acción voluntaria no último ano e o 31% da cidadanía fíxoo nalgunha ocasión.
Lei Galega de Acción Voluntaria
Mato sostivo que 2011 está a ser unha gran plataforma de impulso a esta materia como se reflicte na aprobación, hai só uns días, no Parlamento e por unanimidade, da Lei Galega de Acción Voluntaria, unha norma que actualiza a anterior, que tiña 11 anos, e adapta seus obxectivos as últimas directrices europeas. Ademais, garante por primeira vez ás persoas voluntarias a certificación oficial da súa labor e experiencia; crea o Observatorio Galego de Voluntariado e Consello Galego de Acción Voluntaria que dará más participación ás entidades que terán máis presenza que as administracións.
A aprobación da Lei supón un dos chanzos básicos do desenvolvemento do terceiro Plan Galego de Acción Voluntaria, que rematará no 2014. Un Plan concibido como unha ferramenta e estratexia participativa elaborada con máis de 800 entidades sociais do terceiro sector de ámbitos como a discapacidade, as ONG, as universidades ou os concellos.
O Plan consta de 89 medidas repartidas en 3 áreas de intervención: a sensibilización, o apoio e a coordinación. Con elas actuarase en 7 ámbitos para a promoción do voluntariado: difusión, reflexión e estudo, promoción, formación, xestión, coordinación e cooperación. Mato sostivo que un dos puntos fortes desta aposta é a formación. De feito, ao longo de 2011 desenvolvéronse 28 accións nesta materia (xestión de entidades, accións de voluntariado ambiental e no eido social…) nas que participaron mais de 6.500 persoas.
Así mesmo, a conselleira apuntou que a promoción do voluntariado entre as persoas maiores e as persoas con discapacidade pode aportar un impulso á súa participación social. Neste senso destacou o proxecto europeo Grundtvig ‘Ways of Solidarity’ que ten como obxectivo fomentar o intercambio de aprendizaxe intercultural entre os voluntarios sénior de España e do Reino Unido, e que rematará o 31 de agosto de 2013.
Este ano tamén se puxo en marcha o Servizo de Voluntariado Xuvenil, unha iniciativa novidosa, pioneira e experimental a nivel de todo o Estado. Basease na posta en marcha en paralelo dunha bolsa de persoas voluntarias e unha de proxectos de voluntariado co obxectivo de poñer en contacto as dúas bandas. No seu primeiro ano de funcionamento a Consellería de Traballo e Benestar apoiou medio centenar de proxectos, un éxito que supuxo triplicar o seu orzamento para o ano 2012 ata os 210.000 euros.
‘Voluntariado sen fronteiras’
O periodista, escritor e director xeral de Sonrisas de Bombay, Jaume Sanllorente, foi o encargado de impartir a conferencia inaugural do congreso baixo o título ‘Voluntariado sen fronteiras’. A conselleira Beatriz Mato destacou que Sanllorente foi quen de transformar nunha “fermosa realidade o ‘chispazo’ da solidariedade e da acción voluntaria”, polo que considerou que “é unha desas persoas necesarias para que o mundo avance en positivo”.
O XIV Congreso Estatal de Voluntariado, organizado pola Consellería de Traballo e Benestar coa colaboración do Ministerio de Sanidade, Política Social e Igualdade, reúne na Coruña desde hoxe a máis dun millar de participantes de toda España para analizar a realidade das políticas e proxectos que se están a desenvolver nesta materia tanto a nivel nacional como internacional.
Jaume Sanllorente é o primeiro dos 38 poñentes deste Congreso, que clausurarán as súas Altezas Reais os Príncipes de Asturias. Don Felipe de Borbón fará entrega dos Premios Estatais do Voluntariado Social 2011.
A Feira de entidades do XIV Congreso Estatal do Voluntariado acercará á cidadanía o labor de preto de 70 asociacións
O XIV Congreso Estatal do Voluntariado, que inaugurará maña martes a conselleira de Traballo e Benestar, Beatriz Mato, na Coruña, contará cunha Feira de Entidades que poderá visitar toda a cidadanía e na que estarán representadas 68 asociacións de todo o territorio nacional, ademais do propio departamento, o Goberno central e a Plataforma do Voluntariado de España, o que supón un total de 71 stands.
Beatriz Mato inaugurará mañá martes nas instalacións de Palexco na Coruña o XIV Congreso Estatal do Voluntariado, que se celebrará na cidade herculina ata o mediodía do vindeiro 1 de decembro. Posteriormente, a conselleira, acompañada polas demais autoridades presentes, percorrerá os 71 stands que integran a Feira de Entidades de Voluntariado que permanecerá aberta para todos os cidadáns durante os días do Congreso.
As conferencias, mesas redondas e de debate, ás que asistirán 1.025 congresistas, comezarán ás 12,30 co relatorio do xornalista e escritor Jaume Sanllorente, director xeral de “Sonrisas de Bombay”, titulado “Voluntariado sen fronteiras”. Xa pola tarde continuarán as ponencias, que na primeira xornada do Congreso estarán centradas nas políticas europeas e nas experiencias de voluntariado no vello continente.
Pola súa banda, o programa do mércores xirará sobre as novas formas de voluntariado para anticiparse a futuras demandas de acción voluntaria. Ao longo das xornadas do Congreso un total de 38 relatores participarán nas reunións programadas con motivo do encontro.
A Feira de Entidades de Voluntariado será o principal atractivo para os cidadáns, pero non o único. Na primera planta do edificio desenvolverase un programa paralelo de obradoiros, proxeccións cinematográficas nas que colabora o Parlamento Europeo coa emisión das películas “Welcome” e “Un mundo mellor”, así como diferentes actuacións musicais e teatrais.
Durante o acto de clausura do evento, o próximo xoves, as Súas Altezas Reais os Príncipes de Asturias farán entrega dos premios estatais do Voluntariado Social 2011 que este ano recaeron na Asociación Benéfica Renacer da Coruña na categoría colectiva e en María Isabel Bayonas de Ibarra a nivel individual. A Federación Amigos dos Maiores dos Petits Fréres tamén recibirá o premio especial, e a Fundación Cibervoluntarios unha mención de honra. A nivel individual tamén serán recoñecidos con premio especial e mención honorífica respectivamente María Matos González de Careaga e Juan Lara Crevillén.
Toda a información sobre as actividades que converterán durante tres días a Galicia na capital estatal do voluntariado está dispoñible na web: ‘www.caminosdasolidaridade.com’.
Intercambio experiencias con autonomías
Por outra banda, o director xeral de Xuventude e Voluntariado, Ovidio Rodeiro, está a manter esta tarde unha reunión con outros nove directores xerais de Voluntariado doutras tantas Comunidades autónomas españolas e con representantes do Goberno central na que farán unha valoración do Ano Europeo do Voluntariado e abordarán o congreso galego e o propostas para o de o ano que vén, que terá lugar no País Vasco.
En concreto, ademais de Rodeiro, participan no encontro representantes de Illas Baleares, Cataluña, Canarias, Castela la Mancha, Madrid, Murcia, A Rioxa, Comunidad Valenciana e o País Vasco.
Segundo indicou Ovidio Rodeiro, este ano 2011 Galicia contou cunha programación voluntaria moi extensa, ideada especificamente para difundir e conmemorar o Ano Europeo do Voluntariado 2011, e que ten nestes días o seu punto álxido co Congreso.
O director xeral lembrou que a pasada semana o Pleno do Parlamento de Galicia aprobou por unanimidade a nova Lei de Acción Voluntaria, “da que estamos especialmente orgullosos por constituír o proxecto lexislativo máis participativo e consensuado de todos, xa que ademais da unanimidade política, o texto tamén contou co apoio de todo o sector, expresado a través do Consello Galego de Acción Voluntaria”.