A Consellería de Traballo e Benestar é consciente da precariedade e insuficiencia de medios e instalacións axeitadas de que dispoñen as asociacións xuvenís e demais entidades públicas e privadas que realizan actividades coa xuventude. En consecuencia, co obxecto de facilitar á mocidade o acceso a instalacións xuvenís para o desenvolvemento de programas de lecer e tempo libre, sen ánimo de lucro, regula a través desta orde, e baixo a denominación de oferta concertada, o réxime de utilización das súas instalacións xuvenís durante a campaña de verán 2012.

OBXECTO

A través da Oferta Concertada, a Consellería de Traballo e Benestar oferta o uso de instalacións xuvenís do 15 de xuño ao 30 de setembro.

SERVIZOS OFERTADOS E DURACIÓN DAS QUENDAS

O uso das instalacións suporá dispoñer:

• Dos servizos de auga, gas, electricidade e alimentación en réxime de pensión completa.
• Do material (agás o correspondente ás actividades específicas) que, no caso dos campamentos, comprende tamén as tendas de campaña, colchóns e mantas.
• Xerencia e persoal de servizo.

A duración das quendas e instalacións ofertadas serán as recollidas no anexo I (ou descarga a versión en pdf).

O primeiro servizo de alimentación será a comida do día da incorporación e o último, o almorzo do día seguinte ao último día de estancia concedido.

ENTIDADES E GRUPOS DESTINATARIOS

Poderán solicitar o uso das instalacións de referencia:

1. As asociacións xuvenís, as entidades prestadoras de servizos á xuventude e as escolas de tempo libre, debidamente constituídas e legalizadas.
2. O Consello da Xuventude de Galicia e os consellos locais e municipais da xuventude.
3. Corporacións locais.
4. Outras entidades públicas ou privadas que realicen actividades coa xuventude.
5. Grupos de mozos e mozas galegos e galegas non asociados/as que organicen actividades de tempo libre sen ánimo de lucro e, en todo caso, para efectos de realización dun programa de actividades para un mínimo de 15 persoas. Un/ha dos membros do grupo asumirá o papel de representante deste e, como tal, será responsable do cumprimento das obrigas que, como beneficiario/a, lle correspondan ao mesmo. Será necesario que o grupo teña unha denominación que o identifique.

SOLICITUDES

As solicitudes, subscritas por persoa suficientemente acreditada, presentaranse conforme o modelo normalizado recollido no anexo II (version en pdf).

• Lugares de presentación de solicitudes:

No rexistro xeral da Xunta de Galicia, nos rexistros das súas xefaturas territoriais ou por calquera dos procedementos establecidos no artigo 38.4º da Lei 30/1992, de 26 de novembro, de réxime xurídico das administracións públicas e do procedemento administrativo común. Asi mesmo, as solicitudes poderán presentarse por vía electrónica a través da sede electrónica da Xunta de Galicia no enderezo https://sede.xunta.es

• Prazo de presentación de solicitudes:

O prazo de presentación de solicitudes será de 15 días naturais, contado a partir do día seguinte ao da publicación desta orde no Diario Oficial de Galicia.

No número de prazas solicitadas, incluiranse as correspondentes aos membros do equipo de animación.

CRITERIOS DE ADXUDICACIÓN

• Orde de preferencia:

Para a adxudicación do uso das instalacións ofertadas establécese a seguinte orde de preferencia:

1. Asociacións xuvenís, entidades prestadoras de servizos á xuventude e escolas de tempo libre domiciliadas na Comunidade Autónoma galega e censadas ou rexistradas no correspondente censo ou rexistro dependente da Dirección Xeral de Xuventude e Voluntariado.
2. Consello da Xuventude de Galicia e os Consellos locais e municipais de Xuventude.
3. Corporacións locais.
4. Grupos de mozos/as galegos/as non asociados/as que organicen actividades de tempo libre sen ánimo de lucro e, en todo caso, para efectos de realización dun programa de actividades para un mínimo de 15 persoas.
5. Asociacións xuvenís, entidades prestadoras de servizos á xuventude e escolas de tempo libre domiciliadas noutras comunidades autónomas.
6. Outras entidades públicas ou privadas que o soliciten con fins asistenciais.

• Prioridade:

Pola súa banda, dentro do previsto no parágrafo anterior, terán prioridade:

1. As que soliciten un maior número de prazas e/ou de días ata o tope máximo de cada instalación fixado no anexo I (ou descarga a versión en pdf).
2. As solicitudes das entidades que cubran as prazas por convocatoria aberta e non reservadas exclusivamente aos seus membros ou asociados.
3. As entidades domiciliadas na comunidade autónoma galega.
4. As entidades que soliciten instalacións das que non gozaron nos dous últimos anos.
5. As que subvencionen o total ou parte da cota que teñen que pagar os participantes.

As entidades que en anos anteriores non fixeron uso das instalacións unha vez adxudicadas, sen presentar causa xustificada no seu momento, pasarán a ocupar o último lugar dentro dos criterios de prioridade descritos nos puntos anteriores.

• Renuncias:

No caso de que algunha entidade renuncie ás prazas adxudicadas, estas quedarán dispoñibles para calquera solicitante que as demande e cumpra os requisitos esixidos no apartado “Entidades e grupos destinatarios”.

As renuncias serán sempre respecto do total das prazas adxudicadas e deberán formalizarse mediante correo electrónico na seguinte dirección: Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo

As entidades que, tendo remitido o anexo II en prazo, non resultasen adxudicatarias, poderán realizar novas solicitudes das prazas sobrantes a través do enderezo electrónico arriba indicado e terán prioridade respecto doutros/as solicitantes que as demanden por primeira vez.

INSTRUCIÓN E RESOLUCIÓN

• Instrución:

As solicitudes presentadas serán examinadas por unha comisión de valoración constituída para o efecto e que será integrada por: 

1. O/a xefe/a do Servizo de Programas, que a presidirá.
2. Os/as xefes/as dos Servizos de Xuventude e Voluntariado, das xefaturas territoriais da Consellería de Traballo e Benestar ou o funcionario/a en quen deleguen.
3. Un/unha funcionario/a da Dirección Xeral de Xuventude e Voluntariado designado/a polo/a director xeral, que actuará como secretario/a

• Resolución

Esta comisión, valoradas as solicitudes conforme os criterios mencionados anteriormente, elevará proposta de resolución ao director xeral de Xuventude e Voluntariado, que deberá ditar a correspondente resolución no prazo de 10 días.

A resolución seralles notificada a todos os solicitantes no prazo máximo de dous meses, contados desde a publicación desta orde no Diario Oficial de Galicia. Transcorrido o dito prazo sen que recaia resolución expresa, deberá entenderse desestimada a petición correspondente. A dita resolución non esgota a vía admininistrativa e contra ela poderá interpoñer recurso de alzada ante a persoa titular da Consellería de Traballo e Benestar no prazo dun mes a partir do día seguinte ao da notificación da resolución, se o acto fose expreso, ou no prazo de 3 meses contados a partir do día seguinte a aquel en que se produza o acto presunto, de acordo co disposto nos artigos 114 e 115 da Lei 30/1992, de réxime xurídico das administracións públicas e do procedemento administrativo común, modificada pola Lei 4/1999, do 13 de xaneiro.

A antedita resolución publicarase nos taboleiros de anuncios da Dirección Xeral de Xuventude e Voluntariado e das xefaturas territoriais da Consellería de Traballo e Benestar.

RESERVA DE PRAZAS E PRIMEIRO PAGAMENTO

1. Recibida a resolución os/as beneficiarios/as están obrigados/as, no prazo de 10 días:

• A ingresar, en concepto de reserva de prazas, o 25% do importe correspondente ás prazas adxudicadas. A dita cantidade non será reintegrable, nin descontable no seguinte pago, en caso de que decaese a adxudicación realizada por incumprimento das obrigas expresadas neste artigo, se a entidade adxudicataria anulase a reserva de utilización da instalación, reducise o número de usuarios previstos ou os días de uso solicitado.
• A presentar, no Servizo de Xuventude e Voluntariado da xefatura territorial da Consellería de Traballo e Benestar correspondente á provincia na que estea a instalación adxudicada, a seguinte documentación:

a) Breve proxecto de actividades que se van realizar.

b) Acreditación da persoa que subscribiu a solicitude como representante da entidade ou grupo solicitante.

c) Xustificante do aboamento do 25% expresado anteriormente.

2. Se transcorrido o prazo de 10 días desde a notificación da adxudicación non se cumprisen os requisitos anteriores, declararase expresamente, a través da oportuna resolución, o desestimento da solicitude efectuada, ofertándose aos/ás demáis solicitantes. No caso de non cubrirse as prazas desta forma, a xefatura territorial correspondente reservarallas a quen as demande.

AUTORIZACIÓN DE USO TEMPORAL E SEGUNDO PAGAMENTO

Transcorridos 15 días desde a finalización do prazo establecido anteriormente, a entidade beneficiaria deberá formalizar o documento de aceptación das condicións particulares de uso da instalación e aboar o 75% do importe correspondente ás prazas que confirme. A dita cantidade ou a parte proporcional non será reintegrable se o número de usuarios ao inicio da actividade é menor ao confirmado.

O documento de aceptación das condicións particulares de uso e o xustificante do segundo ingreso presentaranse no Servizo de Xuventude e Voluntariado da xefatura territorial da Consellería de Traballo e Benestar da provincia na que estea a instalación adxudicada.

Así mesmo, presentarán a relación dos/as responsables que dirixan a actividade e a acreditación das titulacións esixidas en materia de tempo libre, tendo en conta o disposto no artigo 47 do Decreto 50/2000, do 20 de xaneiro, polo que se refunde e actualiza a normativa vixente en materia de xuventude (DOG nº 49, do 10 de marzo).

Cumpridas as condicións anteriores, a xefatura territorial correspondente da Consellería de Traballo e Benestar facilitaralle á entidade beneficiaria o documento de autorización de uso temporal da instalación.

Se transcorridos os diferentes prazos establecidos neste artigo non se fixesen os pagamentos correspondentes polas entidades beneficiarias, a xefatura territorial correspondente reservarallas a quen as demande.

OBRIGAS DOS BENEFICIARIOS

Os/as adxudicatarios/as estarán obrigados/as:

1. A cumprir os requisitos esixidos no Decreto 50/2000, do 20 de xaneiro, polo que se refunde e actualiza a normativa en materia de xuventude (DOG nº 49 , do 10 de marzo de 2000) e demais lexislación vixente.
2. A observar as normas de réxime interno da instalación da que sexan adxudicatarios/as así como as indicacións da persoa responsable desta no referente a aqueles aspectos non recollidos expresamente nas citadas normas.
3. A responder dos actos que se realicen nas instalacións concedidas e das consecuencias que deles se deriven, así como de toda responsabilidade civil derivada de calquera acto.
4. A aboar o importe dos desperfectos que produzan no material e nos equipamentos da instalación durante o período de uso desta.
5. No caso de que queiran utilizar as piscinas da instalación adxudicada, cada entidade deberá dispor dos/as seus/súas propios/as socorristas.

TARIFAS

Os prezos dos servizos ofertados nesta orde aparecen recollidos no anexo I da Orde pola que se fixan as tarifas e os prezos correspondentes á prestación de servizos nas instalacións xuvenís e á expedición de carnés dirixidos á xuventude da Dirección Xeral de Xuventude e Voluntariado durante o ano 2012.

Aqueles grupos que figuren inscritos no rexistro da Consellería de Traballo e Benestar como entidades prestadoras de servizos sociais, gozarán dun desconto do 50% sobre os prezos sinalados no apartado anterior.

O aboamento dos diferentes pagamentos regulados nesta orde efectuarase utilizando os impresos destinados para o efecto, que se atoparán á disposición dos interesados na Dirección Xeral de Xuventude e Voluntariado ou en calquera xefatura territorial da Consellería de Traballo e Benestar.

Protección de datos

De conformidade coa Lei orgánica 15/1999,do 13 de decembro, de protección de datos de carácter persoal, informámoslle que a través dos datos recompilados nos diferentes anexos desta orde, préstase o seu consentimento á incorporación dos datos persoais aportados a un ficheiro do que é responsable a Consellería de Traballo e Benestar, e inscrito na Axencia Española de Protección de Datos, coa finalidade de xestión da actividade. O responsable do ficheiro, comprométese a respectar a confidencialidade da información de carácter persoal e a garantir o exercicio dos dereitos de acceso, rectificación, cancelación e oposición, que se poden exercer ante o centro directivo competente en materia de xuventude no enderezo: Dirección Xeral de Xuventude e Voluntariado, edificio administrativo San Lázaro, s/n , 3º andar, 15781 Santiago de Compostela, ou ben enviando un correo electrónico ao seguinte enderezo: Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo .