• Esta iniciativa estivo estruturada en dúas fases que buscaron o enriquecemento e o desenvolvemento de habilidades directivas, centradas no liderado, a motivación, a comunicación, a xestión de emocións e a organización propia e produtiva dos colaboradores
  • Cecilia Vázquez destacou a heteroxeneidade de perfís, xa que “permitiu unha gran retroalimentación de ideas dende puntos de vista moi diferentes, o que incrementou e potenciou as diferentes capacidades de cada un dos participantes”

imaxe lideres do futuroOs 31 mozos e mozas finalistas do programa formativo de educación non formal Líderes de Futuro, organizado pola Consellería de Política Social, recibiron hoxe os seus diplomas da man da directora xeral de Xuventude, Participación e Voluntariado, Cecilia Vázquez. Os participantes, con idades comprendidas entre os 18 e os 30 anos, están inscritos no Sistema de Garantía Xuvenil; ou ben son líderes de grupos xuvenís que participaron en proxectos de educación non formal; ou ben teñen emprendido algunha actividade profesional por conta propia no ano 2015.

A directora xeral destacou esta heteroxeneidade de perfís, xa que “permitiu unha gran retroalimentación de ideas dende puntos de vista moi diferentes, o que incrementou e potenciou as diferentes capacidades de cada un dos participantes”. Cecilia Vázquez tamén afirmou que “este programa ofreceu a oportunidade de mellorar de xeito individualizado as habilidades para ensaiar e liderar un proxecto que facilite a empregabilidade, a través do desenvolvemento de habilidades persoais e directivas”.

Líderes de Futuro estivo estruturado en dúas fases que buscaron o enriquecemento e o desenvolvemento de habilidades directivas, centradas no liderado, a motivación, a comunicación, a xestión de emocións e a organización propia e produtiva dos colaboradores.

A primeira fase abrangueu tres etapas nos meses de febreiro e marzo. A primeira delas, correspondeu ao seminario “Liderar na xuventude. Motivación para o éxito”, dividido en dúas sesións de catro horas. A segunda abrangueu tres obradoiros: “Sacar o máximo partido do meu estilo de comunicación”, “A xestión de emocións con intelixencia” e “A organización: sacando o máximo partido dos meus colaboradores e de min mesma/o”.

Durante o desenvolvemento destas etapas, fíxose unha avaliación sistemática e continua de cada participante e en función dos resultados, 25 deles pasaron á segunda fase do programa baseada na mentorización e coaching personalizado. Mediante esta actividade desenvolveron as habilidades adquiridas ao longo das sesións xa realizadas.

Os mentores acompañarán a cada alumno na consecución dos seus obxectivos particulares, axudándolles a planificar os seus pasos e completar o camiño de mellora e crecemento profesional. Este proceso facilitou a aprendizaxe dos participantes e promoveu cambios cognitivos, emocionais e de conduta. Estas sesións de coaching personalizado tiveron lugar no mes de abril e na primeira semana de maio.

A directora xeral de Xuventude, Participación e Voluntariado, Cecilia Vázquez Suárez, recordou hoxe que a Consellería de Política Social mantén aberto os prazos para a participación de mozos e mozas de entre 18 e 30 anos nos programas de mobilidade Galeuropa e Campos de Traballo. Vázquez Suárez fixo este recordatorio durante a súa participación na clausura da Conferencia de Abegondo do proxecto On Tour for Europe. Esta iniciativa enmárcase no programa europeo Europe for Citizens 2014-2020, que pretende fortalecer unha rede de cooperación entre as cidades participantes en temas vinculados á migración, os dereitos humanos e a cidadanía activa. Nel participan representantes de institucións e de entidades procedentes de Bélxica, Francia, Alemaña, Italia, Lituania, Países Baixos, Reino Unido e España.


A titular autonómica asegurou que o fomento da mobilidade xuvenil en Europa é un dos eixes preferentes do Plan Estratéxico de Xuventude 2014-2016, xa que “as políticas máis modernas de Europa teñen a mobilidade como un dos instrumentos para que os mozos e mozas poidan adquirir novas capacidades e competencias, ampliando deste xeito o currículo a través dunha experiencia internacional”.


O programa Galeuropa enmárcase no Programa Operativo de Emprego Xuvenil cofinanciado pola Iniciativa de Emprego Xuvenil e o Fondo Social Europeo e ten por obxecto a concesión de axudas para a realización de prácticas formativas de entre 8 e 16 semanas en entidades ou empresas públicas ou privadas de 31 países europeos. Este programa conta cun orzamento de 2 millóns de euros que permitirá sufragar en torno a 500 mobilidades. O prazo de solicitudes está aberto ata o 9 de maio.


Pola súa banda, os Campos de Traballo para este verán contan con 588 prazas de acollida, nos 24 campos que se organizan en Galicia, e outras 370 de partida. Deste xeito, os mozos e mozas galegos poden participar tanto nos Campos de traballo galegos como nos que teñen lugar noutras comunidades autónomas (para os que se ofrecen 120 prazas), e nos que se celebran en 31 países de todo o mundo (250 prazas).


Os Campos de Traballo constitúen unha excelente ferramenta de educación non formal para a mocidade, xa que engloban experiencias de participación, de voluntariado e de mobilidade. Son accións voluntarias, que os rapaces e rapazas realizan de forma altruísta e solidaria, poñendo o seu gran de area para mellorar a nosa sociedade. Tamén promoven a participación e implicación da xuventude na sociedade e fomentan a mobilidade, pois ofrecen aos mozos e mozas a oportunidade de tomar parte en campos doutras Comunidades e países e viceversa.

xaponwakayamaNo marco do programa “A Xuventude no mundo”, a Dirección Xeral de Xuventude, Participación e Voluntariado da Consellería de Política Social convoca un intercambio á Prefectura de Wakayama (Xapón), ao abeiro das relacións bilaterais entre a Xunta de Galicia e a Prefectura de Wakayama.

Obxectivos: facilitar o coñecemento doutras realidades sociocultural e lingüísticas para a comprensión da diversidade cultural e  favorecer e potenciar a adquisición de habilidades e competencias non formais que faciliten o desenvolvemento persoal.
A cultura galega e a cultura xaponesa son dúas culturas moi distintas pero unidas por un vínculo: existen soamente dous camiños no mundo recoñecidos pola UNESCO como Patrimonio da Humanidade: o Camiño de Santiago e o Camiño Kumano Kodo.

Datas de realización do intercambio: do 4 ao 11 de xullo de 2016
O 4 de xullo todos/as os/as participantes seleccionados/as deberán estar en Wakayama
Prazas: 15 (acompañados/as dun monitor)
Destinatarios: mozos e mozas galegos residentes en Galicia con idades comprendidas entre os 18 e 30 anos de idade no momento de celebrarse o intercambio.
Prazo de inscrición: do 26 de abril ao 2 de maio de 2016.
Inscrición:
mediante envío de formulario electrónico dentro do prazo establecido. Só se admitirá unha solicitude por participante.
Os erros nos datos facilitados na solicitude de participación ou a omisión dalgún deles pode ocasionar a desestimación da solicitude
Admisión: será por rigoroso orde de inscrición, ata cubrir a totalidade de prazas convocadas para o intercambio. Os/as solicitantes seleccionados/as recibirán un correo electrónico de confirmación da praza. Unha vez finalizado o prazo de inscrición, de non recibir comunicación nos tres  días seguintes, entenderase que non obtivo praza para o intercambio.

Confirmada a praza nos 4 días (naturais) seguintes os/as seleccionadas deberán remitir amobilidadexuvenil@xunta.es:
- unha copia do billete de transporte adquirido para desprazarse ata a cidade do país do intercambio. Non é documento válido a reserva de voo
- unha copia do seguro de viaxe, de accidentes e  de enfermidade
A non remisión destes documentos no prazo establecido supón a perda da praza no intercambio.
De darse baixas despois de ter sido adxudicadas as prazas, ofertaránselle  aos seguintes da lista de espera, tendo que presentar estes o billete e a documentación nos 4 días (naturais) seguintes da comunicación.
De ser o caso de que o billete de transporte adquirido fose anulado posteriormente a súa remisión á Dirección Xeral de Xuventude, Participación e Voluntariado, a praza para o intercambio será anulada e considerada non adxudicada.
Recibidos correctamente as copias dos documentos requiridos, posteriormente aos seleccionados seralles facilitado o nome do coordinador que acompañará ao grupo, así como o lugar de encontro no lugar de celebración do intercambio
Realizaranse o intercambio se existe un mínimo da metade das prazas convocadas para cada intercambio.
Os /as mozos/as seleccionados/as serán convocados a unha reunión preparatoria do intercambio previo ao inicio do intercambio, no día e lugar que determine a Dirección Xeral de Xuventude, Participación e Voluntariado. A asistencia será obrigatoria, agás causa de forza maior debidamente xustificada. A data de celebración desta reunión será comunicada con antelación suficiente.

Cobertura do intercambio
- Aloxamento  en réxime de pensión completa en cuarto de uso múltiple
- Trasporte no ámbito do intercambio
- Actividades organizadas pola entidade de acollida
- 3 días de estancia con familias xaponesas
Será a cargo do/a participante:
- Os gastos de desprazamento ata o lugar de aloxamento do intercambio
- Os gastos do seguro de viaxe, de accidente e  de enfermidade

Estancias con familias xaponesas
Os/as participantes neste intercambio adquiren o compromiso de acoller no seu domicilio particular en Galicia durante 3 días a 2 mozos ou mozas xaponeses/as, cando se realice o intercambio de acollida en Galicia durante o 2017.
Recomendación de aeroporto máis preto para chegar ao lugar de destino do país de realización do intercambio:
Wakayama (Xapón): Aeroporto de Kansai

Máis información:
Subactividades-xuventude.ctb@xunta.es
981 544 645 e 981 544 869

FORMULARIO DE INSCRICIÓN

  • Os destinatarios desta experiencia son mozos e mozas galegos residentes en Galicia con idades comprendidas entre os 18 e os 30 anos. O intercambio realizarase entre o 4 e o 11 de xullo de 2016
  • Os participantes terán a oportunidade de coñecer a cultura, costumes e lingua do país nipón, ademais de convivir cunha familia xaponesa de acollida
  • Esta será o duodécimo intercambio xuvenil entre a Xunta de Galicia e a Prefectura de Wakayama dende o ano 2010, dúas rexións irmanadas dende o ano 1988
  • Os intercambios xuvenís permiten aos mozos e mozas participantes desenvolver habilidades, competencias e coñecementos, descubrir novas culturas, tradicións, costumes e estilos de vida, sobre todo a través da aprendizaxe entre iguais

A Dirección Xeral de Xuventude, Participación e Voluntariado da Consellería de Política Social convoca, no marco do programa de mobilidade “A Xuventude no mundo”, un intercambio á Prefectura de Wakayama (Xapón) que se desenvolverá entre o 4 e o 11 de xullo de 2016. Durante esa semana, os mozos e mozas galegos coñecerán a cultura e lingua xaponesa, as súas costumes, terán a oportunidade de interactuar coa mocidade xaponesa en distintas actividades e durante os tres últimos días convivirán con familias xaponesas de acollida.

O número de prazas convocadas son 15 e os/as destinatarios/as desta iniciativa son os mozos e mozas galegos residentes en Galicia con idades comprendidas entre os 18 e 30 anos de idade no momento de celebrarse o intercambio. A inscrición realizarase mediante o envío do formulario electrónico a través do portalxuventude.xunta.ese o prazo de inscrición estará aberto ata o 2 de maio.

Wakayama e Galicia aprobaron no ano 1988 o seu irmanamento e, dende entón, foron varios os programas realizados conxuntamente, sobre todo centrados no turismo e na cultura. No que respecta á xuventude, en 2009 estableceuse un protocolo de traballo entre as dúas administracións rexionais para favorecer os lazos de unión entre as entidades xuvenís de Wakayama e Galicia. Así, con este grupo de mozos e mozas galegos, esta será a duodécima experiencia de intercambio xuvenil entre a Xunta de Galicia e a Prefectura de Wakayama dende o ano 2010. Ao longo destes anos, esta iniciativa contou cun total de 180 participantes galegos/as e xaponeses/as con culturas moi distintas pero unidos por un gran vínculo como son os itinerarios de peregrinación de cada rexión: o Camiño de Santiago en Galicia e o Camiño Kumano Kodo en Wakayama, ambas rutas recoñecidas pola UNESCO como Patrimonio da Humanidade.

Os intercambios xuvenís permiten aos mozos e mozas participantes desenvolver habilidades, competencias e coñecementos, descubrir novas culturas, tradicións, costumes e estilos de vida, sobre todo a través da aprendizaxe entre iguais. Así mesmo axudan a consolidar valores como a solidariedade, a democracia e a amizade e facilita a concienciación intercultural e a mellora das competencias lingüísticas. Este amplo proceso de aprendizaxe realízase a través de métodos de educación non formal, deste xeito, os participantes neste intercambio, poderán solicitar o certificado de educación non formal en materia de xuventude ao abeiro da Orde do 26 de febreiro de 2015, publicada recentemente no Diario Oficial de Galicia do 25 de marzo.

A Xunta de Galicia ten como un dos seus eixos prioritarios en canto a políticas de Xuventude, a promoción da mobilidade xuvenil entendida cunha participación activa, xa que os mozos e mozas son acollidos por unha entidade xuvenil do país de referencia e comparten un amplo programa de actividades, o que supón unha implicación activa dos mozos e mozas na vida social, cultural e educativa da rexión á que temporalmente se van desprazar.

Ademais, no ano 2014 a administración autonómica puxo en marcha o Plan estratéxico de xuventude de Galicia 2014-2016. Horizonte 2020 no que se recollen as políticas públicas en materia de xuventude desenvolvidas polas diferentes consellerías da Xunta de Galicia. Un documento que ten como un dos seus eixos prioritarios a promoción da mobilidade xuvenil a través de programas como A Xuventude no mundo, Galeuropa ou Erasmus+.