A Consellería de Traballo e Benestar organiza seis xornadas en diferentes cidades de Galicia para informar sobre este proceso
En concreto, hoxe ás 18,00 horas e mañá ás 11,00 horas terá lugar no centro coordinador de Santiago; o 28 de febreiro no Espazo Xove de Ourense; o 1 de marzo ás 11,30 horas no Centro LUG I de Lugo e no Espazo Xove de Vilagarcía; e o 14 de marzo ás 11,30 horas na Delegación Territorial de Vigo
O prazo de inscrición para participar neste procedemento de acreditación será do 1 ao 31 de marzo de 2013
Máis de 300 persoas poderán acceder á certificación oficial de informador xuvenil, pioneira en España. Neste senso, a Consellería de Traballo e Benestar organiza seis xornadas en diferentes cidades de Galicia para informar sobre este procedemento.
O departamento autonómico publicou no DOG do 16 de novembro de 2012 a convocatoria do procedemento de recoñecemento das competencias profesionais para os informadores xuvenís. Galicia é a primeira Comunidade do Estado que lle vai a facilitar aos técnicos da información xuvenil a posibilidade de obter un certificado de profesionalidade.
A Consellería está a levar a cabo xornadas informativas nos distintos Espazos Xove, co obxecto de facilitar información sobre o procedemento de asesoramento e avaliación a todos os informadores xuvenís, e aquelas persoas que reúnan os requisitos.
En concreto, hoxe ás 18,00 horas e mañá ás 11,00 horas terá lugar no centro coordinador de Santiago; o 28 de febreiro no Espazo Xove de Ourense; o 1 de marzo ás 11,30 horas no Centro LUG I de Lugo e no Espazo Xove de Vilagarcía; e o 14 de marzo ás 11,30 horas na Delegación Territorial de Vigo.
A Rede Galega de Información Xuvenil está formada polas 244 oficinas municipais de información xuvenil dependentes dos concellos, os 56 puntos de información xuvenil dependentes de asociacións, os 12 Espazo Xove autonómicos e o Centro Coordinador de Información e Documentación Xuvenil.
A cualificación profesional de informador xuvenil recoñeceuse no Catálogo Nacional de Cualificacións Profesionais, dentro da familia profesional de servizos socioculturais e á comunidade, que se publicou no BOE do 9 de maio de 2011.
Con este procedemento de recoñecemento de competencias profesionais Galicia convértese na primeira Comunidade Autónoma en ofrecerlle a posibilidade aos técnicos que levan máis de tres anos de profesión, cun mínimo de 2.000 horas traballadas en total nos últimos 10 anos de obter o certificado de profesionalidade a través da acreditación das súas competencias adquiridas pola súa experiencia laboral ou pola formación obtida a través da educación non formal (xustificaranse polo menos 300 horas nos últimos 10 anos).
Neste procedemento poderán obter o certificado de profesionalidade as persoas que acrediten as catro unidades de competencia das que consta. Os técnicos que non poidan completar o proceso poderán obter unha acreditación parcial, podendo posteriormente adquirir as outras. O prazo de inscrición para participar neste procedemento será do 1 ao 31 de marzo de 2013.
O director xeral de Xuventude e Voluntariado, Ovidio Rodeiro, mantivo hoxe unha xuntanza de traballo con concelleiros da zona no Espazo Xove de Carballo
Ademais, durante a súa visita expuxo a programación do centro para este ano
A instalación ofrecerá seis cursos que chegarán a preto de 250 mozos e mozas
Tamén se organizarán actividades de lecer entre as que se inclúen ballet, danza moderna baile galego e de salón, pintura e debuxo e ioga
Acollerá obradoiros do servizo Quérote+, que se centrarán nas relacións afectivo-sexuais, a imaxe persoal, a prevención da drogodependencia ou o uso seguro das redes sociais
As comarcas de Bergantiños e Terras de Soneira contan con preto de 700 usuarios do carné xove e cun total de 18 establecementos adheridos.
Así o destacou hoxe o director xeral de Xuventude e Voluntariado, Ovidio Rodeiro, que mantivo unha xuntanza de traballo con concelleiros destas dúas bisbarras no Espazo Xove de Carballo. Ademais, durante a súa visita anunciou tamén a programación deste centro para o ano 2013.
Ao longo da reunión, Rodeiro destacou que a promoción do carné xove vai ser un dos obxectivos para os próximos anos. Ademais, tamén abordou outros programas da área da mocidade, como o Iniciativa Xove, Xuventude en acción ou Voluntariado Xuvenil.
Sobre Iniciativa Xove, destacou que disporá de 730.000 euros para proxectos en toda Galicia, un 3,5 por cento máis que en 2012. Precisou tamén que o programa europeo Xuventude en acción priorizará este ano os proxectos que traten os temas de desemprego xuvenil, iniciativa da mocidade ou creatividade.
Polo que se refire ao Voluntariado Xuvenil, a meta este ano é que un total de 3.000 mozos e mozas se sumen aos proxectos voluntarios de asociacións e concellos. Conta cun orzamento de 440.500 euros.
Rodeiro adiantou tamén a programación do Espazo Xove de Carballo, unha instalación que forma parte da rede 12 centros xuvenís que hai en Galicia xunto con Lalín, Vilagarcía, Tui, Vilalba, Viveiro, Chantada, Betanzos, Curtis, Ourense, Noia e Pontedeume.
Ao longo deste ano, o Espazo Xove ofrecerá un total de 6 cursos de educación non formal para a mocidade, que sumarán máis de 450 horas lectivas e poderán chegar ata 250 mozos e mozas. Serán de carácter gratuíto e semipresenciais. Entre eles, destacan o de “animación cultural”, “desenvolvemento comunitario” ou o “teórico de monitor sociocultural”.
Ademais, neste centro tamén se realizarán obradoiros do servizo Quérote+, que se centrarán nas relacións afectivo-sexuais, a imaxe persoal, a prevención da drogodependencia ou o uso seguro das redes sociais. Os técnicos deste servizo prestarán atención os xoves aos mozos e mozas que demanden asesoramento nestas temáticas, sempre individualmente e garantindo a confidencialidade.
A estas actividades, súmanse as de lecer, moitas en colaboración con asociacións xuvenís. Entre elas, inclúense ballet, danza moderna, baile galego, bailes de salón, pintura, debuxo e ioga.
O Espazo Xove de Carballo realiza tamén os trámites para a obtención de carnés para a mocidade como o ISIC, Teacher, Alberguista ou carné xove. Tan só no 2012 expedíronse nestas instalacións 400 destes documentos.
Entre outras, haberá actividades de lingua de signos, de acompañamento a vítimas de violencia de xénero, de emprendemento ou de idiomas como o chinés
Nesta edición 2013 os participantes terán a súa disposición un conxunto de accións enfocadas todas elas á adquisición de coñecementos, reciclaxe e actualización das distintas temáticas que se van abordar nos diferentes cursos
Destaca tamén pola conxugación das metodoloxías das clases presenciais, semipresenciais e a distancia
O Plan de Formación da Dirección Xeral de Xuventude e Voluntariado, dependente da Consellería de Traballo e Benestar, constará este ano de 153 cursos de diferentes temáticas que beneficiarán a máis de 18.000 persoas, con máis de 7.000 horas de formación non formal. Isto supón un incremento de preto de 5.800 beneficiarios con respecto a 2012.
Os cursos de formación divídense nas áreas de xuventude e voluntariado. En xuventude o número de horas pasa de 1.249 a 6.638, e de 37 cursos de formación a 128; mentres que no eido do voluntariado case se duplica o número de horas e de persoas que poden beneficiarse desta formación. Programáronse para o 2013 un total de 25 cursos, dos cales cinco son presenciais e 20 en liña. Isto supón 624 horas de formación, e chegar a 14.325 persoas.
No ámbito de voluntariado, haberá cursos de lingua de signos, de acompañamento a vítimas de violencia de xénero, voluntariado ambiental o para persoas maiores, entre outras. No eido de lecer e tempo libre será de animación á lectura, dinamización do asociacionismo, ou novas tecnoloxías.
Desde a Rede Galega de Información e Documentación Xuvenil organizarase un curso de chinés, emprendemento e creación de autoemprego, animación e xestión cultural ou organización de accións socioeducativas. Mentres, os centros Quérote + acollerán cursos de mediación familiar e escolar, de diversidade funcional ou de intervención afectivo-sexual coa mocidade.
Doutra banda, os Espazo Xove de Betanzos, Carballo, Chantada, Curtis, Lalín, Noia, Ourense, Tui, Vilagarcía de Arousa, Vilalba, Viveiro ou Pontedeume terán tamén actividades formativas de idiomas, monitor sociocultural ou recoñecemento de competencias de información xuvenil.
Para o departamento autonómico a educación non formal é unha parte fundamental da formación integral dos mozos e mozas, xa que permite adquirir e asimilar valores, normas de vida, opinións e coñecementos que facilitan a participación na sociedade.
Nesta edición 2013 os técnicos de xuventude, a mocidade galega e os voluntarios terán a súa disposición un conxunto de accións formativas enfocadas todas elas á adquisición de coñecementos, reciclaxe e actualización das distintas temáticas que se van abordar nos diferentes cursos.
Este Plan Formativo 2013, destaca tamén pola conxugación das metodoloxías das clases presenciais, semipresenciais e a distancia. Estas últimas modalidades facilitan o acceso á formación a todos os mozos e mozas que debido ás barreiras xeográficas, de traballo ou de conciliación familiar, non poden asistir aos cursos na modalidade presencial, ao mesmo tempo que a modalidade teleformación, semipresencial e a distancia permiten ofrecer máis formación a un menor custo.
Os distintos cursos do Plan de Formación Xuventude 2013 incrementarán as potencialidades e competencias dos técnicos e mozos e mozas que os realicen, favorecendo o seu desenvolvemento persoal e posibilitándolles aumentar o seu currículo e maiores oportunidades de acceso a un emprego.
O director xeral de Xuventude e Voluntariado, Ovidio Rodeiro, mantivo hoxe un encontro cos concelleiros da área de Arousa, Pontevedra e Caldas
A xuntanza tivo lugar no Espazo Xove de Vilagarcía, que ofrece información xuvenil e asesoramento aos mozos en materias como emprego, saídas académicas e profesional, bolsas e axudas ou ocio e tempo libre
Ovidio Rodeiro informou de que o programa Iniciativa Xove impulsou nestas comarcas un total de 10 proxectos, a través de asociacións e grupos informais xuvenís, cun orzamento de 37.150 euros
Preto de 7.500 mozos e mozas dos concellos das comarcas de Pontevedra, Arousa e Caldas contan xa co Carne Xove expedido pola Dirección Xeral de Xuventude e Voluntariado da Consellería de Traballo e Benestar.
Así o indicou hoxe o director xeral de Xuventude e Voluntariado, Ovidio Rodeiro, que mantivo unha xuntanza cos concelleiros da área de Arousa, Pontevedra e Caldas. A xuntanza cos concelleiros tivo lugar no Espazo Xove de Vilagarcía, unha instalación do departamento autonómico que ofrece información xuvenil e asesoramento aos mozos da zona en materias como emprego, saídas académicas e profesional, bolsas e axudas ou ocio e tempo libre.
Neste centro precisamente realízase o trámite para a obtención do Carné Xove, así como o dos carnés de Estudante Internacional, Teacher ou Alberguista, dos que se emitiron en 2012 un total de 614.
Doutra banda, Ovidio Rodeiro informou de que o programa Iniciativa Xove, dependente da Consellería de Traballo e Benestar, impulsou un total de 10 proxectos, a través de asociacións e grupos informais xuvenís, nestas comarcas. Para promover estas actividades, investíronse 37.150 euros.
En concreto, os dez proxectos financiados por Iniciativa Xove correspóndense con grupos e asociacións dos concellos de Cotobade, Pontevedra, Poio, Ribadumia, Sanxenxo, Valga e Vilagarcía. As iniciativas presentadas centrábanse en temas como a música, a horticultura ou asuntos históricos.
Ademais un total de 39 mozos e mozas destas comarcas participaron entre 2010 e 2012 en programas de mobilidade da Consellería, tales como Galeuropa, unha orde pola que se convocan axudas para prácticas laborais non remuneradas, que se realizan en empresas de países da Unión Europea.
No decurso da reunión tamén se presentou a programación para 2013 deste centro. O Espazo Xove de Vilagarcía contará en 2013 con actividades de carácter formativo, así como de lecer e tempo libre.
As actividades de lecer realízanse a maioría en colaboración coas asociacións xuvenís e outras entidades da comarca. Entre estas destaca a participación na Liga Galega de Xadrez dos asistentes aos cursos que se imparten no centro. Tamén se organizan talleres e obradoiros de coiro, bisutería, reciclado de aceites para xabón, pintura ou cerámica, así como cursos e actividades relacionadas coa informática, xa que o centro conta cunha aula dotada con once ordenadores e wifi libre.
Entre as accións formativas programadas para 2013 destacan un curso de elaboración de proxectos de animación sociocultural e turística, outro de animación cultural, un seminario para a elaboración de proxectos de animación sociocultural e turística e outro de animación de lecer e tempo libre.
Cada un dos cursos que se ofertan no Espazo Xove de Vilagarcía contarán con 25 prazas, serán gratuítos e impartiranse en modalidade semipresencial. Os interesados poderán inscribirse a través da páxina http://xuventude.xunta.es.
Trátase dun proxecto que pretende potenciar o diálogo como ferramenta para argumentar as ideas propias entre a mocidade galega
Hoxe terá lugar o debate da fase preliminar para o grupo de Educación Secundaria (ESO) e o 2 de marzo será a quenda dos estudantes de Bacharelato
Parlamento Xove é unha competición de debate, a maior de toda España, na que os equipos representantes de centros educativos de toda Galicia empregan a oratoria para defender un determinado posicionamento acerca dun tema proposto pola organización
O equipo gañador de ESO terá como premio unha semana de multiaventura e actividades culturais no centro LUG II, dependente da Consellería de Traballo e Benestar
A Dirección Xeral de Xuventude e Voluntariado, dependente da Consellería de Traballo e Benestar, organiza hoxe unha nova edición do Parlamento Xove cun debate sobre consumo responsable entre a mocidade, que terá lugar no Pazo de Mariñán, en Bergondo (A Coruña).
Trátase dun proxecto que pretende potenciar o diálogo como ferramenta para argumentar as ideas propias entre a mocidade galega. Hoxe terá lugar o debate para o grupo de Educación Secundaria (ESO) e o 2 de marzo será a quenda dos estudantes de Bacharelato.
Parlamento Xove é unha competición de debate, a maior de toda España, na que os equipos representantes de centros educativos de toda Galicia empregan a oratoria para defender un determinado posicionamento acerca dun tema proposto pola organización. Os participantes de cada equipo (formado por catro alumnos e un profesor) investigarán, escribirán e, finalmente, debaterán sobre o tema proposto, incluíndose tamén a elaboración de artigos en blog e a realización dun dossier de investigación.
Nesta edición a temática elixida é o consumo responsable entre a xuventude e así os debates preliminares xirarán sobre a interrogante: ‘Está a servir a crise económica global para que a xuventude tome conciencia dun consumo responsable?’.
A dificultade da actividade está en que só cinco minutos antes de cada encontro dialéctico se procede ao sorteo da postura a adoptar por cada equipo, “a favor” ou “en contra”, en relación a cuestión formulada. Os equipos levaron a cabo unha labor de investigación previa e despois contrapoñen e discuten datos e ideas.
Ante o elevado número de centros participantes, a Dirección Xeral de Xuventude e Voluntariado decidiu incrementar a duración total da actividade e facer dúas categorías diferenciadas por idades, ampliando o tramo educativo: unha para alumnado de 3º e 4º da ESO e outra para o de 1º e 2º de Bacharelato. Esta última terá dúas fases.
Na competición relativa á categoría de ESO, que celebra os debates hoxe no Pazo de Mariñán, participarán 16 equipos dos seguintes centros educativos: IES Ramón Menéndez Pidal (A Coruña), IES Alfonso X O Sabio (Cambre), IES Melide, CPI Conde Fenosa (Ares), IES Porto do Son, IES Saturnino Montojo (Ferrol), IES Mugardos, CPI Vicente Otero Barcalcel (Lugo), IES Nosa Señora dos Ollos Grandes (Lugo). IES montecastelo (Burela), IES A Pinguela (Monforte de Lemos), Colexio Internacional Sek Atlántico (Poio), IES Pintor Colmeiro (Silleda), Colexio Filipense Sagrada Familia (Vilagarcía), Ies de Rodeira (Cangas) e IES Valle Inclán (Pontevedra).
O equipo gañador desta categoría terá como premio unha semana de multiaventura e actividades culturais no centro LUG II, dependente da Consellería de Traballo e Benestar.
A fase preliminar de Bacharelato terá lugar o vindeiro 2 de marzo, na Deputación da Coruña, no que debaterán 24 equipos de 1º e 2º curso, dos que 8 serán os que debaterán na fase final que descorrerá o 5 e 6 de abril no Salón do Pleno do Parlamento de Galicia.
A edición de Parlamento Xove 2013 empezou a súa andaina coa fase de formación no mes de outubro do ano anterior estendéndose ata o mes de xaneiro, formación na que que participaron un total de 56 centros educativos e na que os alumnos participantes recibiron coñecementos de oratoria enfocada ao funcionamento dos campionatos escolares de debate.
Parlamento Xove, como actividade na que participa alumnado e profesorado de centros educativos, contribúe ao desenvolvemento de practicamente todas as competencias básicas: competencia lingüística, nos seus catro ámbitos (expresión oral e escrita; e compresión oral e escrita): Competencia matemática: en todos os debates manexan datos e porcentaxes que avalan a súa argumentación. Tratamento da información e competencia dixital. Competencia social e cidadá: contribúe á convivencia dado que o traballo realízase en equipo. Competencia cultural e artística: nos debates esíxese o emprego de figuras estilísticas e capacidade de retórica. E competencia para aprender a aprender e iniciativa persoal
O director xeral de Xuventude e Voluntariado, Ovidio Rodeiro, participou hoxe na presentación de actividades do Espazo Xove de Pontedeume e reuniuse con concelleiros das comarcas de Ferrol, Eume e Ortegal
As seis actividades que obtiveron financiamento son de entidades e grupos dos concellos de Cabanas, Fene, Ferrol, Narón, Ortigueira e Pontedeume
Nestas tres comarcas, hai actualmente preto de 2.400 usuarios do carné xove e 155 establecementos adheridos
Con respecto á programación do Espazo Xove de Pontedeume, destácase os cursos gratuítos de inglés ou de animación cultural e de lecer
O programa Iniciativa Xove, dependente da Consellería de Traballo e Benestar, impulsou un total de seis proxectos, a través de asociacións e grupos informais xuvenís, nas comarcas de Eume, Ferrol e Ortegal. Para promover estas actividades, investíronse 24.000 euros.
O director xeral de Xuventude e Voluntariado, Ovidio Rodeiro, participou hoxe na presentación da programación para 2013 do Espazo Xove de Pontedeume e, posteriormente, reuniuse con concelleiros das tres comarcas para facer balance e avaliar as liñas estratéxicas en materia xuvenil de cara este ano.
En concreto, os seis proxectos financiados por Iniciativa Xove correspóndense con grupos e asociacións dos concellos de Cabanas, Fene, Ferrol, Narón, Ortigueira e Pontedeume. As iniciativas presentadas centrábanse en temas como a música, ruta de sendeirismo, ou asuntos históricos.
Rodeiro destacou tamén que nestas tres comarcas hai actualmente preto de 2.400 usuarios do carné xove e un total de 155 establecementos adheridos.
Con respecto ao Espazo Xove de Pontedeume, cabe destacar que esta instalación ofrece información xuvenil e asesoramento aos mozos e mozas da zona en materias como o emprego, saídas académicas e profesionais, bolsas e axudas, ou ocio e tempo e libre. Ademais, neste centro realízase tamén o trámite para a obtención do Carné Xove, ou os carnés de Estudante Internacional, Teacher ou Alberguista.
De luns a sábado lévanse a cabo actividades como teatro, artes plásticas, pilates, danza do ventre, hip hop, bailes latinos ou guitarra. Ademais, tamén hai formación relacionada coa informática, xa que o espazo conta cunha aula dotada con dez ordenadores e wifi libre.
Entre as accións formativas previstas para 2013, destaca un curso de inglés para a mocidade de 160 horas; un obradoiro para a elaboración de proxectos de animación sociocultural e turística; e un curso de animación cultural e outro de animación de lecer e tempo libre.
Cada un dos cursos contará con 25 prazas, serán gratuítos, e impartiranse en modalidade semipresencial.
O Espazo Xove disporá tamén da presenza o mércores de persoal técnico do servizo Quérote +, que informará e asesorará en temáticas xuvenís como as relacións afectivo-sexuais, a imaxe persoal, o uso seguro de internet ou a resolución de conflitos. A atención profesional é individual e garante en todo momento a confidencialidade.
Por último, adiantouse que o centro ten previsto organizar tres exposicións nas súas instalacións sobre “o movemento asociativo xuvenil no Espazo Xove de Pontedeume”, “o dereito á información da mocidade”, e “obras gañadoras de artes plásticas do certame Xuventude Crea”.
O director xeral de Xuventude e Voluntariado, Ovidio Rodeiro, participou hoxe en Pontevedra nunha charla sobre programas europeos, que foi organizada pola Asociación galega de formación do profesorado e a Asociación galega de percutas OMAR
A comunidade autónoma acolleu un total de 60 programas que chegaron a preto dun milleiro de mozos e mozas
Adiantou que en 2013 priorizaranse, entre outras, as iniciativas centradas no desemprego xuvenil ou no estímulo do espírito creativo ou empresarial
Galicia executou durante 2012 o 10 por cento do total dos proxectos estatais que se desenvolveron ao abeiro do programa europeo “Xuventude en Acción”. Deste xeito, Galicia foi a terceira comunidade autónoma onde máis actividades de puxeron en marcha o pasado ano, ata un total de 60, que chegaron a preto dun milleiro de mozos e mozas. O orzamento manexado polas entidades e asociacións para esas actividades foi de máis de 818.000 euros.
Así o salientou hoxe o director xeral de Xuventude e voluntariado, Ovidio Rodeiro, que participou en Pontevedra nunha charla sobre programa europeos, que foi organizada pola Asociación galega de formación do profesorado e a Asociación galega de percutas OMAR. Ambas entidades están a participar nesta liña europea de participación e mobilidade.
Rodeiro destacou que en 2013 cambiaranse os prazos e prioridades para participar nesta liña de axudas, que contará cun orzamento superior aos 9 millóns de euros e medio para repartir entre todas as comunidades autónomas.
En canto aos prioridades, este ano primaranse aqueles proxectos que traten o tema do desemprego xuvenil, así como os que se destinen a fomentar a mobilidade entre os mozos e mozas. Tamén se promoverán os que aborden a pobreza e a marxinación; ou que estimulen o espírito empresarial e de creatividade, e animen aos mozos e mozas a ser cidadáns activos.
No que se refire aos prazos, para aquelas iniciativas que empezan entre o 1 de maio e o 31 de outubro, o período de solicitude xa finalizou o 1 de febreiro. Pola súa banda, para os proxectos que se desenvolvan entre o 1 de agosto e o 31 de xaneiro de 2014, o data límite de presentación é o 1 de maio. Xa por último, para aqueles que empezarán entre o 1 de xaneiro e o 30 de xuño de 2014, o prazo esténdese ata o 1 de outubro de 2013.
A Dirección Xeral de Xuventude e Voluntariado encárgase de informar, asesorar, avaliar e facer seguimento de todos os proxectos de Xuventude en Acción. Este programa europeo ten como obxectivo principal promover a mobilidade e o diálogo e a empregabilidade, co fin de fomentar un sentimento de cidadanía europea activa, así como de solidariedade e tolerancia.
A Asociación galega de formación do profesorado organiza un intercambio bilateral entre mozos e mozas galegos e chipriotas do 10 ao 18 de febreiro. Neste proxecto participan 16 persoas de cada país, que estudarán os problemas ambientais de rías e ríos como posibles xacementos de emprego.
Pola súa parte, a Asociación galega de percutas OMAR está a desenvolver un proxecto de participación xuvenil, que comezou en febreiro e que se prolongará ata setembro. O obxectivo desta iniciativa é crear un espazo de encontro musical, onde o eixo vertebrador é a percusión.
"Receitas para grupos" é unha iniciativa de persoas vinculadas á Asociación REVE, que se decataron que nalgunhas actividades de Xuventude en Acción non sempre se contan cos recursos necesarios para adaptarse a distintos tipos de axudas.
En www.recetasparagrupos.com podes encontrar en que consisten as dietas vegana, lactar-vexetariana ou celíaca, incluíndo tamén a Halal e Kosher.
O director xeral de Xuventude e Voluntariado, Ovidio Rodeiro, participou hoxe nesta iniciativa, que tivo lugar no Instituto de Educación Secundaria Eduardo Pondal de Santiago
Está previsto que poidan participar preto de 10.000 alumnos neste proxecto chamado ‘Convivencia nas redes sociais’
Nalgúns destes obradoiros, como é o caso do Eduardo Pondal, os técnicos do Quérote + contan coa colaboración de funcionarios dos departamentos de investigación de delitos tecnolóxicos da Policía Nacional e da Garda Civil, que informan aos alumnos do que son este tipo de delitos e de cómo se poden denunciar
Mañá, día 5 de febreiro, celébrase o Día Internacional de Internet Seguro, unha xornada para promover o uso responsable de internet
Os centros Quérote+, dependentes da Dirección Xeral de Xuventude e Voluntariado da Consellería de Traballo e Benestar organizan o obradoiro ‘Convivencia nas redes sociais’ de 100 minutos de duración e que se vai impartir nas clases de 3º da ESO de 165 institutos de toda Galicia. Está previsto que poidan participar preto de 10.000 alumnos.
O director Xeral de Xuventude e Voluntariado, Ovidio Rodeiro, participou hoxe nesta iniciativa, que tivo lugar no Instituto de Educación Secundaria Eduardo Pondal de Santiago. Mañá, día 5 de febreiro, celébrase o Día Internacional de Internet Seguro, unha xornada para promover o uso responsable de internet. Rodeiro indicou que “a día de hoxe a mocidade convive a través de internet, crean e afianzan vínculos, buscan información, comparten imaxes, xogan, estudan, e moitísimas cousas máis. As actuais son xeracións dixitais ou tecnolóxicas, xeracións de rapaces e rapazas que naceron xa inmersos nas Tecnoloxías da Información e a Comunicación”.
A relación entre a xente nova e internet é “intensa”, pero isto non supón que saiban facer un uso responsable das mesmas, polo que se fai necesario atender esta realidade e falar deste tema nas aulas e outros espazos xoves.
Dende os centros Quérote+ vense traballando con esta temática nas aulas dos centros de ensino de toda Galicia. A través destes obradoiros, foméntase na mocidade o uso responsable de internet, poñendo o acento nas redes sociais.
A través da reflexión trabállanse os beneficios que se poden obter co seu uso, e facendo visibles os posibles riscos aos que se poden ver expostos. Involúcrase aos mozos e ás mozas na construción e uso de ferramentas que garantan a seguridade e a preserven a súa intimidade na Rede.
Tamén se traballa nos comportamentos non adecuados a través das redes sociais, a fin de previr e evitar na medida do posible casos de Cyberbullying entre os alumnos.
É frecuente que nos obradoiros para o alumnado de 3º da ESO haxa mozos e mozas que conten con máis de 500 amigos nos seus perfís das redes sociais, que teñan publicadas máis de 3.000 imaxes, e que compartan os seus contrasinais con outras persoas.
De aí que teña unha gran relevancia a información e a formación no uso destas ferramentas, que teñan espazos onde poder consultar tódalas dúbidas que lle xurdan sobre este tema, así como que saiban a quen poder acudir en caso de atoparse con algunha dificultade.
Nas formacións que ofrecen os centros Quérote+, ademais de dar información, búscase que coñezan tamén un espazo de referencia no que poder formular as dúbidas, curiosidades, preocupacións ou dificultades que lle xurdan en relación a este tema.
Unha das actividades coas que se traballa co mocidade neses obradoiros é que identifiquen certos comportamentos que poden ter no uso de internet como inseguros (vermello), mellorables (laranxa) ou seguros (verde).
Entre os comportamentos vermellos estarían o de deixar sesións abertas nun equipo de acceso público; dar o número de teléfono ou calquera outro dato persoal por Internet, para un fin descoñecido ou por unha vía non segura; ou descargar arquivos de orixe descoñecida ou non fiable. Os comportamentos mellorables son empregar sempre o mesmo contrasinal, aceptar condicións de uso sen mirar ou ter o Bluetooth continuamente activado.
En algúns destes obradoiros, como é o caso do Eduardo Pondal, os técnicos do Quérote + contan coa colaboración de funcionarios dos departamentos de investigación de delitos tecnolóxicos da Policía Nacional e da Garda Civil, que informan aos alumnos do que son este tipo de delitos e de cómo se poden denunciar.
O director xeral de Xuventude e Voluntariado, Ovidio Rodeiro, presentou as actividades deste centro e mantivo unha xuntanza de traballo cos concelleiros da área das comarcas de Fisterra, Muros, Noia e Barbanza
Nesta instalación tamén se realizarán obradoiros do servizo Quérote+, centrados nas relacións afectivo-sexuais, a imaxe persoal, a prevención de drogodependencias ou o uso seguro das rede sociais
Desenvolveranse tamén actividades de lecer, moitas delas en colaboración con asociacións xuvenís, así como exposicións sobre distintas materias
Con respecto ao carné xove, unha iniciativa que se seguirá fomentando este ano, hai actualmente 71 establecementos adheridos a este servizo e 1.483 usuarios nestas catro comarcas
O Espazo Xove de Noia ofrecerá en 2013 un total de 12 cursos de educación non formal para a mocidade, que sumarán máis de 500 horas lectivas e poderán chegar ata a 250 mozos e mozas. Os cursos serán de carácter gratuíto e impartiranse de xeito semipresencial.
O directora xeral de Xuventude e Voluntariado, Ovidio Rodeiro, presentou hoxe as actividades deste centro para este ano. A continuación mantivo unha xuntanza de traballo cos concelleiros desta área das comarcas de Fisterra, Muros, Noia e Barbanza.
O espazo de Noia forma parte da rede de 12 instalacións xuvenís que hai en Galicia xunto con Lalín, Vilagarcía, Tui, Vilalba, Viveiro, Chantada, Betanzos, Carballo, Curtis, Ourense e Pontedeume.
Entre os cursos que se impartirán en 2013, destacan entre outros o de “inglés para información xuvenil”, a “formación en emancipación xuvenil e orientación laboral”, ou o “fomento do tecido asociativo”.
Ademais desta oferta, na instalación noiesa tamén se realizarán este ano obradoiros do servizo Quérote+, que se centrarán nas relación afectivo-sexuais, a imaxe persoal, a prevención de drogodependencia ou o uso seguro das redes sociais. Os técnicos do Quérote atenderán os martes, individualmente e garantindo a confidencialidade, aos mozos que demanden asesoramento nestas temáticas.
Toda esta programación estará acompañada pola organización de actividades de lecer, moitas deles en colaboración con asociacións xuvenís, entre as que se inclúen ballet clásico, danza moderna, baile galego, sevillanas, bailes de salón, breakdance, teatro, xadrez, percusión, pandeireta, gaitas, violín, ioga, pilates, bailoterapia e apoio escolar.
O Espazo Xove acollerá tamén distintas exposicións sobre o movemento asociativo xuvenil vinculado a este centro, ou o dereito á información da mocidade; así como a mostra fotográfica de alumnos do ciclo medio Virxe do Mar ou das obras gañadoras na modalidade de artes plásticas do certame Xuventude Crea.
Neste centro realízanse tamén os trámites para a obtención de carnés para a mocidade como o ISIC, Teacher, Alberguista e o carné xove. Tan só no 2012 expedíronse nestas instalacións un total de 190 carnés xove.
Cabe destacar tamén que o centro conta con wifi libre e un aula de informática con 14 equipos, aos que acoden diariamente unha media de 45 rapaces e rapazas de entre 12 e 25 anos. Este ano espérase superar as 8.360 visitas a aula de informática que se rexistraron en 2012.
A toda esta programación hai que sumar outras actividades que xurdirán ao longo do ano en colaboración cos concellos e asociacións xuvenís da zona.
Por outra banda, na xuntanza cos concelleiros das comarcas de Fisterra, Noia, Muros e Barbanza, o director xeral de Xuventude e Voluntariado fixo fincapé en diversos programas autonómicos que estarán en marcha en 2013.
Neste sentido, salientou que se seguirá potenciando en toda Galicia o carné xove. Ao respecto, informou de que nestas catro comarcas hai un total de 71 establecementos adheridos que ofrecen beneficios e descontos, e 1.483 usuarios de entre 12 e 30 anos.
Entre outras iniciativas, Rodeiro tamén mencionou o programa de Iniciativa Xove que permite a posta en marcha de proxectos liderados pola propia mocidade. En 2012 financiáronse en Lousame, Noia e Ribeira un total de 5 proxectos ao abeiro desta liña de axudas.
Tamén destacou o proxecto de Voluntariado Xuvenil (en 2012 participaron nel os concellos de Ribeira, Lousame e Porto do Son), ou outras iniciativas como os intercambios xuvenís con Europa, ou a campaña de verán.