En portada (1113)

 

 

INTERACTUANDO NO TEMPO LIBRE 2017

XI xornadas galegas de actualización de coñecementos e intercambio de experiencias

3, 4 e 5 de novembro

Albergue Xuvenil de Gandarío, Bergondo, A Coruña

A Dirección Xeral de Xuventude, Participación e Voluntariado da Consellería de Política Social pon en marcha unha nova edición de Interactuando no tempo libre, que nesta ocasión ven marcada polo reto de avanzar no consenso de cara á elaboración do Decreto de desenvolvemento da Lei 6/2012, do 19 de xuño, de xuventude de Galicia.

Téñense dado varios pasos neste camiño partindo daquel II Foro aberto do Tempo Libre celebrado en novembro de 2016, e logo de todo o proceso participativo levado a cabo para a renovación da normativa en materia de xuventude, o XI Interactuando supón un espazo de avance de cara a pechar participadamente un borrador de Decreto e como encontro aberto para ir anticipando, debatendo, imaxinando e construíndo horizontes novos.

Unha vez máis o obxectivo último é o de crear un espazo de reflexión e debate entre os profesionais do sector acerca da importancia da educación non formal como acción educativa e transformadora no eido do tempo libre, a través dunha metodoloxía activa e participativa.

Interactuando é

• Un foro para o intercambio de experiencias e para a actualización de coñecementos

• Un espazo para a formación e a aprendizaxe

• A oportunidade para o encontro e a convivencia.

• Un tempo para reflexionar e vivir o tempo libre en clave educativa

• Unha fin de semana para achegarnos a diferentes maneiras de traballar e para tecer redes

Os seus obxectivos son:

• Dar a oportunidade de encontrarse e de establecer contactos.

• Promover o diálogo entre todas as persoas que traballan neste ámbito.

• Reflexionar e analizar a acción educativa no tempo libre.

Definir as liñas de acción e compromisos para poñer en práctica nas diferentes realidades de cadaquén.

Destinatarios:

Monitores/as e directores/as de actividades de educación notempo libre.

Técnicos/as de xuventude e dinamizadores/as xuvenís.

Profesionais do ámbito (animadores/as socioculturais, educadores/as sociais, pedagogos/as, dinamizadores/as de actividades de educación no tempo libre).

Membros de asociacións xuvenís, grupos informais que realicen actividades de educación no tempo libre e voluntarios/as.

Interactuando no tempo libre artellarase en faladoiros como espazos para a aprendizaxe, a reflexión e o debate sobre os seguintes temas:

  • Formación e escolas de educación no tempo libre: están as escolas de tempo libre cumprindo a súa función? Que formación precisamos? Como debe ser esa formación? Formación por competencias. Futuro das ETL
  • Emprego no tempo libre: Profesionais de actividades de educación no tempo libre. Relación entre empresas, monitores, escolas e administración.
  • Campamentos e instalacións xuvenís: En instalacións xuvenís fixas ou móbiles, os campamentos de verán son un dos alicerces da educación no tempo libre en Galicia.
  • Educación no tempo libre: Entreter? Educar? Aprender xogando? Educación global? Valores transversais e aprendizaxe hoxe en Galicia.

 

Cada un dos faladoiros estará constituído por un máximo de 25 persoas. Cando se realice a inscrición cómpre indicar a preferencia do faladoiro no que se desexa participar. A organización adscribirá os/as participantes nos faladoiros atendendo ás súas preferencias e á orde de inscrición.

Achegas na rede ao novo decreto

O borrador do decreto está dispoñible na rede para que calquera persoa o consulte e elabore achegas que o poidan mellorar. Non é necesario asistir ás xornadas para facer chegar achegas ao borrador.

Antes do 31 de outubro enviaranse ao enderezo de correo electrónico decreto.xuventude@xunta.gal indicando o artigo que se quer mellorar, o texto que se propón e, se se quer, unha xustificación da proposta de mellora.

As achegas recollidas de antemán serán a base de traballo da maña de sábado.

Panel de Experiencias. Comunicacións e experiencias

Calquera persoa ou entidade que desexe compartir unha experiencia realizada no ámbito da educación no tempo libre poderá solicitar a súa inclusión no Panel de experiencias. Isto implicará dispor de 7-10 minutos para a súa presentación.

Para iso enviarase antes do 31 de outubro ao email institutoxuventude.ctb@xunta.gal un arquivo de texto de entre 7 e 20 páxinas, tipo de fonte “Arial”, tamaño 12, espazado entre liñas de 1'5. É posible incluír imaxes, sempre e cando non superen o 30% do espazo. A comisión organizadora fará a selección e comunicará a inclusión ou non no panel de experiencias das distintas propostas achegadas.

Xunto coa experiencia achegarase un resumo dela, dun máximo de 10 liñas, incluíndo o título da comunicación, o nome dos/as autores/as e o nome da entidade/grupo onde se desenvolveu a iniciativa.

Inscrición: a través do seguinte formulario. A inscrición estará aberta ata o 1 de novembro inclusive.

Se para participares activamente no Interactuando precisas traer á túa cativa ou ao teu cativo, fáinolo saber.

PROGRAMA

Venres, 3 de novembro

17.00 h Acollida e entrega de documentación

17.30 h Benvida e sesión plenaria

18.30 h Descanso

19.00 h Faladoiros

20.30 h Cea

22.00 h Actividade nocturna: coñecemento e creación de grupo

Sábado, 4 de novembro

9:30 h Faladoiros

11:30 h Descanso

12: 00 h Faladoiros

14.00 h Xantar

16.00 h Faladoiros

18.00 h Panel de experiencias

20.00 h Tempo libre

20.30 h Cea

22.00 h Interacción nocturna: presentación en vivo de boas prácticas

Domingo, 5 de novembro

09.30 h Faladoiros

11.00 h Presentación de conclusións

13.00 h Clausura e despedida.

No DOG do 16 de outubro de 2017 publícase o decreto que regula o Observatorio Galego de Acción Voluntaria, no ámbito da Comunidade Autónoma de Galicia, establecendo a súa estrutura, composición e funcionamento, o contido dos plans e proxectos elaborados polas entidades de acción voluntaria, así como a formación en materia de acción voluntaria, en desenvolvemento da Lei 10/2011, do 28 de novembro, de acción voluntaria.

DOG do 16 de outubro de 2017

 

A DXXPV está a impulsar o desenvolvemento de diversas accións para deseñar as políticas de xuventude da Xunta de Galicia dos vindeiros catro anos. Sobre algunha delas xa vos invitamos a participar, como son os World Café provinciais. Aínda non te apuntaches? Podes facelo premendo aquí.


Nesta ocasión invitámosvos a cumprimentar un cuestionario. Non leva máis de 8 minutos! Pincha aquí para acceder ao cuestionario: CUESTIONARIO.
Terás a oportunidade de contar como ves á xuventude de Galicia e valorar o que a Xunta de Galicia, e nomeadamente a DXXPV, están a facer para a xuventude.
Recollerase a opinión das persoas interesadas ata o luns 06-11-2017 ás 23.59 horas.


Se te interesa o que se fai dende as políticas públicas a favor da xuventude, aquí podes deixar a túa opinión. Podes ser mozo ou moza, ou non. Este cuestionario está aberto a toda a cidadanía!


É posible que te cheguen invitacións para cumprimentalo por diversas vías. Agradecémosche que o cumprimentes unha soa vez.
Anímate e anima a outras persoas a participar.
Graciñas pola túa contribución!

 

Dirección Xeral de Xuventude, Participación e Voluntariado.

Os participantes convivirán durante a fin de semana no albergue de ecoturismo Alvarella e xuntos abordarán diversos temas como o bullying ou a violencia de xénero

A Consellería de Política Social achegou 5000 euros para a celebración deste evento

A Directora Xeral de Xuventude, Participación e Voluntariado asistiu hoxe ás xornadas XAC-Xóvenes como axente de cambio promovidas por Cruz Vermella Xuventude e que se están a celebrar durante a xornada de hoxe e mañá en Vilarmaior.


As xornadas, xirarán entorno á educación e sensibilización para evitar e previr a violencia nas súas diferentes manifestacións. O obxectivo é promover unha mocidade activa e solidaria mediante a non violencia e o fomento de valores como a convivencia, a tolerancia e o respecto; que os mozos e mozas podan ser axentes de cambio desde a perspectiva da non violencia.


Os participantes convivirán durante a fin de semana no albergue de ecoturismo Alvarella e abordarán xuntos temáticas como: rompendo mitos sobre as migracións, o bullying e o acoso escolar, a violencia de xénero e o conflito desde unha perspectiva positiva, entre outras.


A Consellería apoia este proxecto cunha subvención de 5.000 euros como financiamento integral das xornadas, a través do programa Iniciativa Xove da Consellería de Política Social, que posibilita a posta en marcha de proxectos por parte das entidades xuvenís e grupos informais de mozos e mozas, cuxo desenvolvemento facilita a adquisición de habilidades e ferramentas á mocidade así como a vivencia de experiencias e aprendizaxes no ámbito da educación non formal. A Dirección Xeral de Xuventude, Participación e Voluntariado destina este ano 545.000€ a este programa que permite a execución de 119 proxectos.

Novo Decreto de Xuventude1

A xuntanza enmárcase no proceso de participación aberto co obxectivo de coñecer e contar coa opinión, inquedanzas e necesidades dos distintos axentes implicados nos ámbitos obxecto de regulación.

A Dirección Xeral de Xuventude, Participación e Voluntariado convida a calquera persoa/entidade interesada e, nomeadamente, a educadoras/es de tempo libre, asociacións xuvenís e entidades prestadoras de servizos á xuventude, empresas do sector, xerentes de instalacións, técnicas/os de xuventude e escolas de tempo libre, a unha xuntanza onde se dará conta das mudanzas realizadas e das incorporacións ao texto do borrador ao longo do proceso participativo para a elaboración do decreto que desenvolverá o título II da Lei 6/2012, de xuventude de Galicia.

O texto do último borrador pode consultarse aqui

Estas mudanzas e incorporacións fixéronse en base ás achegas realizadas por correo electrónico e ás propostas recibidas nas distintas sesións de traballo e no III Foro Aberto do Tempo Libre.

Así mesmo, informarase e debaterase acerca dos pasos a seguir a partir de agora.

A xornada terá lugar na Escola Galega de Administración Pública (EGAP), en Santiago de Compostela, o día 17 de outubro entre as 16h30 e as 18h30.

Se estás interesada/o en asistir, inscríbete a través do seguinte formulario.

 

A directora xeral de Xuventude, Participación e Voluntariado, Cecilia Vázquez, reuniuse hoxe cos mozos e mozas participantes no proxecto promovido pola Mancomunidade de municipios de Ordes no marco do programa de mobilidade transnacional xuvenil Galeuropa, convocado pola Consellería de Política Social.
Trátase de 20 mozos e mozas menores de 30 anos inscritos no Sistema Nacional de Garantía Xuvenil no ámbito da Comunidade Autónoma de Galicia, que cumpren a condición de beneficiarios e que nos vindeiros días iniciarán as súas prácticas formativas non retribuídas cunha duración de dous meses en empresas de Portugal, Italia e Reino Unido.
A contía da axuda por mozo/a está en función do país de realización da práctica formativa e en función da duración da mesma; e inclúe unha axuda para os gastos de aloxamento e manutención e axuda para a viaxe. O importe total da axuda inclúe para a entidade de envío unha axuda á organización da mobilidade (550 euros por participante) e a súa execución, así como unha axuda á entidade de acollida.

Cecilia Vázquez sinalou que “este proxecto de mobilidade é un exemplo de unión de esforzos e medios entre administracións para ofrecer á mocidade ferramentas para a mellora da súa formación que lle permitan adquirir habilidades e capacidades complementarias para achegarse un pouco máis ao obxectivo profesional marcado; de reforzar a súa autoestima en termos de empoderamento que lle dea forzas e motivación para avanzar no seu itinerario persoal e profesional”. “Debemos lembrar que a Mancomunidade de municipios da comarca de Ordes, creada no ano 1976 e integrada polos concellos de Frades, Ordes, Mesía, Trazo, Oroso, Tordoia e Cerceda, é a máis antiga da Comunidade Autónoma galega”, engadiu a directora xeral.

A directora xeral lembrou que a mobilidade na formación ofrece aos mozos e mozas oportunidades de fortalecer as súas capacidades xenéricas e específicas para avanzar no seu proceso formativo e incrementar as súas posibilidades de inserción no mercado de traballo. “A mobilidade non é un fin en si mesma, debemos entendela como a adquisición de novas competencias nun entorno cultural e social novo, que facilita a adquisición de coñecementos e competencias mediante metodoloxías de aprendizaxe distintas ao modelo formativo do país de orixe”, explicou a directora.

Cecilia Vázquez rematou a súa intervención lembrando que “a Comisión Europea no documentoUnha estratexia da Unión Europea para a xuventude: Investimento e Capacitación, destaca que unha das claves para o desenvolvemento persoal e a mellora da empregabilidade da mocidade é a súa participación en programas de mobilidade”.

Galeuropa


O programa de mobilidade trasnacional xuvenil Galeuropa enmárcase dentro do Programa Operativo de Emprego Xuvenil cofinanciado pola Iniciativa de Emprego Xuvenil e o Fondo Social Europeo. Cun orzamento no ano 2017 de 2.176.515,40 euros, pretende financiar e apoiar á mobilidade da mocidade galega para que realice estadías de prácticas formativas non remuneradas entre dous e tres meses de duración en entidades/empresas públicas ou privadas de 27 países da Unión Europea ben directamente concedendo axudas individuais aos mozos e mozas ou ben mediante concesión de axudas a proxectos de mobilidade de entidades sen ánimo de lucro con sede permanente ou domicilio social en Galicia que desenvolvan actividades no eido da xuventude ou proxectos de concellos, agrupacións de concellos ou mancomunidades da Comunidade Autónoma de Galicia.

Nesta última convocatoria na modalidade de axudas a entidades locais, foron aprobados os catro proxectos presentados cun orzamento adxudicado de 356.419,09 euros e un total de 67 mobilidades aprobadas: 31 para Reino Unido, 13 para Irlanda, nove para Italia, nove para Finlandia e cinco para Portugal. As entidades locais beneficiarias son: a agrupación de concellos de Boqueixón, Vedra e Vila de Cruces, con 20 mobilidades de tres meses de duración; a agrupación de concellos Negreira- Val do Dubra con 18 mobilidades de tres meses de duración; a Mancomunidade de concellos de Ordes con 20 mobilidades de dous meses de duración; e o Concello de Ourense con nove mobilidades de dous meses de duración.

No apartado de axudas a entidades sen ánimo de lucro foron presentados 26 proxectos, dos que resultaron beneficiarios 15 cun orzamento adxudicado de 1.000.000 de euros e un total de 188 mobilidades aprobadas: 72 para Italia, 45 para Portugal, 23 para Irlanda, 12 para Bulgaria, 11 para Reino Unido, cinco para Malta, catro para Polonia, catro para Alemaña, catro para Francia, catro para Chipre e catro para República Checa.

Na modalidade de axudas individuais, recibíronse un total de 286 solicitudes, dos que resultaron beneficiarios 160 mozos e mozas cun orzamento adxudicado de 674.527,26 euros. Segundo o país de realización das prácticas, estes 160 mozos e mozas realizarán a súa mobilidade nun total de 18 países: 53 no Reino Unido; 38 en Portugal; 16 en Irlanda; 11 en Malta; 10 en Alemaña; cinco en Francia; cinco en Grecia; catro en Italia; tres en Bélxica, Países Baixos e Polonia, respectivamente; dous en Dinamarca e dous en Eslovaquia; e un respectivamente en Austria, Eslovenia, Hungría, Letonia e Suecia.

As axudas do programa Iniciativa Xove teñen como fin que a mocidade adquira unha serie de destrezas, aptitudes e competencias transversais que lles permitan unha doada transición cara as responsabilidades que deben asumir na vida adulta

No 2017, investíronse 545.000 euros destinados a apoiar a posta en marcha de 119 proxectos, dos que 61 desenvólvense na provincia da Coruña

A directora xeral de Xuventude, Participación e Voluntariado, Cecilia Vázquez, asistiu ao encontro aberto sobre participación xuvenil que se desenvolve no albergue xuvenil da REAJ Art Surf Camp en Carballo no marco do proxecto Camiñando xuntos da Federación ASDE Scouts de Galicia financiado a través do programa Iniciativa Xove. No encontro participan principalmente scouts e monitores de tempo libre con fin de traballar no eido da lexislación e seguridade nas actividades de tempo de lecer en Galicia.

O encontro enmárcase nun proxecto que ten como finalidade espertar a iniciativa e creatividade na mocidade para impulsar accións que melloren o noso entorno social máis próximo, así como fomentar a concienciación sobre a necesidade da implicación activa dos mozos e mozas como camiño para o liderado.

Ao abeiro deste proxecto realizáronse diversas actividades: unha campaña de difusión nas rúas sobre a importancia da doazón de sangue tratando de concienciar aos mozos e mozas; unha acampada na natureza para amosar á xuventude unha alternativa de ocio sá á vez que se traballa para mellorar o espazo natural e se abordan temas como a reciclaxe e o coidado do medio ambiente; un concurso de imaxe creativa Vida na natureza con recopilación de todas as fotos recibidas; e o encontro sobre participación xuvenil celebrado na xornada de hoxe.

Iniciativa Xove

As axudas do programa Iniciativa Xove teñen como fin fundamentalmente que os mozos que desenvolven os proxectos financiados a través do programa adquiran unha serie de destrezas, aptitudes e competencias transversais que lles permitan unha doada transición cara as responsabilidades que deben asumir na vida adulta, enfocándose especialmente en facilitar o seu acceso ao emprego.
Neste ano 2017 introducíronse novas áreas prioritarias a ter en conta positivamente na valoración dos proxectos de cara a seren apoiados pola Dirección Xeral, nomeadamente a promoción de hábitos saudables e prevención de condutas de risco ou violentas, a sensibilización e loita contra calquera forma de discriminación, a inclusión social e laboral dos colectivos con dificultades de integración ou especialmente vulnerables, a valorización do patrimonio cultural, o desenvolvemento e dinamización do medio rural e a dinamización da lingua galega entre a mocidade.

No 2017, investíronse 545.000 euros destinados a apoiar a posta en marcha de 119 proxectos, que xa se están levando a cabo ou o farán ao longo deste ano: 42 por parte de grupos informais de mozos/as, 32 de entidades asociativas de ámbito autonómico e 45 de entidades asociativas de ámbito provincial (17 da Coruña, 6 de Lugo, 10 de Ourense e 12 de Pontevedra).

Na provincia da Coruña se financian a través do programa Iniciativa Xove un total de 61 proxectos que supoñen un investimento de arredor de 277 mil euros.

No marco deste programa no 2017 fináncianse 25 proxectos presentados por concellos e entidades sen ánimo de lucro, que facilitarán a participación de 358 mozos e mozas

A directora xeral de Xuventude Participación e Voluntariado, Cecilia Vázquez Suárez, coñeceu de primeira man os proxectos de varias empresas locais que están a acoller a mozos e mozas participantes no proxecto promovido pola Asociación Centro Xuvenil Don Bosco no marco do programa Deseñando o teu futuro.

O proxecto, cun orzamento de 2.580 euros, permite que 15 mozos e mozas con idades comprendidas entre os 14 e 18 anos se acheguen á realidade do ámbito laboral con estancias visitas en distintas empresas sitas no barrio santiagués de San Pedro no que a Asociación Centro Xuvenil Don Bosco ten a súa sede: librería Pedreira, xeadería Xearte, Brigitte, Cosmomedia, Perruquería Crikas, Farmacia Arrojo, Como pez en el agua, Estudo de pilates e fisioterapia Mateo Martínez, Mononke e Perruquería Milenio. As estancias visitas con seis horas diarias teñen unha duración de quince días.

Cecilia Vázquez manifestou que “este proxecto impulsa o coñecemento e a integración da xuventude co comercio local tendo en conta que o tecido empresarial do barrio de San Pedro caracterízase por estar formado por pequenas empresas que abranguen varios sectores” como o da artesanía, comercio, hostalería, servizos, entre outros. Unha parte deste tecido é herdeiro de empresas familiares e outro son pequenas empresas de nova creación, máis vencelladas a nichos económicos dun contexto máis actual. “Neste proxecto destaca o compoñente persoal nos proxectos empresariais que se sumaron a esta iniciativa”, engadiu a titular autonómica

Aos efectos de desenvolvemento deste proxecto, a Asociación Centro Xuvenil Don Bosco conta con convenios de colaboración coa Asociación Veciñal A Xuntanza de Santiago de Compostela, a ANPA do Colexio Apóstolo Santiago e con catro centros de ensino santiagueses: o Colexio Compañía de María, o Colexio La Salle, o Colexio San Francisco Javier e o Colexio Plurilingüe Vilas Alborada.

O programa Deseñando o teu futuro é unha iniciativa piloto de educación non formal a través da cal mozos e mozas de entre 14 e 18 anos poden realizar pequenas estadías titorizadas en centros de traballo. Un proxecto de aproximación dos mozos e mozas galegos ao ámbito sociolaboral coa finalidade de que se acheguen á realidade das empresas mediante o desenvolvemento de estancias – visitas en distintos sectores das empresas.

A titular do departamento autonómico sinalou que “o programa Deseñando o teu futuro ofrécelle á mocidade ferramentas para o desenvolvemento das súas capacidades e ampliación das súas oportunidades”. Así mesmo, asegurou que “a participación nesta iniciativa supón camiñar cara maiores niveis de autonomía dos rapaces e rapazas, entendendo como tal a capacidade de dirixir por si mesmos os seus propios procesos persoais”, engadiu.

No marco deste programa no 2017 se financian 25 proxectos presentados por concellos e entidades sen ánimo de lucro, que facilitarán que un total de 358 mozos e mozas realicen estadías visitas en empresas.

As estadías visitas en empresas teñen unha duración mínima de cinco días e máxima de quince días hábiles e se establece unha xornada mínima diaria de catro horas. O número máximo de mozos participantes por proxecto non pode exceder de 15.

A cantidade subvencionable a cada entidade e concello ou agrupación de concellos se calcula a razón de seis euros por participante día, para cubrir os gastos de manutención e desprazamento do mozo ou da moza e 100 euros por participante para cubrir os custos derivados da organización das estadías-visitas.

 
I

Os obxectivos desta acción son traballar no desenvolvemento do seu empoderamento persoal e social e dotalos de ferramentas e habilidades sociais para favorecer a súa integración, entre outros 

A directora xeral de Xuventude Participación e Voluntariado, Cecilia Vázquez Suárez, participou hoxe nun taller de musicoterapia dentro das actividades que forman parte do intercambio xuvenil IntegrArte que reúne na Comunidade Autónoma de Galicia do 18 ao 29 de setembro a 21 mozos e mozas con discapacidade intelectual de Chipre, Portugal e España.

Este intercambio, organizado pola Asociación de acción Social, Educación Permanente e de Servicios á xuventude e á muller Tempus e cun orzamento de 18.680 euros, é un dos 21 proxectos de mobilidade aprobados en Galicia na primeira quenda do ano 2017 do programa europeo ‘Erasmus+: Xuventude en Acción’. Son socios do proxecto as entidades: Association of Parents and Friends of Children with Special Needs da localidade de Limassol (Chipre) e a Cooperativa de Educação e Reabilitação de Crianças Inadaptadas de Fafe (Portugal).

Os obxectivos deste proxecto son fomentar a integración social das persoas con discapacidade intelectual, traballar no desenvolvemento do seu empoderamento persoal e social; dotar aos participantes de ferramentas e habilidades sociais para favorecer a súa integración; traballar o sentimento de ser protagonistas do seu futuro e a autodeterminación das persoas con discapacidade intelectual e fomentar a tolerancia e erradicar prexuízos cara outras culturas e da propia discapacidade intelectual. Así mesmo pretende impulsar o espírito crítico e a análise social a través da alfabetización mediática; adentrar aos mozos e mozas participantes na cultura, a arte e a música como instrumentos de integración social; aprender a importancia da intelixencia emocional; e contribuír á concienciación dos valores e expectativas da Unión Europea e do programa Erasmus+.

Durante os 12 días de duración do proxecto IntegrArte, un grupo de mozos e mozas con idades comprendidas entre os 18 e 25 anos e con discapacidade intelectual (7 por país) están a experimentar con formación práctica, recursos e ferramentas para empoderarse como persoas autónomas e independentes, erradicar estereotipos e dar un paso cara a súa plena inclusión social. Así, están a compoñer a letra dunha canción que será a base dun videoclip como forma de reivindicar os seus dereitos e para a súa visualización en redes sociais e nos medios de comunicación.

Cecilia Vázquez sinalou que “un dos obxectivos do programa Erasmus+ é promover a equidade e a inclusión facilitando o acceso dos mozos e mozas que proceden de entornos desfavorecidos e con menos oportunidades”. “A mobilidade promove maiores oportunidades de aprendizaxe, de cidadanía, inclusión social e solidariedade e reforza vínculos entre os mozos participantes” engadiu a titular autonómica, ao tempo que asegurou que a participación en proxectos de educación non formal facilita a adquisición de competencias, aptitudes e habilidades que axudarán ao desenvolvemento persoal, educativo e profesional dos mozos.

A directora xeral de Xuventude, Participación e Voluntariado destacou que Galicia é unha das Comunidades Autónomas máis activas dentro do Erasmus+, tanto polo número de proxectos presentados e aprobados como nos fondos recibidos pola Unión Europea para contribuír ao financiamento da posta en marcha dos mesmos. O programa estrutúrase en tres accións clave: mobilidade das persoas por motivos de aprendizaxe; cooperación para a innovación e o intercambio de boas prácticas; e apoio ás reformas das políticas.

Nas dúas primeiras quendas do 2017 do programa Erasmus+: Xuventude en Acción foron aprobados 39 proxectos promovidos por concellos, grupos informais de mozos e mozas e asociacións xuvenís cun orzamento total de 677.832 euros, sen prexuízo dos proxectos aprobados noutros países europeos e nos que organizacións e mozos e mozas galegos participan activamente.

O programa europeo Erasmus+ para a educación, a formación, a mocidade e o deporte, con vixencia 2014 – 2020, ten entre os seus obxectivos específicos mellorar o nivel de aptitudes e competencias dos mozos e mozas; promover a participación na vida democrática en Europa e no mercado de traballo; a cidadanía activa; o diálogo intercultural; a inclusión social e a solidariedade; posibilitar ás persoas que traballan no ámbito da xuventude e aos mozos e mozas maiores oportunidades de mobilidade por motivos de aprendizaxe; potenciar a dimensión internacional das actividades xuvenís e o papel dos traballadores e organizacións no eido da xuventude como estruturas de apoio aos mozos e mozas.

A titular do departamento autonómico sinalou que “Erasmus+ é un dos proxectos de maior éxito da Unión europea. Durante tres décadas ven ofrecendo, en particular aos mozos e mozas, oportunidades de adquirir experiencias e de ampliar os seus horizontes viaxando ao estranxeiro”. O que comenzou no ano 1987 como un modesto programa de mobilidade para estudantes de educación superior creceu e enriqueceu as vidas de máis de 9 millóns de participantes directos. “Durante tres décadas ven ofrecendo, en particular aos mozos e mozas, oportunidades de adquirir experiencias e de ampliar os seus horizontes viaxando ao estranxeiro”, engadiu a directora xeral.

Cecilia Vázquez rematou a súa intervención lembrando que “ao longo do ano 2017, baixo o lema ‘De Erasmus a Erasmus+: 30 anos de historia’ estanse a celebrar actos a escala europea, nacional e local que relatarán a historia do programa Erasmus+ e dos seus predecesores nos últimos 30 anos. 

A Directora xeral de Xuventude, Participación e Voluntariado, Cecilia Vázquez, entrega os diplomas de asitencia aos participantes no curso de Información Xuvenil, desenvolto no Centro coordinador de información xuvenil.