En portada (1108)

No marco do programa “A Xuventude no mundo” ao abeiro das relacións bilaterais que a Xunta de Galicia mantén con entidades doutros países, a Dirección Xeral de Xuventude, Participación e Voluntariado da Consellería de Política Social convoca tres intercambios xuvenís:

cadro1

 

 

 

 

Obxectivos: facilitar o coñecemento doutras realidades socioculturais e lingüísticas para a comprensión da diversidade cultural e favorecer e potenciar a adquisición de habilidades e competencias non formais que faciliten o desenvolvemento persoal dos mozos e mozas.

Destinatarios/as: mozos e mozas galegos residentes en Galicia con idades comprendidas entre os 18 e 30 anos no momento de realizarse o intercambio.
Non poderán participar no/s intercambio/s, os mozos e mozas que participaran noutro intercambio ao mesmo país no marco do programa A Xuventude no mundo nos últimos tres anos (2017-2019). Así, neste caso, poderán participar nos intercambios a un país diferente do que xa participaran nos referidos tres últimos anos.

Prazo de inscrición: do 5 ao 10 de febreiro de 2020. (Pechado o prazo de inscrición)
Inscrición:  mediante envío de formulario electrónico dentro do prazo establecido. Só se admitirá unha solicitude por participante.
Os erros nos datos facilitados na solicitude de participación ou a omisión dalgún deles pode ocasionar a desestimación da solicitude.
Admítese a inscrición nos tres intercambios, tendo en conta os requisitos de participación en cada un deles. No caso de inscrición dobre ou tripla o/a solicitante deberá indicar a orde de preferencia de participación.

Admisión: será por rigoroso orde de inscrición, ata cubrir a totalidade de prazas convocadas para o intercambio. Os/as solicitantes seleccionados/as recibirán un correo electrónico de confirmación da praza. Unha vez finalizado o prazo de inscrición, de non recibir comunicación nos tres días seguintes, entenderase que non obtivo praza.
No caso de que unha persoa solicite participar en dous ou tres intercambios, a admisión nun intercambio exclúe a admisión nos outros, salvo que non se cubran as prazas destes últimos.
De producirse baixas despois de adxudicarse as prazas, ofertaránselle aos/as solicitantes da lista de agarda, tendo que presentar o billete e demais documentación nos 5 días (naturais) seguintes da comunicación.
No caso de que o billete de transporte adquirido fose anulado posteriormente a súa remisión á Dirección Xeral de Xuventude, Participación e Voluntariado, a praza para o intercambio será anulada e considerada non adxudicada.
Recibidos correctamente os documentos requiridos, aos seleccionados/as seralles facilitado, posteriormente, o nome do/a coordinador/a que acompañará ao grupo, así como o lugar de encontro no lugar de realización do intercambio.
Realizarase o intercambio se existe un mínimo da metade das prazas convocadas para cada un.

Documentación a remitir: confirmada a praza, nos 5 días (naturais) seguintes, as persoas seleccionadas deberán remitir a galeuropa@xunta.gal:
1. Documentación xenérica para os tres intercambios:
- Unha copia do/s billete/s de transporte adquirido/s para desprazarse ata a cidade do país de realización do intercambio. Non é documento válido a/s reserva/s de voo ou medio de transporte elixido.
- Copia do Documento Nacional de Identidade.
2. Documentación específica para os tres intercambios:
a) Unha copia do seguro de viaxe, de accidentes e de enfermidade.
Para acreditar cobertura de viaxe e accidentes a Venecia admítese copia do Carné Xove.
Para acreditar asistencia sanitaria admítese copia Tarxeta Sanitaria Europea ou certificado sustitutorio.
A non remisión destes documentos no prazo establecido supón a perda da praza no intercambio.
No caso de que a persoa seleccionada queira xestionar a súa viaxe con outras persoas participantes no intercambio deberá autorizar á Dirección Xeral de Xuventude, Participación e Voluntariado a facilitar os seus datos de contacto aos demais participantes, cumprimentado o cadro  habilitado a tal efecto no formulario de inscrición.
b) Unha copia do pasaporte, no caso do intercambio a Xapón.

INTERCAMBIO XUVENIL A VENECIA (ITALIA)

Título:  “Venecia, Patrimonio Mundial”.
Datas de realización do intercambio:   do 2 ao 9 de xullo  de 2020. É obrigatorio participar no intercambio a totalidade dos días.
Prazas:  20 (acompañados/as dun/ha/s coordinador/a/s).
Cobertura do intercambio:
- Aloxamento en réxime de pensión completa en cuarto de uso múltiple.
- Transporte no ámbito do intercambio.
- Actividades organizadas pola entidade de acollida.
Será a cargo do/a participante:
- Os gastos de desprazamento ata o lugar de aloxamento do intercambio en Italia. Nos días anteriores ao inicio do intercambio comunicarase ás persoas participantes o lugar de aloxamento en Venecia.
- Os gastos do seguro de viaxe, de accidente e de enfermidade.
Actividades provisionais previstas:  entre outras, actividades de ocio educativo e culturais, visita á Basílica e Praza de San Marcos, ao Palacio Ducal, illas de Murano e Burano, ao Teatro La Fenice, Museo de Historia Natural, workshops, encontros con mozos e mozas venecianos/as e cea intercultural.
Recomendación de aeroportos máis pretos para chegar ao lugar de destino do país de realización do intercambio:
- Aeroporto Internacional Marco Polo - Venecia.
- Aeroporto de Sant´Angelo – Treviso.

INTERCAMBIO XUVENIL A TBILISI (XEORXIA)

Título:  “Encontro entre culturas”.
Datas de realización do intercambio:  do 13 ao 20 de xullo de 2020. É obrigatorio participar no intercambio a totalidade dos días.
Prazas:  20 (acompañados/as dun/ha/s coordinador/a/s).
Cobertura do intercambio:
- Aloxamento en réxime de pensión completa en cuarto de uso múltiple.
- Transporte no ámbito do intercambio.
- Actividades organizadas pola entidade de acollida.
Será a cargo do/a participante:
- Os gastos de desprazamento ata o lugar de aloxamento do intercambio en Xeorxia. Nos días anteriores ao inicio do intercambio comunicarase ás persoas participantes o lugar de aloxamento en Tbilisi.
- Os gastos do seguro de viaxe, de accidente e de enfermidade.
Actividades provisionais previstas:  entre outras, actividades de ocio educativo e culturais, visita a Mtskheta, Capital antigua de Xeorxia, o Museo Nacional, a Universidade Agraria, Catedral de Svetitskhoveli, Monasterio de Shiomgvime, Tblisi antiguo. Catedral “Sameba”, Castelo de Narikala, Baños vellos, Igrexa “Sioni”, Visita a Mtasminda e Mama Daviti, entre outros lugares.
Recomendación de aeroporto máis preto para chegar ao lugar de destino do país de realización do intercambio:
- Aeroporto de Tbilisi.

INTERCAMBIO XUVENIL Á PREFECTURA DE WAKAYAMA (XAPÓN)

Título:  “O Camiño  Kumano Kodo irmandado co Camiño de Santiago”.
Datas de realización do intercambio:  do 16 ao 22 de xullo de 2020.
Observacións:
O 16 de xullo, entre as 17.00 h e as 18.00 horas (hora xaponesa) todos os mozos e mozas participantes deberán estar  no punto de encontro sinalado no aeroporto de Kansai - Wakayama.
É obrigatorio participar no intercambio a totalidade dos días, é dicir, ata o 22 de xullo.
Prazas:  20 (acompañados/as dun/ha coordinador/a).
Cobertura do intercambio:
- Aloxamento en réxime de pensión completa en cuarto de uso múltiple.
- Trasporte no ámbito do intercambio.
- Actividades organizadas pola entidade de acollida.
Será a cargo do/a participante:
- Os gastos de desprazamento ata o lugar de aloxamento do intercambio en Xapón.
- Os gastos do seguro de viaxe, de accidente e de enfermidade.
Actividades provisionais previstas:  percorrido un tramo do Camiño Kumano Kodo, visita a lugares tradicionais da cultura xaponesa, encontros con mozos e mozas xaponeses,  audiencia con autoridades.
Reunión previa á saída:  Os /as mozos/as seleccionados/as serán convocados a unha reunión preparatoria do intercambio previo ao inicio do intercambio, no día e lugar que determine a Dirección Xeral de Xuventude, Participación e Voluntariado. A asistencia será obrigatoria, agás causa de forza maior debidamente xustificada. A data de realización desta reunión será comunicada por correo electrónico con antelación suficiente.
Recomendación de aeroporto máis preto para chegar ao lugar de destino do país de realización do intercambio:  Aeroporto de Kansai.

FORMULARIO DE INSCRICIÓN  (Pechado o prazo de inscrición)

Máis información na Dirección Xeral de Xuventude, Participación e Voluntariado, teléfono 981 545 702
galeuropa@xunta.gal

 

CUMPRIMENTO DA NORMATIVA DE PROTECCIÓN DE DATOS

Os datos persoais recadados neste programa serán tratados na súa condición de responsable pola Consellería de Política Social coas finalidades de levar a cabo a tramitación administrativa que se derive da xestión deste programa.
O tratamento dos datos baséase no cumprimento dunha misión de interese público ou no exercicio de poderes públicos, conforme as referencias recollidas en https://www.xunta.gal/informacion-xeral-proteccion-datos.
A Dirección Xeral de Xuventude, Participación e Voluntariado comprométese ao cumprimento da súa obriga de segredo dos datos de carácter persoal e adoptará todas as medidas técnicas e de seguridade para asegurar a confidencialidade dos devanditos datos, así como evitar a súa alteración, perda, tratamento ou acceso non autorizado, habida conta, en todo momento, do estado da tecnoloxía.

O Instituto Galego da Vivenda e Solo convoca axudas á mocidade para a adquisición de vivenda:

- Subvencións para a adquisición de vivenda en concellos de menos de 5.000 habitantes.
- Subvencións para a adquisición de vivenda nos centros históricos.

Requisitos das persoas mozas:
Persoas maiores de idade que, tendo menos de 35 anos na data de presentación da solicitude, reúnan os seguintes requisitos:
1. Posuír a nacionalidade española ou, no caso de seren estranxeiras, ter a residencia legal en España.
2. Que os ingresos anuais das persoas que compoñen a súa unidade de convivencia sexan iguais ou inferiores a tres veces o IPREM*.
Este límite será de catro veces o IPREM se se trata dunha familia numerosa de categoría xeral ou se dentro da súa composición existen persoas cunha discapacidade distinta das sinaladas a continuación. O referido límite será de cinco veces o IPREM cando sexa unha familia numerosa de categoría especial ou na súa composición existan persoas con algunha das seguintes discapacidades:
  - Parálise cerebral, enfermidade mental, discapacidade intelectual ou discapacidade do desenvolvemento, cun grao de discapacidade recoñecido igual ou superior ao 33 %.
  - Discapacidade física ou sensorial, cun grao de discapacidade recoñecido igual ou superior ao 65 %.
3. Que a persoa solicitante e as demais persoas integrantes da súa unidade de convivencia estean empadroadas na vivenda adquirida no momento de presentación da correspondente solicitude, para o caso de dispoñer de escritura pública de compravenda formalizada con anterioridade á data da presentación da correspondente solicitude.
4. Que nin a persoa solicitante nin ningunha das persoas integrantes da súa unidade de convivencia sexan propietarias ou usufrutuarias dalgunha vivenda en territorio español.
5.  Ter subscrito con posterioridade ao 1 de xaneiro de 2020 un contrato privado ou, de ser o caso, unha escritura pública de adquisición dunha vivenda, que reúna os seguintes requisitos:

Requisitos da vivenda:
1. Que a vivenda estea localizada nun concello pertencente ao territorio da Comunidade Autónoma de Galicia de menos de 5.000 habitantes, (procedemento VI435A)
2. Que a vivenda estea situada no ámbito dun centro histórico, (procedemento VI400A)
3. Que se trate dunha vivenda xa construída, tanto vivenda nova como usada.

Requisitos do prezo de adquisición da vivenda:
1. Que o prezo de adquisición da vivenda, nun concello de menos de 5.000 habitantes, incluídos os seus anexos, sen os gastos e tributos inherentes a ela, sexa igual ou inferior a cen mil euros.
2. No caso de subvencións para a adquisición de vivenda en centros históricos, que o prezo de adquisición da vivenda, no caso de que estea situada no ámbito dun centro histórico dos concellos da Coruña, Ferrol, Santiago de Compostela, Lugo, Ourense, Pontevedra e Vigo, non supere o prezo máximo previsto para as vivendas de protección autonómica de réxime concertado nos municipios de prezo máximo superior, computando unha superficie útil de 120 m² e sen incluír os gastos e tributos inherentes á dita adquisición. Este prezo máximo incrementarase nun 8 % no suposto de dispoñer de garaxe e nun 2 % no suposto de dispoñer de rocho.

As solicitudes tramitaranse preferiblemente en https://sede.xunta.gal/portada cos procedementos VI435A e VI400A
O prazo de presentación de solicitudes estará aberto ata o o 30 de setembro de 2020
Máis información no DOG do 4 de febreiro e en http://igvs.xunta.gal/

*IPREM: 537,84 €

A Dirección Xeral de Xuventude, Participación e Voluntariado convoca subvencións dirixidas a entidades de acción voluntaria e a entidades locais enmarcadas no programa Servizo de Voluntariado Xuvenil, que realicen proxectos desde o 1 de xaneiro ata o 31 de outubro de 2020. As acción voluntarias dentro deste proxetos deberán ser desenvoltos por mozos/as de idades comprendidas entre os 16 e os 30 anos.

Este programa consiste en incorporar ás entidades de acción voluntaria e ás entidades locais inscritas no Rexistro de Acción Voluntaria de Galicia, mozos/as galegos/as para a súa colaboración como voluntarios/as na realización dos proxectos de voluntariado

Proxectos subvencionables
Serán subvencionables os proxectos de acción voluntaria presentados por entidades de acción voluntaria e entidades locais sempre que a dita acción voluntaria a desenvolvan mozos/as de idades comprendidas entre os 16 e os 30 anos; para os menores de 18 anos precísase, ademais, autorización do pai/nai ou titor/a legal, e que se realicen no ámbito territorial da Comunidade Autónoma de Galicia, prioritaria pero non exclusivamente, nalgunha das seguintes áreas:
a) Actividades relacionadas co Camiño de Santiago.
b) Actividades de recuperación da cultura/arte/tradicións populares galegas.
c) Actividades con colectivos en situación de risco.
d) Actividades xuvenís.
e) Actividades ambientais.
f) Actividades relacionadas coa igualdade de xénero ou actuacións dirixidas a proxectos ou programas que desenvolvan medidas orientadas á prevención e sensibilización en materia de violencia de xénero.
g) Posta en marcha de programas de voluntariado no ámbito familiar por parte das entidades.
h) Actividades relacionadas coa posta en valor do medio rural.
i) Actividades relacionadas co benestar das persoas maiores.

Os proxectos de acción voluntaria subvencionables deberán ter unha duración comprendida entre 15 e 60 días desde o 1 de xaneiro ata o 31 de outubro de 2020. As xornadas diarias serán de 6 horas como mínimo e se son inferiores sumaranse as horas diarias ata completar xornadas de 6 horas.

Requisitos:
- Que as entidades de acción voluntaria e as entidades locais estean legalmente constituídas e inscritas no Rexistro de Acción Voluntaria de Galicia.
- Ter sede permanente ou domicilio social en Galicia e desenvolver os programas subvencionables na Comunidade Autónoma galega a través de voluntarias ou voluntarios.
- Ter debidamente contratados todos os seguros de responsabilidade civil e de accidentes de todas as persoas voluntarias.

Os trámites presentaranse en http://sede.xunta.es co procedemento BS320A
O prazo para a presentación das solicitudes estará aberto ata o 3 de marzo de 2020.
Máis información no DOG do 3 de febreiro de 2020 e en www.voluntariadogalego.org

Lingua rodada

Xan 16, 2020

Lingua rodada é unha iniciativa promovida pola Secretaría Xeral de Política Lingüística da Consellería de Cultura e Turismo coa finalidade de potenciar o uso e a valoración positiva do galego entre as xeracións máis novas, en consonancia co Plan de dinamización da lingua galega na mocidade.

Para acadar este obxectivo é evidente a importancia as tecnoloxías da información e da comunicación, a Internet, as redes sociais e os recursos audiovisuais, ao seren do gusto das xeracións novas, todas elas nativas dixitais.

Con esta proposta, os rapaces e rapazas crearán vídeos baseados en pequenos relatos para plasmaren a esencia da nosa terra: a súa fala, a súa xente e os seus costumes, lendas, paisaxes, patrimonio, historia...

Poderá participar alumnado de 12 a 17 anos dos centros de titularidade da Consellería de Educación, Universidade e Formación Profesional que curse ensinanzas de educación secundaria (ESO, 1.º de bacharelato, formación profesional básica e ciclos formativos de grao medio) e especiais de grao medio con vídeo-relatos de ata 1:30 min de duración, gravados con aparellos móbiles.

- A 1.ª fase iniciarase cunha proba de selección aberta (casting) na que se elixirán os tres mellores vídeo-relatos enviados polos centros. O prazo de inscrición será do 10 de xaneiro ao 3 de febreiro, e o de envío dos traballos, do 4 de febreiro ao 4 de marzo de 2020.
- Na 2.ª fase, os tres centros finalistas da proba de selección recibirán un obradoiro de 3 h de duración, entre o 11 e o 13 de marzo, e enviarán un novo vídeo-relato a linguarodada@gmail.com entre o 16 de marzo e o 22 de abril, O xurado de Lingua rodada elixirá o audiovisual gañador.
- Na 3.ª fase, o alumnado participante na obra gañadora terá a oportunidade de rodar o seu vídeo-relato cun equipo de profesionais do audiovisual durante unha convivencia de dous días no rural galego, e de asistir á súa presentación na XVII Edición do Festival de Cans.

Este programa é tamén unha pequena homenaxe a Chano Piñeiro, un dos pioneiros do cinema galego, no 25 aniversario do seu pasamento. En 2020 tamén se farán 30 anos da estrea en Galicia de Sempre Xonxa e 35 da primeira emisión da TVG, que comezou en xullo de 1985 con Mamasunción, unha obra que ese ano ampliaría o seu palmarés cunha chea de premios en certames nacionais e internacionais.

Nas súas palabras, "facer cine en Galicia é posible e facer cine en galego é necesario".

https://www.lingua.gal/a-secretaria-xeral/convocatorias/_/Premios/convocatoria_0101/lingua-rodada

A Tarxeta Xente Nova é a tarxeta de transporte metropolitano de Galicia que permite realizar viaxes interurbanas gratuítas.

Quen a pode utilizar?
Mozos de entre 4 e 20 anos, porque os menores de 4 anos xa viaxan gratis no transporte interurbano. Cando cumpras 21 poderás seguir usando a tarxeta ata que se esgote o saldo.

En que liñas de transporte se pode usartarxetaxentenova
Área da Coruña
Área de Santiago
Área de Ferrol
Área de Lugo
Área de Vigo

Como conseguila?
Solicita cita nesta páxina: https://solicitudonline.abanca.com/Tarjetas/gl/txn
Ao facilitar os datos que se solicitan xerarase unha cita na oficina Abanca máis próxima. Non é necesaria unha conta asociada.
Unha vez alí, só necesitarán o teu DNI. A tarxeta é gratuíta. Lembra que, se aínda non cumpriches os 18 anos, deberá solicitala o teu representante legal, que, xunto co teu DNI, só terá que levar o seu DNI e o libro de familia ou documentos equivalentes.
Hai que cargar a tarxeta antes de poder viaxar con ela.

Como recargala?
En todas as oficinas e caixeiros de Abanca.
En efectivo ou con tarxeta de dédito de Abanca. Con tarxetas de crédito ou doutras entidades poden existir comisións bancarias.
Banca Móbil e/ou Banca Electrónica de Abanca: podes recargala desde o móbil ou o ordenador, e introducila en calquera caixeiro Abanca para que a carga se faga efectiva.

Como viaxar con ela?
Para recibir a túa bonificación só deberás introducir a tarxeta en calquera caixeiro Abanca e automaticamente recibirás o aboamento das viaxes realizadas.
Todas as viaxes interurbanas reembolsaranse cada 15 días, ata un máximo de 60 viaxes mensuais.
Para recibir a túa bonificación só tes que introducir a túa tarxeta en calquera caixeiro de ABANCA e aceptar o reintegro. Automáticamenete recibirás o aboamento das viaxes realizadas.
O importe dos reembolsos cargaranse segundo a tarifa aplicada en cada momento.

Se queres aclarar algunha dúbida podes facelo no enderezo tmg@xunta.gal

Máis información en https://tmg.xunta.gal/xente-nova-que-e

Canal de WhatsApp Xuventude

Se tes entre 18 e 30 anos seguro que sabes que podes beneficiarte de numerosos descontos en comercios, actividades de ocio e transportes grazas ao Carné Xove. Seguro que sabes que podes acceder a bolsas para os teus estudos, para realizar prácticas formativas en Europa e mesmo viaxes a países tan interesantes como Xapón. Seguro que tamén coñeces os premios, certames e concursos nos que recoñecemos a creatividade e o talento xuvenil. E, por suposto, sabes que tes ao teu alcance numerosas accións de voluntariado e que mesmo podes desfrutar de estadías de fin de semana no rural galego cargadas de aventuras... ¿Ou non o sabías?

Se non sabías nada disto ou, se aínda coñecendo toda esta oferta, queres apuntarte antes que ninguén, esta mensaxe seguro que che interesa.

En breve, desde a Xunta de Galicia, a través da Dirección Xeral de Xuventude, Participación e Voluntariado da Consellería de Política Social, poñeremos en marcha por primeira vez un canal de WhatsApp a través do cal daremos a coñecer todos os programas, novidades e futuras accións nas que podes participar como persoa nova. Ao mesmo tempo, responderemos tamén a todas as túas dúbidas, preguntas e inquedanzas.

Para poder sumarte a esta iniciativa precisamos o teu consentimento expreso, simplemente enviando un mail ao enderezo: xuventude-informacion.politicasocial@xunta.gal, indicándonos o teu número de móbil.

No asunto debes poñer: WhatsApp de Xuventude.

Esperamos recibir pronto noticias túas.

No DOG do 14 de xaneiro de 2020 a Dirección Xeral de Xuventude, Participación e Voluntariado publica as subvencións concedidas ás entidades locais de Galicia para a posta en marcha de iniciativas locais dirixidas á xuventude durante o ano 2019.

https://www.xunta.gal/dog/Publicados/2020/20200114/AnuncioG0425-030120-0017_gl.html

A Consellería de Economía, Emprego e Industria convoca o programa Emprega Xuventude coa finalidade de facilitar a inserción laboral das persoas mozas menores de 30 anos desempregadas que presentan desvantaxes e dificultades particulares para permaneceren no mercado de traballo, favorecer o emprego estable e facilitar a empregabilidade e ocupabilidade.

Por medio desta convocatoria as empresas terán a posibilidade de obter axudas para a contratación indefinida inicial, a contratación temporal cunha duración inicial mínima de 12 meses e formación por conta allea

Inclúense dous tipos de axuda compatibles:

- Bono de contratación, por medio do cal se proporcionará unha subvención para a contratación indefinida inicial e a temporal, cunha duración mínima inicial de doce meses, das persoas desempregadas mozas menores de 30 anos.
- Bono de formación (opcional), dirixido ás persoas contratadas por medio desta orde, para levar a cabo accións formativas que melloren os seus coñecementos e habilidades relacionados co posto de traballo

Prazos:
- As solicitudes de axudas polas contratacións realizadas entre o 1 de outubro de 2019 e a data da publicación destas axudas deberán presentarse antes do 9 de marzo de 2020.
- As axudas previstas polas contratacións subvencionables realizadas desde a entrada en vigor desta orde deberán solicitarse ata o último día do segundo mes seguinte á data en que se inicie a relación laboral indefinida ou temporal pola cal se solicita subvención.

O prazo para a presentación das solicitudes de axudas estará aberto ata o 30 de setembro de 2020.  

As solicitudes están dispoñibles en https://sede.xunta.gal co código TR349T
Máis información no DOG do 7 de xaneiro de 2020 e en http://emprego.ceei.xunta.gal/portada-conselleria

O equipo Login Gaming Bar, clasificado previamente no Espazo Xove de Tui, resultou o gañador do primeiro torneo autonómico de League o Legends (LOL) organizado pola Xunta de Galicia, en colaboración coa Asociación La Grotta, nos 12 Espazos Xoves pertencentes á Administración autonómica. Esta fin de semana celebrouse a fase final deste torneo no recinto da Feira Internacional de Galicia, en Silleda. No encontro definitivo impúxose ao equipo OTPS+ do Espazo Xove de Betanzos.

Os cinco integrantes do equipo gañador son: Martín García Pérez, Diego Ribas González, Diego López López, Javier Carrera Rodríguez e Tomás Campelos Fernández. Pola súa banda, os nomes dos subcampións son: Manuel Lechuga Meirás, Antón Rodríguez García, Óscar Lenin Veloso Varela, Sergio Andrade Portela e Jesús Molinero Vázquez.

En canto aos premios do torneo, cada membro do conxunto vencedor recibiu unha tarxeta de Riot Points valorada en 100 euros cada unha. Os compoñentes do equipo que quedaron en segunda posición recibiron material de promoción da Consellería de Política Social. Así mesmo, todos os gastos de manutención, transporte e aloxamento durante esta fase final correron a cargo da organización.

A directora xeral de Xuventude, Participación e Voluntariado, Cristina Pichel, que asistiu á fase final da competición acompañada do director do recinto feiral, Ricardo Durán, destacou a boa acollida desta primeira edición. O evento desta fin de semana reuniu en Silleda a 80 mozas e mozos de diferentes municipios de toda Galicia. Cristina Pichel subliñou o feito de que as fases previas do torneo se desenvolveran nos 12 Espazos Xoves que conforman a rede pública autonómica, de modo que se conseguiu implicar na iniciativa á xente nova da zona na que se emprazan estes Espazos e da súa contorna. Tamén sinalou que este evento procura promover o coñecemento, a formación e o ocio arredor dos videoxogos, así como xerar comunidade e promover a súa visibilidade social.

Pola súa banda, o responsable do recinto feiral, Ricardo Durán, sinalou que a Dirección Xeral de Xuventude, R e a Feira Internacional de Galicia Abanca teñen unha especial relación co mundo dos videoxogos: pola XGN R Encounter e, desde agora, por este campionato autonómico de League of Legends. Ao respecto, apuntou que “a nosa intención é a de seguir organizando eventos en torno aos videoxogos, que son a parte social que lle faltaba a todo este movemento lúdico global, que chegou para quedarse, e do que queremos formar parte”.

Dezaseis equipos finalistas

Durante as xornadas do sábado e a do domingo, 16 equipos competiron nesta fase final. Estes procederon dos Espazos Xoves de Betanzos, Curtis, Noia, Pontedeume, Viveiro, Chantada e Tui, que contaron cada un deles cun equipo clasificado. Pola súa banda, das localidades de maior poboación que teñen Espazo Xove –Carballo, Lalín, Ourense e Vilagarcía- chegaron a esta fase final dous equipos por ámbito xeográfico.

Cada un dos 16 equipos clasificados estivo formado por cinco mozas e mozos, con idades comprendidas entre os 18 e os 30. Todos eles dispuxeron de transporte de ida e de regreso aos Espazos Xoves dos que saíron, aloxamento e manutención de balde a cargo da Administración autonómica. No que atinxe ao aloxamento, os equipos puideron facelo nun pavillón do recinto de Silleda, provistos da súa propia tenda de acampada, saco de durmir e útiles de aseo. Tamén tiveron acceso a duchas e lavabo. Por último, a manutención incluíu os servizos de xantar e cea do sábado, así como o almorzo e xantar de hoxe.

O público que asistiu a esta fase final do I Torneo Autonómico de League of Legends (LOL) tivo a ocasión de seguir a competición na pantalla do escenario principal. A conexión a internet e os equipos informáticos que empregaron durante esta fase final foron subministrados pola compañía R.

final3

final1final2final4final6final7

A directora xeral de Xuventude, Participación e Voluntariado, Cristina Pichel, asistiu ao evento de inicio de curso do I Encontro de correspondentes xuvenís deste ano 2019/2020 que tivo lugar durante a fin de semana do 13, 14 e 15 de decembro no complexo xuvenil As Mariñas e no que participaron máis de 250 mozas e mozos de toda Galicia inscritos neste programa. Alí poideron compartir experiencias e comprobar como organiza cada centro a difusión da información entre as súas compañeiras e compañeiros.

Durante esta fin de semana os participantes poideron participar en distintos obradoiros para o deseño dunha curtametraxe ou o uso responsable das redes sociais, así como actividades de ocio como xogos cooperativos, stop motion, lipdub ou danzas do mundo e expresión corporal.

Mediante esta iniciativa, a Consellería de Política Social facilita unha rede xuvenil para que a mocidade poida difundir nos seus centros de ensino programas e información de interese xuvenil, sobre todo aqueles programas que a Xunta de Galicia ofrece aos mozos e mozas galegas. Durante este curso 2019/2020 o número de correspondentes supera os 850. Trátase dunha cifra similar á rexistrada durante o curso pasado.

Estes correspondentes reciben gratuitamente o carné xove, o carné internacional e o carné de alberguista durante o ano escolar no que están como correspondentes. Ademais, recoñéceselles mediante un certificado de educación non formal expedido pola Administración autonómica o tempo dedicado ás actividades como persoas voluntarias.

Máis fotos do Encontro

C 26C 28E 5E 7E 11E 12E 13E 18E 21E 22E 23E 27E 30E 32E 33E 38E 40E 43E 46E 47E 51E 52E 53E 56E 58E 60E 72E 74E 75E 81E 82E 83E 84E 87E 90C 33C 37C 50C 54C 61C 65C 68E 1E 2

C 7C 11C 22