A formación acreditable permitirá aos alumnos dispoñer dun certificado con carácter oficial e validez estatal
Esta é unha demanda pola que veñen loitando, a nivel do Estado, todos os profesionais da información xuvenil desde o ano 1983
O prazo de inscrición para participar neste procedemento será do 1 ao 31 de marzo de 2013
Neste procedemento poderán obter o certificado de profesionalidade os que acrediten as catro unidades de competencia das que consta, ou obter una acreditación parcial, mediante a acreditación dalgunha unidade de competencia
A Consellería de Traballo e Benestar, a través da Dirección Xeral de Formación e Colocación, publicou no DOG do pasado venres a convocatoria do procedemento de recoñecemento das competencias profesionais para os informadores xuvenís, converténdose así na primeira Comunidade de España que lle vai a facilitar a posibilidade aos técnicos da información xuvenil de obter un certificado de profesionalidade.
A formación acreditable permitirá aos alumnos dispoñer dun certificado con carácter oficial e validez estatal, que, ao mesmo tempo, terá efectos académicos no eido do sistema educativo e profesionais recoñecidos na lexislación vixente.
Esta é unha demanda pola que veñen loitando, a nivel do Estado, todos os profesionais da información xuvenil desde o ano 1983 no que tivo lugar o primeiro encontro de información xuvenil en Murcia, e que se ven reclamando nos sucesivos encontros estatais que teñen lugar cada dous anos desde esa data.
A cualificación profesional de informador xuvenil recoñeceuse no Catálogo Nacional de Cualificacións Profesionais, dentro da familia profesional servizos socioculturais e a comunidade, publicándose no BOE do 9 de maio de 2011, mentres que o certificado de profesionalidade publicouse no BOE do 10 de decembro de 2011.
Con este procedemento de recoñecemento de competencias profesionais, Galicia convértese na primeira comunidade autónoma en ofrecerlle a posibilidade aos técnicos que levan un mínimo de tres anos traballando neste eido, cun mínimo de 2.000 horas traballadas en total nos últimos 10 anos, de obter o certificado de profesionalidade a través da acreditación das súas competencias, adquiridas pola súa experiencia laboral ou pola formación obtida a través da educación non formal (xustificaranse polo menos 300 horas nos últimos 10 anos).
Neste procedemento poderán obter o certificado de profesionalidade os que acrediten as catro unidades de competencia das que consta, ou obter una acreditación parcial, mediante a acreditación dalgunha unidade de competencia, podendo posteriormente adquirir as outras.
O prazo de inscrición para participar neste procedemento será do 1 ao 31 de marzo de 2013.
A Xunta está a colaborar coa Fundación Paideia no proxecto de mobilidade ‘La Ida’, que permite a mozos e mozas galegos a oportunidade de desenvolver prácticas laborais en Alemaña. A Consellería de Traballo e Benestar financia este ano un total de 10 prazas desta iniciativa, a través de Galeuropa, un programa da Dirección Xeral de Xuventude destinado á realización de prácticas laborais durante catro semanas en 6 países diferentes e que oferta 50 prazas.
A conselleira de Traballo e Benestar, Beatriz Mato, e a presidenta da Fundación Paideia, Rosalía Mera, avanzaron hoxe que a finais desta semana partirán cara á Augsburgo os 10 mozos e mozas galegos, ao tempo que despediron en Outes a 11 mozos alemáns que veñen realizando prácticas en diferentes empresas das comarcas de Barbanza, Sar, Muros e Noia.
Mato destacou que Galeuropa, no que se enmarca o proxecto La Ida, conta cun orzamento de 85.000 euros. Os mozos e mozas poden realizar as prácticas, ademais de en Alemaña, na República Checa, Hungría, Polonia, Irlanda e Holanda.
A titular de Benestar destacou que esta iniciativa forma parte da aposta do Goberno galego polos programas de mobilidade, xa que lembrou que a propia Comisión europea ten sinalado que este tipo de plans son un dos instrumentos “máis efectivos” para combater o desemprego xuvenil e para desenvolver as capacidades e a autonomía dos mozos e mozas.
“Desde o Goberno autonómico traballamos para poñer en marcha medidas que creen oportunidades de presente e futuro para a nosa mocidade”, apuntou Mato. Neste senso, sinalou que os programas de mobilidade son “un piar das nosas políticas en materia de xuventude” e, por iso, indicou que a mobilidade é un dos nove eixos do Plan Estratéxico de Xuventude 2010-2012, un plan transversal coordinado e consensuado coas asociacións xuvenís.
A través deste plan, Xuventude ten ofrecido preto de 9.000 prazas nos distintos programas de mobilidade xuvenil como son Xuventude en Acción, Leonardo da Vinci, Xuventude no Mundo, Imaxina Atlántica, campamentos de verán ou campos de traballo. A estas iniciativas, o departamento autonómico está a investir un total de 2,9 millóns de euros.
Por último, a conselleira explicou que este tipo de programas permiten aumentar as posibilidades dos mozos e mozas á hora de conseguir un emprego, mellorar a súa competencia en idiomas estranxeiros, asumir responsabilidades e tomar decisións e, por último, apuntou que lles axuda a seguir crecendo en valores de respecto e tolerancia.
A Xunta de Galicia, a través da Dirección Xeral de Xuventude e Voluntariado e da Secretaría Xeral de Igualdade, vén de poñer en marcha un programa pioneiro e innovador de voluntariado en materia de violencia de xénero, que xa conta con preto de 1.000 inscritos no primeiro curso básico.
Tratase do primeiro programa destinado a crear unha bolsa de voluntarios e voluntarias que estarán a disposición dos servizos especializados, co obxectivo de realizar tarefas de acompañamento, apoio e información ás mulleres vítimas de violencia de xénero. Deste xeito, os participantes estarán ao servizo da Rede Galega de Acollemento a Vítimas da violencia de xénero -formada polas casas de acollida e o centro de emerxencia- e da Rede de Centros de Información a Muller.
O director xeral de Xuventude e Voluntariado da Consellería de Traballo e Benestar, Ovidio Rodeiro, e a subdirectora xeral para o Tratamento da Violencia de Xénero da Secretaría Xeral de Igualdade, Belén Liste, explicaron hoxe en rolda de prensa que este programa permite “implicar a toda a sociedade, a través do voluntariado, na loita contra a violencia de xénero”.
Deste xeito, os voluntarios e voluntarias contribuirán nas accións informativas para que as mulleres vítimas de violencia de xénero coñezan como actuar para a súa protección, ao mesmo tempo que exercerán labores de acompañamento, co obxectivo de que as mulleres maltratadas poidan contar co apoio dunha persoa voluntaria á hora de solicitar, por exemplo, un parte de lesións, asistir a un xuízo de trámite ou presentar unha denuncia. Cabe salientar que este acompañamento nunca debe entenderse como un substituto dos recursos profesionais de asistencia legal ou de apoio psicolóxico e social.
Sensibilización
Tamén realizarán tarefas de derivación e sensibilización que consistirán no apoio á persoa á hora de buscar alternativas a súa situación, a través da súa derivación cara aos servizos e programas de apoio e atención especializada. Nesta sentido xoga un papel moi importante a sensibilización, xa que é un problema que atinxe a toda a cidadanía.
O programa comezará este mércores co inicio dun curso básico sobre violencia de xénero, que se desenvolverá ata o 14 de decembro a través da plataforma voluntariadogalego.org, é que xa conta con preto de 1.000 persoas inscritas. O director xeral de Xuventude e Voluntariado salientou a “resposta masiva que tiveron os voluntarios e voluntarias de Galicia ante este programa” como unha mostra da “profunda sensibilización social que hai sobre a violencia de xénero”.
Este curso formativo busca ofrecer aos participantes uns coñecementos básicos para poder identificar e distinguir posibles situacións violentas, fomentando a sensibilización e permitindo unha aproximación aos recursos existentes e ás actuacións que as diferentes administracións están a desenvolver neste ámbito.
Este novo programa posto en marcha pola Xunta responde aos obxectivos de difusión dos valores de acción voluntaria e á promoción do voluntariado en colectivos sociais con circunstancias especiais, como son as mulleres vítimas de violencia de xénero, segundo o III Plan galego de acción voluntaria (2011-2014), e aos valores de igualdade que inspiran o VI Plan Galego para a Igualdade de Mulleres e Homes, Estratexia 2012-2015, que será aprobado en datas próximas.
Hoxe venres 9 de novembro de 2012, ás 19:00 horas da comezo na sede da Eurocidade Chaves-Verín, unha reunión informativa cos colectivos xuvenís de Chaves e Verín para presentarlles o proxecto de Creación dun Foro Xuvenil Transfronteirizo.
O acto, ao que asistirán máis de 50 representantes de colectivos xuvenís de ambos lados da raia, é presentado por persoal da Dirección Xeral de Xuventude e Voluntariado.
Na segunda fase do proxecto, a desenvolver durante os meses de novembro de decembro, os representantes dos colectivos xuvenís integrados no Foro Xuvenil articularán os regulamentos e estatutos necesarios para a súa posta en marcha como organismo con personalidade xurídica, tanto no territorio español coma no português.
Durante a reunión, explicarase con detalle o obxecto do Foro Xuvenil Transfronteirizo, dando ao final un turno de palabra aos asistentes nos que se derán resposta ás súa dubídas sobre o proxecto.
O Foro Xuvenil Transfronteirizo busca converterse nun espazo de partipación democrática da mocidade de Chaves e Verín, a partir do cal os colectivos que realizan o seu traballo dentro do territorio da Eurocidade poidan aportar as súas opinións respecto das inquedanzas e necesidades existentes entre a mocidade local, dende unha perspectiva transfronteiriza. Por outra banda, tamén persegue servir de lugar común de encontro e de intercambio de experiencias entre os mozos e mozas de Chaves e Verín a partir do cal poder xerar novos proxectos conxuntos de participación xuvenil.
Esta actividade está enmarcada dentro do proxecto EUROCIDADE II, aprobado ao abeiro do Programa de Cooperación Transfronteiriza Galicia-Norte de Portugal 2007-2013 (POCTEP), que conta coa participación da Dirección Xeral de Xuventude e Voluntariado o Instituto Português do Desporto e Juventude, o Concello de Verín e a Câmara Municipal de Chaves.
O director xeral de Xuventude e Voluntariado, Ovidio Rodeiro, inaugurou hoxe na sede da fundación Granell en Santiago a exposición das obras finalistas da especialidade de deseño de xoias do certame de novos creadores ‘Xuventude Crea’, que organiza a Consellería de Traballo e Benestar.
Os finalistas que mostran o seu talento nesta exposición, aberta ata o 26 de novembro, son Cecilia Renata Vidal Vázquez, coa obra “O bosque máxico”; Mª. Mar Batallé Pérez, coa obra “Os soños da ninfea”; Inés Sánchez Estévez, coa obra “Vigo náufrago”; Raquel Sánchez Ballesteros, coa obra “Tápame”, Sabela Correa Comesaña, coa obra “Unha aproximación á bóveda celeste”; Iria Martínez Rodríguez, coa obra “Rexurdir”; Valentín Amoedo Moreira, coa obra “A luz que delimita a Galiza”; Paula Garcia Carballal, coa obra “Había una vez un circo”; Iraya Morales Malla, coa obra “El capricho del mar” e Daniel Rivas Fernández, coa obra “Eolo”.
Na convocatoria deste ano do certame ‘Xuventude Crea’ participan máis de 300 mozos e mozas de entre 16 e 30 anos, autores de 245 proxectos en 11 modalidades artísticas diferentes: teatro, artes plásticas, música, relato breve, poesía, videocreación, banda deseñada, graffiti, carteis, deseño de xoias e monólogos. A iniciativa contou neste exercicio cun orzamento de 71.150 euros. Estas cifras converten ao Certame Xuventude Crea no maior evento de promoción e difusión do talento artístico dos novos creadores galegos.
O director xeral de Xuventude e Voluntariado, Ovidio Rodeiro indicou no acto de inauguración que “as administracións temos que insistir na posta en marcha de solucións e ferramentas como o ‘Xuventude Crea’, que permitan a apertura dos nosos mozos e mozas cara á novidade da creación, a invención ou o descubrimento”. Rodeiro tamén manifestou que “avanzar neste terreo axuda a que os novos creadores descubran o seu potencial e fortalezan a súa confianza, para que se animen a elaborar novos proxectos e se preparen para ser os emprendedores do futuro”.
Os gañadores de cada unha das especialidades contan cos seguintes premios en metálico: 3.000 euros para os premiados en primeiro lugar; 1.500 para os segundos; e 1.000 para os terceiros. Ademais, os premiados en teatro e música terán a oportunidade de representar as súas creacións nunha serie de actuacións por distintos concellos galegos. Cabe lembrar tamén que os primeiros clasificados en artes plásticas tamén poderán participar en exposicións colectivas incluídas no Circuíto galego de creatividade xuvenil.
Así mesmo, a Dirección Xeral de Xuventude e Voluntariado deu a coñecer os gañadores da especialidade de artes plásticas, cuxas obras atópanse en exposición pública na Igrexa da Universidade de Santiago ata o vindeiro venres 9 de novembro.
Os premios foron os tres compartidos, correspondendo o primeiro á fotógrafo Andrea Valado Díaz, coa obra serie ‘Reminging’ e á escultora Tania Pérez Arribas, coa obra ‘Dómino Vs. Dómina’. A pintora Aída Rodríguez Donoso, coa obra ‘Sete ollos ven máis ca dous’, e o pintor Jacobo Lorenzo Nespereira, coa obra ‘Ferido’, acadaron os dous segundos premios e os terceiros foron para o pintor Joan Morera Arbones, coa obra ‘Visións da paisaxe III’ e a fotógrafo Lis María García Calvo, coa obra ‘Aurora’.
O director xeral de Xuventude e Voluntariado, Ovidio Rodeiro, clausurou hoxe o ‘IV Afterwork Emprega talento’
O programa pretende ofrecer aos mozos e mozas unha alternativa para poder acadar novas oportunidades laborais, así como promover a participación e a colaboración entre a mocidade e os directivos
Un total de 150 mozas e mozas participan hoxe na ‘IV Afterwork Emprega Talento’, unha iniciativa que organiza a Consellería de Traballo e Benestar, a través da dirección xeral de Xuventude e Voluntariado, que ten por obxectivo o fomento do emprego xuvenil.
O director Xeral de Xuventude e Voluntariado, Ovidio Rodeiro, clausurou hoxe na Coruña este programa que se realiza en colaboración coa Asociación para o Progreso da Dirección (APD) e que se financia a través do programa Emprende de cooperación transfronteirizo Galicia-Norte de Portugal (POCTEP).
Trátase dun espazo de encontro, coñecemento, información e de formación en habilidades co obxectivo de fomentar a creación de empresas e o autoemprego; un espazo aberto cara a empregabilidade dos mozos e mozas, así como para a creación de oportunidades mediante o intercambio e posta en común de ideas.
O director xeral de Xuventude e Voluntariado destacou que o que se pretende con este programa é “ofrecer aos mozos e mozas unha alternativa para poder acadar novas oportunidades laborais, promover a participación, o intercambio de ideas e a colaboración entre a mocidade e os directivos”. A xornada, inspirada no formato Afterwork, xira ao redor de dous bloques: unha conferencia obradoiro e unha mesa de experiencias prácticas.
Para finalizar a xornada o programa transcorrerá no Espazo Ágora, un punto de encontro que permite as relacións e o intercambio de ideas a través de actividades paralelas e onde terá lugar un obradoiro de busca activa de emprego conducido pola entidade Adecco; un workshop de habilidades para o directivo do futuro e un espazo de traballo en equipo con show cooking.
Esta iniciativa enmárcase no apoio que está a prestar a Xunta na difusión dos valores do emprendemento e no estímulo á xuventude como capital de futuro, tal e como se recolle no marco da Estratexia Xuventude 2013, que ten no fomento da creatividade e do espírito emprendedor un dos seus eixos prioritarios de actuación.
O director xeral de Xuventude e Voluntariado, Ovidio Rodeiro, asistirá ás 20,00 horas a estas actuacións, que terán lugar no Jazz Club Dado Dadá de Santiago de Compostela
O segundo premio recibirá 1.500 euros, e os terceiros obterán 1.000 euros
Os premiados en música, ao igual que en teatro, terán a oportunidade de representar as súas creacións en actuacións por diferentes concellos galegos
No acto tamén se deron a coñecer os gañadores das modalidades de poesía, relato breve, banda deseñada, videocreación e deseño de carteis
Na edición deste ano do certame Xuventude Crea participan máis de 300 mozos e mozas en 11 especialidades artísticas diferentes
Seis solistas e grupos participarán hoxe na final da especialidade de música do certame Xuventude Crea. Os clasificados para esta fase final son os solistas Carlos Gende Prego (Cerceda) e Gustavo Esteban Barragán (Pontevedra), xuntos cos grupos Verso Libre (Vigo), Tío Phil Jazz Group (Meaño), A máquina de meter medo (A Coruña) e Nagai (Marín).
O director xeral de Xuventude e Voluntariado, Ovidio Rodeiro, asistirá hoxe a esta final, que terá lugar ás 20,00 horas no Jazz Club Dado Dadá de Santiago de Compostela. Os gañadores desta fase –ao igual que no resto de especialidades artísticas deste certame- recibirán 3.000 euros por quedar en primeiro lugar; 1.500 no caso de obter o segundo posto; e 1.000 para o terceiro.
Ademais, os premiados en teatro e música terán a oportunidade de representar as súas creacións nunha serie de actuacións por distintos concellos galegos. En concreto, os que obteñan o primeiro premio contarán con dúas actuacións; mentres que os segundos e terceiros clasificados actuarán nunha cada un deles. Cabe lembrar tamén que os primeiros clasificados en artes plásticas poderán participar en exposicións colectivas incluídas no Circuíto da creatividade.
En total, na convocatoria deste ano do certame Xuventude crea participan máis de 300 mozos e mozas de entre 16 e 30 anos, autores de 245 proxectos en 11 modalidades artísticas diferentes: teatro, artes plásticas, música, relato breve, poesía, videocreación, banda deseñada, graffiti, carteis, deseño de xoias e monólogos.
Gañadores de 5 especialidades
No evento de hoxe tamén se darán a coñecer os gañadores de 5 das 11 especialidades do certame: poesía, relato breve, banda deseñada, videocreación e deseño de carteis.
En poesía, os tres primeiros lugares foron todos compartidos. O primeiro posto foi para Cristina Ferreiro Real, coa obra “Epidemia”; e Natalia Umpiérrez Suárez, con “Artibiótico”. O segundo lugar foi conseguido por Belén Gavín Bermúdez, coa obra “Porcelana” e por Rafael Lobelle González, con “Retrincos fotoxénicos”. En terceiro lugar quedaron Alba Cid Fernández, que presentou ao certame “Epistolario sitiado. Correspondencia abisal en escenarios diversos” e Míriam Ferradáns Ferradás, con “Novecomaoito”. O xurado tamén destacou con senllas mencións de honra a Daniel Emilio Villaverde Framil, coa obra “Suicidio correctivo” e a Elías Antón Marcos, con “AEC”.
Na especialidade de relato breve, o primeiro premio foi para Inés Mª. Rodríguez Naz, coa obra “Mitos en ámbar”. O segundo premio foi compartido por Roi Vidal Ponte, con “Un coitelo manchado de graxa” e Mª. Luisa Iglesias Taboada, coa obra “Un cuarto impropio. Metamorfose”. O terceiro premio tamén foi compartido por Rubén Vidal López, coa obra “Quen matou a Otto Hoch?” e Mª. Elena López González, coa obra “A corda de area”. O xurado tamén outorgou dúas mencións de honra para Tito Pérez Pérez, coa obra “Alén da elipse” e Sheila Aldariz Ferreiro, con “Pompas fúnebres Ernesto”.
En canto á banda deseñada, o primeiro premio desta especialidade foi declarado deserto. O segundo premio foi concedido a Miguel Cuba Taboada, coa obra “Ráfaga” e o terceiro premio para Laura Velasco Vázquez, con “A cita”. Neste caso tamén se destacaron dúas mencións de honra, para Alba Mª. González López, que presentou ao certame “En busca da arte perdida” e Miguel Golmayo Labrador, con “O legado do lume”.
En videocreación, os premiados foron Alexandre Martínez Pérez, coa obra “Super 8” en primeiro lugar; Clara Elisa Sobrino Heyvaert, coa obra “A costureira” en segundo; e Estela Rodríguez López, coa obra “A incrible historia de Santi Pingüin” e Olalla Castro Rodríguez, coa obra “Arrevoa os meus cabelos” compartiron o terceiro premio.
Na especialidade de deseño de carteis o primeiro premio foi para Carlota Mª. Brea Fernández, que presentou a obra “Compártete”; o segundo para Alba Díaz López, coa obra “Ó alcance da túa man”; e, finalmente, o terceiro posto tamén foi compartido por Valeria Rubal Rubal, coa obra “Este ano non” e Sara Roca del Pozo, con “Paso de todo”.
Fomento da creatividade
O obxectivo do programa Xuventude Crea, posto en marcha pola Consellería de Traballo e Benestar, é conseguir que os mozos e mozas poidan manifestar a súa inquedanza artística e cultural, ao mesmo tempo que se fomenta a creatividade xuvenil e se mostra o talento da mocidade galega.
Esta iniciativa inscríbese na Estratexia Xuventude 2013, que ten como un dos seus eixos principais o fomento da creatividade e o espírito empresarial e propón 20 medidas concretas para seguir avanzando neste eido.
O director xeral de Xuventude e Voluntariado, Ovidio Rodeiro, participou hoxe na iniciativa que organiza a Consellería de Traballo e Benestar baixo o lema ‘A xestión da acción voluntaria’
O obxectivo é que a actividade se converta nun espazo de encontro e interacción dos axentes de participación social e voluntariado de Galicia
A celebración destes debates enmárcase no III Plan Galego de Acción Voluntaria, un documento que foi consensuado co sector para mellorar a situación actual das persoas voluntarias en Galicia
Os próximos foros terán lugar o 15 de novembro na Coruña e o 13 de decembro en Santiago
O IV Foro Galego de Solidariedade que organiza a Consellería de Traballo e Benestar estase a celebrar hoxe en Ferrol baixo o lema ‘A xestión da acción voluntaria’. Máis de 60 profesionais vinculadas á xestión do voluntariado, tanto de concellos como de entidades sociais como Cruz Vermella, Cogami ou Aspronaga, están a debater sobre os modelos de xestión do voluntariado.
O director xeral de Xuventude e Voluntariado, Ovidio Rodeiro, participou hoxe nesta iniciativa, onde destacou que o obxectivo principal desta actividade é converter estes debates “nun espazo de encontro e interacción dos axentes de participación social e voluntariado de Galicia” para estimular a reflexión e o debate para achegar conclusións compartidas sobre aspectos cruciais para o desenvolvemento das entidades de acción social e solidarias de Galicia.
A dinamización da cuarta edición deste foro está a ser realizada por un grupo composto por técnicos e coordinadores de voluntariado de entidades locais de Galicia, polo que os aspectos de xestión da acción voluntaria orientarase a reflexionar sobre o papel que están a xogar as entidades locais de Galicia na dinamización da acción voluntaria.
Rodeiro indicou que esta iniciativa enmárcase na liña estratéxica de sensibilización do III Plan Galego de Acción Voluntaria, un documento que a Consellería de Traballo e Benestar consensuou co sector para mellorar a situación actual das persoas voluntarias da Comunidade autónoma, así como para definir o seu futuro.
O ciclo destes debates rematará este año coa celebración o 15 de novembro na Coruña do foro ‘A contribución social do terceiro sector’ e o 13 de decembro en Santiago coa actividade titulada ‘O traballo na rede no ámbito da solidariedade e a sustentabilidade das entidades do terceiro sector’. O foro de Ferrol toma o relevo aos celebrados en meses pasados en Ourense, Vigo e Lugo. Como resultado deste traballo participativo, publicarase un documento que achegue ás entidades de acción voluntaria, os resultados e conclusións obtidos nos distintos foros celebrados.
O director xeral de Xuventude e Voluntariado, Ovidio Rodeiro, estivo presente hoxe na final do concurso de grafitti que tivo lugar en Santiago
Ao longo do mes de outubro están tendo lugar as comisións de valoración de cada especialidade
Os gañadores de cada unha das especialidades de Xuventude Crea contarán cos seguintes premios en metálico: 3.000 euros para os premiados en primeiro lugar; 1.500 para os segundos; e 1.000 para os terceiros
O certame de creadores novos ‘Xuventude Crea 2012’ recibiu este ano un total de 245 traballos que representan o arte de máis 300 mozos e mozas galegas que se presentaron este ano ao concurso que convoca a Dirección Xeral de Xuventude e Voluntariado da Consellería de Traballo e Benestar, superando o número dos 185 traballos presentados na última edición do 2010.
O director xeral de Xuventude e Voluntariado, Ovidio Rodeiro, estivo presente hoxe na final do concurso de grafitti que tivo lugar en Santiago enmarcada no Xuventude Crea. O certame deste ano inclúe un total de 11 especialidades diferentes: teatro, artes plásticas, música, relato breve, poesía, videocreación, banda deseñada, graffiti, carteis, deseño de xoias e monólogos. A iniciativa, para mozos e mozas de entre 16 e 30 anos residentes en Galicia, contou neste exercicio cun orzamento de 71.150 euros.
Ao longo do mes de outubro están tendo lugar as comisións de valoración de cada especialidade. Ata o de agora os galardóns que se fallaron foron os correspondentes a relato breve, poesía, banda deseñada e videocreación. Ao longo do mes de outubro terán lugar as finais das modalidades restantes e a inicios do mes de novembro coñeceranse os premiados de todas as categorías.
Os nove finalistas de graffiti realizarán hoxe unha exhibición desde ás 9.30 ata as 18.00 horas no Pavillón municipal de Vite en Santiago. Realizarán en directo os seus traballos Brais Rodriguez Trigo, Iván Cabello Camba, Noel Pérez Fungueiriño, Roberto Escariz Ferreira, David Canosa Barreiro, Felipe Covelo Vázquez, Lois Costa Pereiro e o grupo formado por Tirso Juan Paz Sans, Manuel Seijas Fernández e Adrián Mourenza Pena.
Así mesmo, tamén nesta semana está a celebrarse a final de teatro. No referente á especialidade de música ás actuacións dos seis finalistas está prevista para o sábado 27 de outubro a partir das 20.00 horas no Jazz Club Dado Dadá en Santiago. Actuarán os solistas Carlos Gende Prego de Cerceda e Gustavo Esteban Barragán de Pontevedra e os grupos Verso Libre (Vigo), Tío Phil Jazz Group (Meaño), A máquina de meter medo (A Coruña) e Nagai (Marín).
Na modalidade de artes plásticas a exposición das vinte obras finalistas será na Igrexa da USC en Santiago desde o 30 de outubro ata o 9 de novembro, de luns a sábado. A inauguración terá lugar o martes 30 ás 20.00 horas e exporán os seus traballos en escultura: Oliver Requeijo Fernández, Basilia Fiestras Cachafeiro, Carmen Álvarez Campo, Tania Pérez Arribas e Laura Piñeiro Meana; en pintura: Humberto Loureiro Argullós, Olmo Blanco Fuentes, Aida Pérez Donoso, Aida Estrella Vigo Edreira, Soraya Redondo Taboada, Jacobo Lorenzo Nespereira, Marta López López, Joan Morera Arbones e Luis Iván Estévez Martín; e en fotografía: Fabio Alonso Comesaña, Alicia Seoane Orro, Marta González Suárez, Lis García Calvo, Andrea Velado Díaz e Sara Baños Martínez.
Así mesmo na modalidade de deseño de xoias os traballos dos dez finalistas serán expostos dende o 6 ao 24 de novembro na Fundación Eugenio Granell en Santiago. A inauguración da exposición será o 6 de novembro ás 20.00 horas e os traballos expostos serán os de Cecilia Vidal Vázquez, Mar Batallé Pérez, Inés Sánchez Estévez, Raquel Sánchez Ballesteros, Sabela Correa COmesaña, Iria Martínez Rodriguez, Valentín Amoedo Moreira, Paula García Carballal, Iraya Morales Malla e Daniel Rivas Fernández.
Polo que se refire á modalidade de videocreación os traballos dos gañadores serán reproducidos no Centro Galego de Artes da Imaxe (CGAI) na Coruña.
Premios
Os gañadores de cada unha das especialidades de Xuventude Crea contarán cos seguintes premios en metálico: 3.000 euros para os premiados en primeiro lugar; 1.500 para os segundos; e 1.000 para os terceiros.
Ademais, os premiados en teatro e música terán a oportunidade de representar as súas creacións nunha serie de actuacións por diferentes concellos galegos. O gañador participará en dúas actuacións e o segundo e terceiro clasificado nunha. Pola súa banda, os tres primeiros clasificados en artes plásticas poderán participar en exposicións colectivas no Circuíto da creatividade.
Ademais, os finalistas dalgunhas modalidades recibirán unha axuda económica para poñer en valor a súa creatividade. Así, en teatro percibirán 650 euros por grupo; na categoría de música recibirán 600 euros por grupo e 300 euros por solista e en graffiti 350 euros por participante.
Os obxectivos fundamentais desta iniciativa da Consellería de Traballo e Benestar é que os mozos e mozas poidan manifestar a súa inquedanza artística e cultural a través do certame e ao mesmo tempo fomentar a creatividade xuvenil, como mostra do talento que amosa a mocidade galega.
De feito, a Estratexia Xuventude 2013 dedica ao fomento da creatividade e do espírito empresarial un dos eixos principais de acción, propoñendo 20 medidas concretas para as propias iniciativas dos mozos e mozas galegos.
O obxectivo da iniciativa é analizar a actual situación de desemprego en Galicia e España valorando a situación dos mozos e mozas e as perspectivas socioeconómicas
Desenvolveranse relatorios sobre desemprego xuvenil, un panel de experiencias sobre programas europeos de mobilidade e unha mesa redonda sobre emprendemento, entre outras accións
O prazo de inscrición rematará o próximo 9 de novembro
A Dirección Xeral de Xuventude e Voluntariado celebrará os próximos 23 e 24 de novembro unhas xornadas sobre desemprego, emprendemento e autoemprego xuvenil en Santiago, unha iniciativa enmarcada dentro do proxecto europeo Xuventude en Acción. Poderán participar representantes de asociacións xuvenís, monitores, técnicos de xuventude de entidades públicas, representantes políticos en materia de xuventude, líderes de organizacións estudantís e mozos e mozas non asociados.
Os interesados en tomar parte das xornadas poderán inscribirse a través do portal http://xuventude.xunta.es , ata o próximo 9 de novembro. Ofértanse un total de 75 prazas.
O obxectivo da iniciativa é analizar a actual situación de desemprego en Galicia e España valorando a situación dos mozos e mozas e as perspectivas socioeconómicas de futuro. Así mesmo, presentaranse boas prácticas para o fomento da empregabilidade e a inserción laboral, ao tempo que se fomentará a inclusión dos mozas e mozas con menos oportunidades no mercado laboral a través dos programas europeos e rexionais.
Ademais, establecerase un espazo de traballo e diálogo para facilitar o labor en rede e a cooperación europea en materia de xuventude e darase a coñecer as posibles vías de financiamento que a Unión Europea e outros organismos dispoñen para o fomento da iniciativa empresarial.
O programa das xornadas prevén relatorios sobre o desemprego xuvenil, un panel de experiencias sobre programas europeos de mobilidade, unha mesa redonda sobre emprendemento e autoemprego xuvenil, unha visita a un viveiro de empresas, así como unha exposición de políticas de emprego xuvenil en varios países europeos (Hungría, Italia, Bulgaria, Romanía, Letonia, Turquía, Polonia, España, Portugal e República Checa). Así mesmo, haberá obradoiros de coaching e liderado empresarial.
As charlas enmárcase no eixo 6 do Plan Estratéxico de Xuventude 2013, unha estratexia para a mocidade galega, dentro do obxectivo que busca establecer mecanismos que faciliten o acceso á información sobre aspectos que lle interesan á mocidade, como poder ser a formación, vivenda, emprego u outros temas de interese para a mocidade.