En portada (1110)

novasO Xuventude.Novas deste mes dedica as súas primeiras páxinas ao acontecido no Xuventude Galicia Net 2012, que xuntou a máis de 8.000 mozos e mozas no evento máis importante relacionado coas novas tecnoloxías da nosa comunidade. Ademais, tamén se relata a oferta para participar nos campos de traballo deste ano, 7 en Galicia, 41 no resto de España e 63 no estranxeiro, en 25 países diferentes. O boletín interactivo da Dirección Xeral de Xuventude e Voluntariado compleméntase cunha entrevista ao grupo de Rock galego ITH e coas bases do certame Lingua de Namorar. Podes descargalo facendo clik aquí

Aos 1.000 mozos e mozas inscritos na maior festa das novas tecnoloxías de Galicia sumáronse as máis de 7.000 persoas que visitaron a iniciativa de Xuventude e participaron nas diferentes actividades que se programaron ao aire libre

Unha das accións máis valoradas foi o bloque temático dedicado ao emprendemento como saída fronte á crise

Os relatorios de Enrique Dans e Leopoldo Abadía colgaron o cartel de aforo completo coa asistencia de 1.500 persoas

O Encontro Dixital Xuventude Galicia Net que organizou ao longo deste fin de semana en Santiago a Dirección Xeral de Xuventude pechou un ano máis as súas portas cun balance “moi positivo”. Entre o venres e hoxe mesmo pasaron polas instalacións desta iniciativa, no Pazo de Congresos e Exposicións, máis de 7.000 persoas. A esta cifra súmanse os máis de 1.000 mozos e mozas que se inscribiron para participar durante os 3 días na intranet.

Unha das iniciativas máis valoradas nesta edición foi o bloque temático dedicado ao emprendemento como saída fronte á crise. Máis de 500 participantes participaron ao longo de toda a semana para elixir os tres mellores proxectos, que foron defendidos ante un xurado cualificado durante a tarde de onte.

Ademais, a mesa redonda sobre o emprendemento, que contou con profesionais do ámbito universitario e da empresa privada, debateu as vantaxes e situacións que han de ter en conta os mozos e mozas que se adianten no mundo do emprendemento.

Os asistentes tamén puideron participar nunha sesión de networking non convencional, na que mesturaron as técnicas de citas rápidas. Deste feito, a sesión de networking foi cronometrada para que os participantes puidesen interactuar coa maior parte dos asistentes posibles.

Aforo completo nos relatorios
Os relatorios tamén contaron con moita asistencia de público este ano. As ponencias de Enrique Dans e Leopoldo Abadía colgaron o cartel de aforo completo, ao encher a sala habilitada para os seus relatorios, cunha capacidade para 1.500 persoas.

Así mesmo, é preciso salientar que a oferta formativa foi a máis completa das trece edicións celebradas no Encontro de Xuventude Galicia Net. Abordouse un amplo abano de materias dirixidas para todos os públicos ao longo dos tres días, como, por exemplo, hacking ético, neuromarketing web ou redes sociais.

Con respecto á extranet, onde tiveron lugar as actividades ao aire libre, converteuse nesta edición nun punto de encontro de pais e fillos, mozos e mozas arredor das novas tecnoloxías.

As colas sucedéronse todo o fin de semana para acceder aos simuladores de golf ou tiro, Tamén houbo moita afluencia de público nos obradoiros de maquillaxe, no stand de consolas e no de ciencia divertida dirixida para os máis cativos.

Os amantes da arte tamén tiveron un oco no exterior do Pazo de Congresos no que o Graffiti foi o protagonista. Neste senso, os participantes na XGN puideron participar nun obradoiro de iniciación ao graffiti e presenciar unha exhibición desta arte urbana.

Dentro da party realizáronse, ademais, diversas actividades relacionadas co modding, hardware e overclocking. Así mesmo, destacaron os campionatos de xogos con pc´s como o de Counter Strike 1.6, League of Legends, Super Street Fighter 4, ProEvolution Soccer. Para competir sen os ordenadores, houbo lanzamento de CD, air guitar ou dobraxe, entre outras.

Por último, as noites temáticas de cine, a novidade desta edición da land party tamén foron un éxito. Ao longo da fin de semana Xuventude Galicia Net non pechou as súas portas pola noite, ofrecendo de balde noites de cine temáticas de acceso libre.

O director xeral de Xuventude, Ovidio Rodeiro, e a directora da Axencia para a Modernización Tecnolóxica de Galicia (Amtega), Mar Pereira, percorrerán hoxe as instalacións do Pazo de Congresos

A xornada de hoxe sábado contará cun bloque temático no que se abordará o emprendemento como unha opción viable de futuro para a mocidade galega

A AMTEGA participa na décimo terceira edición de Xuventude Galicia Net cun stand onde se ofrecerá información sobre os proxectos que está a impulsar para acercar as novas tecnoloxías ás empresas e cidadán galegos xgn

Presentarase o programa Voluntariado Dixital aos asistentes co obxectivo de captar novos voluntarios e voluntarias que poidan difundir os beneficios das novas tecnoloxías no conxunto da sociedade galega

Para rematar a xornada, a partir das 21,00 horas comezará a noite de cine temática, que estará ambientada no film ‘A guerra das Galaxias’

A XIII edición do Xuventude Galicia Net, organizado pola Consellería de Traballo e Benestar, está a facer fincapé nun dos aspectos que máis preocupación lle supón á xuventude: o desemprego. Por iso, a xornada de hoxe sábado contará cun bloque temático no que se abordará o emprendemento como unha opción viable de futuro para a mocidade galega.

Neste sentido, organizarase unha mesa redonda na que profesionais de diferentes ámbitos falarán sobre emprendemento. Universidade, grande empresa de base tecnolóxica e pequena startup en proceso de expansión xuntaranse nunha mesma sala para compartir co público as súas visións sobre o autoemprego, emprendedores e saídas laborais, que darán paso a un pequeno coloquio co público. Simultaneamente a esta mesa redonda, terá lugar unha charla de Juan Gestal de Pix Fans, un blog de videoxogos.

Así mesmo haberá unha actividade de ‘SpeedNetworking’ que consistirá en roldas de cinco minutos de duración nas que os interlocutores se irán coñecendo fugazmente; un concurso titulado ‘Startup mocidade emprendedora’, no que a xente pode votar en Facebook aos proxectos máis salientables e, xa na XGN, os tres proxectos máis votados terán que facer un “pitching” (exposición do proxecto) ante un xurado composto por expertos que decidirán cal é o mellor proxecto.

O director xeral de Xuventude, Ovidio Rodeiro, e a directora da Axencia para a Modernización Tecnolóxica de Galicia (Amtega), Mar Pereira, percorreron as instalacións do Pazo de Congresos, onde interactuaron cos participantes da intranet e visitaron os stands da zona exterior do recinto, destacando a presenza de participantes do programa de Voluntariado Dixital, un programa conxunto dos dous departamentos posto en marcha meses atrás e que ten como obxectivo achegar as novas tecnoloxías aos colectivos máis afectados pola fenda dixital.

A Axencia para a Modernización Tecnolóxica de Galicia, Amtega, está a participar activamente no encontro Xuventude Galicia Net, difundindo as iniciativas postas en marcha polo Goberno galego para achegar a tecnoloxía ao maior número posible de persoas e empresas e integrar as TIC en todos os ámbitos da sociedade

Unha das últimas iniciativas desenvolvidas pola Axencia en colaboración coa Consellería de Traballo e Benestar é o Programa de Voluntariado Dixital, que terá presenza neste encontro grazas á participación de 17 voluntarios dixitais. A súa función centrarase en colaborar cos organizadores ante cuestións de funcionamento e tecnolóxicas que poidan xurdir e dirixidas especialmente ás persoas con discapacidade, nenos e nenas participantes no encontro.

Calquera persoa que acuda ao encontro poderá solicitar o apoio dixital dalgún dos voluntarios que se identificarán cun chaleco e chapa identificativa do programa voluntariado dixital.

Para darlle a visibilidade aos proxectos da Administración autonómica en materia de novas tecnoloxías a Amtega conta cun stand, onde se ofrece información sobre as iniciativas orientadas a achegar as novas tecnoloxías ás empresas como o Centro Demostrador TIC, así como as actuacións de impulso do uso das TIC por parte de toda a cidadanía, a través da Rede de Aulas para a Modernización e Inclusión Tecnolóxica Rede CeMIT.

Ademais durante a xornada de hoxe o Software Libre centrará a parte formativa de Xuventude Galicia Net cunha conferencia na que AGASOL, Asociación Galega de Software Libre, e colaborador da Amtega, que informará aos asistentes sobre as oportunidades laborais que hai detrás do mesmo, proxectos das súas empresas relacionados co software libre, como “emprender + software libre”.

Programación
A segunda xornada da XIII edición de Xuventude Galicia Net arrancou coa conferencia do profesor da IE Bussiness School, Enrique Dans. Actualiza un dos blogs máis influentes da blogosfera hispana e é considerado unha das persoas máis influentes da rede.

A situación económica mundial faise presente nesta edición prestando especial atención ao emprendemento como saída laboral. Para isto cóntase nesta xornada coa presenza de Javier Megías, asesor da Comisión Europea, consultor en estratexias innovadoras para empresas e startup, especializado en modelos de negocio.

A mañá do sábado seguiu coa ponencia ‘Software Libre e Emprendemento’, por parte de Luis Alberto Fernández e Xavier Castaño, xerente e vicepresidente de Agasol, na que estes relatores relacionados co software libre lle contarán aos asistentes as oportunidades laborais que hai detrás do mesmo.

Os xogos de rol terán unha gran presenza na XGN a través de xogos coma Warhammer, Magic ou YuGi Oh, que contarán cos seus propios torneos para deleite dos participantes na XIII edición da Xuventude Galicia Net.

Ás ponencias da tarde darán comezo co Rubén Bastón, un dos profesionais de referencia no mundo social media en Galicia e en España. É o directivo máis novo da multinacional Elogia.

Para rematar a xornada a partir das 21,00 horas comezará a noite de cine temática, que estará ambientada no film ‘A guerra das Galaxias’, e proxectaranse interrumpidamente as seis películas que compoñen esta serie cinamatográfica.

A secretaria xeral da Consellería de Traballo e Benestar, Cristina Ortiz, inaugurou hoxe a xornada ‘Inicia e emprende o camiño do teu futuro’, na que participou a directora xeral de Formación e Colocación, Ana María Díaz

Na xornada de hoxe os mozos e mozas puideron atopar resposta ás súas inquedanzas formativas, laborais e emprendedoras

Cristina Ortiz explicou que na coxuntura económica actual as fórmulas que están a demostrar maior resistencia son a iniciativa empresarial e o autoemprego

Ana María Díaz lembrou que nesta lexislatura son xa máis de 30.000 os galegos e galegas que recibiron formación certificable

Consellería de Traballo e Benestar organizou hoxe en Ferrol unha xornada enmarcada no Programa Conecta, na que participaron máis de 600 mozos e mozas. A mesma centrouse no emprego, o empredemento e a participación da mocidade na sociedade, baixo o título ‘Inicia e emprende o camiño do teu futuro’. En total, realizaranse dez mostras ao longo de toda Galicia e incluirán ponencias, mesas redondas, stands e actividades paralelas.FERROL

A secretaria xeral da Consellería de Traballo e Benestar, Cristina Ortiz, acompañada do alcalde de Ferrol, José Manuel Rey, foi a encargada de inaugurar este encontro. Na súa intervención indicou que esta xornada quere dar resposta ás dúbidas e inquedanzas da mocidade ferrolá en relación ao mercado laboral, a formación e o emprendemento.

Ortiz engadiu que para a Xunta a xuventude é unha “prioridade absoluta” e que, co obxectivo de crear e mellorar as súas oportunidades de presente e futuro, o departamento autonómico puxo en marcha o primeiro Plan Estratéxico de Xuventude, que pon o acento en materia de emprego, aspecto que engloba preto da metade do investimento total do plan, con actuacións como o desenvolvemento de ferramentas e mecanismos de información e orientación laboral, nas que se inscribe esta xornada.

Cristina Ortiz explicou que na coxuntura económica actual as fórmulas que están a demostrar maior resistencia son a iniciativa empresarial e o autoemprego, un feito que, si se engade a creatividade propia da xuventude, constitúe “excelentes oportunidades para xerar emprego e devolver a nosa economía á senda do crecemento”.

No eido da participación, a secretaria xeral indicou que na Consellería se están a levar a cabo iniciativas que fomentan tanto a participación como o emprendedurismo e permiten o desenvolvemento integral das capacidades dos mozos e amosan as vantaxes do traballo en equipo.

Formación certificable
Doutra banda, no decurso da xornada, a directora xeral de Formación e Colocación, Ana María Díaz, ofreceu un relatorio sobre formación certificable e indicou que esta permite aos alumnos dispoñer dun certificado con carácter oficial e validez estatal, que, ao mesmo tempo, ten efectos académicos no eido do sistema educativo e profesionais recoñecidos na lexislación vixente.

A directora xeral apuntou que Traballo e Benestar busca deste xeito ofertar unha formación axustada ás necesidades do mercado laboral e ás esixencias de competitividade das empresas.

Así, a Xunta, no marco do Diálogo Social, está a facer unha importante aposta por unha formación para o emprego cos máximos niveis de calidade e excelencia. De feito, ao longo desta lexislatura xa son máis os 30.000 galegos e galegas que recibiron formación certificable.

Programa Conecta
O Programa Conecta xorde como elemento de enlace entre a mocidade e o movemento asociativo para converterse nunha ferramenta de conexión entre o colectivo xuvenil e as variables que lles poden ser de interese. Ten por obxectivo ofrecer oportunidades para a xuventude e motivar a súa participación activa na sociedade.

Na xornada de hoxe en Ferrol os mozos e mozas puideron atopar resposta ás súas inquedanzas formativas, laborais e emprendedoras. Esta mostra celebrouse xa en Santiago e Vila de Cruces (Pontevedra) e continuará o seu percorrido en Ourense, Burela, Ribeira, Melide, Ponteceso e Marín, para rematar na Coruña.

Esta edición de 2012, a décimo terceira, contará con persoas con grande experiencia no mundo empresarial como o profesor da IE Business School, Enrique Dans; o profesor Leopoldo Abadía; ou o social media Rubén Bastón

Para os pais e nais tamén están previstas actividades co obxectivo de facer accesibles certos contidos e tecnoloxías que, a primeira vista, so parecen influír aos máis mozos

Os exteriores do Pazo de Congresos e Exposicións e o hall de entrada acollerán as actividades da extranet, abertas a todos os públicos

A edición deste ano do Xuventude Galicia Net, que terá lugar desde este venres, 4 de maio, e ata o domingo, fará énfase na formación, a creación de empresas, as oportunidades de traballo baseadas nas novas tecnoloxías e a procura activa de emprego para a xuventude que se dea cita no evento.

Trátase do maior ‘Lan-party’ da Comunidade e celebrarase no Pazo de Congresos e Exposicións de Galicia, en Santiago de Compostela. Esta edición de 2012, a décimo terceira, contará con persoas con grande experiencia no mundo empresarial: altos directivos e empresarios que poidan cubrir as necesidades que a xuventude galega demanda á hora de iniciar o emprendemento empresarial.

Para mellorar a formación e a preparación en materia de novas tecnoloxías, e totalmente de balde para quen se achegue, deseñouse unha grella de relatorios onde se contará con expertos reputados nas súas áreas como o profesor da IE Business School, Enrique Dans; o profesor Leopoldo Abadía; ou o social media Rubén Bastón.

Para os pais e nais tamén están previstas actividades co obxectivo de facer accesibles certos contidos e tecnoloxías que, a primeira vista, so parecen influír aos máis mozos. Para a Dirección Xeral de Xuventude e Voluntariado, os pais son un dos colectivos máis numerosos e comprometidos, xa que moitos dos seus fillos ou ben son participantes ou ben se acercan a participar das actividades gratuítas dun evento para todos os públicos.

logo_xgnA situación económica mundial faise presente nesta edición dun xeito innovador: prestando especial atención ao emprendedurismo como saída laboral. Para iso, contarase con especialistas na materia como Javier Megías e directivos de empresas, así como se celebrarán obradoiros sobre as últimas novidades do sector como a reciclaxe de aparatos eléctricos ou neuromarketing.

Nesta edición de XGN estará presente a Axencia para a Modernización Tecnolóxica cun stand e unha conferencia na que varios relatores relacionados co software libre exporán as oportunidades laborais que hai detrás do mesmo, así como proxectos das súas empresas relacionados co software libre.

Para os máis habilidosos, tamén haberá actividades nesta XGN. Complementando a oferta formativa, a edición 2012 da XGN prevé multitude de actividades e obradoiros de carácter práctico.

Os exteriores do Pazo de Congresos e Exposicións e o hall de entrada acollerán as actividades da extranet, abertas a todos os públicos. No exterior do recinto todas aquelas persoas que se achegen á XGN poderán facer uso das instalacións de paintball, rocódromo, diversos xogos e o obradoiro de graffiti que se organizan como actividades nesta edición, e, no interior do Pazo, contarase con stands de consolas e videoxogos, ciclos temáticos de cine, maquilladores e mesmo un stand sobre ciencia divertida para despertar o interese científico nos máis cativos, diversos xogos, e todo de maneira totalmente gratuíta para aqueles que queiran achegarse.

‘Inicia e emprende; o camiño do teu futuro’ é a consigna desta mostra na que os mozos e mozas atoparán resposta ás súas inquedanzas formativas, laborais e emprendedoras

Esta iniciativa, enmarcada no Programa Conecta, ten por obxectivo ofrecer oportunidades para a xuventude e motivar a súa participación activa na sociedade

A iniciativa percorrerá os concellos de Santiago, Vila de Cruces, Ferrol, Ourense, Burela, Melide, Marín, Ribeira, Ponteceso e A Coruña

A Dirección Xeral de Xuventude e Voluntariado, dependente da Consellería de Traballo e Benestar, desenvolverá o próximo 4 de maio en Ferrol unha mostra sobre emprendemento e talento xuvenil no marco do programa Conecta. Os interesados xa poden incribirse na web ‘www.xuventude.net’. En total, realizaranse dez mostras ao longo de toda Galicia e incluirán ponencias, mesas redondas, stands e actividades paralelas.

Esta iniciativa xorde como elemento de enlace entre a mocidade e o movemento asociativo para converterse nunha ferramenta de conexión entre o colectivo xuvenil e as variables que lles poden ser de interese. Ten por obxectivo ofrecer oportunidades para a xuventude e motivar a súa participación activa na sociedade.

Cada unha destas mostras terá un tema definido e complementario coas demais, todos eles vinculados aos eixos (educación, emprego, creatividade e espírito emprendedor, vivenda, saúde e deporte, voluntariado e solidariedade, información xuvenil, participación e mobilidade) do Plan Estratéxico Xuventude 2013.

‘Inicia e emprende; o camiño do teu futuro’ é a consigna da mostra que se celebrará en Ferrol sobre ‘Iniciativa e Emprendemento’ na que os mozos e mozas atoparán resposta ás súas inquedanzas formativas, laborais e emprendedoras. A mesma contará con diversos ponentes como directores de recursos humans ou directores de tempo libre.

A promoción e potenciación do movemento asociativo vinculado á xuventude é unha prioridade clave para a Dirección Xeral, entendendo a participación como mecanismo de aprendizaxe non formal, opción de ocio educativo e de desenvolvemento de actitudes cívicas e persoais determinantes para o futuro do colectivo xuvenil.

Esta mostra celebrouse xa en Santiago e Vila de Cruces (Pontevedra) e continuará o séu percorrido en Ourense, Burela, Ribeira, Melide, Ponteceso e Marín, para rematar na Coruña.

O director xeral de Xuventude e Voluntariado, Ovidio Rodeiro, e o delegado territorial da Xunta en Ourense, Rogelio Martínez, inauguraron hoxe este encontro baixo o título “Promoción e dinamización da acción voluntaria”

No Foro participan voluntarios e voluntarias, así como persoal técnico e responsables de concellos, entidades e centros educativos

Os seus principais obxectivos son poñer en valor a contribución das persoas voluntarias, difundir iniciativas innovadoras neste eido, e servir de punto de encontro entre todos os axentes do sectorFORO_GALEGO_DE_SOLIDARIEDADE

Máis de 60 persoas participan hoxe no II Foro galego de solidariedade (FGS), que se celebra en Ourense. Esta iniciativa está organizada pola Consellería de Traballo e Benestar, a través da Dirección Xeral de Xuventude e Voluntariado, baixo o título “Promoción e dinamización da acción voluntaria”.

O director xeral desta área autonómica, Ovidio Rodeiro, e o delegado territorial da Xunta en Ourense, Rogelio Martínez, inauguraron hoxe este encontro, que pretende converterse nun espazo de interacción dos axentes de participación social e voluntariado en Galicia, ao tempo que estimula a reflexión, o debate, e a construción de conclusións compartidas sobre aspectos cruciais para o desenvolvemento da acción das entidades sociais e solidarias de Galicia.

Os FGS son unha iniciativa posta en marcha por primeira vez este ano, e o de Ourense é o segundo foro que se celebra, tras o que tivo lugar en Lugo. Estes encontros están preparados por grupos de traballo formados por persoas e entidades que coñecen en profundidade esta materia. Esta reflexión previa dos grupos de traballo será enriquecida posteriormente polo debate que se produza durante os foros.

Os destinatarios destes encontros son voluntarios e voluntarias; persoal técnico de entidades de acción voluntaria; responsables de programas de voluntariado de administración públicas; persoal do terceiro sector de Galicia e demais axentes de acción voluntaria en Galicia.

Os obxectivos dos FGS son, principalmente, dimensionar e poñer en valor ante a opinión pública a contribución das persoas voluntarias; difundir as iniciativas innovadoras do sector e das persoas voluntarias a favor dunha sociedade máis participativa e solidaria; ademais de servir de punto de encontro entre todos os axentes do sector.

O departamento autonómico enviará a campos doutras comunidades a 81 galegos e galegas e a 88 a países do estranxeiro

A Consellería de Traballo e Benestar acollerá este ano a 57 galegos e galegas, 87 mozos e mozas doutras comunidades e a 116 voluntarios doutros países

En Galicia celebraranse 7 campos de traballo distribuídos en 11 quendas nas localidades de Boqueixón, Rois, Melide, A Coruña, Ourense, Celanova e Vigo

A Comunidade autónoma é a terceira rexión que máis prazas oferta no estranxeiro

Os campos de traballo están dirixidos a mozos e mozas de entre 18 e 30 anos

As temáticas xirarán en torno á cultura, etnografía, medio ambiente, construción e restauración, dinamización social, eido social e a arqueoloxíaMoncayo

Consellería de Traballo e Benestar, a través da Dirección Xeral de Xuventude e Voluntariado, vén de abrir o prazo de inscrición para anotarse aos campos de traballo que este ano se celebrarán entre os meses de xullo e agosto. A Xunta ofertará un total de 260 prazas (57 para galegos e galegas; 87 para mozos e mozas doutras comunidades; e 116 para voluntarios doutros países, incluíndo 20 procedentes da emigración galega) en 7 campos distribuídos en 11 quendas.

Ademais, os mozos e mozas galegos poderán tamén optar a 81 prazas nos 41 campos do resto de España e a 88 prazas nos 63 campos do estranxeiro de 25 países: Alemaña, Armenia, Austria, Bélxica, Corea do Sur, Estados Unidos; Estonia, Francia, Grecia, Islandia, Italia, Kenia, Marrocos, México, Polonia, Reino Unido, República Checa, Rusia, Serbia, Taiwan, Togo, Turquía, Ucraína, Vietnam e Xapón. Polo tanto, ademais de ofertar 260 prazas, a Dirección Xeral de Xuventude e Voluntariado xestionará 169 prazas máis, o que supoñen un total de 429 prazas.

Entre a oferta deste ano, que está dirixida a mozos e mozas de entre 18 e 30 anos, destacan iniciativas culturais e etnográficas; ambientais; de construción e restauración; de dinamización social con temáticas relacionadas coa formación lingüística e co turismo; sociais; e arqueolóxicas.

As localidades galegas elixidas este ano para celebrar os 7 campos de traballo son Boqueixón, Rois, Melide e A Coruña (na provincia coruñesa); Ourense e Celanova (na provincia ourensá); e en Vigo (Pontevedra).

En outras comunidades autónomas terán lugar na Rioxa; Andalucía; Aragón; Asturias; Canarias; Cantabria; Castela A Mancha; Castela e León; Cataluña; Ceuta; Estremadura; Madrid; Melilla; País Vasco; e Valencia.

Con respecto ás prazas do estranxeiro, Galicia é a terceira comunidade cunha oferta máis ampla neste eido. Segundo destacou o Injuve, Galicia oferta 88 prazas, só superada por País Vasco (103) e Andalucía (102).

Os campos de traballo son actividades encamiñadas a fomentar a convivencia a través da colaboración desinteresada e voluntaria en traballos diversos que se levan a cabo en todas as comunidades autónomas e en distintos países. A cambio do seu labor, os mozos reciben unha alternativa de lecer e tempo libre baseada no intercambio de coñecementos e culturas, da práctica de deportes e da visita a lugares de interese, tanto turísticos como históricos ou culturais.

O desenvolvemento deste tipo de actividade é un exemplo de boas prácticas en materia de xuventude, xa que cumpre con dous dos principais eixes de actuación da Estratexia de Xuventude 2013, o fomento do voluntariado xuvenil e a mobilidade.

Inscricións
Os interesados en participar nos campos de traballo de Galicia poderán solicitar a súa praza ata tres días antes do inicio da actividade, sempre e cando existan vacantes; para acudir a outras comunidades autónomas poderán pedirse ata o 16 de maio, mentres existen prazas libres; e, por último, para os campos de traballo no estranxeiro a inscrición rematará o 11 de maio.

As inscricións faranse na Dirección Xeral de Xuventude e Voluntariado ou a través dos teléfonos 981 544 838; 981 957 115; e 981 544 840. Tamén se poderá solicitar unha praza nos servizos de xuventude e voluntariado e oficinas locais das xefaturas territoriais da Consellería de Traballo e Benestar.

O director xeral de Xuventude e Voluntariado, Ovidio Rodeiro, presentou esta iniciativa que arranca hoxe no concello de Ames

O plan consta de 4 modalidades enfocadas a temas de especial interese para a mocidade, como son as habilidades para a busca de emprego; a participación e o asociacionismo; os recursos existentes para mozos e mozas; e a formación centrada na oratoria

Persoal da Rede Galega de Dinamización Xuvenil impartirá os obradoiros que foron deseñados, escollidos e planificados en colaboración con técnicos municipais e responsables de Espazo Xove

Os destinatarios son menores de 30 anos, técnicos locais de emprego, animadores xuvenís, concelleiros de xuventude, asociacións, grupos informais e, en xeral, calquera colectivo interesado no eido da mocidade

O programa Activa da Consellería de Traballo e Benestar permitirá a formación de máis de 5.000 mozos e mozas por toda Galicia en temas de especial interese para este colectivo.ACTIVA

O director xeral de Xuventude e Voluntariado, Ovidio Rodeiro, presentou esta iniciativa en Ames, onde se inicia hoxe o primeiro dos 141 cursos e obradoiros que se celebrarán entre os meses de abril e novembro por toda Galicia.

Persoal da Rede Galega de Dinamización Xuvenil percorrerán, deste xeito, concellos e comarcas das catro provincias desenvolvendo estas xornadas que inclúen catro tipoloxías de formación que tentan abranguer cuestións transversais e de interese para a mocidade galega.

A primeira das catro modalidades, segundo explicou Rodeiro, leva por título ‘Mediación xuvenil para a participación’, que se centra na formación en competencias sobre xestión e funcionamento interno de entidades xuvenís e na difusión de elementos que potencien o asociacionismo e a participación da mocidade. Este é o primeiro dos obradoiros que comeza hoxe en Ames.

A divulgación de recursos para a mocidade galega será o tema clave da segunda tipoloxía de cursos que se levarán a cabo a través do programa ‘Activa’. Así, ‘Programas e axudas para mozos e mozas’ procurará amosar aos mozos e mozas qué oportunidades e medios teñen á súa disposición sobre temas como a vivenda, mobilidade, voluntariado, asociacionismo, emprego ou bolsas e axudas.

O terceiro curso que se impartirá, ‘Comunícate’, versará sobre a importancia de saber transmitir e comunicarse con eficacia. O obradoiro centrarase en descubrir as claves comunicativas fundamentais para enfrontarse con solvencia ás necesidades de cada día.

Por último, ‘Emprégate’ terá como finalidade mellorar a empregabilidade da mocidade, achegando as ferramentas axeitadas para atopar un emprego. “Pretendemos que os participantes acaden unha idea clara do mercado laboral, cáles son as oportunidades dispoñibles en momentos de crise, cómo elaborar un currículum ou enfrontarse a unha entrevista de traballo”, apuntou. Nesta iniciativa, ademais, descubrirán o programa ‘Emprende’ da Dirección Xeral de Xuventude.

Beneficiarios dos cursos
Os destinatarios destas xornadas serán os menores de 30 anos, técnicos locais de emprego, animadores e animadoras xuvenís, concelleiros e concelleiras, asociacións e grupos informais, aínda que están abertos a calquera colectivo interesado no eido da mocidade.

Para consultar as datas e lugares de realización destes obradoiros, os interesados poden consultar máis información na páxina web www.xuventude.net.

declaracionsAs consellerías de Traballo e Benestar e de Cultura e Educación, a través da Dirección Xeral de Xuventude e Voluntariado e da Secretaría Xeral de Política Lingüística, respectivamente, convocan este certame de declaracións de amor en liña para conmemorar o 17 de maio, Día das Letras Galegas e Día de Internet

O concurso está dirixido a mozos e mozas que teñan entre 14 e 35 anos, pero calquera persoa interesada poderá ter participación votando polas declaracións que máis lle gusten

Con motivo da dobre celebración, o 17 de maio, do Día das Letras Galegas e mais do Día de Internet, as consellerías de Cultura, Educación e Ordenación Universitaria e de Traballo e Benestar, a través da Secretaría Xeral de Política Lingüística e a Dirección Xeral de Xuventude, respectivamente, presentaron hoxe en rolda de prensa o concurso de declaracións de amor en galego vía internet Lingua de namorar.

O secretario xeral de Política Lingüística, Valentín García, recordou durante a presentación que o galego é actualmente “a lingua que preferimos para falar coa xente que queremos: os amigos, a familia, as persoas que temos preto”, mais que pode ser tamén “a lingua que usemos para dirixirnos a persoas descoñecidas e iniciar relacións novas que, se comezan en galego, se manterán en galego”. García Gómez destacou tamén que o noso idioma, “que foi lingua de namorar na Idade Media, pode seguir séndoo hoxe e esperamos que así o entenda a mocidade galega”. Neste sentido, indicou que “o prestixio literario que tivo e ten a lingua galega debe complementarse co que hoxe ofrecen outros medios, coma internet”.

Neste mesmo senso, Ovidio Rodeiro, director xeral de Xuventude e Voluntariado, fixo fincapé en que a promoción do idioma galego é necesaria e, por iso, lembrou que é unha das prioridades da primeira Lei de Xuventude de Galicia.

Plan xeral de normalización da lingua galega
Os obxectivos da nova iniciativa son fomentar a participación en galego da mocidade, aumentar a presenza do noso idioma en internet e animar ao seu uso nas relacións interpersoais, de acordo co establecido polo Plan xeral de normalización da lingua galega nos ámbitos da mocidade e das novas tecnoloxías.

Xuventude 2013, unha estratexia para a mocidade galega
‘Lingua de namorar’ contribúe tamén, no marco do Plan Estratéxico Xuventude 2013 deseñado pola Dirección Xeral de Xuventude e Voluntariado ao fomento da lingua galega entre a mocidade. Ao fío disto, explicou o director xeral que unha vez que no Parlamento se aprobe a Lei de Xuventude de Galicia, as políticas de promoción e dinamización do galego entre a mocidade formarán parte dos sucesivos Plans Estratéxicos de Xuventude. “Todos os gobernos estarán obrigados a redactar e aprobar no Consello da Xunta en cada lexislatura”, apuntou.

Para concluír, Rodeiro explicou que “con esta iniciativa garantimos os principios de transversalidade e coordinación administrativa que deben rexer todas as políticas de xuventude, incluíndo as de dinamización lingüística”.

Bases do concurso
Ata o 17 de maio, os mozos e mozas que queiran participar poderán inscribirse e colgar as súas declaracións, de menos de 350 caracteres, na páxina web www.xunta.es/linguagalega/linguadenamorar, onde se poden consultar as bases do concurso. Todas as declaracións serán visibles nese mesmo web, onde figurarán de forma anónima, para que, a partir do Día das Letras Galegas e Día de Internet, as persoas que o desexen poidan votar polas que máis lles gusten.

As bases establecen dúas categorías -unha para mozos de 14 a 19 anos e outra para mozos de 20 a 35- e tres premios por categoría consistentes en produtos tecnolóxicos coma un iPad, unha wii ou un libro electrónico, entre outros.

Difusión a través de axentes dinamizadores locais e educativos
O secretario xeral de Política Lingüística mostrou o seu desexo de contar coa axuda das entidades pertencentes á Rede de Dinamización Lingüística e mais dos equipos de dinamización da lingua galega na difusión desta iniciativa, polo que agradeceu a súa colaboración.


A mocidade, un sector social prioritario para a dinamización lingüística
O galego é a lingua de maior uso social en Galicia. O 56,4% da poboación maior de 5 anos fala sempre en galego ou máis galego ca castelán, segundo se desprende dos datos da ECVFG-2008, e os que falan sempre en galego constitúen o 30% da poboación. Malia todo, a xuventude adoita utilizar máis o castelán. En consecuencia, as franxas de idade máis novas constitúen un dos principais retos para a lingua galega, así como o sector da poboación onde se fai máis necesaria unha actuación planificada para promover o uso do idioma.