Listado Iniciativa Xove 2013

Listado Iniciativa Xove 2013 (22)

xornadas_micoloxicasRutas e Cogomelos de Betanzos é un grupo informal de mozos e mozas do municipio betanceiro unidos por unha afección común ao mundo dos cogomelos e ás actividades no medio natural. Froito desta afección naceu o proxecto Xornadas micolóxicas, O patrimonio ecolóxico, oportunidade para o emprendemento, que se desenvolveu ao longo do mes de outubro e contou coas actividades seguintes:

  • Curso de iniciación á micoloxía (do 14 ao 18 de outubro)O curso, que tivo lugar no Espazo Xove de Betanzos, estaba dirixido a todos os mozos e mozas de entre os 16 e os 35 anos, sen coñecementos previos sobre a materia, que quixesen iniciarse no mundo da micoloxía. Participou un total de 21 persoas. 
  • Curso sobre os cogomelos máis frecuentes en Galicia (do 22 ao 24 de outubro) O curso, que tivo lugar no Espazo Xove de Betanzos, estaba dirixido a mozos e mozas de entre os 16 e os 35 anos, con coñecementos previos sobre micoloxía, que desexasen afondar nesta materia. Participou un total de 26 persoas. 
  • Charla sobre o cultivo de cogomelos e as súas distintas aplicacións (19 de outubro) Os cogomelos, polas súa características, teñen moitas aplicacións no ámbito gastronómico e forestal.O obxectivo desta charla era aumentar o interese das persoas participantes polas aplicacións dos cogomelos en distintos ámbitos da vida económica de Galicia. A charla, na que participaron 17 persoas, foi impartida de forma desinteresada polo persoal da empresa Porto Muíños.
  • Saídas ao monte guiadas por un experto micólogo (días 13 e 20 de outubro)A finalidade desta actividade era que as persoas participantes puidesen poñer en práctica os seus coñecementos teóricos, sempre baixo a  supervisión dunha persoa experta en micoloxía, á vez que se promovía unha actividade de ocio saudable como son as saídas ao monte. As saídas guiadas leváronse a cabo no Parque Natural das Fragas do  Eume, no concello de Monfero. O día 13 de outubro participaron 24 persoas mentres que o 20 de outubro participou un total de 33 persoas.
  • Visita guiada á Aula de Cociña da empresa Porto Muíños (25 de outubro)Porto Muíños é unha empresa pioneira no cultivo, procesado e comercialización de  champiñóns e outros cogomelos en Galicia. O obxectivo da visita era coñecer outro exemplo de empresa de éxito que naceu, precisamente, de descubrir o potencial comercial que tiñan os cogomelos no noso país. Nesta visita guiada á Aula de Cociña participaron 19 persoas.
  • Xornada en Casa de Sixto: ecoloxía, emprendemento, turismo rural, micogastronomía e espectáculo de cociña. Charla sobre emprendemento e patrimonio ecolóxico a cargo da directora xeral de Olei (26 de outubro)A xornada tivo lugar en Casa de Sixto, establecemento de turismo rural, do Concello de Paderne, membro da Asociación Refuxios do Mandeo. Durante a mañá, as persoas participantes saíron a buscar cogomelos polos montes que hai ao redor da casa para, deseguido, realizar un concurso de identificación supervisado pola Federación Micolóxica Galega. As e os gañadores do concurso foron premiados con distintos agasallos ofrecidos pola Asociación Refuxios do Mandeo. De 12:00 a 13:00 h impartiuse a Cátedra de Cociña, que correu a cargo de José Luis Tomé Ortega. A continuación, o relator preparou con filloas á pedra a degustación popular da tradicional Cazola de Bruxas. Xa pola tarde, tivo lugar o Show Cooking e a degustación a cargo de Mesón Paxeiro de Javier Casanoba, de Mesón-restaurante a Veiga e de Tarta.com Arte, todos eles de Betanzos.  Aceites Olei quixo estar presente nestas xornadas e foi utilizado en todos os pratos. María Estévez Forneiro, propietaria da compañía, explicou as características e o potencial da variedade, 100% galega, de oliva brava que utiliza na elaboración dos seus aceites. A xornada pechouse cunha queimada e cunha ruta cultural da Santa Compaña polos camiños que rodean este establecemento de turismo rural. 

O obxectivo principal destas xornadas era transmitirlles aos mozos e mozas participantes os valores de coñecemento do noso patrimonio micolóxico e do espírito emprendedor que impregnaron de forma transversal todas as actividades, dunha forma lúdica e en contacto coa natureza. Na iniciativa participaron 43 persoas.


Máis información sobre as Xornadas micolóxicas, O patrimonio ecolóxico, oportunidade para o emprendemento:

III Xornadas Micolóxicas de Betanzos, en Facebook 

Betanzos acollerá en outubro as Xornadas Micolóxicas con charlas e curso 

Éxito das III Xornadas Micolóxicas de Betanzos 

A Casa da Xuventude acollerá un curso de micoloxía en outubro 

 

Máis información sobre o Grupo Informal Rutas e Cogomelos de Betanzos en Facebook 

tecido_asociativoCruz Vermella Xuventude formulou esta iniciativa para a mocidade a través dunha xornada onde se pretendía favorecer a vida asociativa e a participación da mocidade na toma de decisións, fomentando a equidade de xénero.

 

As actividades do proxecto xiraron en torno a dúas accións: realización da xornada Xoguemos a tecer tecido asociativo e a elaboración dunha guía informativa.

 O obxectivo principal da xornada Xoguemos a tecer tecido asociativo, que tivo lugar o 19 de outubro no albergue peregrino Monte do Gozo, en Santiago de Compostela, era promover unha mocidade activa e solidaria, fomentando o sentimento de pertenza e o espírito solidario, á vez que se visibiliza o papel das mozas como axentes de desenvolvemento na cidadanía galega. 

A través de actividades lúdico-formativas profundouse na importancia do traballo en grupo –o asociacionismo–, os mecanismos de participación cidadá e o proceso de empoderamento da mocidade galega. 

Por outra banda, elaborouse unha guía informativa sobre o asociacionismo e o papel da xuventude. O obxectivo principal desta guía é ampliar o impacto do grao de coñecemento sobre o asociacionismo e a participación cidadá.


Máis información sobre Xoguemos a tecer tecido asociativo:
Facebook


Máis información sobre Cruz Vermella Xuventude 
Web: http://www.cruzvermella.org/quen-somos/xuventude/ 
Twitter de Cruz Vermella Xuventude: https://twitter.com/CruzVermellaXuv 
Facebook de Cruz Vermella Española en Galicia: https://www.facebook.com/cruzvermella.org

vitaminateO  Club Emprende M.A.S. é unha asociación sen ánimo de lucro prestadora de servizos á xuventude, formada por mozas e mozos universitarios, que ten como misión construír unha comunidade de persoas novas que promoven unha cultura de emprendemento baseada en valores, orientada á excelencia e á sostibilidade, a través dunha rede de apoio que atende as súas inquedanzas con profesionalidade, calidade humana, e comprometida co desenvolvemento da persoa.

O proxecto VITAMÍNA-T, organizado pola Asociación Club Emprende M.A.S. grazas ao programa Iniciativa Xove da Xunta de Galicia, consistiu na realización dunha serie de actividades encamiñadas a dotar os mozos e mozas da motivación e das habilidades precisas de cara ao seu futuro. 

VITAMÍNA-T, dirixido a mozos e mozas de 18 a 35 anos, desenvolveuse en catro fases que tiveron lugar ao longo do mes de outubro na Universidade de Santiago de Compostela e no Edificio Cersia Empresa do Concello de Santiago de Compostela

  • Fase 1: Toma de contacto Consistiu nunha serie de charlas informativas realizadas en diversas facultades da Universidade de Santiago de Compostela (Dereito, Farmacia, ETSE e Xornalismo) e nunha macrocharla motivacional e dinámica na facultade de Ciencias Económicas e Empresariais. Nesta macrocharla contamos coa presenza de Roberto Pérez Marijuán e Juan José Romero Crusat, socios de Suma Importancia, que impartiron a conferencia “Dejadme Soñar”; Santiago Martínez, profesional da Oratoria, que nos relatou o seu caso de éxito; e Álex Pardo, monologuista que amenizou o peche da xornada.
  • Fase 2: Design Competition Consistiu na superación dun reto emprendedor dunha empresa real empregando a creatividade e a imaxinación. Os mozos e mozas puideron darse a coñecer profesionalmente achegando o mellor deles mesmos/as. A maiores, tamén debateron sobre temas de emprendemento e de éxito profesional.
  • Fase 3: Design Thinking Para os mozos e mozas que superaron o Design Competition comezou esta fase, na que a profesional Dolores Diz fixo a dinámica “Pensamento de Deseño”. O dito workshop é unha metodoloxía aplicable a calquera ámbito que requira un enfoque creativo baseado nos principios de empatía, imaxinación, experimentación, prototipado colaborativo, pensamento integrador e aprendizaxe interactiva.Ao finalizar esta dinámica gozamos da presenza de Santiago Martínez, quen empregou as técnicas da comunicación e do debate para fomentar actitudes e propostas creativas baseadas en argumentacións sólidas. Deste xeito, potenciáronse as habilidades comunicativas.
  • Fase 4: Posta en común Consistiu na posta en común do aprendido durante as diversas fases anteriores, na exposición dun vídeo resumo e na realización dun networking. Buscabamos poñer a xuventude en contacto con emprendedores, empresarios e representantes de institucións co fin de que puidesen xerar sinerxías con eles. Entre os que chegaron a esta fase sorteouse un tablet libre Blusens Touch 90.

 

Máis información sobre o proxecto VITAMÍNA-T: 

 Blogue Programa VITAMÍNA-T

VITAMÍNA-T en Vimeo. Resumo das sesións realizadas dentro desta iniciativa

O proxecto VITAMÍNA-T fomentará o espírito emprendedor entre os mozos universitarios 

O proxecto VITAMÍNA-T preséntase a próxima semana en varios centros composteláns 

Charlas e un workshop para fomentar o espírito emprendedor na USC. El Correo Gallego

 

Máis información sobre a Asociación Club Emprende M.A.S.:  www.clubemprendemas.es

topografiasO proxecto Topografías Vivas naceu da necesidade dun grupo de artistas plásticos e escénicos da Coruña de achegar a arte ao seu contorno máis próximo, o barrio dos Mallos na Coruña. Á vez, a iniciativa buscaba incentivar a experiencia artística real na comunidade de veciños e veciñas deste distrito.

Topografías Vivas consistiu na realización de diversas actividades artística no barrio ao longo dunha semana, en colaboración co espazo creativo Extramuros, onde tiveron lugar os cinco obradoiros artísticos, de tres horas de duración cada un deles, e as exposicións (de dous días de duración) dos traballos realizados polas persoas participantes.
As actividades que se levaron a cabo dentro da iniciativa Topografías Vivas foron as seguintes:
  • Expresións gráficas: experimentar cunha gran variedade de materiais gráficos sobre un soporte de gran formato común- Teatro e Movemento: espertar a creatividade e a desinhibición co teatro
  • Mobiliario de cartón: achegamento á técnica de deseño e construción en cartón- Barrio cromático: a expresividade plástica a través da arte abstracta
  • Arte interactiva: transformar a creatividade nunha linguaxe propia que fala de nós a través da pintura
  • Exposición: mostra colectiva das obras realizadas polo alumnado participante nos obradoiros artísticos
  • Exposición: mostra colectiva das obras realizadas polo alumnado participante nos obradoiros artísticos Un dos obxectivos principais de Topografía Vivas era descentralizar a produción artística.
Como obxectivos secundarios podemos destacar os seguintes:
  • Ampliar a circulación da cultura ao barrio
  • Traballar a arte como vehículo para activar as persoas 
  • Achegar a comunicación artística visual ao barrio
  • Romper a fronteira entre artista e espectador
  • Ofrecer alternativas artísticas en espazos non formais
  • Socializar a técnica artística
  • Valorar o barrio dos Mallos: Dinamizar o tecido social e cultural do barrio, fomentar o sentimento de pertenza á comunidade e establecer vínculos de transformación grupal e comunitario

Todas as actividades de Topografías Vivas, nas que participaron 50 persoas, tiveron lugar entre o 7 e o 13 de outubro. 


Máis información sobre Topografías Vivas:

Topografías Vivas en Facebook 

Vídeo Topografías Vivas converte o barrio dos Mallos da Coruña nunha gran galería de arte, en YouTube 

Un proxecto de Iniciativa Xove converterá esta semana o barrio dos Mallos da Coruña nunha gran galería de arte 

socializateO Grupo Informal Ocio para a Xuventude desenvolveu durante o mes de outubro a iniciativa Socialízate, que tiñan por obxectivo dinamizar a participación da mocidade ourensá en actividades lúdico-formativas. 

 As actividades que se levaron a cabo dentro do proxecto Socialízate a foron as seguintes:

  • Obradoiro de repostería: para elaborar sobremesas artesanais caseiras.
  • Degustación de sobremesas: a comunidade universitaria de Ourense tivo a oportunidade de probar as sobremesas que se elaboraran previamente no obradoiro de repostería.
  • Obradoiro de calceta: para aprender a elaborar bufandas e alfombras de forma artesanal.
  • Obradoiro de artesanía:para aprender a elaborar colares e pulseiras de forma artesanal.
  • Degustación de comidas do mundo: nesta ocasión, o público en xeral tivo ocasión de degustar comidas típicas de diversos países do planeta.
  • Defensa persoal: para aprender as nocións básicas de defensa persoal
  • Clases de cóckteles sen alcohol: para aprender a elaboración combinados de bebidas sen alcohol.
  • Viaxe cultural a Porto: nesta viaxe as persoas participantes tiveron a oportunidade de realizar unha visita cultural á segunda cidade máis importante do país veciño. 

Máis información sobre Socialízate:
Socialízate, en Facebook

Socialízate, en Twitter 

Actividades de balde en outubro (Proxecto Socialízate) 

Algunhas boas escusas para socializarse 

rural_playRural Play and Dance é unha actividade, incluída dentro do programa Iniciativa Xove da Xunta de Galicia, que parte de cinco mozos e mozas da Baña e de Negreira que constitúen o Grupo Informal A Mocidade Non Stop

O proxecto Rural Play and Dance consistiu na realización de tres obradoiros relacionados co mundo da cultura urbana como son o graffiti, o breakdance e o skateboard nunha comarca puramente rural, coa que se pretende ampliar a oferta cultural para a mocidade. 
  • Obradoiro de graffiti: Arte nas paredes

Co obradoiro de graffiti pretendíase achegar á comunidade o mundo da arte urbana a través da técnica do spray, atendendo á reivindicación de novos espazos creativos e á intervención plástica no noso contorno.

  • Obradoiro de skateboard: Móvete co skate

O skateboard é unha das disciplinas da cultura urbana máis practicadas pola xuventude na rúa, a través do uso do skate (monopatín) en diferentes zonas urbanas. As vantaxes que reporta son moitas: mellora do equilibrio, diversión, traballo de todo o corpo e posibilidade de practicalo en calquera lugar.

  • Obradoiro de breakdance: Dance na rúa

A través do breakdance ofrécese unha alternativa de ocio e hábito de exercicio saudable dado que contribúe ao fortalecemento corporal, mellora a condición física, o equilibrio e a coordinación motriz. Tamén se adquire sensibilidade musical mediante a percepción e o recoñecemento de estruturas rítmicas. Os obradoiros leváronse a cabo o domingo 8 de setembro de 2013 na praza do Concello da Baña. 

As actividades estiveron  dirixidas principalmente á mocidade de entre 12 e 35 anos con ganas de descubrir unha nova forma de lecer. Finalmente, na actividade existiu unha grande adaptación xa que o grupo de idade que finalmente participou no evento foi do máis diverso. Toda persoa que o desexara, tivo a oportunidade de pasar unha xornada agradable inmersa nunha cultura urbana diferente á que están afeitas. 

Por outra banda, gozouse dunha exhibición de turntablism e de breakdance. Amais, o público asistente (máis de 50 persoas participaron de forma activa nos obradoiros) e figura activa dos obradoiros participou no sorteo dun monopatín e dunha camiseta de cultura urbana. 

 

Máis información sobre Rural Play and Dance:

A cultura urbana aterra na Baña a ritmo de break. El Correo Gallego 

Concello da Baña: Rural Play and Dance

Galería de fotos de Rural Play and Dance no Facebook de Vella Escola

ruas_xovesVella Escola é unha asociación especializada na organización e difusión de actividades relacionadas coa cultura urbana en Galicia: breakdance, graffiti, skateboard, rap, beatbox, parkour, turntablism (DJ), street basket, danzas de rúa, bmx, slackline, capoeira… 

A misión de Vella Escola é promover e difundir en Galicia as manifestacións culturais e artísticas que nacen no medio urbano (disciplinas de cultura urbana), a través da xestión e oferta de actividades innovadoras de calidade, que mellor respondan ás necesidades e demandas da xuventude actual. 

O principal obxectivo da Asociación Cultural e Deportiva Vella Escola é ofrecerlle ao colectivo xuvenil a posibilidade de participar activa e socialmente en diferentes proxectos que favorezan o seu desenvolvemento integral mediante a formación e a expresión artística, o ocio activo e a integración social a través da cultura urbana.

Rúas Xoves. Creactívate e participa na cultura urbana! é un programa composto por xornadas de portas abertas realizadas na rúa, nas que se ofertan diferentes obradoiros e exhibicións de actividades de cultura urbana dirixidas á xuventude (de 12 a 35 anos) e orientadas a conseguir a máxima participación e implicación (participación activa) deste colectivo nas actividades programadas.

Os obxectivos xerais desta iniciativa foron os seguintes:

  • Motivar a participación activa da xuventude en diferentes actividades culturais e artísticas a través da oferta de programas innovadores que respondan ás súas inquedanzas para a ocupación do seu tempo de lecer. 
  • Potenciar a creatividade dos mozos e mozas e contribuír á súa formación artística e creativa de forma educativa e integral.
  • Motivar condutas saudables de ocupación do tempo de ocio e fomentar valores cooperativos de aceptación, tolerancia, respecto e solidariedade. 

As actividades de Rúas Xoves desenvolvéronse durante os meses de xuño e outubro deste ano 2013 nos seguintes lugares e datas:

  • Noia, 26.08.2013: Xornada de Cultura Urbana Portas Abertas
  • Muros, 29.06.2013: Xornada de Cultura Urbana Portas Abertas
  • Lugo, 01.06.2013: Obradoiros de campionato de Breakdance
  • Santiago de Compostela, 08.06.2013 e 10.10.2013: Xornada de Cultura Urbana Portas Abertas

 

Máis información sobre Rúas Xoves. Creactívate e participa na cultura urbana!:
Xornada de Cultura Urbana nas Festas de Noia 2013, Flickr 

O Concello de Santiago presenta Rúas Xoves, cultura urbana en estado puro 

Rúas Xoves, Santiago de Compostela con Vella Escola 

Xornada de cultura urbana na praza Roxa este xoves. El Correo Gallego 

Xornada de cultura urbana na praza Roxa 

 

Máis información sobre a Asociación Cultural e Deportiva Vella escola: 

Web: http://www.vellaescola.com/ 

Twitter: https://twitter.com/Vella_Escola  

Facebook: https://www.facebook.com/vellaescola.cultura.urbana

queret_mimateO grupo NEVOX, formado por cinco mozos e mozas de Lousame, organizou e puxo en marcha a iniciativa Quérote, mímate, cóidate.

O proxecto consta de tres grandes bloques temáticos: o primeiro bloque explotou a actividade artística a través dunha obra de teatro; o segundo bloque tratou o benestar a través de diferentes talleres e, por último, o terceiro bloque conduciu as e os participantes a tratar a igualdade entre persoas a través do deporte.

A obra de teatro E ti...  que farías? reflexionaba sobre o consumo de drogas e de alcohol por parte da mocidade, así como a práctica de sexo seguro. O grupo representou a obra en diversas verbenas tanto do Concello de Lousame como doutros concellos limítrofes.

O bloque máis central do programa foi o pertencente ao benestar. Para tratar este temática realizáronse talleres de masaxes, de imaxe persoal, de tatuaxes e de automaquillaxe. Amais, nestes talleres realizáronse sorteos para sesións de masaxes, peiteados, maquillaxes e ata unha tatuaxe. 

O terceiro bloque consistiu na realización dunha xincana deportiva e mais unha charla que tiñan como obxectivo reflexionar sobre a igualdade entre todas as persoas. Para o desenvolvemento destas actividades contouse co apoio da asociación MISELA e co Colexio Cernadas de Castro de Lousame.

Os lugares e as data de realización das actividades foron as seguintes:

E ti... que farías? Porto do Son, 11 de setembro , Ponte de San Francisco, Noia, 14 de setembro , Casa da Cultura de Lousame, 28 de setembro , San Roquiño, Lousame, 29 de setembro

Taller de masaxes: Casa da Cultura de Lousame, 6 de setembro, Taller de imaxe persoal: Casa da Cultura de Lousame, 7 de setembro , Taller de tatuaxes: Casa da Cultura de Lousame, 13 de setembro , Taller de automaquillaxe: Casa da Cultura de Lousame, 21 de setembro , Taller recordatorio: Casa da Cultura de Lousame, 27 de setembro

Xincana deportiva: Colexio Cernadas De Castro, Lousame, 1 de outubro


Máis información sobre Quérete, mímate, cóidate:
Lousame amplía a súa oferta de ocio para os mozos con talleres de fotografía e imaxe persoal 

Actividades de ocio e obradoiros de fotografía para mozos de Lousame 

Xuventude apoia catro proxectos de Iniciativa Xove en Noia e Barbanza cun orzamento de 16 000 € 

Barbanza xa é un referente de ocio saudable en Galicia 

elveElve é un grupo informal que foi creado para promover  actividades tanto educativas como lúdico-recreativas e fomentar con elas o movemento da xuventude na comarca do Ribeiro. 

O Proxecto Elve consistiu na realización das actividades seguintes: 

  • Festa da Istoria de Ribadavia. Lugar: espazo infantil Bolboretas. Data: 22, 23 e 24 de agosto de 2013 

A actividade consistiu en realizar decoracións de carácter variado para axudar no desenvolvemento da festa máis coñecida do Ribeiro, a Festa da Istoria de Ribadavia, considerada de interese turístico nacional.  O obxectivo da dita actividade era achegarlles aos e ás participantes a Festa da Istoria xerando de tal xeito o interese pola época medieval. 

  • Obradoiro de traballos manuais. Lugar: espazo infantil Bolboretas. Data: 10, 11, 12 e 13 de setembro de 2013

Nesta actividade realizáronse actividades manuais como: pulseiras, chaveiros e figuras de animais con globos. 
O obxectivo desta actividade era desenvolver a capacidade para crear e ser creativo, así como mellorar destrezas motrices. 

  • Actividades lúdico-deportivas Lugar: comarca do Ribeiro Data: 21 de setembro de 2013 

A actividade consistiu nunha andaina pola comarca do Ribeiro e mais nunha visita guiada pola vila de Ribadavia, que incluía unha visita ao museo etnolóxico e ao Castelo dos Sarmientos. A  andaina continuou ata os lugares próximos como San Cristovo ou A Quinza.  Ao mediodía fíxose unha pausa para xantar nun merendeiro situado no pequeno lugar de San Cristoval, onde os e as participantes desfrutaron dunha ampla variedade de alimentos. 
O obxectivo que pretendía con esta actividade era coñecer o contorno e acadar unha maior concienciación co medio ambiente xa que, ademais de camiñar e observar a bonita paisaxe, o grupo axudou no coidado do medio recollendo a maior parte de lixo que ía atopando polo camiño. 

  • Aprende a relaxarte. Lugar: espazo infantil Bolboretas. Data: 24, 25 e 26 de setembro de 2013 

A actividade consistiu na aprendizaxe das diferentes técnicas de realizar unha masaxe relaxante corporal e facial. 
Os obxectivos desta actividade eran usar as mans como un instrumento de relaxación co propio corpo e aprender a relaxarse física e mentalmente.

  • As novas tecnoloxías. Lugar: Casa da Xuventude de Ribadavia. Data: 27 e 28 de setembro de 2013  O obradoiro realizouse para achegar os e as participantes ao mundo das novas tecnoloxías e tiña como finalidade crear un blog onde se recollan os intereses e as opinións das persoas participantes. 

O Proxecto Elve ofreceulles ás persoas participantes a posibilidade de acceder a unha serie de actividades lúdicas, gratuítas e novidosas pouco frecuentes nunha comarca rural como é a do Ribeiro. 


Máis información sobre o Proxecto Elve:

Novas actividades internacionais e locais da OMIX de Ribadavia na tempada de outono e inverno 

Obradoiro de traballos manuais. Facebook da OMIX de Ribadavia 

 

Máis información sobre o Grupo Informal Elve: 
Blog: http://elvexuventude.blogspot.com.es/

participa_goza_naturaleza_culturaO Grupo Informal Mocidade Cabaqueira, formado por cinco mozos e mozas do Concello do Rosal, organizou a finais de setembro unha visita ambiental e cultural á Serra do Courel, unha actividade incluída dentro do programa Iniciativa Xove 2013. 

Os días 27, 28 e 29 de setembro, un grupo de 54 mozos e mozas compoñentes da banda de música da Agrupación Musical do Rosal, con idades comprendidas entre os 12 e 30 anos, desprazouse ata o Courel para realizar diversas actividades.

Durante a súa estancia combinaron actividades na natureza, como excursións para coñecer o espazo natural e outros centros de interese da Serra do Courel, con actividades musicais, nomeadamente, organizaron dous concertos gratuítos aos que puideron asistiron os veciños e veciñas de Folgoso do Courel. 

Os concertos tiveron lugar os días seguintes:
— 28 de setembro, ás 11.00 h, en Seoane, no CPI Poeta Uxío Novoneyra, no marco da celebración da Festa dos Maiores
— 29 de setembro, ás 12.00 h, en Folgoso do Courel, na praza do Concello

O obxectivo principal da iniciativa Participa e goza da cultura e da natureza era proporcionarlles aos membros máis novos da banda de música Agrupación Musical do Rosal a posibilidade de coñecer un espazo senlleiro do país, para ampliar os seus horizontes persoais e conciencialos sobre a necesidade de manter o noso patrimonio cultural e histórico. 
Por outra parte, pretendíase achegar a música de banda a un punto afastado na xeografía galega que, polas características dimensionais dos seus núcleos de poboación, teñen poucas posibilidades de poder gozar coa música dunha banda das dimensións e da calidade da Banda do Rosal.

 

Máis información sobre Participa e goza da cultura e da natureza:

Vídeo Agrupación Musical do Rosal. Actuación no Concello de Folgoso do Courel, en YouTube 

A banda de música da Agrupación Musical do Rosal ofrecerá dous concertos no Caurel 

Programación Grupo Informal Mocidade Cabaqueira