En portada (1158)

  • O director xeral de Xuventude e Voluntariado, Ovidio Rodeiro, celebrou a posta en marcha deste proxecto que permitiu recuperar unha das tradicións máis afamadas da cidade
  • O pasado ano un total de 969 mozos e mozas participaron nos 60 proxectos galegos aprobados polo ‘Xuventude en Acción’
  • Galicia é a terceira comunidade con máis proxectos aprobados
cabezudo_ribeiraA asociación xuvenil Flor de Toxo presentou en Ribeira (A Coruña) a iniciativa europea ‘Mozos con ideas, mozos con cabeza’, que desenvolverán durante os vindeiros meses. Este proxecto, enmarcado no programa europeo ‘Xuventude en Acción’, coordinado pola Dirección Xeral de Xuventude e Voluntariado, dependente da Consellería de Traballo e Benestar, conta cun orzamento de 5.600 euros e ten como obxectivo a recuperación dunha comparsa de xigantes e cabezudos.

A tradición de pasear durante as festas de Ribeira os xigantes e cabezudos tivo gran importancia durante os dous séculos pasados, se ben se perdeu nos anos 80. O proxecto desenvolverase durante as fins de semana e participarán arredor de 15 mozos e mozas, que nas festas de Ribeira do verán serán os encargados de desfilar coa comparsa.

O director xeral de Xuventude e Voluntariado, Ovidio Rodeiro, visitou hoxe aos integrantes da asociación e celebrou a posta en marcha deste proxecto que permitiu recuperar para toda a sociedade unha das tradicións máis afamadas da cidade. Tamén resaltou “a enorme capacidade que ten a xuventude galega para sacar adiante os seus propios proxectos, como demostraron os membros da asociación Flor de Toxo”.

Por iso, para o director xeral “desde a Administración temos que ser capaces de ofrecerlle á mocidade, con total confianza nela, as ferramentas adecuadas para canalizar o seu talento e a súa capacidade de liderado”. Entre esas ferramentas de participación está o programa europeo Xuventude en Acción, que na nosa comunidade canaliza e coordina a Dirección Xeral de Xuventude e Voluntariado.

O pasado ano un total de 969 mozos e mozas participaron nos 60 proxectos galegos aprobados polo ‘Xuventude en Acción’. Galicia é a terceira comunidade con máis proxectos aprobados, polo que “este elevado índice de participación resalta a forte iniciativa dos mozos e mozas galegos en todas as actuacións que teñan que ver coa adquisición de competencias mediante a aprendizaxe non formal”.

Os obradoiros, que son gratuítos, teñen como destinatarios a mozos e mozas de entre 18 e 35 anos

A súa finalidade é aprender a comunicar para emprender un proxecto ou para facilitar atopar o traballo ao que se aspira

Celebraranse ata o 5 de abril nos Espazos Xoves de Tui, Lalín, Vilagarcía e Ourense, no Centro Coordinador de Información Xuvenil de Santiago e na Residencia Florentino López Cuevillas de Ourense

Doutra banda, o Albergue Xuvenil da Gandarío (A Coruña) acollerá unhas xornadas formativas os días 25, 26 e 27 de marzo dentro da actividade Xuventude Emprende

A Dirección Xeral de Xuventude e Voluntariado, dependente da Consellería de Traballo e Benestar, organizará oito obradoiros de comunicación, co fin de facilitar a aprendizaxe e o manexo da comunicación nun entorno onde a información é continua e circula constantemente.

Os obradoiros, que son gratuítos, teñen como destinatarios a mozos e mozas de entre 18 e 35 anos e celebraranse desde este fin de semana e ata o 5 de abril nos Espazos Xoves de Tui, Lalín, Vilagarcía e Ourense, no Centro Coordinador de Información Xuvenil de Santiago e na Residencia Florentino López Cuevillas de Ourense. Para formalizar a inscrición deberase cubrir o formulario na web : www.xuventude.net 

Dita iniciativa enmárcase no proxecto Emprende, financiado polo programa de cooperación transfronteiriza Galicia – Norte de Portugal (POCTEP), que ten como obxectivo principal fomentar a creación de empresas, de emprego e autoemprego para a mocidade, promovendo actividades que convertan o espazo de cooperación transfronteirizo nun marco atractivo para novas actividades económicas e empresariais.

A súa finalidade é aprender a comunicar para emprender un proxecto ou para facilitar atopar o traballo ao que se aspira. A través da capacidade de comunicación búscase fomentar o emprendemento dos mozos e mozas, fortalecendo a capacidade de convición para atopar a cooperación e complicidade, para desenvolver as fortalezas, as capacidades e as actitudes que permitan aos participantes afianzar as súas ilusións presentes e desenvolver as súas ideas para o futuro que desexan.

Haberá dous modelos de obradoiro de catro horas de duración cada un. No primeiro, titulado ‘Comunicación e relacións humanas emprendedoras’, abordarase a capacidade de comunicación nun entorno onde as relacións se establecen por confianza. Traballarase a psicoloxía e socioloxía da linguaxe tanto verbal e non verbal e a comunicación para ser mais eficaces e o reforzo de actitudes para ser mais influentes.

O segundo dos obradoiros será o de ‘Comunicación para falar en público’, que ten por finalidade saber defenderse con fortaleza e seguridade en calquera situación onde se teña que falar en público.

Doutra banda, o Albergue Xuvenil da Gandarío (A Coruña) tamén acollerá unhas xornadas formativas os días 25, 26 e 27 de marzo dirixidas a estudantes de bacharelato ou ciclos formativos de grao medio.

Esta actividade chamada Xuventude Emprende inclúe o aloxamento, durante os tres días. Os participantes desenvolverán competencias emprendedoras como o traballo en equipo, a iniciativa empresarial, a comunicación interpersoal e a xestión da diversidade, entre outras. Tamén haberá espazo para as actividades lúdicas e de tempo libre.

  • O director xeral de Xuventude e Voluntariado, Ovidio Rodeiro, inaugurou hoxe a mostra e destacou que este concurso é unha novidade no decurso de todas as edicións da iniciativa
  • Ovidio Rodeiro recordou que este certame é a maior mostra de creatividade xuvenil de Galicia
  • O gañador deste concurso de carteis levará un premio económico de 500 euros

A sala de exposicións do Centro Coordinador de información xuvenil de Santiago acolle desde hoxe a exposición dos 40 carteis que participan no concurso de elaboración da imaxe do certame 'Xuventude Crea 2013'. Puideron participar no concurso mozos e mozas de 18 a 30 anos residentes en Galicia.

O director xeral de Xuventude e Voluntariado, Ovidio Rodeiro, inaugurou hoxe a mostra e destacou que este concurso é unha novidade no decurso de todas as edicións do certame 'Xuventude Crea', e pretende implicar e facer partícipes aos propios novos artistas na xestión desta iniciativa. Tamén adiantou que a publicación posterior ao certame tamén será deseñada por un novo creador, que será elixido despois doutro concurso.

Ovidio Rodeiro recordou que o certame 'Xuventude Crea' é a maior mostra de creatividade xuvenil de Galicia. Nos últimos anos avanzouse cara a unha maior difusión das obras premiadas, xa que os artistas premiados poden expoñer o seu traballo en salas de toda Galicia a través do Circuíto Galego de Creatividade. Deste xeito, as obras das últimas edicións do certame están expostas no Espazo Xove de Carballo e na sede da eurocidade Chaves-Verín. No vindeiro mes as obras exporanse no Espazo Xove e no Concello de Lalín.

O tema e a técnica foron libres, respectando unhas dimensións de 50x70 cm, polo que na exposición pódense ver carteis realizados a man e tamén con medios dixitais. Todas as obras inclúen o texto 'Certame Xuventude Crea 2013' así como as especialidades que o compoñen: artes plásticas, banda deseñada, carteis, deseño de xoias, graffiti, música, poesía, relato breve, teatro e videocreación.

As obras presentáronse cun lema ou pseudónimo, que servirá para preservar a identidade dos artistas ata o fallo do xurado, que se producirá no mes de abril. O gañador deste concurso levará un premio económico de 500 euros.

O certame 'Xuventude Crea 2013' convocarase mediante orde no Diario Oficial de Galicia no vindeiro mes de abril. Esta iniciativa seguirá contando con premios en metálico para os tres gañadores das diferentes especialidades de 3.000, 1.500 e 1.000 euros.

O director xeral de Xuventude e Voluntariado, Ovidio Rodeiro, e a delegada territorial da Xunta, María José Bravo Bosch, mantiveron hoxe en Vigo unha xuntanza de traballo con concelleiros da gran área de Vigo

En concreto, 21 asociacións e grupos informais da zona participaron no programa Iniciativa Xove; e outros 13 foron beneficiarios do programa Xuventude en Acción

Do total das 34 entidades, un total de 18 proceden da cidade olívica

Rodeiro destacou que esta área territorial é onde se concentra “un maior dinamismo do asociacionismo xuvenil”

Ademais, 82 mozos e mozas da área -49 da cidade de Vigo- participaron en dous anos en programas de mobilidade (Leonardo, Mogal ou Galeuropa)

Na cidade de Vigo hai 7.612 usuarios do carné xove e 268 establecementos adheridosVIGO

Un total de 34 asociacións e grupos informais das comarcas de Vigo, Paradanta, o Baixo Miño, o Condado e o Morrazo xestionaron ao longo de 2012 un total de 256.000 euros en distintos programas xuvenís (Iniciativa e Xove e Xuventude en Acción) promovidos pola Consellería de Traballo e Benestar.

Así o informou hoxe o director xeral de Xuventude e Voluntariado, Ovidio Rodeiro, na reunión que mantivo con concelleiros da gran área de Vigo e na que estivo acompañado pola delegada territorial da Xunta, María José Bravo Bosch. Rodeiro destacou que esta área é “onde se concentra un maior dinamismo do asociacionismo xuvenil en Galicia”.

En concreto, os proxectos que financiou Iniciativa Xove tiveron lugar en Bueu, Cangas, O Covelo, Mos, Nigrán, O Porriño e Vigo. En total, as asociacións xestionaron máis de 70.000 euros para levar a cabo 21 iniciativas. Estas centráronse en diversos temas, que foron desde a organización de festivais de música ou cine, a publicación dun traballo sobre oficios tradicionais, accións de fomento do ocio alternativo ou un obradoiro de relatos de ciencia ficción.

Neste sentido, o responsable da área autonómica informou de que este programa terá en 2013 un orzamento de 730.000 euros para toda Galicia, un 3,55 por cento máis que no exercicio anterior.

Pola súa banda, en Xuventude en Acción participaron 13 entidades dos municipios de A Lama, Marín, Moaña, Mondariz, Redondela, Tomiño e Vigo. En total, xestionaron un total de 186.548 euros, que financiaron proxectos de voluntariado, formación, intercambio internacionais ou difusión de recursos culturais.

Rodeiro destacou que Galicia xestionou en 2012 un total de 60 actividades enmarcadas nestes programa europeo, o que fixo de Galicia a terceira comunidade autónoma española que máis proveito sacou desta liña de actuación.

No que se refire á cidade de Vigo, nestes dous programas, participaron un total de 18 asociacións e grupos informais.

Ademais, os programas de mobilidade (Leonardo, Mogal e Galeuropa) rexistraron un total de 82 participantes da zona de 2010 a 2012, dos que 49 proceden da cidade olívica.

No que respecta á solidariedade, Rodeiro destacou que o pasado ano 4 municipios (Ponteareas, Tomiño, Salceda e Porriño) e 3 asociacións (2 de Vigo e 1 de Porriño) tomaron parte no programa de Voluntariado Xuvenil.

O carné xove foi outro dos temas avaliados na xuntanza. Na cidade de Vigo, un 12,77 por cento da poboación xuvenil conta con este carné, e os usuarios chegan a 7.612 usuarios e 268 entidades adheridas.

No resto da comarca de Vigo, e nas de A Paradanta, Baixo Miño, Condado e O Morrazo son un total de 6.808 os usuarios do carné xove, e hai 179 empresas que ofrecen descontos e vantaxes.

A conselleira de Traballo e Benestar, Beatriz Mato, inaugurou hoxe na Coruña as xornadas ‘Mobilidade de mozos e mozas en situación de desvantaxe’, enmarcadas no proxecto ‘La Ida’ da Fundación Paideia

Os mozos e mozas en situación de desemprego e sen formación poderán traballar en Alemaña durante 4 semanas nos sectores do metal e o comercio, entre outros

Hoxe comeza o prazo de inscrición na web xuventude.xunta.es

A Xunta ofertará máis prazas para realizar prácticas no estranxeiro a través dos programas Galeuropa e Eurogal

Mato destacou que este ano o departamento autonómico multiplica por cinco as prazas de Galeuropa, ata 250, e duplica as semanas de estancia

Eurogal é un novo proxecto, enmarcado no Programa Leonardo da Vinci, que ofertará 100 prazas en diferentes países para realizar prácticas durante 3 meses

A Consellería de Traballo e Benestar reforzará este ano os programas de mobilidade dirixidos á mocidade facendo fincapé en aqueles que están vinculados á realización de prácticas laborais no estranxeiro. Así, o departamento autonómico reforzará a súa colaboración coa Fundación Paideia para o desenvolvemento do proxecto ‘La Ida’, unha iniciativa que permitirá a 10 mozos e mozas galegos traballar ao longo de catro semanas en Alemaña nos sectores do metal, a produción industrial, a saúde, a gastronomía e o comercio.

Así o destacou hoxe a titular do departamento autonómico, Beatriz Mato, na inauguración das xornadas ‘Mobilidade de mozos e mozas en situación de desvantaxe’ enmarcadas no proxecto ‘La Ida’ da Fundación Paideia e co que colabora a Xunta. Esta iniciativa ten como obxectivo principal impulsar o intercambio entre a mocidade galega e alemá en situación de desemprego. Neste proxecto investiranse preto de 25.000 euros. Hoxe comeza o prazo de inscrición a través da web http://xuventude.xunta.es/2013031310009/estancias-practicas-en-empresas-de-alemana.html

Mato apuntou que a este programa sumaranse outros vinculados á realización de prácticas no estranxeiro. Resaltou, deste xeito, que o Goberno galego multiplicará este ano por cinco as prazas ofertadas en 2012 a través de Galeuropa, ata chegar ás 250. Duplicará, ademais, as semanas de estancia que pasarán de 4 a 8. Nesta campaña investiranse 600.000 euros.

Galeuropa terá lugar este ano entre xuño e novembro e estará regulado por unha orde que se publicará a finais do próximo mes.

Este proxecto púxose en marcha de forma experimental o ano pasado cun orzamento de 85.000 euros, o que permitiu ofertar 50 prazas para a mocidade galega en 6 países diferentes.

“Esta demostrado que as empresas valoran moi positivamente o coñecemento de idiomas e a estancia noutros países á hora de estudar un currículum”, apuntou a conselleira. De feito, comentou que en Galicia hai “experiencias moi positivas” cos programas de mobilidade que inclúen prácticas laborais no estranxeiro.

Eurogal
Outro dos programas de mobilidade con prácticas laborais ao que se referiu a titular de Benestar foi ‘Europeizando Galicia’ (Eurogal). Trátase dun novo proxecto, enmarcado no programa Leonardo da Vinci da UE, que ofertará 3 meses de traballo en diversos países europeos.

Esta actuación está pendente da aprobación do Organismo Autónomo de Programas Educativos Europeos e ten previsto ofrecer 100 prazas. O orzamento será de máis de 260.000 euros de financiamento europeo.

“O que pretendemos é incrementar a participación e implicación social da mocidade e mellorar a súa empregabilidade e os programas de mobilidade supoñen unha excelente forma de dar unha resposta a estes obxectivos”, apuntou Mato.

Así, sinalou que o Goberno galego, a través destas iniciativas, ofrece aos mozos e mozas vantaxes como a mellora do seu currículum, o incremento da súa competencia en idiomas, a invitación a asumir responsabilidades e tomar decisións e, por último, fomenta o desenvolvemento de valores como o respecto e a tolerencia.

Por iso, a conselleira indicou que a mobilidade é un piar das políticas da Xunta en materia de xuventude e, así, é un dos eixos do Plan Estratéxico de Xuventude 2010-2013.

En total, a través dos programas de mobilidade, a Consellería de Traballo e Benestar ofertará este ano preto de 2.500 prazas aos mozos e mozas galegos. Na pasada lexislatura investíronse 3 millóns de euros na posta en marcha de preto de 9.000 prazas nas distintas actuacións realizadas nesta materia.

A conselleira de Traballo e Benestar, Beatriz Mato, recibiu hoxe en Santiago a un grupo de 15 mozos xaponeses que visitan Galicia a través do programa da Xunta ‘A Xuventude no mundo’

En xullo terá lugar a acollida dun grupo galego en Xapón

A Dirección Xeral de Xuventude promoveu na pasada lexislatura a mobilidade de preto de 9.000 mozos e mozas galegas

O Goberno galego ofertará durante todo 2013 preto de 2.500 prazas de mobilidade para a mocidadeXAPON

Un grupo de 15 mozos e mozas da prefectura de Wakayama, en Xapón, visitan estes días Galicia grazas ao programa de mobilidade da Xunta ‘A Xuventude no mundo’. A conselleira de Traballo e Benestar, Beatriz Mato, recibiu hoxe a estes novos en Santiago que estarán de intercambio na Comunidade autónoma ata o próximo domingo. En xullo terá lugar a acollida do grupo galego en Xapón.

A titular de Benestar destacou que a Dirección Xeral de Xuventude puxo en marcha ‘A Xuventude no Mundo’ no año 2010, polo que este intercambio ten lugar por cuarto ano consecutivo. Ata o momento, máis de 460 mozos e mozas tomaron parte desta campaña que oferta prazas en diferentes países.

No primeiro semestre deste ano, un total de 50 mozos galegos participarán en intercambios en Italia, Rusia e Xapón. O orzamento para desenvolver esta iniciativa será de 16.000 euros. Ademais, Mato destacou que se levarán a cabo outros programas de mobilidade e, así, ao longo de 2013 ofertaranse preto de 2.500 prazas de mobilidade para a mocidade.

“O Goberno galego segue a apostar por este tipo de actuacións, que ofrecen aos mozos e mozas unha oportunidade única para adquirir coñecementos, experiencia e responsabilidades a través dunha aprendizaxe non formal”, apuntou Mato.

Deste xeito, apuntou que na pasada lexislatura promoveuse desde a Xunta a mobilidade de preto de 9.000 mozos e mozas galegas a través de diferentes programas.

Kumano Kodo
Wakayama e Galicia están irmandados desde hai máis de 15 anos. En 1997 asinouse un documento de irmandamento entre o Camiño de Santiago e o Kumano Kodo, a ruta de peregrinación propia desta rexión xaponesa.

Deste xeito, o Camiño e o Kumano Kodo son as dúas únicas rutas de peregrinación recoñecidas pola Unesco como Patrimonio da Humanidade en todo o mundo.

Posta en marcha do proxecto Youth4JOB

A Dirección Xeral de Xuventude e Voluntariado puxo en marcha o proxecto Youth4JOB  co que se pretende a identificación de boas prácticas e a análise da calidade dos proxectos  europeos destinados para a mocidade nos ámbitos da educación e emprego.PROXECTO

Este proxecto  está financiado no marco do Programa comunitario para o Emprego e a Solidaridade Social (PROGRESS); será coordinado pola cooperativa social italiana PROMIDEA, e ten como socios, ademais da Dirección Xeral de Xuventude e Voluntariado da Consellería de Traballo da Xunta de Galicia, o departamento de políticas para a mocidade e o Foro Rexional da Cultura da rexión de Campania, en Italia; a Rede de Informadores da Mocidade IJCA, de Cöte d´Azur, en Francia; a Autoridade Rexional para o Sureste SERA,  de Irlanda a Axencia de Desenvolvemento para o Val do Ave (ADRAVE), de Portugal; o Centro para o Desenvolvemento Rexional  Helénico HRDC, de Grecia; a Asociación de Municipios ISD Noordenkwartier de Holanda; a Academia Marítima LMA de Letonia e a Axencia para a Innovación e a Cooperación Europea AIEC, de Eslovaquia.

Nos estudos que forman parte do proxecto analizaranse as políticas de emprego e educación en catro sectores económicos: tecnoloxía da información e comunicación, espírito empresarial e autoemprego, turismo, sector marítimo e movementos migratorios.

No edificio da Consellería de Traballo e Benestar de San Lázaro tivo lugar o martes día 26 de febreiro a  sesión de inicio do proxecto presidida pola Dirección Xeral de Xuventude e Voluntariado; a esta sesión asistiron representantes das entidades socias e nela estableceuse o plan de traballo, a metodoloxía e as tarefas que se deben desenvolver en cada país así como os aspectos financeiros.

Haberá un seminario internacional en Italia coincidindo co informe intermedio e unha conferencia final na sede da Xunta de Galicia en Bruselas na que se darán a coñecer os resultados dos estudos financiados polo proxecto.

O director xeral de Xuventude e Voluntariado, Ovidio Rodeiro, reuniuse hoxe cos concelleiros da zona centro e sur de Lugo co obxectivo de impulsar as políticas de mocidade

A temática destes sete proxectos foi moi diversa, pasando por accións de difusión do xadrez á utilización do surf con nenos e nenas con autismo

As asociacións e entidades procedían de As Nogais, Sarria, Viveiro e Lugo capital (con 4 grupos)

Na zona centro e sur de Lugo hai un total de 340 establecementos adheridos ao carné xove e 3.286 usuariosLUGO

Un total de 7 grupos informais e asociacións xuvenís da provincia de Lugo participaron en 2012 no programa “Iniciativa Xove”, un proxecto que ten como obxectivo apoiar proxectos liderados, executados e protagonizados por grupos de mozos e mozas. Esta liña de actuación disporá en 2013 de 730.000 euros para toda Galicia, un 3,5 por cento máis que en 2012.

Os beneficiarios procedían de As Nogais, Sarria, Viveiro e Lugo capital (con catro grupos). Todos os proxectos que presentaron foron de temática moi diversa, e centráronse desde en accións de difusión do xadrez ata na utilización do surf con nenos e nenas con autismo.

Así o salientou hoxe o director xeral de Xuventude e Voluntariado, Ovidio Rodeiro, que se reuniu cos concelleiros da zona centro e sur de Lugo co obxectivo de impulsar as políticas de mocidade na provincia, así como para promover os distintos programas e recursos que ten a Consellería de Traballo e Benestar.

Unha das iniciativas que salientou durante a súa xuntanza foi o do Carné Xove. Neste sentido, informou de que nestas dúas zonas de Lugo hai un total de 340 establecementos adheridos e contan con 3.286 usuarios.

Tamén puxo en valor os cursos do servizo Quérote +, que ofrecen formación en distintos centros sobre conflitos de imaxe corporal, seguridade nas redes sociais, sexualidade, consumo de drogas ou bullying. Durante o ano pasado, un total de 24 centros destas dúas zonas dispuxeron destes cursos.

Rodeiro destacou tamén a importancia da incorporación da mocidade a labores voluntarias, a través do programa de Voluntariado Xuvenil. A meta é incorporar un total de 3.000 mozos e mozas a proxectos voluntarios de asociacións e concellos, cun orzamento de 440.500 euros. En 2012, participaron nesta iniciativa un total de 7 concellos da provincia (Mondoñedo, Sarria, Piñor, Viveiro, Quiroga, Rábade e Guitiriz).

Por último, informou tamén doutros programas como o Galeuropa de mobilidade xuvenil, o Xuventude en acción, as axudas para o mantemento das oficinas municipais de información xuvenil, a campaña de verán ou o plan de formación.

Beatriz Mato e Diego Calvo participaron hoxe na Coruña na semifinal da cuarta edición desta iniciativa posta en marcha pola Dirección Xeral de Xuventude e Voluntariado

Parlamento Xove é unha competición de debate, a maior de toda España, na que os equipos representantes de centros educativos de toda Galicia empregan a oratoria para defender un determinado posicionamento acerca dun tema proposto pola organización

A titular de Benestar subliñou que “nun momento como o actual, cunha situación económica tan adversa, e no que moitas persoas o están a pasar realmente mal, é importante que a sociedade non perda confianza nas institucións que nos representan”

Mato opinou que para os participantes non só é importante convencer coa retórica, senón tamén que sexan capaces de escoitar a aqueles que opinan distintoMATO

A conselleira de Traballo e Benestar, Beatriz Mato, destacou que o programa Parlamento Xove permite aos mozos e mozas que se involucren na construción dunha sociedade máis tolerante e respectuosa, ao tempo que fortalece a súa capacidade de diálogo e axuda a que crezan no emprego de mecanismos democráticos.

Beatriz Mato participou hoxe na Coruña na semifinal da cuarta edición desta iniciativa posta en marcha pola Dirección Xeral de Xuventude e Voluntariado, dependente do departamento autonómico. O acto contou coa presenza do presidente da Deputación Provincial da Coruña, Diego Calvo. Hoxe debateron 24 equipos de 18 centros de ensino de 1º e 2º curso de Bacharelato, dos que 8 serán os que debaterán na fase final que descorrerá o 5 e 6 de abril no Salón do Pleno do Parlamento de Galicia.

En concreto os participantes foron o IES Alfonso X O Sabio (Cambre), IES Virxe do Mar (Noia), IES As Barxas (Moaña), Colexio La Salle (Santiago), IES Cidade de Antioquía (Xinzo de Limia), Colexio Divina Pastora (Ourense), IES A Pinguela (Monforte), IES Monte Castelo (Burela), IES Pintor Colmeiro (Silleda), IES de Melide, Colexio Internacional Sek Atlántico (Poio), IES de Fene e IES de Foz; IES Valle Inclán (Pontevedra), IES Becerreá, Colexio Galem (Lugo), IES Laxeiro (Lalín) e IES de Mugardos.

A titular de Benestar subliñou que “nun momento como o actual, cunha situación económica tan adversa, e no que moitas persoas o están a pasar realmente mal, é importante que a sociedade non perda confianza nas institucións que nos representan”.

Unha desas institucións é o Parlamento, que non só representa aos 75 deputados que o compoñen, senón a toda a sociedade. Trátase dun lugar “para o debate, para chegar a acordos que defendan os dereitos dos galegos e permitan crear novas oportunidades e mellorar a calidade de vida de todos”.

Neste sentido, Beatriz Mato opinou que para os participantes do Parlamento Xove non só é importante convencer coa retórica, senón tamén que sexan capaces de escoitar a aqueles que opinan distinto, prestar atención aos que defenden unha postura contraria e atopar os puntos que unen, máis que afondar naqueles que separan.

Mato engadiu que é preciso que desde os poderes públicos se estimule a participación da mocidade na sociedade, e que se lles outorguen responsabilidades e capacidade de decisión.

Parlamento Xove é unha competición de debate, a maior de toda España, na que os equipos representantes de centros educativos de toda Galicia empregan a oratoria para defender un determinado posicionamento acerca dun tema proposto pola organización. Os participantes de cada equipo (formado por catro alumnos e un profesor) investigan, escriben e, finalmente, debaten sobre o tema proposto, incluíndose tamén a elaboración de artigos en blog e a realización dun dossier de investigación.

Nesta edición a temática elixida é o consumo responsable entre a xuventude e así os debates preliminares xirarán sobre a interrogante: ‘Está a servir a crise económica global para que a xuventude tome conciencia dun consumo responsable?’.

En canto aos premios, o gañador de categoría de Educación Secundaria disfrutará dunha semana de multiaventura e actividades culturais no centro LUG II, dependente da Consellería de Traballo e Benestar. E o equipo gañador de Bacharelato terá como premio unha viaxe valorada en 5.000 euros.

O director xeral de Xuventude e Voluntariado, Ovidio Rodeiro, reuniuse hoxe con concelleiros das dúas zonas para impulsar políticas de mocidade e presentou a programación do Espazo Xove de Lalín

As entidades e grupos informais proceden dos concellos de Cercedo, A Estrada, Lalín, Silleda e Vila de Cruces

Estas asociacións realizaron, entre outros, tres intercambios multilaterais e un proxecto para crear unha rede de capitais europeas da xuventudeLALIN

Nestas dúas bisbarras, hai un total de 826 carnés xove en vigor e 56 establecementos adheridos

No Espazo Xove de Lalín, destacan, entre outras, actividades como cursos de alemán ou inglés, obradoiros de debuxo e teatro, ou xornadas de xogos tradicionais

Un total de catro grupos empregan o local de ensaio desta instalación

Un total de 11 asociacións e grupos informais das comarcas de Deza e Terra de Montes participaron ao longo de 2012 nos programas Iniciativa Xove e o proxecto europeo Xuventude en Acción.

Así o destacou hoxe en Lalín o director xeral de Xuventude e Voluntariado, Ovidio Rodeiro, quen resaltou que este feito amosa un “importante desenvolvemento do tecido asociativo nestas dúas bisbarras”.

En canto ao programa Iniciativa Xove, recibiron financiamento un total de 7 asociacións e grupos informais de Cercedo, A Estrada, Vila de Cruces, Lalín (2) ou Silleda (2), que xestionaron en conxunto máis de 27.000 euros. Os proxectos que presentaron e levaron a cabo centráronse na organización dun verán cultural, no fomento do deporte ou na creación dunha rota de sendeirismo, entre outros.

Ao respecto do programa europeo Xuventude en Acción, foron 4 as entidades que participaron: tres de Lalín e unha de Vila de Cruces. Estes proxectos permitiron realizar tres intercambio multilaterais e poñer en marcha un proxecto para crear unha rede de capitais europeas da xuventude. Xestionaron en total preto de 60.000 euros.

Durante a xuntanza que mantivo hoxe o responsable autonómico con concelleiros da zona, animou aos gobernos locais a seguir difundindo tanto estes programas como outros destinados á mocidade e a continuar impulsando e coordinando estas políticas.

Entre elas, destacou a promoción do Carné Xove. Actualmente, nestas dúas comarcas hai un total de 826 carnés en vigor e 56 establecementos adheridos. O maior índice de penetración do Carné Xove entre a poboación xuvenil das zonas rexístrase en Focarei e na Estrada.

Na visita, tamén se presentou a programación do Espazo Xove de Lalín para este ano, unha instalación que se ocupa de ofrecer información xuvenil e asesoramento a mozos e mozas en materia de emprego, saídas académicas e profesionais, bolsas e axudas, ou ocio e tempo libre.

No primeiro trimestre, as actividades previstas son un taller de automaquillaxe, un obradoiro do día do pai, e actividades de maxia e xogos en inglés. Tamén se organizará un curso de alemán para persoas de entre 20 e 35 anos, que se pretende que se alongue durante todo o ano para que sexa efectivo.

No segundo trimestre, realizarase un taller día da nai, outro de repostería e un de risoterapia. Tamén haberá actividades sobre alimentación e nutrición; ou sobre o mal uso das redes sociais, así como un curso sobre técnicas para buscar emprego.

Xa no terceiro trimestre do ano, coincidindo coa tempada estival, realizaranse xornadas de xogos tradicionais destinados aos nenos e nenas de ata 15 anos, e cursos relacionados coas tecnoloxías e elaboración de páxinas web. Ademais, haberá dúas actividades formativas sobre información xuvenil especializada na área de educación –dirixido ao persoal da Rede galega de información e documentación xuvenil e universitarios- e outro curso sobre a elaboración de proxectos de animación sociocultural e turística para mozos e mozas de 18 a 30 anos.

Nos últimos meses de ano, está previsto, entre outras actividades, un taller sobre a prevención de hábitos nocivos, dirixido a mozos de entre 14 e 16 anos, e un curso de desenvolvemento persoal a través de coaching.

A todas estas actividades súmanse outras que se realizarán ao longo de todo o curso escolar como o taller de pintura e dibuxo ou o de teatro.

Por último cabe destacar que actualmente hai catro grupo que empregan o local de ensaios que existe neste instalación.