Sábado, 02 Decembro 2023

logo consellería 2022

Subscribe to this RSS feed

En portada (1151)

Así foi Mo_cidade 2023

Mar 30, 2023

Así foi a 3º Edición do Congreso Mo_Cidade da Xunta de Galicia

basifoi3

Ler máis...

Máis de 400 persoas participaron na 3º Edición do Congreso Mo_Cidade da Xunta de Galicia

Mar 27, 2023

A conselleira de Política Social e Xuventude, Fabiola García, clausurou o pasado sábado, 25 de marzo, a 3º Edición do Congreso Mo_Cidade, celebrada no Palacio de Exposición e Congresos da Coruña (Palexco), contou coa participación de 400 persoas. Na cita puideron gozar dun amplo abanico de actividades como conferencias, concertos, talleres ou monólogos.

Fabiola García lembrou que Mo_Cidade este ano se cambiou de data e tamén de localización, pero que mantivo o seu espírito cunha edición con moito talento. Así, puxo en valor que o importante deste congreso é que “está integrado por mozos que se dirixen a mozos” e, a través do cal, se busca que broten ideas e se impulsen novos proxectos.

Neste sentido, a conselleira subliñou que o Goberno galego quere que a Galicia de hoxe incorpore canto antes todo o que ten que achegar a mocidade galega, por iso, sinalou que son moitos os programas que se poñen en marcha para dalo a coñecer. Entre eles, destaca Xuventude Mentoring, para a inmersión e titorización no mundo laboral de persoas que acaban de estudar; Iniciativa Xove, que ofrece axudas de ata 5000 euros para que comezar un proxecto sexa máis fácil; ou o Parlamento Xove, que convida a debater e mellorar as habilidades na oratoria.

 

CHARLA2CHARLA3Cristina2IMG 0573IMG 0627IMG 0719IMG 0753IMG 3326IMG 3348IMG 3441 2IMG 3472IMG 3511

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Mo_cidade 2023

Teñen lugar diferentes actividades que procuran darlle protagonismo á xente nova e aos ámbitos do seu interese como pode ser a cultura urbana, as novas tecnoloxías, o mundo dos videoxogos, a música, o emprendemento e o acceso ao comprado laboral. En definitiva, unha cita de lecer na que se conxuga e ponse en valor o talento da mocidade e o seu papel na sociedade.

Nesta edición celebráronse conferencias de profesionais recoñecidos como o mánager do artista C Tangana, Íñigo Elósegui; a tiktoker Carla Gabián; a cofundadora de Lázzaro e unha das integrantes na lista Forbes menores de 30 anos, Carlota Corzo; ou o director deportivo do equipo de gaming KOI, David Sabater.

Tamén houbo actividades dirixidas ao persoal técnico, con xornadas de traballo específicas; actuacións musicais a cargo de Alicia Otero, gañadora da especialidade de Música de Xuventude Crea 2021, ou da artista Lina de Sol; un monólogo do humorista galego Pablo Meixe...

Ler máis...

A inscrición para campos de voluntariado no estranxeiro abre o luns 13 de marzo

Mar 10, 2023

Se queres participar no programa de Campos de voluntariado no estranxeiro, o luns, día 13 de marzo, ábrese o prazo para presentar as solicitudes.

Existen máis de 400 opcións de campos ás que poderás apuntarte.

Máis información

Ler máis...

Consegue un dos Bonos Albergues REAJ

Mar 09, 2023

A Rede Española de Albergues Xuvenís (REAJ) lanza de novo este ano a campaña de Bonos Albergues REAJ, co fin de incentivar o uso dos albergues da rede, dala a coñecer xunto co Carné de Alberguista, fomentar o movemento alberguista e que os mozos, mozas e grupos coñezan novos destinos.

As persoas e grupos posuidores dun bono poderán facer uso del en calquera albergue da rede para estancias que teñan lugar ata o 31 de maio de 2023. Por tanto, as persoas usuarias ou grupos deberán asegurarse de que as súas estancias (pernoitas) teñen lugar antes de dita data, xa que non poderán ser utilizados a partir dela.

A campaña Bonos Albergues REAJ componse de:
- Bonos Individuais de 30 euros (IVE incluído).
- Bonos Grupais de 200 euros (IVE incluído).

Os devanditos bonos serán postos ao dispor dos usuarios na páxina web de REAJ cada semana de maneira graduada.

 

REQUISITOS

Bonos individuais:

Os Bonos Albergues REAJ individuais poderán ser solicitados por calquera persoa física que teña entre 18 e 30 anos e teña residencia legal en España. No momento da solicitude do bono o usuario deberá ser menor de 31 anos. Unha vez cumpridos os 31 anos, non poderá ser solicitante do bono (aínda que si que poderá trocalo no caso de que o solicitase antes de cumprir os 31).

Só se emitirá un bono por persoa que irá ligado ao seu número de DNI / NIE e será persoal e intransferible, non podendo ser cedido a terceiros baixo ningunha circunstancia.

Bonos de grupo:

Os Bonos Albergues REAJ de grupo poderán ser solicitados por calquera grupo legalmente constituído que teña CIF e estea recoñecido por algunha administración como grupo.

Só se emitirá un bono por cada CIF e só poderá ser utilizado polo grupo ao que lle foi concedido, non podendo ser cedido a terceiros baixo ningunha circunstancia.

 

Tes toda a info e o formulario de solicitude nesta ligazón

Ler máis...

A Mocidade como motor da igualdade para construír unha sociedade máis xusta

Mar 08, 2023

Durante o acto de entrega de premios dos carteis escolares do concurso do 8-M, o Día Internacional da Muller, a conselleira de Promoción do Emprego e Igualdade, María Jesús Lorenzana sinalou á mocidade como motor da igualdade para construír unha sociedade máis xusta ante a conmemoración do 8-M.

O xurado do concurso do deseño do cartel do 8 de marzo, o Día Internacional da Muller, ditaminou os carteis gañadores da sexta edición desta iniciativa da Xunta de Galicia, resultando gañadores os traballos de escolares de centros da Coruña, Baiona, Pontevedra, Bueu, Cambados e Lugo.

Establecéronse tres categorías no certame. Na primeira, dirixida ao alumnado de infantil e aos cursos de primeiro, segundo, terceiro e cuarto de educación primaria, obtivo o primeiro premio o alumnado de 2º de Primaria do Centro de Educación Infantil e Primaria Plurilingüe Anxo da Garda da Coruña co título Igualdade; o segundo galardón recaeu nas alumnas e alumnos do 4º de Primaria do CPI Cova Terreña, de Baiona, co traballo Fomentamos a igualdade no patio do cole; e o accésit foi para o alumando de 4º de Infantil do CEIP A Carballeira, de Lourizán-Pontevedra con Mariscadoras.

Na segunda categoría, para o alumnado de quinto e sexto de educación primaria e de primeiro e segundo da ESO e de educación especial, resultou gañador co primeiro posto o alumnado de 2º da ESO do Centro de Educación Especial Nosa Señora do Rosario, da Coruña, co deseño Seguimos en loita pola igualdade; o segundo premio foi para as alumnas e alumnos do IES Illa de Ons de Bueu co traballo Pero se xa hai igualdade; e o accésit recaeu nos escolares de 1º da ESO do IES Ramón Cabanillas de Cambados co Rumbo á igualdade.

Na terceira categoría, dirixida ás alumnas e os alumnos de terceiro e cuarto da ESO e primeiro e segundo de bacharelato, de FP básica, de ciclos de grao medio e superior, obtivo o primeiro premio o alumnado de 1º de Bacharelato do IES Nosa Señora dos Ollos Grandes de Lugo con Elas abriron o teu futuro; o segundo galardón foi para as alumnas e alumnos de 4º da ESO do IES Rafael Dieste da Coruña con Alumeando; e o accésit obtívoo o alumnado de 2º de Bacharelato do IES A Xunqueira II de Pontevedra co título Publicacións pola igualdade.

O xurado valorou este ano de xeito positivo a alta participación acadada nesta edición do certame no que presentaron os seus traballos ata 95 centros escolares.

O obxecto do concurso é fomentar a promoción da igualdade dentro dos centros educativos galegos, a través dunha acción que visibilice a contribución das mulleres nos distintos ámbitos e promova a reflexión sobre os estereotipos de xénero que aínda existen na sociedade, as causas e a orixe da discriminación de xénero, así como o camiño que as mulleres tiveron que percorrer para ver recoñecidos os seus dereitos.

Carteis premiados

http://igualdade.xunta.gal/

Ler máis...

Volve Mo_cidade, o congreso da xuventude galega!

Mar 22, 2023

A Consellería de Política Social e Xuventude da Xunta de Galicia organizará, do 23 ao 26 de marzo na Coruña, a terceira edición de Mo_cidade, o congreso da xuventude galega que aúna formación, creatividade, emprendemento, cultura e lecer e que permitirá establecer sinerxías, compartir experiencias, proxectos ou ideas, e fomentar a participación e o diálogo entre o público asistente.

Nesta ocasión e como novidade, a terceira edición de Mo_cidade ofrecerá unha programación específica para público técnico (xornadas do xoves e venres pola mañá), a maiores da tradicional para a mozos e mozas de 18 a 30 anos (venres pola tarde e sábado). De feito, Mo_cidade busca asentarse como un evento de referencia para a xuventude grazas a unha programación multidisciplinar, moderna e á vangarda das novas correntes e sectores emerxentes.

A inscrición no evento, totalmente gratuíta, dará acceso a todas as mesas redondas, charlas e dinámicas do evento, ás actuacións musicais, así como ao aloxamento (incluíndo con este almorzo e
cea) durante os días do encontro.

Ademais, o evento contará cunha zona de networking e formación e cunha zona expositiva con stands de diferentes entidades, asociacións xuvenís e de voluntariado.

Consulta aquí o programa completo do encontro

Programa completo

 

Datas de realización: do 23 ao 26 de marzo de 2023.

Lugar de realización: Palexco (A Coruña).

Aloxamento: Complexo Xuvenil As Mariñas (Bergondo), en dormitorios compartidos.

Destinatarios: mozos e mozas galegas de entre 18 e 30 anos de idade (incluídos) e persoal técnico do sector do ocio educativo e tempo libre.

Prazas ofertadas para a mocidade: 300.

Prazo de inscrición para a mocidade: do 1 ao 15 de marzo. AMPLIADO ATA O MARTES 21 DE MARZO, ÚLTIMAS PRAZAS! 

Inscrición para a mocidade: será en liña a través deste formulario electrónico.

Formulario de inscrición

 

Procedemento de adxudicación de prazas: as prazas asignaranse por estrita orde de inscrición.

A confirmación da praza farase por correo electrónico no prazo máximo de tres días hábiles tras realizar a inscrición. Unha vez confirmada a praza, e tal e como se indique na comunicación de confirmación, haberá un prazo de 48 horas para remitir por correo electrónico:

  • Fotocopia escaneada do DNI/NIE.

No caso de que o número de solicitudes sexa superior ao número de prazas ofertadas establecerase unha lista de agarda por orde de entrada.

A ausencia de datos, que estes sexan erróneos, enviar mal a documentación ou non enviala, ocasionará a baixa automática do encontro e as prazas quedarán dispoñibles para as persoas en lista de agarda.

As persoas admitidas que por calquera motivo non poidan finalmente asistir ao encontro deberán comunicalo a través dun correo electrónico (xuventur@xunta.gal) cunha antelación mínima de catro días naturais á data de inicio do evento, co fin de poder asignar as prazas vacantes aos solicitantes da lista de agarda. De non facelo así quedarán excluídas da participación en sucesivas edicións deste encontro e nos demais que poña en marcha a Dirección Xeral de Xuventude, Participación e Voluntariado.

Transporte: a organización poñerá a disposición das persoas inscritas autobuses para desprazarse entre o aloxamento incluído neste evento e o Palexco. O traslado entre a localidade de domicilio á
Coruña será por conta das persoas inscritas.

Acreditación: o acceso a todas as actividades do encontro esixe que a persoa moza participante se acredite, como hora límite, ás 10:00 horas do sábado 25 de marzo de 2023. Deste xeito, o horario de acreditación para a mocidade, e tal e como se reflicte no programa, abrirase o venres in situ no evento ás 16:30 horas e finalizará o sábado ás 10:00 horas. De non presentarse neste horario e, salvo causa xustificada, a persoa quedará excluída das actividades programadas.

Máis información: xuventur@xunta.gal

Ler máis...

Activación do Carné Xove en Barbadás

Feb 24, 2023

Dende este mes sumamos un punto máis onde poder facer ou activar o carné xove: a Casa da Mocidade de Barbadás.

Localízase na rúa Os Diestros, nº 2, na Valenzá (Barbadás). Para que che fagan ou activen o carné xove cómpre que acudas de luns a venres de 8:30 a 14:30 h. Ademais, pódelos contactar por teléfono (988 000 234) ou por correo electrónico (xuventude@barbadas.es). Tamén podes seguilos nas redes sociais (@mocidade_barbadas)

Descontos co Carné Xove, seguro de viaxe, puntos de activación...: http://xuventude.xunta.es/carnes-para-a-mocidade/carne-xove

Ler máis...

Biocultura. Feira de Productos Ecolóxicos e Ecoturismo

Feb 24, 2023

BioCultura, a feira de produtos ecolóxicos e ecoturismo máis grande do Estado, celebrarase do 3 ao 5 de marzo de 2023 en EXPOCoruña. Reunirá a máis de 150 expositores dedicados aos sectores da alimentación ecolóxica (con máis de 10.000 referencias), ecoturismo, cosmética ecolóxica, moda sostible, fogar saudable, benestar, estilo de vida ecolóxico, artesanía e ONG´S. Paralelamente á exposición realizaranse máis de 150 actividades.

As persoas titulares do carné xove terán un 50% de desconto no prezo da entrada. Para as compras online haberá que introducir o código XOVEBIOCULTURA.

Para máis información sobre a feira podes consultar os seguintes enlaces:

Información xeral da feria
https://www.biocultura.org/acoruna/informacion

Horarios e entradas
https://www.biocultura.org/acoruna/horarios

Programa de actividades
https://www.biocultura.org/acoruna/programacion-actividades

Nota de prensa
https://vidasana.clickacm.com/show/fbd4f684-b12c-11ed-98ca-005056bd5094/

Ler máis...

Lingua de namorar 2023

Feb 27, 2023

Lingua de namorar é un concurso en liña de mensaxes de amor en lingua galega dirixido a todos os mozos e mozas de 14 a 35 anos.

O obxectivo principal de Lingua de namorar, organizado pola Dirección Xeral de Xuventude, Participación e Voluntariado e máis pola Secretaría Xeral de Política Lingüística, é dinamizar o uso da lingua galega entre os mozos e mozas nas súas relacións persoais e nas novas tecnoloxías, nomeadamente na Internet e na mensaxería instantánea.

Para participar no concurso nas categorías A (de 14 a 19 anos) e B (de 20 a 35 anos) só cómpre cubrir e enviar este formulario. As mensaxes que participen nestas dúas modalidades publicaranse na páxina do concurso:

http://xuventude.xunta.es/linguadenamorar

Para participar na nova categoría C (exclusiva para Instagram) cómpre ser seguidor/a de @xuventudegalicia e de @linguagalega.

As mensaxes publicaranse directamente na imaxe habilitada para o concurso #LinguaDeNamorar no perfil @xuventudegalicia. No texto indicarase en primeiro lugar un cancelo que recolla o título e despois a mensaxe. Ao final da publicación engadirase o cancelo #LinguaDeNamorar. Etiquetaranse tamén dúas amizades de IG.

Características das mensaxes

Cada participante poderá enviar ata dúas mensaxes, cunha extensión máxima de 350 caracteres no caso das categorías A e B e 200 caracteres na categoría C (de Instagram), incluídos os espazos en branco.

Categorías de idade e premios

Establécense tres premios por cada unha das categorías de idade A e B:

- 1º Tableta 10' Samsung A8
- 2º Libro electrónico Kindle
- 3º Cascos sen fíos JBL

Establécese un premio para a categoría C:

- 1º Tableta 10' Samsung A8

Prazos de participación e votación

O prazo para enviar as mensaxes remata o venres 17 de marzo.

Do 20 ao 26 de marzo abrirase o período de votación. As persoas que desexen votar polas súas mensaxes favoritas nas categorías A e B deberán cubrir o formulario que se habilitará para o efecto na páxina do concurso.

No caso da nova categoría C a mensaxe gañadora seleccionarase en dúas fases:

1. O xurado do concurso fará unha preselección de 6 mensaxes de entre todas as presentadas en prazo e que respecten o indicado nestas bases.

2. O 10 de abril daranse a coñecer as 6 mensaxes preseleccionadas polo xurado, que concorrerán á votación final do público do 11 ao 16 de abril. Rematado o prazo de votación computaranse os gústame que reciba cada mensaxe e gañará aquela que acade un maior número de gústame por parte do público. No caso de que exista empate entre dúas ou máis mensaxes prevalecerán no cómputo o número de gústame dados por parte de seguidores/as de @xuventudegalicia e @linguagalega. A organización reserva para si o dereito de establecer calquera outro procedemento de desempate.

Resolución do concurso

A listaxe cos nomes das persoas gañadoras e finalistas nas tres categorías publicarase o 21 de abril. Tanto as mensaxes gañadoras como finalistas daranse a coñecer publicamente en http://xuventude.xunta.es/linguadenamorar e nos IG @XuventudeGalicia e @LinguaGalega.

Entrega de premios

A data da entrega de premios publicarase nesta páxina web con antelación suficiente á súa realización.

 

MENSAXES GAÑADORAS DE LINGUA DE NAMORAR 2023

O xurado do concurso Lingua de namorar 2023 reuniuse o pasado 31 de marzo para elixir as mensaxes gañadoras das categorías A e B, de entre aquelas mensaxes que resultaron máis votadas polo público. Son as seguintes:


Mensaxes gañadoras da categoría A

1º premio

Alba Guzmán Falcón (Ourense)

Chover ten que chover

Chove. Corre por debaixo nosa un reghato de auga. No baño hai pingueiras facendo percusión contra a porcelana.

Namora pensar que o mundo non para se nos deixamos de querer.

2º premio

Santiago Sánchez Villarino (A Coruña)

Distancia

Alén do mar

alén dos meus ollos
alén dos meus soños,
ti.
Preto do mar,
preto dos teus ollos,
preto dos teus soños,
eu.

3º premio

Carla López Otero (Pantón, Lugo)

Translúcidas chinas

Cólleme da man e imos capar o río. Tres pedriñas afundirán, eu fundireime contigo, e as chinas viaxarán río abaixo ata dar cun inmenso mar de lágrimas de felicidade, e quedarán pulidas, e romperán en anacos, e volverán fusionarse, e cambiarán de cor cos anos... Eu quixera amarte coa mesma forza coa que os tres nimios obxectos cabalgaron a vida.

Mensaxes gañadoras da categoría B

1º premio

Eva González Blanco (Lalín, Pontevedra)

Áncora

Tentei escribir a melodía perfecta pero decateime de que a túa voz non ten partitura. Que ningunha batuta poderá escribir no aire notas agudas e graves de alegrías, doce alegoría do teu sorriso non mudo. Mais cando recito, os versos debuxan engurras na túa cara, avivecendo a poesía, ao tempo que os teus beizos me ancoran á beira do abismo.

2º premio

Clara Pérez Martínez (A Bola, Ourense)

Morriñada

O petricor salpícame a memoria esquecida

nunha inducida ataraxia en tons verdes
que me tingue as arterias ritmicamente,
acompasada coa efervescencia das ondas
mentres o nordés me zoa melifluo
a balada máis romántica en segredo,

a soas coa terra matria

e fico prendida eterna.

3º premio

Andrea López Otero (Pantón, Lugo)

Entre as cinzas

saboreo

 doce
o caos

da túa lingoa
 coa miña,

              incendiada,

 nun lume
que se aviva
      feroz

  silencioso
e asulagador
  entre a pel,

              ameazante

coa destrución.

O xurado de Lingua de namorar 2023 preseleccionou, na súa xuntanza do 31 de marzo, seis mensaxes participantes na categoría C do concurso, mensaxes que pasaron á fase de votación pública en IG, da que resultou gañadora ao recibir o maior número de "gústame" a seguinte:

Iria Cebreiros Trigo (Ourense)

@iriiaa_8

#Aartedoboquerer

Caerei de novo na tentación da lingua das miradas, movementos e sorrisos cómplices. Hipnotizada pola sonoridade da túa melodía. Alentada pola túa harmonía. Sempre dependente do teu efémero respirar. #LinguaDeNamorar.

O obxectivo principal de Lingua de namorar, organizado pola Dirección Xeral de Xuventude, Participación e Voluntariado e pola Secretaría Xeral de Política Lingüística, é dinamizar o uso da lingua galega entre a mocidade nas súas relacións persoais e nas novas tecnoloxías, nomeadamente en internet e na mensaxería instantánea.

 

basesvota mensaxes

categoriaA categoriaB BotonC 2

Ler máis...

Estas son as próximas paradas do "Día da Xuventude"

Feb 26, 2023

A Xunta de Galicia, a través da Consellería de Política Social e Xuventude, puxo en marcha desde principios de 2023 un novo programa de lecer e educación non formal dirixido aos mozos e mozas galegos baixo o nome “Día da Xuventude”.
Esta iniciativa, que recalará en 30 concellos de Galicia ata abril, nútrese dunha ampla programación formativa e de ocio destinada tanto á mocidade galega como ás propias familias, dado que esta iniciativa tamén favorece a conciliación da vida familiar e laboral.


Actividades
Talleres dinámicos de cociña saudable, graffiti, igualdade de xénero, protección do medio ambiente e empregabilidade. Tamén hai espazo para o fútbol burbulla, futbolín humano, slackline ou tiro con arco. Todas as actividades son gratuítas.


Próximas paradas
Tras pasar xa pola Estrada, Cangas do Morrazo, Vimianzo, Monterroso, Cee, Sarria e Mugardos, as próximas paradas confirmadas do “Día da Xuventude” son as seguintes:

 

Xaneiro:

A ESTRADA: Martes, 3 de xaneiro, de 16 a 21 horas, na Praza da Constitución.
CANGAS DO MORRAZO: Sábado, 14 de xaneiro, de 17 a 22 horas, na Praza da Constitución. Actuación de Miguel Santervás e Nuno Ponce.
VIMIANZO: Domingo, 22 de xaneiro, de 16 a 21 horas, na Praza do Concello. Actuación de A.C. Trubisquiña.
MONTERROSO: Sábado, 28 de xaneiro, de 16 a 21 horas, na Cúpula.

Febreiro:

CEE: Sábado, 4 de febreiro, de 16 a 21 horas, na Praza do Mercado. Actuación de Álex Castro.
SARRIA: Sábado, 11 de febreiro, de 16 a 21 horas, no Parque do Chanto. Actuación de A.C. Meigas e Trasgos.
MUGARDOS: Domingo, 12 de febreiro, de 16 a 21 horas, no Pavillón Municipal de Deportes. Actuación de Willie & Winnie.
MUROS: Venres, 17 de febreiro, de 16 a 21 horas no Curro da Praza. Actuación de The Balayöös.
BANDE: Sábado, 18 de febreiro, de 16 a 21 horas na Praza da Constitución. Actuación de Simplemente Enricco.
SANTA COMBA: Domingo, 19 de febreiro, de 16 a 21 horas no Recinto Feiral (mercado do gando). Actuación de DJ Rokiño.
A FONSAGRADA: Venres, 24 de febreiro, de 16 a 21 horas no Pavillón do CEIP Plurilingüe Santa María. Actuación de Enriba da Brétema.
MELIDE: Sábado, 25 de febreiro, de 16 a 21 horas no Pazo de Congresos e Exposicións.
RIBEIRA: Domingo, 26 de febreiro, de 16 a 21 horas no Espazo Municipal de usos múltiples. Actuación de Dani Recho.

Marzo:

ORDES: Venres, 3 de marzo, de 16 a 21 horas na Alameda. Actuación de Embruxo Gaiteiros.
VILAGARCÍA: Sábado, 4 de marzo, de 17 a 22 horas na Praza da II República (explanada do Auditorio). Actuación de Martina López.
PONTEAREAS: Domingo, 5 de marzo, de 16 a 21 horas na Praza Maior. Actuación de Os Alecríns.
O BARCO DE VALDEORRAS: Venres, 10 de marzo, de 16 a 21 horas no pavillón vello (Praza de España). Sesión DJ con Rafa Aguiar.
CELANOVA: Sábado, 11 de marzo, de 16 a 21 horas no Pavillón Pedra da Moa. Actuacións de Breaking Fast e da Banda de música xuvenil de Celanova.
MONDOÑEDO: Domingo, 12 de marzo, de 16 a 21 horas na Praza da Catedral. Sesión con DJ Peabody.
PADRÓN: Venres, 17 de marzo, de 16 a 21 horas no pavillón polideportivo do Grupo Escolar. Actuación de Pecha a Cansela.
CALDAS DE REIS: Sábado, 18 de marzo, de 16 a 21 horas no patio do CPR Plurilingüe San Fermín. Actuación de Diego Méndez.
O PORRIÑO: Sábado, 25 de marzo, de 16 a 21 horas no Auditorio exterior do Centro Cultural Municipal. Sesión con DJ Pitty.

Abril:

O CARBALLIÑO: Domingo, 2 de abril, de 16 a 21 horas na Praza Maior. Actuación de Percucar.
VIANA DO BOLO: Sábado, 8 de abril, de 16 a 21 horas no exterior do Pavillón Municipal. Sesión con DJ Tariro.
LALÍN: Sábado, 15 de abril, de 13 a 14:30 horas e de 16:30 a 20 horas na Praza da Igrexa. Actuación de Iria e Diego ás 13 horas.
NEGREIRA: Domingo, 16 de abril, de 10 a 15 horas na Praza do Concello. Sesión con Mr. Vieito.
RIBADEO: Sábado, 29 de abril, de 16 a 21 horas no Pavillón Municipal. Actuación de Festra.

Maio:

ARZÚA: Sábado, 6 de maio, de 16 a 21 horas no Recinto Feiral Terra do Queixo. Actuación de Human Band.
VERÍN: Sábado, 13 de maio, de 16 a 21 horas na Praza García Barbón (Praza Maior). Actuación de Victoria Pérez Gascón.

 

 

O programa está cofinanciado polo Ministerio de Igualdade en desenvolvemento do Plan Corresponsables.

Máis información, aquí

Ler máis...