Novas e actividades (988)

O Instituto Portugués do Deporte e da Mocidade organiza en colaboración, entre outros, coa Dirección Xeral de Xuventude, Participación e Voluntariado, a Webinar Empreeendedorismo.

Da Idea á Concreción, Traballo Remoto, Redes Colaborativas e de Talento

O obxectivo deste webinar é a repartición de experiencias, conceptos e consellos a ter en conta, para axilizar unha idea. Non hai solucións milagrosas, pero hai formas de «facer que aconteza» que poden axudar a chegar onde se pretende.

É posíbel facelo remotamente, auxiliado por redes colaborativas e de talento, nacionais e transfronteirizas, que promoven un troco de ideas e de coñecemento cruciais para o desenvolvemento dun proxecto.

Data e horarios: 30 de xuño de 2020 ás 14:30 e ás 17:00.

Preténdese que o webinar sexa dinámico, coa intervención dos diversos participantes.

A inscrición é gratuíta, de caracter obrigatorio e limitadas a 15 participantes.

Participa e inscríbete aquí: https://ipdj.gov.pt/evento?titulo=webinar-empreendedorismo

iSignos

Xun 18, 2020

A Facultade de Filoloxía e Tradución da Universidade de Vigo puxo en marcha este curso unha páxina web facilitar o ensino e interpretación da lingua de signos. Trátase de iSignos, unha nova ferramenta de consulta, aberta e gratuíta, na que se pon ao dispor de calquera persoa interesada un corpus de anotación da Lingua de Signos Española, coas súas correspondentes glosas identificativas.

O corpus consiste nun conxunto de gravacións en vídeo de signantes que se expresan en LSE, presentadas xunto ás glosas de ambas as mans e a tradución ao español.

Na primeira etapa están dispoñibles un conxunto de vídeos coas súas correspondentes glosas e traducións, que se irá ampliando en fases sucesivas. Pódese consultar a lista de gravacións e seleccionar por criterios de xénero ou tema, e tamén polo sexo ou rango de idade das persoas signantes.

O buscador permite explorar o corpus e observar o contexto no que aparecen as glosas buscadas

O recurso pode ser útil para todas aquelas persoas que necesiten este tipo de datos lingüísticos para o seu traballo, por exemplo, para exercicios de clase, prácticas de interpretación, avaliacións de linguaxe, investigación sobre a LSE, etc.

http://isignos.uvigo.gal/ 

A Consellería de Economía convoca un Programa de axudas para a contratación de persoas traballadoras remudistas.

A través da incentivación do contrato de remuda, este programa ten a finalidade de favorecer a substitución nos cadros de persoal das empresas, das persoas traballadoras próximas á xubilación por persoas mozas menores de 30 anos desempregadas ou cun contrato formativo na mesma empresa, ou menores de 35 anos cun contrato de duración determinada na mesma empresa ou persoas desempregadas maiores de 45 anos, garantindo a non destrución de postos de traballo, unha vez que as persoas traballadoras que os ocupaban rematen a súa vida activa.

As solicitudes presentaranse obrigatoriamente por vía electrónica a través do formulario normalizado dispoñible na sede electrónica da Xunta de Galicia, https://sede.xunta.gal co código de procedemento TR349Y.

Prazos
- As solicitudes de axudas polos contratos de remuda subvencionables realizadas entre o 1 de xaneiro de 2020 e o 17 de xuño poden presentarse ata o 17 de agosto de 2020
- Para as contratacións feitas a partir do 17 xuño deberán solicitarse ata o último día do segundo mes seguinte á data en que se inicie a relación laboral indefinida ou temporal pola que se solicita subvención.

En todos os caso o prazo para a presentación das solicitudes de axudas no superará o 30 de setembro de 2020

Máis información no DOG do 17 de xuño de 2020 e en https://ceei.xunta.gal/recursos/axudas-e-subvencions/secretaria-xeral-de-emprego

As persoas mozas son as que experimentaron con maior intensidade os efectos do parón económico derivado do confinamento tal e como reflicten a caída da taxa de actividade e a caída da taxa emprego.

En comparación co mes de marzo, en abril hai un 33,3% máis de persoas mozas en paro e un 82,4% máis que son demandantes de emprego. Ademais, a taxa de paro da poboación nova en España sitúase no 25,2% durante as primeiras semanas do estado de alarma, rexistrando un incremento trimestral máis de dúas veces superior ao que se rexistrou entre a poboación de 30 a 64 anos.

Estes son algúns dos datos que recolle a primeira entrega do estudo 'Mocidade en risco: análise das consecuencias socioeconómicas do COVID-19 sobre a poboación nova en España', elaborado con fontes secundarias polo Instituto da Mocidade ( Injuve) e o Consello da Mocidade de España ( CJE) co fin de medir o impacto da pandemia e das medidas de confinamento sobre un mercado laboral xuvenil

http://www.injuve.es/observatorio/formacion-empleo-y-vivienda/estudio-consecuencias-economicas-covid-19-en-la-juventud 

O equipo de Correspondentes Xuvenís do IES Saturnino Montojo de Ferrol considera que sería interesante de cara ao futuro escoitar as vosas propostas para mellorar o proceso de ensinanza-aprendizaxe a distancia. O documento que elaboren terá un enfoque en positivo que permita incorporar suxestións e actividades no futuro próximo.

Sería importante dedicar uns minutos do voso tempo para cubrir o cuestionario 

Eurodesk e ERYICA uníronse para proporcionar ao sector de información xuvenil pautas e antecedentes sobre a ecoloxización dos seus servizos e o apoio á mocidade nas súas ambicións ambientais. O resultado deste traballo, a guía Greening Youth Information Services presentarase en liña no Día Mundial do Medio Ambiente .

O obxectivo da información xuvenil non é só responder as necesidades, intereses e solicitudes da mocidade, senón tamén anticipar as súas necesidades e desenvolver medidas preventivas en consecuencia. O obxectivo da guía é explorar o papel do traballo de información xuvenil no contexto da emerxencia climática, así como proporcionar consellos concretos e exemplos de boas prácticas á hora de deseñar e proporcionar servizos de información xuvenil máis ecolóxicos. A guía proporciona exemplos de servizos de información xuvenil sobre como informar, involucrar e empoderar á mocidade sobre a sustentabilidade ambiental. O obxectivo tamén é crear conciencia sobre a importancia de estratexias e programas de información xuvenil máis ecolóxicos entre os provedores de servizos e os encargados de formular políticas.

O evento:
Podes coñecer aos autores e colaboradores da guía durante o evento de lanzamento en liña o 5 de xuño 14:00-16:00 CEST.
Participarán os presidentes de ERYICA e Eurodesk, Jaana Fedotoff e Ingrida Jotkaite, a moza activista climática, Anuna de Wever, autoras da publicación e promotoras de boas prácticas.
Os participantes terán a oportunidade de facer preguntas a cada un deles.

Os primeiros 100 solicitantes poden participar no evento a través de Zoom e facer preguntas aos oradores. O evento tamén se transmitirá en Facebook, onde todos os demais participantes interesados ​​poden asistir.

Hora: 5 de xuño de 2020, 14:00-16:00 CEST
Lugar: en liña (Zoom e Facebook Ao vivo)
Rexístrese para o evento aquí

https://eurodesk.eu/2020/05/14/launch-event-publication-on-greening-youth-information-services/ 

O equipo de Correspondentes Xuvenís do IES Saturnino Montojo de Ferrol achegannos dúas propostas para todos e todas os Correspondentes de Galicia:

INSTAGRAM STORIES: Crear e difundir historias por Instagram que tenten concienciar a mozas e mozos da necesidade de manter as medidas de seguridade para vencer a pandemia e non retroceder.

VALORACIÓN E PROPOSTAS SOBRE O TRABALLO TELEMÁTICO NO ÁMBITO EDUCATIVO: sería interesante de cara ao futuro escoitar as propostas dos/as Correspondentes para mellorar o proceso de aprendizaxe a distancia. Especialmente tería un enfoque en positivo que permitiría incorporar suxestións e actividades.
Calquera suxestión que teñades podedes enviala a informacion.xuventude@xunta.gal
Recolleremos todas as propostas e poñerémolas na web á vosa disposición e tamén farémoslla chegar aos centros educativos

 

A Comisión Interuniversitaria de Galicia, CIUG,  publica os parámetros de ponderación de materias troncais de modalidade e materias de opción da proba de avaliación de bacharelato, ABAU, para o acceso ás ensinanzas universitarias oficiais de grao do Sistema universitario de Galicia para o curso 2020/21.

https://ciug.gal/PDF/poderacions.pdf

E se queres consultar as últimas notas de corte: https://ciug.gal/PDF/notascorte20.pdf

Se tes dúbidas, preguntas ou desexas falar con Quérote+ para recibir asesoramento, xa sabes, podes poñerte en contacto a través do 647 018 752

http://xuventude.xunta.es/querote-mais 

A Consellería de Política Social, mediante a Dirección Xeral de Xuventude, Participación e Voluntariado en colaboración coa Axencia Turismo de Galicia, poñen en marcha un novo programa “Voluntariado no Camiño”.

Este programa é unha iniciativa que busca dar a coñecer, por parte das persoas voluntarias, o rico patrimonio artístico e cultural existente ao pé das diferentes rutas do Camiño de Santiago, co obxectivo de favorecer o seu coñecemento de cara ao Xacobeo 2021.
Deste xeito, promoverase a apertura de igrexas e monumentos que reflicten a riqueza do legado histórico e relixioso do Camiño de Santiago, durante a época de maior afluencia de peregrinos ao longo dos diferentes Camiños de Santiago.
Ademais, promocionará o patrimonio cultural existente como castros, cruceiros, lavadoiros ou mámoas, e informará aos peregrinos dos servizos dos que dispoñen na súa andaina tales como albergues, oficinas de información ou centros de saúde.

O programa “Voluntariado no Camiño” facilita que as persoas voluntarias participantes leven a cabo actividades de información en dous ámbitos de actuación:

Voluntariado Cultural: Acompañamento aos peregrinos para as visitas as igrexas, e outros monumentos da zona.

Voluntariado informativo: Informar aos peregrinos e visitantes sobre aspectos culturais e de servizos (albergues, oficinas de información, centros de saúde, …) que existan no ámbito territorial.

Sen dúbida, estas actividades teñen unha incidencia e beneficios directos na contorna local, na que se desenvolven, ademais de contribuír ao enriquecemento persoal das persoas voluntarias participantes.

As actividades de voluntariado levaranse a cabo nas localizacións específicas en función das súas características peculiares, que determinan a necesidade da actuación e que fan que un determinado ámbito deveña como exclusivo para a consecución de determinados fins.

VÍA DA PRATA

A primeira ruta na que se aplicará será na Vía da Prata, e as igrexas nas que se poderá colaborar son as seguintes: Santa María de Retorta (Laza), Santa María de Mixós (Monterrei), Santa María de Xinzo (Xinzo de Limia), San Estevo de Sandiás (Sandiás), Santa María a Real (Xunqueira de Ambía), Igrexa de Santiago (Allariz), Santa Mariña de Augas Santas (Allariz), Santa María de Vilanova (Allariz), Beato Sebastián Aparicio (A Gudiña), San Cristobo de Cea (Cea), Santa María de Carballeda (Piñor), San Pedro de Vilanova (Dozón) e Santa Eulalia (Silleda).

Formulario de inscrición Vía da Prata

CAMIÑO PORTUGUÉS

No Camiño Portugués as igrexas nas que se poderá colaborar son as seguintes: Santo Domingo (Tui), San Bartolemou de Rebordáns (Tui), Santa María (Oia), San Salvador de Coruxo (Vigo), Igrexa de Santiago (Redondela), Igrexa de Santiago de Vilavella (Redondela), Igrexa de Santiago de Arcade (Soutomaior), Santa María de Alba (Pontevedra), Santa María de Carracedo (Caldas de Reis) e Santuario da Escravitude (Padrón).

Formulario de inscrición Camiño Portugués

CAMIÑO FRANCÉS

No Camiño Francés as igrexas nas que se poderá colaborar son as seguintes: Igrexa de Santiago de Barbadelo en Sarria e Igrexa de Santa Susana en Santiago de Compostela.

Formulario de inscrición Camiño Francés

As persoas voluntarias que participen estarán cubertas pola póliza de seguro de accidentes e responsabilidade civil que ten subscrita a Dirección Xeral de Xuventude, Participación e Voluntariado.

Os gastos de desprazamento das persoas voluntarias dende o seu domicilio ata o punto de encontro correrán pola súa conta.

Ao finalizar a súa acción voluntaria, a Dirección Xeral de Xuventude, Participación e Voluntariado inscribirá de oficio a experiencia voluntaria no Rexistro de Acción Voluntaria de Galicia.