Novas e actividades (1224)

A Casa das Ciencias, a Domus e o Aquarium Finisterrae abren as súas portas para recibir aos grupos escolares cunha oferta de exposicións, obradoiros e proxeccións que permitirán ao alumnado complementar os contidos curriculares.

No Aquarium Finisterrae a principal novidade é a oferta de itinerarios temáticos, como o titulado «Reproducirse baixo o mar», para coñecer os variados procesos de reprodución que empregan as especies mariñas, o itinerario «Planeta océano», no que se abordan diferentes cuestións oceanográficas (salinidade, mareas, correntes), efemérides históricas e a diversidade biolóxica na sala Maremagnum, ou o itinerario «Sinais de alarma», sobre algúns dos cambios ambientais que están a sufrir os océanos e que ameazan a súa biodiversidade.

Na Domus, os grupos escolares poderán coñecer o recentemente renovado vídeo do parto, coas imaxes de dous nacementos que amosan un proceso biolóxico polo que pasamos todos os seres humanos e que ten lugar case 400.000 veces cada día en todo o planeta. A visita polas salas de experiencias interactivas pódese complementar con sesións de cinema e con actividades e obradoiros no Laboratorio Aberto e na sala maker@domus. Experimentar coa técnica da PCR, a disección de flores, explorar diferentes aspectos da nutrición ou construír unha variedade de mecanismos e artefactos tecnolóxicos utilizando materiais sinxelos e moita imaxinación son algunhas das súas propostas.

Na Casa das Ciencias, unha das principais novidades será a renovada incubadora de pitos, cun deseño que permitirá contemplar mellor o proceso de eclosión do ovo e o nacemento de pitos de galiña. Ademais, a oferta escolar para este curso ofrece un abano de programas de Planetario para os diferentes niveis educativos, incluíndo sesións en directo sobre o ceo que se pode contemplar na época da visita.

https://www.coruna.gal/mc2/gl/visitas-escolares 

Xogade

Set 21, 2022

A Secretaría xeral para o Deporte convoca o programa Xogade (xogos galegos deportivos en idade escolar), curso 2022/23.

Poderán inscribirse neste programa os centros de ensino, ANPAS, clubs, escolas deportivas municipais, agrupacións deportivas escolares, asociacións, etc. que o desexen, pertencentes á Comunidade Autónoma de Galicia.

As actuacións do programa para a tempada 2022/23 son:
– Actividade deportiva escolar.
– Actividade deportiva federada-seguro deportivo 6 a 16.
– Coñece o meu club.
– Xogando coa auga e co vento.
– Xogos tradicionais e populares.
– Actividades de promoción.

Máis información no DOG do 21 de setembro de 2022 e en https://xogade.xunta.gal

Cruz Vermella Xuventude organiza XAC-8 Mozos como Axentes de Cambio!

Na oitava edición do XAC, e despois destes dous anos de pandemia, celebrarán unhas xornadas de aprendizaxe vivencial e experiencial, unha fin de semana en Santiago de Compostela!

Serán obradoiros presenciais no propio albergue, nunha aula e no exterior sempre que as condicións climatolóxicas o permitan.

Hai 40 prazas totais e para garantir a participación de todo o territorio galego, distribuiranse 10 prazas por provincia. No caso de non acadar as 10 participantes nalgunha provincia, as prazas poñeranse á disposición da lista de espera.

As persoas destinatarias son:
- Voluntariado de Cruz Vermella Xuventude, de 16 a 35 anos
- Xuventude en xeral

Será no albergue Monte do Gozo, en Santiago de Compostela:

Data: 24 e 25 de setembro.

Precisase tamén:
- Persoas dinamizadoras para dinámicas de medio ambiente e/ou Camiño de Santiago.
- Persoas que realicen fotografías e vídeos das xornadas.
- Persoas conductoras por si houbera que realizar algunha viaxe en coche ata o albergue.

Formulario de inscrición


O Concello de Ourense e a Deputación de Ourense coa colaboración da Universidade de Vigo e a Consellería de Promoción do Emprego e Igualdade da Xunta de Galicia organizan Hackathon - Laboratorio de Ideas e Innovación 2022bhackathon

As persoas destinatarias do Hackathon son rapaces e rapazas interesados en compartir ideas, vivir unha experiencia única e no desenvolvemento turístico do territorio.

Para poder inscribirse será necesario:
- Ser maior de idade
- Residir en Galicia ou a rexión Norte de Portugal
- Ter ganas de compartir ideas e expor solucións

Aconséllase que os equipos sexan multidisciplinares e interxeracionais. Valorarase especialmente a equidade de xénero nos equipos.

O obxectivo é buscar solucións tecnolóxicas, deseños de proxectos ou procesos innovadores que contribúan á mellora do posicionamento de Galicia e o Norte de Portugal como destino turístico.

O prazo de inscrición estará aberto ata o día 26 deste mes e as actividades desenvolveranse ata mediados de outubro.

Os catro mellores proxectos repartiranse case 4.000 euros en premios.

Máis información:
www.hackathonemprendemakers.com 
info@hackathonemprendemakers.com

O Campus Industrial de Ferrol abre o prazo de inscrición para participar no Challenge STEM, un xogo inmersivo e colaborativo dirixido a alumnado de Bacharelato da rama científica e de ciclos superiores de FP de toda Galicia. A través dunha plataforma web, o estudantado terá que resolver os catro retos propostos para este desafío polo profesorado da Escola Politécnica de Enxeñaría de Ferrol (EPEF) e da Escola Universitaria de Deseño Industrial (EUDI).

O alumnado participante, dividido en grupos de non máis de seis persoas, competirá, colaborará e traballará durante catro semanas para resolver os enigmas dun buque de metano que está atracado na ría de Ferrol, o Mozah. Este desafío porá a proba os seus coñecementos en materias como as matemáticas, o cálculo, a física, a química, as ciencias e a tecnoloxía. Para levalo a cabo, contarán co apoio do profesorado do seu centro e poderán solicitar pistas puntuais durante todo do desafío.

Os cinco equipos que acaden a maior puntuación clasificaranse para a final presencial que terá lugar o venres 11 de novembro no Campus Industrial de Ferrol.

A inscrición no Challenge STEM poderá formalizarse vía web ata o venres 2 de outubro.

O Challenge STEM desenvolverase do 3 ao 28 de outubro.

https://challengestem.gal/#ChallenheSteam 

O escenario de Go!Go!Zo! Xacobeo 21-22 no Monte do Gozo en Santiago de Compostela, acollerá, entre o sábado 24 e o domingo 25 de setembro, a actuación de 18 bandas emerxentes procedentes das escolas Rock School de A Coruña e A Casa do Rock de Santiago de Compostela. Cada día participarán un total de 9 bandas, integradas todas elas por mozos e mozas de entre 18 e 25 anos, que subirán ao escenario do Monte do Gozo para achegar ao público as súas propostas en quendas de 25 minutos.

Xa o domingo terá lugar tamén unha macro actuación organizada por A Casa do Rock, que reunirá a máis de 500 músicos para tocar en vivo dúas pezas: Terra, de Tanxugueiras (as tres integrantes do grupo foron alumnas da escola) e Forza pra un mundo libre, a versión en galego creada polo centro compostelá do mítico tema de Neil Young Rocking In The Free World.

Música electrónica e xornada benéfica

Máis aló destas actuacións, GoGoZo! Xacobeo 21-22 tamén terá outras dúas datas sinaladas este mes de setembro: un festival de DJs o venres 16, no que participarán catro recoñecidos picadiscos do panorama galego, e a xornada solidaria Día da Irmandade entre a cultura galega e ucraína, que buscará dar a coñecer a cultura do país a través dunha mostra de danza, música e postos de artesanía cuxa recadación irá destinada aos afectados pola guerra.


https://www.gogozo.gal/es/programacion/ 

Time to Move

Set 13, 2022

Time to Move é un conxunto de eventos en liña e presenciais celebrados en toda Europa durante (non só!) outubro. As actividades están organizadas por expertos de Eurodesk que poden orientarte de forma personalizada sobre oportunidades internacionais.

Coincidindo co Ano Europeo da Mocidade, non perdas a oportunidade de participar en todas as actividades preparadas para ti, como voluntariado virtual, intercambios académicos semestrais, prácticas no estranxeiro e moito máis. Estamos preparados para planificalo contigo!

É hora de moverse! As actividades de Time to Move ofrécenche a oportunidade de prepararte para proxectos virtuais ou presenciais. Consulta os webinars, sesións informativas, oportunidades de orientación personalizadas ou actividades presenciais preto de ti e empeza a planificar.

https://timetomove.eurodesk.eu/es/ 

O proxecto de talento musical feminino Descúbreas, impulsado pola Deputación de Pontevedra publica en plataformas dixitais os temas das oito rapazas que reciben asesoramento e formación na segunda convocatoria de Descúbreas.

Todas as pezas están xa dispoñíbeis para o público nas principais plataformas dixitais de streaming de audio e vídeo.

Caro (Carolina Lemos) reflexiona no seu debut Despiértate sobre as inseguridades dunha persoa adolescente que se ten que enfrontar á decisión, á hora de formular o seu futuro máis inmediato, de seguir os seus soños ou polo contra ir cara ao seguro.

Amparo estréase de xeito profesional na industria musical co tema Cosas de Descartes.

Marina Vigo foi a primeira participante en estrear o seu tema como integrante da banda Cantometrics. Chifro é unha proposta que recupera o arquivo sonoro de Alan Lomax substituíndo o chifre pola gaita, acompañada de marimba, acordeón e percusións.

Silencio é o título do tema de Sara Casas, un clamor pola necesidade de buscar a harmonía vital, de conectar coa natureza de forma espiritual e consciente.

Sara Baños forma coa tamén viguesa María Lago a banda Todo mal, que gravaron no marco de Descúbreas o seu sinxelo Guiri en mi ciudad.

A Riso é o nome artístico de Alba Nogueira, que acaba de estrear no marco de Descúbreas o seu tema I eu?, un canto á resistencia e á loita pola defensa dunha voz propia para as mulleres no ámbito das artes.

Impuntual é o título do tema lanzado por María Gabeiras, unha balada pop sobre a manchea de oportunidades que se lle pode dar a unha persoa sen que esta as aproveite.

Ane Swan lanza a súa carreira con só 16 anos e estréase cun tema en inglés: Queen among shadows.

A través de “Descúbreas”, desenvolvido en colaboración con Regalamúsica, a Deputación de Pontevedra actúa para reducir a fenda de xénero na industria musical dándolle a oportunidade a 8 rapazas e mozas da provincia a formarse e dar os seus primeiros pasos profesionais neste ámbito. A mentorización inclúe a gravación dun tema e dun vídeo musicais e a planificación e promoción do seu lanzamento real ao mercado.

https://descubreas.com/gl/ 

A Consellería de Política Social e Xuventude convoca axudas para a realización de programas de interese xeral que atenden fins de carácter social destinados ente outros, á mocidade e ao voluntariado con cargo á asignación tributaria do 0,7 % do imposto sobre a renda das persoas físicas e do imposto de sociedades.

Poderán ser beneficiarias destas axudas as entidades do terceiro sector de acción social e a Cruz Vermella Española.

Liñas de actuación
Liña I. Actuacións no ámbito da familia, infancia e dinamización demográfica
Liña II. Actuacións de inclusión social
Liña III. Actuacións de promoción da autonomía persoal e apoio de persoas maiores ou con discapacidade
Liña IV. Proxectos de investimento e adecuación de centros e unidades de atención destinados a persoas maiores ou con discapacidade
Liña V. Actuacións destinadas á mocidade
Liña VI. Actuacións destinadas ao voluntariado

O prazo de presentación de solicitudes estará aberto ata o 10 de outubro de 2022.

Máis información no DOG do 8 de setembro de 2022 e en https://politicasocial.xunta.gal/es

Artigo do xornal La Voz de Galicia no que catro mozas e mozos contan a súa experiencia tras gañar o premio Xuventude Crea

Francesca de Nigrís gañou o primeiro premio da categoría de cociña do Xuventude Crea 2021.

Celina Mauricio foi o primeiro premio de danza no 2021.

Ana Vázquez gañou a categoría de moda deste certame no 2020. Actualmente, atópase inmersa en sacar adiante a súa marca: chámase Anamingo Twins. Pero non está soa neste proxecto, senón que a acompaña Fran Basteiro, tamén deseñador e gañador do Xuventude Crea no 2021.

Adrián Noia gañou o segundo premio de novela curta no 2021, e o seu grupo de teatro conseguiu o terceiro posto na súa categoría no 2019.

Artigo Ao gañar o Xuventude Crea cambiou a miña traxectoria profesional