En portada (1158)
As Comunidades Autónomas e o Goberno Central buscarán vías comúns para impulsar a emancipación dos mozos
O 10 de maio de 2012 reunironse os directores xerais de Xuventude das Comunidades Autónomas co INJUVE, e acordaron a posta en marcha dunha serie de plans de cooperación entre administracións para impulsar a emancipación dos mozos.
Presidida polo Director Xeral do Instituto da Xuventude , Rubén Urosa, a reunión do Consello Interterritorial celebrada hoxe en Madrid foi a primeira desde marzo de 2010 e serviu para ter unha toma de contacto coas Comunidades Autonómas. Tal e como destacou o propio Urosa na reunión, ao Goberno interésalle a activación de políticas a favor da Xuventude que, como primordial obxectivo, permita aos mozos españois entrar no mercado laboral.
As Comunidades Autónomas expresaron o seu interese en coordinar xunto á administración central plans que axuden á Xuventude , especialmente á súa emancipación. Durante os próximos días, os departamentos correspondentes de cada autonomía remitirán ao INJUVE documentación sobre o que están facendo para axudar aos mozos, e así, incidir na coordinación de diversas actuacións.
Así mesmo, Urosa presentou aos seus homólogos autonómicos o informe de situación deste organismo e trasladoulles o interese do Ministerio de Sanidade, Servizos Sociais e Igualdade de pór en marcha canto antes o Plan estratéxico de Emancipación Nova.
Un dos aspectos que se debateron durante este Consello Interterritorial foi a situación das cualificaciones profesionais de Xuventude e homologación de titulacións de lecer e tempo libre xuvenil.
O Director Xeral do INJUVE tamén presentou un informe sobre a situación do proceso de elaboración do Libro Branco para a Xuventude en España 2020 e detalloulles toda a información sobre o programa europeo Xuventude en Acción e outros programas internacionais.
O Consello Interterritorial de Xuventude constituír o 18 de outubro de 2007. Persegue afianzar a cooperación entre as Comunidades Autónomas e o Estado, asi como entre as propias CC.AA, en todo o relativo ás políticas públicas de Xuventude .
A Consellería de Traballo e Benestar vén de adxudicar as prazas da oferta concertada da campaña de verán 2012
O obxectivo é facilitar ás asociacións que traballan coa mocidade o desenvolvemento dos seus programas de lecer e tempo libre
A campaña de verán de Xuventude permitirá este ano a contratación de ao redor de 900 monitores e directores de tempo libre
A Consellería de Traballo e Benestar vén de adxudicar un total de 1.155 prazas nas súas instalacións xuvenís a 27 entidades que traballan coa mocidade. En concreto, as prazas poranse a disposición de asociacións xuvenís; entidades prestadoras de servizos aos mozos e mozas; escolas de tempo libre; Consello da Xuventude de Galicia e consellos locais e municipais de xuventude, así como das corporacións locais e outras entidades públicas ou privadas, incluídos os grupos de mozos e mozas non asociados que levan a cabo actividades de tempo libre sen ánimo de lucro.
A oferta concertada de prazas porase a disposición destes colectivos entre o 15 de xuño e o 30 de setembro. O obxectivo da iniciativa é facilitarlles o desenvolvemento dos seus programas de lecer e tempo libre.
As asociacións que non resultaron adxudicatarias poderán acceder ás prazas que queden baleiras con prioridade fronte aos solicitantes que as demanden por primeira vez, a través do correo electrónico ofertaconcertada.benestar@xunta.es
Esta iniciativa enmárcase na campaña de verán da Dirección Xeral de Xuventude e Voluntariado, na que o departamento autonómico investirá este ano ao redor de 2,5 millóns de euros.
A campaña permitirá este ano a contratación de 900 monitores e directores de tempo libre. Máis de 8.000 mozos e mozas poderán participar da iniciativa entre os meses de xuño e setembro, un programa no que se ofertan, ademais de prazas concertadas, campamentos en Galicia e noutras comunidades autónomas, actividades para maiores de 18 anos, campos de traballo, e accións para mozos e mozas descendentes de galegos, residentes no exterior.
Esta iniciativa inclúe varias novidades, como a unión por primeira vez dos participantes procedentes da emigración cos rapaces galegos nos campamentos e actividades para maiores de 18 anos. O obxectivo é fomentar a convivencia intercultural e a aprendizaxe mutua. Ata o de agora só tomaban parte en actividades específicas para eles. Ademais, inclúense novos emprazamentos nos campos de traballo e actividades para maiores de 18 anos.
Aínda non sacaches o carné de conducir? Axudámosche?
Hoxe, día 14 de maio, publícase no DOG a Orde do 4 de maio de 2012 pola que se establecen as bases reguladoras que rexen as axudas para facilitar a obtención do permiso de condución clase B e favorecer a seguridade viaria dos mozos e mozas galegos, e se procede á súa convocatoria.
Podes obter unha axuda de 200 euros!
REQUISITOS
Ter entre 18 e 30 anos; residir en Galicia; ser titular do carné xove; estar en situación de desemprego (cunha antigüidade mínima de 6 meses); non ter, a unidade familiar, ingresos superiores a 2,5 veces o IPREM.
Para acceder á axuda, deberás obter o carné de conducir entre o 1 de xaneiro e antes do 15 de outubro de 2012 e, ademais, superar con éxito un curso gratuíto de educación viaria
As axudas concederánsevos a todos/as os que reunades os requisitos esixidos, seguindo a orde de presentación de solicitudes ata esgotar o crédito dispoñible.
O prazo de solicitude iniciarase a partir do día seguinte ao da publicación da orde no DOG e estará aberto ata o día 1 de setembro de 2012, salvo que antes se esgote o crédito dispoñible.
Consulta da orde: DOG
Folleto informativo: aquí
Máis información aquí
Máis de 300 mozos e mozas galegos participaron xa no programa de aprendizaxe e lecer ‘Aula Xuventur’ de Benestar
O director xeral de Xuventude e Voluntariado, Ovidio Rodeiro, visitou hoxe o albergue xuvenil de Gandarío onde se está a desenvolver a actividade ‘Camiño a Durban’
Nesta segunda edición do programa ofertáronse máis de 850 prazas dirixidas ao alumnado galego, distribuídas en 24 quendas, durante os meses de marzo a xuño
O Aula Xuventur estrutúrase en tres módulos diferenciados, en función da temática e das idades dos participantes: ‘Vive o mar’, ‘Multiaventura de Cine’ e ‘Camiño a Durban’
Un total de 321 mozos e mozas de catorce centros de ensino de toda Galicia participaron ata agora no programa ‘Aula Xuventur’ da Consellería de Traballo e Benestar, que combina aprendizaxe e lecer.
O director xeral de Xuventude e Voluntariado, Ovidio Rodeiro, visitou hoxe o albergue xuvenil de Gandarío (Bergondo, A Coruña), onde se está a desenvolver a actividade ‘Camiño a Durban’, dentro do programa ‘Aula Xuventur’. Durante a visita, puido coñecer a opinión dos 42 mozos e mozas do Colexio Divino Salvador de Vigo que están a participar na iniciativa.
Nesta segunda edición do programa ofertáronse máis de 850 prazas dirixidas ao alumnado galego, distribuídas en 24 quendas, durante os meses de marzo a xuño, na procura de facilitarlles aos mozos e mozas unha experiencia educativa alternativa e complementaria do currículo escolar, cunha programación que combina a aprendizaxe e o tempo de lecer, á vez que se pon a disposición da mocidade galega a rede de albergues xuvenís de Galicia.
O Aula Xuventur estrutúrase en tres módulos diferenciados, en función da temática e das idades dos participantes: ‘Vive o mar’, ‘Multiaventura de Cine’ e ‘Camiño a Durban’. Todos os titulares do carné xove teñen dereito a un desconto.
‘Camiño a Durban’ está dirixido ao alumnado con idades entre os 14 e os17 anos que estea cursando 3.º e 4.º da ESO, 1.º de bacharelato ou 1.º ciclo de grao medio. Desenvólvese no albergue xuvenil de Gandarío, en seis quendas de tres días (2 noites), entre os meses de marzo e maio. Durante tres xornadas organízase un xogo de rol sobre educación ambiental, tendo como fío condutor o cambio climático, co obxecto de favorecer un achegamento ao concepto de educación ambiental e desenvolvemento sostible, sensibilizar da problemática do cambio climático, as súas causas, efectos e medidas paliativas.
‘Vive o mar’ dirixiuse ao alumnado con idades entre os 12 e os 16 anos e que estivera cursando Educación Secundaria. Desenvolveuse no albergue xuvenil das Sinas, en sete quendas de dous días (1 noite), entre os meses de marzo e abril. A finalidade deste módulo foi a de crear un novo marco de ensinanza lúdico-educativa, baseada na multidisciplinariedade de coñecementos e aprendizaxes sobre o medio mariño e o seu entorno.
‘Multiaventura de cine’ está dirixido ao alumnado con idades entre os 14 e os 17 anos que estea cursando terceiro e carto da ESO, 1.º de bacharelato ou 1.º ciclo de grao medio. Desenvólvese no albergue xuvenil LUG 2, en once quendas de tres días (2 noites), entre os meses de marzo e xuño. Busca achegar aos participantes ó cine como ferramenta de desenvolvemento de habilidades sociais, creatividade e autocoñecemento, complementado por actividades de deporte activo.
O encontro dixital Xuventude Galicia Net pechou hoxe as súas portas coa participación de máis de 8.000 persoas
Aos 1.000 mozos e mozas inscritos na maior festa das novas tecnoloxías de Galicia sumáronse as máis de 7.000 persoas que visitaron a iniciativa de Xuventude e participaron nas diferentes actividades que se programaron ao aire libre
Unha das accións máis valoradas foi o bloque temático dedicado ao emprendemento como saída fronte á crise
Os relatorios de Enrique Dans e Leopoldo Abadía colgaron o cartel de aforo completo coa asistencia de 1.500 persoas
O Encontro Dixital Xuventude Galicia Net que organizou ao longo deste fin de semana en Santiago a Dirección Xeral de Xuventude pechou un ano máis as súas portas cun balance “moi positivo”. Entre o venres e hoxe mesmo pasaron polas instalacións desta iniciativa, no Pazo de Congresos e Exposicións, máis de 7.000 persoas. A esta cifra súmanse os máis de 1.000 mozos e mozas que se inscribiron para participar durante os 3 días na intranet.
Unha das iniciativas máis valoradas nesta edición foi o bloque temático dedicado ao emprendemento como saída fronte á crise. Máis de 500 participantes participaron ao longo de toda a semana para elixir os tres mellores proxectos, que foron defendidos ante un xurado cualificado durante a tarde de onte.
Ademais, a mesa redonda sobre o emprendemento, que contou con profesionais do ámbito universitario e da empresa privada, debateu as vantaxes e situacións que han de ter en conta os mozos e mozas que se adianten no mundo do emprendemento.
Os asistentes tamén puideron participar nunha sesión de networking non convencional, na que mesturaron as técnicas de citas rápidas. Deste feito, a sesión de networking foi cronometrada para que os participantes puidesen interactuar coa maior parte dos asistentes posibles.
Aforo completo nos relatorios
Os relatorios tamén contaron con moita asistencia de público este ano. As ponencias de Enrique Dans e Leopoldo Abadía colgaron o cartel de aforo completo, ao encher a sala habilitada para os seus relatorios, cunha capacidade para 1.500 persoas.
Así mesmo, é preciso salientar que a oferta formativa foi a máis completa das trece edicións celebradas no Encontro de Xuventude Galicia Net. Abordouse un amplo abano de materias dirixidas para todos os públicos ao longo dos tres días, como, por exemplo, hacking ético, neuromarketing web ou redes sociais.
Con respecto á extranet, onde tiveron lugar as actividades ao aire libre, converteuse nesta edición nun punto de encontro de pais e fillos, mozos e mozas arredor das novas tecnoloxías.
As colas sucedéronse todo o fin de semana para acceder aos simuladores de golf ou tiro, Tamén houbo moita afluencia de público nos obradoiros de maquillaxe, no stand de consolas e no de ciencia divertida dirixida para os máis cativos.
Os amantes da arte tamén tiveron un oco no exterior do Pazo de Congresos no que o Graffiti foi o protagonista. Neste senso, os participantes na XGN puideron participar nun obradoiro de iniciación ao graffiti e presenciar unha exhibición desta arte urbana.
Dentro da party realizáronse, ademais, diversas actividades relacionadas co modding, hardware e overclocking. Así mesmo, destacaron os campionatos de xogos con pc´s como o de Counter Strike 1.6, League of Legends, Super Street Fighter 4, ProEvolution Soccer. Para competir sen os ordenadores, houbo lanzamento de CD, air guitar ou dobraxe, entre outras.
Por último, as noites temáticas de cine, a novidade desta edición da land party tamén foron un éxito. Ao longo da fin de semana Xuventude Galicia Net non pechou as súas portas pola noite, ofrecendo de balde noites de cine temáticas de acceso libre.
O Xuventude Galicia Net presenta o emprendemento como unha posibilidade de futuro para a mocidade galega
O director xeral de Xuventude, Ovidio Rodeiro, e a directora da Axencia para a Modernización Tecnolóxica de Galicia (Amtega), Mar Pereira, percorrerán hoxe as instalacións do Pazo de Congresos
A xornada de hoxe sábado contará cun bloque temático no que se abordará o emprendemento como unha opción viable de futuro para a mocidade galega
A AMTEGA participa na décimo terceira edición de Xuventude Galicia Net cun stand onde se ofrecerá información sobre os proxectos que está a impulsar para acercar as novas tecnoloxías ás empresas e cidadán galegos 
Presentarase o programa Voluntariado Dixital aos asistentes co obxectivo de captar novos voluntarios e voluntarias que poidan difundir os beneficios das novas tecnoloxías no conxunto da sociedade galega
Para rematar a xornada, a partir das 21,00 horas comezará a noite de cine temática, que estará ambientada no film ‘A guerra das Galaxias’
A XIII edición do Xuventude Galicia Net, organizado pola Consellería de Traballo e Benestar, está a facer fincapé nun dos aspectos que máis preocupación lle supón á xuventude: o desemprego. Por iso, a xornada de hoxe sábado contará cun bloque temático no que se abordará o emprendemento como unha opción viable de futuro para a mocidade galega.
Neste sentido, organizarase unha mesa redonda na que profesionais de diferentes ámbitos falarán sobre emprendemento. Universidade, grande empresa de base tecnolóxica e pequena startup en proceso de expansión xuntaranse nunha mesma sala para compartir co público as súas visións sobre o autoemprego, emprendedores e saídas laborais, que darán paso a un pequeno coloquio co público. Simultaneamente a esta mesa redonda, terá lugar unha charla de Juan Gestal de Pix Fans, un blog de videoxogos.
Así mesmo haberá unha actividade de ‘SpeedNetworking’ que consistirá en roldas de cinco minutos de duración nas que os interlocutores se irán coñecendo fugazmente; un concurso titulado ‘Startup mocidade emprendedora’, no que a xente pode votar en Facebook aos proxectos máis salientables e, xa na XGN, os tres proxectos máis votados terán que facer un “pitching” (exposición do proxecto) ante un xurado composto por expertos que decidirán cal é o mellor proxecto.
O director xeral de Xuventude, Ovidio Rodeiro, e a directora da Axencia para a Modernización Tecnolóxica de Galicia (Amtega), Mar Pereira, percorreron as instalacións do Pazo de Congresos, onde interactuaron cos participantes da intranet e visitaron os stands da zona exterior do recinto, destacando a presenza de participantes do programa de Voluntariado Dixital, un programa conxunto dos dous departamentos posto en marcha meses atrás e que ten como obxectivo achegar as novas tecnoloxías aos colectivos máis afectados pola fenda dixital.
A Axencia para a Modernización Tecnolóxica de Galicia, Amtega, está a participar activamente no encontro Xuventude Galicia Net, difundindo as iniciativas postas en marcha polo Goberno galego para achegar a tecnoloxía ao maior número posible de persoas e empresas e integrar as TIC en todos os ámbitos da sociedade
Unha das últimas iniciativas desenvolvidas pola Axencia en colaboración coa Consellería de Traballo e Benestar é o Programa de Voluntariado Dixital, que terá presenza neste encontro grazas á participación de 17 voluntarios dixitais. A súa función centrarase en colaborar cos organizadores ante cuestións de funcionamento e tecnolóxicas que poidan xurdir e dirixidas especialmente ás persoas con discapacidade, nenos e nenas participantes no encontro.
Calquera persoa que acuda ao encontro poderá solicitar o apoio dixital dalgún dos voluntarios que se identificarán cun chaleco e chapa identificativa do programa voluntariado dixital.
Para darlle a visibilidade aos proxectos da Administración autonómica en materia de novas tecnoloxías a Amtega conta cun stand, onde se ofrece información sobre as iniciativas orientadas a achegar as novas tecnoloxías ás empresas como o Centro Demostrador TIC, así como as actuacións de impulso do uso das TIC por parte de toda a cidadanía, a través da Rede de Aulas para a Modernización e Inclusión Tecnolóxica Rede CeMIT.
Ademais durante a xornada de hoxe o Software Libre centrará a parte formativa de Xuventude Galicia Net cunha conferencia na que AGASOL, Asociación Galega de Software Libre, e colaborador da Amtega, que informará aos asistentes sobre as oportunidades laborais que hai detrás do mesmo, proxectos das súas empresas relacionados co software libre, como “emprender + software libre”.
Programación
A segunda xornada da XIII edición de Xuventude Galicia Net arrancou coa conferencia do profesor da IE Bussiness School, Enrique Dans. Actualiza un dos blogs máis influentes da blogosfera hispana e é considerado unha das persoas máis influentes da rede.
A situación económica mundial faise presente nesta edición prestando especial atención ao emprendemento como saída laboral. Para isto cóntase nesta xornada coa presenza de Javier Megías, asesor da Comisión Europea, consultor en estratexias innovadoras para empresas e startup, especializado en modelos de negocio.
A mañá do sábado seguiu coa ponencia ‘Software Libre e Emprendemento’, por parte de Luis Alberto Fernández e Xavier Castaño, xerente e vicepresidente de Agasol, na que estes relatores relacionados co software libre lle contarán aos asistentes as oportunidades laborais que hai detrás do mesmo.
Os xogos de rol terán unha gran presenza na XGN a través de xogos coma Warhammer, Magic ou YuGi Oh, que contarán cos seus propios torneos para deleite dos participantes na XIII edición da Xuventude Galicia Net.
Ás ponencias da tarde darán comezo co Rubén Bastón, un dos profesionais de referencia no mundo social media en Galicia e en España. É o directivo máis novo da multinacional Elogia.
Para rematar a xornada a partir das 21,00 horas comezará a noite de cine temática, que estará ambientada no film ‘A guerra das Galaxias’, e proxectaranse interrumpidamente as seis películas que compoñen esta serie cinamatográfica.
Máis de 600 mozos e mozas participan nunha xornada sobre emprego, emprendemento e participación da mocidade en Ferrol
A secretaria xeral da Consellería de Traballo e Benestar, Cristina Ortiz, inaugurou hoxe a xornada ‘Inicia e emprende o camiño do teu futuro’, na que participou a directora xeral de Formación e Colocación, Ana María Díaz
Na xornada de hoxe os mozos e mozas puideron atopar resposta ás súas inquedanzas formativas, laborais e emprendedoras
Cristina Ortiz explicou que na coxuntura económica actual as fórmulas que están a demostrar maior resistencia son a iniciativa empresarial e o autoemprego
Ana María Díaz lembrou que nesta lexislatura son xa máis de 30.000 os galegos e galegas que recibiron formación certificable
Consellería de Traballo e Benestar organizou hoxe en Ferrol unha xornada enmarcada no Programa Conecta, na que participaron máis de 600 mozos e mozas. A mesma centrouse no emprego, o empredemento e a participación da mocidade na sociedade, baixo o título ‘Inicia e emprende o camiño do teu futuro’. En total, realizaranse dez mostras ao longo de toda Galicia e incluirán ponencias, mesas redondas, stands e actividades paralelas.
A secretaria xeral da Consellería de Traballo e Benestar, Cristina Ortiz, acompañada do alcalde de Ferrol, José Manuel Rey, foi a encargada de inaugurar este encontro. Na súa intervención indicou que esta xornada quere dar resposta ás dúbidas e inquedanzas da mocidade ferrolá en relación ao mercado laboral, a formación e o emprendemento.
Ortiz engadiu que para a Xunta a xuventude é unha “prioridade absoluta” e que, co obxectivo de crear e mellorar as súas oportunidades de presente e futuro, o departamento autonómico puxo en marcha o primeiro Plan Estratéxico de Xuventude, que pon o acento en materia de emprego, aspecto que engloba preto da metade do investimento total do plan, con actuacións como o desenvolvemento de ferramentas e mecanismos de información e orientación laboral, nas que se inscribe esta xornada.
Cristina Ortiz explicou que na coxuntura económica actual as fórmulas que están a demostrar maior resistencia son a iniciativa empresarial e o autoemprego, un feito que, si se engade a creatividade propia da xuventude, constitúe “excelentes oportunidades para xerar emprego e devolver a nosa economía á senda do crecemento”.
No eido da participación, a secretaria xeral indicou que na Consellería se están a levar a cabo iniciativas que fomentan tanto a participación como o emprendedurismo e permiten o desenvolvemento integral das capacidades dos mozos e amosan as vantaxes do traballo en equipo.
Formación certificable
Doutra banda, no decurso da xornada, a directora xeral de Formación e Colocación, Ana María Díaz, ofreceu un relatorio sobre formación certificable e indicou que esta permite aos alumnos dispoñer dun certificado con carácter oficial e validez estatal, que, ao mesmo tempo, ten efectos académicos no eido do sistema educativo e profesionais recoñecidos na lexislación vixente.
A directora xeral apuntou que Traballo e Benestar busca deste xeito ofertar unha formación axustada ás necesidades do mercado laboral e ás esixencias de competitividade das empresas.
Así, a Xunta, no marco do Diálogo Social, está a facer unha importante aposta por unha formación para o emprego cos máximos niveis de calidade e excelencia. De feito, ao longo desta lexislatura xa son máis os 30.000 galegos e galegas que recibiron formación certificable.
Programa Conecta
O Programa Conecta xorde como elemento de enlace entre a mocidade e o movemento asociativo para converterse nunha ferramenta de conexión entre o colectivo xuvenil e as variables que lles poden ser de interese. Ten por obxectivo ofrecer oportunidades para a xuventude e motivar a súa participación activa na sociedade.
Na xornada de hoxe en Ferrol os mozos e mozas puideron atopar resposta ás súas inquedanzas formativas, laborais e emprendedoras. Esta mostra celebrouse xa en Santiago e Vila de Cruces (Pontevedra) e continuará o seu percorrido en Ourense, Burela, Ribeira, Melide, Ponteceso e Marín, para rematar na Coruña.
A nova edición do Xuventude Galicia Net centrarase nas oportunidades de traballo baseadas nas novas tecnoloxías
Esta edición de 2012, a décimo terceira, contará con persoas con grande experiencia no mundo empresarial como o profesor da IE Business School, Enrique Dans; o profesor Leopoldo Abadía; ou o social media Rubén Bastón
Para os pais e nais tamén están previstas actividades co obxectivo de facer accesibles certos contidos e tecnoloxías que, a primeira vista, so parecen influír aos máis mozos
Os exteriores do Pazo de Congresos e Exposicións e o hall de entrada acollerán as actividades da extranet, abertas a todos os públicos
A edición deste ano do Xuventude Galicia Net, que terá lugar desde este venres, 4 de maio, e ata o domingo, fará énfase na formación, a creación de empresas, as oportunidades de traballo baseadas nas novas tecnoloxías e a procura activa de emprego para a xuventude que se dea cita no evento.
Trátase do maior ‘Lan-party’ da Comunidade e celebrarase no Pazo de Congresos e Exposicións de Galicia, en Santiago de Compostela. Esta edición de 2012, a décimo terceira, contará con persoas con grande experiencia no mundo empresarial: altos directivos e empresarios que poidan cubrir as necesidades que a xuventude galega demanda á hora de iniciar o emprendemento empresarial.
Para mellorar a formación e a preparación en materia de novas tecnoloxías, e totalmente de balde para quen se achegue, deseñouse unha grella de relatorios onde se contará con expertos reputados nas súas áreas como o profesor da IE Business School, Enrique Dans; o profesor Leopoldo Abadía; ou o social media Rubén Bastón.
Para os pais e nais tamén están previstas actividades co obxectivo de facer accesibles certos contidos e tecnoloxías que, a primeira vista, so parecen influír aos máis mozos. Para a Dirección Xeral de Xuventude e Voluntariado, os pais son un dos colectivos máis numerosos e comprometidos, xa que moitos dos seus fillos ou ben son participantes ou ben se acercan a participar das actividades gratuítas dun evento para todos os públicos.
A situación económica mundial faise presente nesta edición dun xeito innovador: prestando especial atención ao emprendedurismo como saída laboral. Para iso, contarase con especialistas na materia como Javier Megías e directivos de empresas, así como se celebrarán obradoiros sobre as últimas novidades do sector como a reciclaxe de aparatos eléctricos ou neuromarketing.
Nesta edición de XGN estará presente a Axencia para a Modernización Tecnolóxica cun stand e unha conferencia na que varios relatores relacionados co software libre exporán as oportunidades laborais que hai detrás do mesmo, así como proxectos das súas empresas relacionados co software libre.
Para os máis habilidosos, tamén haberá actividades nesta XGN. Complementando a oferta formativa, a edición 2012 da XGN prevé multitude de actividades e obradoiros de carácter práctico.
Os exteriores do Pazo de Congresos e Exposicións e o hall de entrada acollerán as actividades da extranet, abertas a todos os públicos. No exterior do recinto todas aquelas persoas que se achegen á XGN poderán facer uso das instalacións de paintball, rocódromo, diversos xogos e o obradoiro de graffiti que se organizan como actividades nesta edición, e, no interior do Pazo, contarase con stands de consolas e videoxogos, ciclos temáticos de cine, maquilladores e mesmo un stand sobre ciencia divertida para despertar o interese científico nos máis cativos, diversos xogos, e todo de maneira totalmente gratuíta para aqueles que queiran achegarse.
‘Inicia e emprende; o camiño do teu futuro’ é a consigna desta mostra na que os mozos e mozas atoparán resposta ás súas inquedanzas formativas, laborais e emprendedoras
Esta iniciativa, enmarcada no Programa Conecta, ten por obxectivo ofrecer oportunidades para a xuventude e motivar a súa participación activa na sociedade
A iniciativa percorrerá os concellos de Santiago, Vila de Cruces, Ferrol, Ourense, Burela, Melide, Marín, Ribeira, Ponteceso e A Coruña
A Dirección Xeral de Xuventude e Voluntariado, dependente da Consellería de Traballo e Benestar, desenvolverá o próximo 4 de maio en Ferrol unha mostra sobre emprendemento e talento xuvenil no marco do programa Conecta. Os interesados xa poden incribirse na web ‘www.xuventude.net’. En total, realizaranse dez mostras ao longo de toda Galicia e incluirán ponencias, mesas redondas, stands e actividades paralelas.
Esta iniciativa xorde como elemento de enlace entre a mocidade e o movemento asociativo para converterse nunha ferramenta de conexión entre o colectivo xuvenil e as variables que lles poden ser de interese. Ten por obxectivo ofrecer oportunidades para a xuventude e motivar a súa participación activa na sociedade.
Cada unha destas mostras terá un tema definido e complementario coas demais, todos eles vinculados aos eixos (educación, emprego, creatividade e espírito emprendedor, vivenda, saúde e deporte, voluntariado e solidariedade, información xuvenil, participación e mobilidade) do Plan Estratéxico Xuventude 2013.
‘Inicia e emprende; o camiño do teu futuro’ é a consigna da mostra que se celebrará en Ferrol sobre ‘Iniciativa e Emprendemento’ na que os mozos e mozas atoparán resposta ás súas inquedanzas formativas, laborais e emprendedoras. A mesma contará con diversos ponentes como directores de recursos humans ou directores de tempo libre.
A promoción e potenciación do movemento asociativo vinculado á xuventude é unha prioridade clave para a Dirección Xeral, entendendo a participación como mecanismo de aprendizaxe non formal, opción de ocio educativo e de desenvolvemento de actitudes cívicas e persoais determinantes para o futuro do colectivo xuvenil.
Esta mostra celebrouse xa en Santiago e Vila de Cruces (Pontevedra) e continuará o séu percorrido en Ourense, Burela, Ribeira, Melide, Ponteceso e Marín, para rematar na Coruña.
O director xeral de Xuventude e Voluntariado, Ovidio Rodeiro, e o delegado territorial da Xunta en Ourense, Rogelio Martínez, inauguraron hoxe este encontro baixo o título “Promoción e dinamización da acción voluntaria”
No Foro participan voluntarios e voluntarias, así como persoal técnico e responsables de concellos, entidades e centros educativos
Os seus principais obxectivos son poñer en valor a contribución das persoas voluntarias, difundir iniciativas innovadoras neste eido, e servir de punto de encontro entre todos os axentes do sector
Máis de 60 persoas participan hoxe no II Foro galego de solidariedade (FGS), que se celebra en Ourense. Esta iniciativa está organizada pola Consellería de Traballo e Benestar, a través da Dirección Xeral de Xuventude e Voluntariado, baixo o título “Promoción e dinamización da acción voluntaria”.
O director xeral desta área autonómica, Ovidio Rodeiro, e o delegado territorial da Xunta en Ourense, Rogelio Martínez, inauguraron hoxe este encontro, que pretende converterse nun espazo de interacción dos axentes de participación social e voluntariado en Galicia, ao tempo que estimula a reflexión, o debate, e a construción de conclusións compartidas sobre aspectos cruciais para o desenvolvemento da acción das entidades sociais e solidarias de Galicia.
Os FGS son unha iniciativa posta en marcha por primeira vez este ano, e o de Ourense é o segundo foro que se celebra, tras o que tivo lugar en Lugo. Estes encontros están preparados por grupos de traballo formados por persoas e entidades que coñecen en profundidade esta materia. Esta reflexión previa dos grupos de traballo será enriquecida posteriormente polo debate que se produza durante os foros.
Os destinatarios destes encontros son voluntarios e voluntarias; persoal técnico de entidades de acción voluntaria; responsables de programas de voluntariado de administración públicas; persoal do terceiro sector de Galicia e demais axentes de acción voluntaria en Galicia.
Os obxectivos dos FGS son, principalmente, dimensionar e poñer en valor ante a opinión pública a contribución das persoas voluntarias; difundir as iniciativas innovadoras do sector e das persoas voluntarias a favor dunha sociedade máis participativa e solidaria; ademais de servir de punto de encontro entre todos os axentes do sector.