En portada (1175)

A Campaña de verán que a Xunta de Galicia pon en marcha para o ano 2024 inclúe oportunidades de participación para as persoas mozas mediante un novo programa de actividades dirixido a mozos e mozas de entre 18 e 30 anos.

Este novo programa, que promove un ocio educativo, alternativo e saudable para a mocidade galega, conta con 200 prazas en cinco programas de actividades.

Desenvolverase en cinco instalacións de toda Galicia, en quendas de xoves a domingo, concretamente nos albergues xuvenís de Allariz, Cabana de Bergantiños e A Devesa (Ribadeo), así como no complexo Cemar de Mondariz-Balneario e no albergue montañas de Trevinca (A Veiga).

1ª Convocatoria: do 3 ao 10 de xuño.

Cada persoa solicitante só poderá enviar un formulario, no que elixirá ata un máximo de tres programas (identificados co seu código) por orde de preferencia.

As persoas con discapacidade deberán facer constar esta circunstancia no apartado que figura no formulario de solicitude, indicando a porcentaxe recoñecida e o tipo de discapacidade que, de ser o caso, presenta, co fin de planificar os apoios persoais necesarios, se os precisase.

As persoas ás que se lles adxudique unha praza deberán aboar un prezo de 74 euros.
Por ser titular do Carné xove ou membro de familia numerosa, acolledora ou monoparental aplicarase un desconto do 25% sobre o prezo. Os descontos citados en ningún caso serán acumulables. Deste xeito, os/as participantes con dereito a desconto aboarán 55,50 euros.

As prazas serán adxudicadas por rigorosa orde de recepción das solicitudes.

Presentación da solicitude: a apertura do formulario de solicitude será ás 9:00 horas do luns 3 de xuño.

Programa de actividades

Formulario de solicitude (no punto 5)

No marco do programa “A Xuventude no mundo” ao abeiro das relacións bilaterais que a Xunta de Galicia mantén con entidades doutros países, a Dirección Xeral de Xuventude, da Consellería de  Cultura, Lingua e Xuventude convoca un intercambio xuvenil á Prefectura de Wakayama (Xapón):

 País  Entidade de acollida  Nº prazas  Datas de realización
 XAPÓN(Wakayama)  Prefectura de Wakayama  15  1-6 setembro 2024

 

Obxectivos: facilitar o coñecemento doutras realidades socioculturais e lingüísticas para a comprensión da diversidade cultural e favorecer e potenciar a adquisición de habilidades e competencias non formais que faciliten o desenvolvemento persoal dos mozos e mozas.

Destinatarios: mozos e mozas galegos residentes en Galicia con idades comprendidas entre os 18 e 30 anos de idade no momento de realizarse o intercambio.

Non poderán participar no intercambio sinalado os mozos e mozas que participaran noutro intercambio ao mesmo país no marco do programa “A Xuventude no mundo” nas últimas tres edicións realizadas (2018, 2019 e 2023).

Prazo de inscrición: do 28 ao 31 de maio de 2024, ou ata esgotar as prazas. O formulario estará dispoñible desde as 10 horas do 28 de maio.

Inscrición: mediante envío de formulario electrónico dentro do prazo establecido.

Os erros nos datos facilitados na solicitude de participación ou a omisión dalgún deles pode ocasionar a desestimación da solicitude.

Admisión: será por rigorosa orde de inscrición, ata cubrir a totalidade de prazas convocadas para o intercambio. Os/as solicitantes seleccionados/as recibirán un correo electrónico de confirmación da praza. Unha vez finalizado o prazo de inscrición, de non recibir comunicación nos tres días seguintes, entenderase que non obtivo praza.

De producirse baixas despois de adxudicarse as prazas, ofertaránselle aos/as solicitantes da lista de agarda, tendo que presentar o billete e demais documentación nos 5 días hábiles seguintes da comunicación.

No caso de que o billete de transporte adquirido fose anulado posteriormente á súa remisión á Dirección Xeral de Xuventude, a praza para o intercambio será anulada e considerada non adxudicada.

Recibidos correctamente os documentos requiridos, aos seleccionados/as seralles facilitado, posteriormente, o nome do/a coordinador/a que acompañará ao grupo, así como o punto de encontro no  lugar de realización do intercambio.

Documentación a remitir: confirmada a praza, nos 5 días hábiles seguintes, as persoas seleccionadas deberán remitir a galeuropa@xunta.gal:

1. Unha copia do/s billete/s de transporte adquirido/s para desprazarse ata a cidade do país de realización do intercambio. Non é documento válido a/s reserva/s de voo ou medio de transporte elixido.

2. Copia do Documento Nacional de Identidade.

3. Unha copia do seguro de viaxe, de accidentes e de enfermidade.

4. Unha copia do pasaporte.

A non remisión destes documentos no prazo establecido supón a perda da praza no intercambio.

INTERCAMBIO XUVENIL Á PREFECTURA DE WAKAYAMA (XAPÓN)

Título: “O Camiño Kumano Kodo irmandado co Camiño de Santiago ”.

Datas de realización do intercambio: do 1 ao 6 de setembro de 2024.

Observacións:

- Recomendación de aeroporto máis preto para chegar ao lugar de destino do país de realización do intercambio: Aeroporto de Kansai.

- O 1 de setembro, ás 14:00 horas (hora xaponesa) todos os mozos e mozas participantes deberán estar no punto de encontro sinalado no aeroporto de Kansai - Wakayama.

- É obrigatorio participar no intercambio a totalidade dos días, é dicir, ata o 6 de setembro.

- A prefectura de Wakayama non pode garantir que se respecten as dietas e necesidades alimentarias especiais das persoas participantes.

Cobertura do intercambio:

- Aloxamento en réxime de pensión completa en cuarto de uso múltiple.

- Trasporte no ámbito do intercambio.

- Actividades organizadas pola entidade de acollida.

Será a cargo das persoas participantes:

- Os gastos de desprazamento ata o lugar de aloxamento do intercambio en Xapón.

- Os gastos do seguro de viaxe, de accidente e de enfermidade.

Actividades provisionais previstas: percorrido por un tramo do Camiño Kumano Kodo, visita a lugares tradicionais da cultura xaponesa, encontros con mozos e mozas xaponeses, audiencia con autoridades.

Reunión previa á saída: Os /as mozos/as seleccionados/as serán convocados a unha reunión preparatoria do intercambio previa ao seu inicio, no día e lugar que determine a Dirección Xeral de Xuventude. A asistencia será obrigatoria, agás causa de forza maior debidamente xustificada.

A data de realización desta reunión será comunicada por correo electrónico con antelación suficiente.

FORMULARIO DE INSCRICIÓN (Inscrición pechada. Prazas esgotadas)

MÁIS INFORMACIÓN:

981545702

galeuropa@xunta.gal

A directora xeral de Xuventude, Lara Meneses, acompañou a un grupo de mozos e mozas nunha visita ás instalacións da empresa TIC Imatia en Vigo, dentro das accións do programa Mentoring impulsado pola Xunta de Galicia co obxectivo de asesorar e formar a xuventude na súa transición á vida laboral tras rematar os estudos de grao ou Formación Profesional.

Na súa visita, Lara Meneses fixo fincapé na importancia que teñen estas visitas de coñecemento “de primeira man e por dentro” do funcionamento das estratexias dunha empresa, encadradas neste programa da Consellería de Cultura, Lingua e Xuventude. Precisamente, recordou que obxectivo do Xuventude Mentoring é preparar a mocidade para a súa inserción laboral ofrecéndolle habilidades e competencias para o emprego, “e deste xeito conseguir mellorar a empregabilidade da xuventude”, valorou. O programa vai xa pola súa quinta edición cunha participación, ata o momento, de 1.200 persoas mozas cun exitoso resultado de inserción laboral.

https://www.xuventudementoring.gal/

O Carné Xove únese a un dos seus establecementos asociados, a @optica_carreira, para sortear entre todos vós un par de lentes ben chulas da marca Mr. Boho para que presumades de outfit no seguinte concerto.​

Participar é ben sinxelo:
1. Darlle gústame á publicación do sorteo en Instagram
2. Seguir a @xuventudegalicia e @optica_carreira
3. Mencionar/etiquetar o perfil dunha amizade explicándolle para que empregas o #CarnéXove
4. Ter o Carné Xove

IMPORTANTE! Se mencionas/etiquetas o establecemento/marca no que usas o teu Carné Xove, tes dobre participación!

Podes participar ata as 12 pm do 29 de maio!​

Un mes máis traemos de volta o noso especial sorteo coa Federación de Libreiros de Galicia para que podas gozar dun vale de 50 € para mercar nas librarías asociadas da federación adheridas ao teu #CarnéXove

Para participar tes que:
1. Darlle gústame a esta publicación en Instagram
2. Seguir a @xuventudegalicia e a @LibrariasGal
3. Mencionar/etiquetar o perfil dunha amizade explicándolle que libro lle recomendas comprar co desconto do #CarnéXove.
IMPORTANTE! Se mencionas / etiquetas o establecemento / marca no que usas o Carné Xove tes dobre participación.
4. Ter o Carné Xove

Podes participar ata as 12 pm do 30 de maio!

Lara del Carmen Meneses Álvarez toma posesión cómo directora xeral de Xuventude, substituindo no cargo a Cristina Pichel Toimil, responsable desta área desde decembro 2018.

O xurado do concurso Lingua de namorar 2024 reuniuse o pasado 11 de abril para elixir as mensaxes gañadoras das categorías A e B, de entre aquelas mensaxes que resultaron máis votadas polo  público.

Son as seguintes:

 

MENSAXES GAÑADORAS DA CATEGORÍA A

 

Mensaxe gañadora do 1º premio da categoría A

Abril Viqueira Pose (Ordes, A Coruña)

Reflexos

Que son aos teus ollos?
Chispas de inverno
Folerpas de verán.
Que fun para ti?
Murmurios do vento
Silencio do mar.

 

Mensaxe gañadora do 2º premio da categoría A

Luna García Guimeráns (Baiona, Pontevedra)

Amor nos teus

Azul,
no ceo cheo de paxaros que voan sen rumbo.
Azul,
nas ondas revoltosas.
Azul,
nas orquídeas que brotan e tornan todo fermoso.
Azul,
nos teus ollos.
Onde podería perderme e bailarte con cada mirada.

 

Mensaxe gañadora do 3º premio da categoría A

Alejandro Alonso Lago (Vigo, Pontevedra)

Razón e emoción

Quizais, a maior traxedia de todas ocorre cando se cruza unha mente racional cunha alma emocional.
Cando penso en ti sinto que a miña alma quere romper as reixas da súa cela con ímpeto, ser libre e
amarte incondicionalmente. Porque eu no fondo sei que ti contradís a parte racional do meu ser.

 

MENSAXES GAÑADORAS DA CATEGORÍA B

 

Mensaxe gañadora do 1º premio da categoría B

Elvira Nercellas Rodríguez (Lalín, Pontevedra)

Auga do corazón

Abrente na pel
e verso libre nos teus beizos
sabor de lúa.

Somos melodía
nunha amálgama de corpos
cores núas.

Envoltos en sopro de vapor
fuximos pola fiestra coa mirada
ronsel na rúa.

Roxe o corazón ó vento
ceo sangue dourado
amor que múa.

O cosmos arredor de nós
nós sobre o cosmos
eu beira túa.

 

Mensaxe gañadora do 2º premio da categoría B

Andrea López Otero (Pantón, Lugo)

B612 só ida

Esta vez,
coma unha molécula de gas eclosionando efímera
no medio do marabilloso e extraordinario caos
asimétricos e imperfectos
voamos en segredo
ata Plutón
para ser eternos
nesa nova forma natural e metafísica
que un día
cando aínda non existían os días
se nos concedeu,
            entre o morrer e o renacer do máis alá,
amarnos para sempre.

 

Mensaxe gañadora do 3º premio da categoría B

Clara Pérez Martínez (A Bola, Ourense)

A tonalidade dos vínculos

Hai persoas que transcorren
gravando pegadas cromáticas
no apego.

Base marela acastañada
impregnada coas túas habilidades
ao óleo.
Dun trazo delicado
suave
coma un suspiro,
o brillo ambarino
dese sorriso impresionista
xa penetrara
as miñas carnes de boceto.
A pel agarda
entre loción e cóxega de pincel
que tornes tatuarme as ansias.

 

MENSAXE GAÑADORA DA CATEGORÍA C

 

O xurado de Lingua de namorar 2024 preseleccionou, na súa xuntanza do 11 de abril, seis mensaxes participantes na categoría C do concurso, mensaxes que pasaron á fase de votación pública en IG, da que resultou gañadora ao recibir o maior número de "gústame" a seguinte:

 

Blanca Domínguez Groba (Ponteareas, Pontevedra)

@blanguez_27

#amiñaterra

E foi aí, nese preciso lugar, onde comprendín que me estaba a namorar. Por primeira vez vin esa beleza da que nunca antes me percatara, e apreciei de verdade o que me rodeba. #LinguaDeNamorar.

 

O obxectivo principal de Lingua de namorar, organizado pola Dirección Xeral de Xuventude, Participación e Voluntariado e pola Secretaría Xeral de Política Lingüística, é dinamizar o uso da lingua galega entre a mocidade nas súas relacións persoais e nas novas tecnoloxías, nomeadamente en internet e na mensaxería instantánea.

A Consellería de Cultura, Lingua e Xuventude pon en marcha unha nova edición do programa ‘Día da Xuventude’, que achegará á mocidade diversas actividades formativas e de ocio saudable e alternativo por un total de 30 concellos de toda Galicia.

Tras o éxito de 2023, no que participaron máis de 4.300 mozos e mozas neste programa, apóstase de novo por ofrecer unha ampla programación formativa e de ocio destinada tanto á mocidade galega como ás propias familias, dado que esta iniciativa tamén favorece a conciliación da vida familiar e laboral. Este programa da Xunta de Galicia, que conta co financiamento do Ministerio de Igualdade en desenvolvemento do Plan Corresponsables, arrancará a fin de semana do 26 e 27 de abril e rematará na primeira semana de xullo.

As actividades son diversas e buscan a participación activa da mocidade de cada concello.

Deste xeito ofreceranse obradoiros de:

  • Gastronomía saudable
  • Habilidades para a empregabilidade
  • Sensibilización medioambiental
  • Igualdade de xénero
  • Arte urbana
  • Actividades de lecer educativo como fútbol burbulla, futbolín humano, tiro con arco, lego e escape box.
  • E actuación actuación musical dalgún artista local ao finalizar a xornada.

As datas que xa están confirmadas son as seguintes:

Abril

RIBADAVIA: venres, 26 de abril, de 16 a 21 horas, na Picuxa. Actuacións de Abelo Valis Dj Set e de Nerea e Leonel.
A ESTRADA: sábado, 27 de abril, de 16 a 21 horas, na Praza do Concello. Actuación de Supermirafiori.

Maio

OIA: mércores, 1 de maio, de 16 a 21 horas, no patio exterior do CEIP Manuel Mestre García.
SANXENXO: sábado, 4 de maio, de 16 a 21 horas, no Pavillón Colexio Abrente. Actuación de Brko e Erre.
PORTO DO SON: venres, 10 de maio, de 16 a 21 horas, na Avenida de Galicia (explanada portuaria). Actuación de Flow del Norte.
CASTRO DE REI: sábado, 11 de maio, de 16 a 21 horas, na Praza Maior (en caso de choiva, no Pavillón Colexio Ramón Falcón). Actuación de Valuros.
MOS: xoves, 16 de maio, de 16 a 21 horas, no Pavillón Óscar Pereiro. Actuacións de Moszaristas e dos dúos de cámara Anxo e Lucía e Anxo e Roi.
CULLEREDO: sábado, 18 de maio, de 16 a 21 horas, no Polideportivo Ría do Burgo. Actuación da charanga Santa Compaña.
ARTEIXO: venres, 24 de maio, de 16 a 21 horas, no espazo exterior do Pazo de Deportes. Actuación de Davinchi.
VIVEIRO: sábado, 25 de maio, de 16 a 21 horas, nos xardíns Noriega Varela. Actuación de XMaseda65.
CHANTADA: venres, 31 de maio, de 16 a 21 horas, na praza do Polideportivo. Actuación do cuarteto de saxofóns Albeiro Ardoa.

Xuño

CANGAS: sábado, 1 de xuño, de 16 a 21 horas, na Praza da Constitución. Actuación de Secuaces de Orfeo.
RIBADEO: domingo, 2 de xuño, de 16 a 21 horas, no Parque San Francisco. Actuación de Festra.
TEO: venres, 7 de xuño.
O PEREIRO DE AGUIAR: sábado, 8 de xuño.
A LARACHA: venres, 14 de xuño.
PONTEAREAS: sábado, 15 de xuño.
A GUARDA: domingo, 16 de xuño.
CERDEDO-COTOBADE: venres, 21 de xuño.
TOMIÑO: sábado, 22 de xuño.
ORTIGUEIRA: martes, 25 de xuño.
SAN CIBRAO DAS VIÑAS: mércores, 26 de xuño.
GONDOMAR: xoves, 27 de xuño.
XINZO DE LIMIA: venres, 28 de xuño.

Xullo

VEDRA: martes, día 2 de xullo.
POIO: mércores, día 3 de xullo.
BAÑOS DE MOLGAS: xoves, día 4 de xullo.
CASTROVERDE: venres, 5 de xullo.
BAIONA: sábado, 6 de xullo.

Folleto informativo

- O Conselleiro de Cultura, Lingua e Xuventude visita os mozos e mozas participantes en Correspondentes Xuvenís que esta fin de semana participan nun encontro formativo no albergue xuvenil Marina EspañolaBENCONTRO1

- Lembra que a mocidade é unha prioridade para o Goberno galego, e por iso se continuará traballando desde a transversalidade, abrindo novas oportunidades

O conselleiro de Cultura, Lingua e Xuventude, José López, visitou ao centenar de mozos e mozas participantes no encontro autonómico de correspondentes xuvenís, un programa que busca xerar unha canle de comunicación directa coa mocidade e favorecer a transmisión de información de interese á xuventude.

Durante este encontro no albergue xuvenil Marina Española, que se celebra no marco do Día europeo da información xuvenil, destacou a “implicación, iniciativa e ilusión” dos participantes, que ao longo da fin de semana ampliarán a súa formación e desenvolverán ideas de proxectos no ámbito do ocio xuvenil a través dun hackatón.

Neste sentido, o conselleiro prometeu estar moi atento aos resultados por se a algunha destas ideas se lle pode dar forma de programa desde a Xunta de Galicia, e avanzou que esta nova Consellería reforzará a comunicación e o contacto coa mocidade a través de novas liñas de actuación.

Programas coma este, no que participan case 800 mozos e mozas de centros educativos de toda Galicia, axudan a desenvolver coñecementos e habilidades desde a educación non formal como o traballo en equipo, a oratoria, a creatividade ou a iniciativa. “Desde o Goberno galego apostamos por proxectos que incentiven a participación da mocidade e que lles abran camiño no seu futuro laboral, por iso traballaremos desde a óptica de transversalidade e de apertura de novas oportunidades para a xuventude”, remarcou.

Máis de 7.000 mozos beneficiados

O programa Correspondentes Xuvenís, que forma parte do Plan Proxecta, converte o alumnado en receptor e transmisor de información no seu centro educativo. A información de relevancia para este alumnado é enviada desde o departamento de Xuventude da Xunta de Galicia e son os propios mozos e mozas de cada centro os encargados de difundila entre os demais compañeiros.

Esta iniciativa, que tamén existe noutras comunidades autónomas, púxose en marcha en Galicia no curso 2013/2014 e non parou de medrar co paso dos cursos. Así mesmo, no ano 2019 ampliouse este programa ao alumnado das universidades galegas, que se denominan Correspondentes Universitarios. Os datos de correspondentes ascenden a máis de 7.000 mozos e mozas implicados desde o comezo das iniciativas.

- A Xunta abre o prazo para solicitar os campamentos e campos de voluntariado deste verán 2024

- A campaña de verán deste ano conta con máis de 11.500 prazas, 300 máis que na pasada edición, cando xa se bateran todos os records

- O prazo dos campamentos permanecerá aberto ata o vindeiro 30 de abril e as solicitudes deberanse facer mediante a sede electrónica da Xunta

- Tamén se pode solicitar praza nos campamentos específicos destinados a persoas con discapacidade e cuxa oferta se poderá consultar na páxina web de Política Social

- Entre as novidades deste ano atópanse catro novos campamentos en Boiro, no Monte do Gozo (Santiago), Becerreá e Allariz

O Diario Oficial de Galicia publicou a orde de convocatoria dos campamentos de verán deste 2024. Ata o vindeiro 30 de abril, as familias poderán solicitar praza nunha das instalacións ofertadas pola Xunta de Galicia para este ano. A campaña de verán do Goberno galego contará con máis de 11.500 prazas, 300 máis que o pasado ano, batendo así con todos os récords.

Entre as novidades desta edición destacan catro novos campamentos: en Boiro, de índole artístico; no Monte do Gozo (Santiago), que terá como temática a música; no Centro de Formación e Experimentación Agroforestal de Becerreá; e tamén un novo campamento en Allariz, no Centro de Formación Valverde. Inclúe tamén unha convocatoria específica para persoas con discapacidade que volverá a contar con 250 prazas e que se poderá solicitar a través da páxina web de Política Social.

Con respecto aos campos de voluntariado, poderanse solicitar ata o 30 de abril en primeira convocatoria, a través da páxina web de Xuventude. Crearanse seis novos: cinco de carácter nacional: Aranga (A Coruña), Samos (Lugo), Ribadavia (Ourense), Poio (Pontevedra) e en Ponteareas (Pontevedra); e outro de carácter internacional, na Merca (Ourense). Tamén se repetirá o campo de voluntariado específico para persoas galegas no exterior no Castro de Viladonga (Castro de Rei), en colaboración coa Secretaría Xeral da Emigración e Patrimonio Cultura.

Cesión de instalacións xuvenís a entidades e grupos de mozos

Así mesmo, as entidades que desenvolven actividades para a xuventude e os grupos de persoas mozas non asociadas tamén poden solicitar a utilización das instalacións xuvenís das que é titular a Dirección xeral de Xuventude, Participación e Voluntariado co obxecto de que poidan desenvolver programas de lecer educativo e tempo libre, sen ánimo de lucro, dentro da programación da campaña de verán 2024. As solicitudes presentaranse por sede electrónica.

Novo programa de ocio alternativo

Ademais, impulsarase un novo programa de ocio alternativo, dirixido a mozos de entre 18 e 30 anos en cinco instalacións de toda Galicia de xoves a domingo. Terá lugar nos albergues xuvenís de Allariz, Cabana de Bergantiños e A Devesa (Ribadeo), así como no complexo Cemar de Mondariz e no albergue montañas de Trevinca (A Veiga).

Minicampamentos

Esta oferta compleméntase cos minicampamentos ‘Coñece Galicia’ cuxa oferta se dará a coñecer máis adiante; e cos intercambios con outras comunidades autónomas. Neste respecto, á oferta tradicional sumaranse novos campamentos en Estremadura e en Castela a Mancha, con temática teatral e que terá lugar no albergue de San Servando, en Toledo.

Campamentos específicos para mozos e mozas con discapacidade

Toda a información sobre a Campaña de Verán, no seguinte enlace: http://xuventude.xunta.es/accion-de-veran