En portada (1103)

A Dirección Xeral de Xuventude, Participación e Voluntariado da Consellería de Política Social pon en marcha unha nova edición do proxecto “EMPRURAL: emprendemento xuvenil no rural” co obxecto de facilitar aos mozos e mozas a súa orientación profesional e futura inserción sociolaboral en comarcas locais, ofrecéndolle apoio e acompañamento profesionalizado no proceso de elaboración e materialización dos seus proxectos en tres eidos: profesional (emprego/empresa), persoal (motivación, habilidades sociais) e social (cooperación, voluntariado, reciprocidade).

No medio rural tamén se erixen hoxe novas oportunidades e recursos susceptibles de seren valorizados, tanto para a creación de novas empresas coma para empregos que aporten valor engadido ás xa existentes. Para isto, é preciso por a disposición da xente moza mecanismos que lles axuden a descubrir estas oportunidades, impulsando os seus proxectos de inserción sociolaboral e converter deste xeito á xuventude no maior activo para o desenvolvemento local.

Obxectivos:
1. Axudar aos mozos/as a coñecer e valorizar máis e mellor o territorio rural e descubrir as oportunidades que este lles ofrece no eido profesional e social.
2. Impulsar a aprendizaxe pola práctica, aplicando a metodoloxía da alternancia e a colaboración co tecido empresarial.
3. Prestar apoio e seguimento individualizado e/ou grupal aos proxectos de emprego/ empresa ou de carácter social xerados, garantindo a súa consolidación no territorio.
4. Fomentar a introdución da innovación no marco dos itinerarios de inserción sociolaboral, baseada fundamentalmente na aplicación das TIC na xestión empresarial, comercial e social.
5. Promover a autonomía e o empoderamento da xuventude no rural, como actores sociais dos seus territorios para favorecer a súa promoción persoal e social, así coma a súa incorporación a redes de partenariado no territorio.

Destinatarios/as:
mozos e mozas de territorios rurais con idades comprendidas entre os 16 e 30 anos en fase de finalización de estudos, desempregados ou en situación de abandono escolar.
Número de prazas: 50.
Duración: de abril a novembro de 2019.
Prazo de inscrición: do 24 de abril ao 8 de maio de 2019.

Inscricións:  mediante o envío do formulario electrónico que figura ao final desta convocatoria.

Admisión:  será por rigoroso orde de inscrición, ata cubrir a totalidade de prazas convocadas. Os/as seleccionados/as recibirán un correo electrónico de confirmación de praza, con indicación do día e lugar de inicio da fase de formación.

Se no prazo dos cinco días seguintes á finalización do prazo de inscrición, os/as solicitantes non recibiron correo de confirmación, se entende que non obtiveron praza.

Actividades:

1. Safari de emprego no territorios.
Duración: 3 meses (maio-xullo 2019). 12 sesións.
Sesións de 1 día a semana (3/4 h), onde se analizarán casos prácticos de éxito,  traballarase iniciativas emprendedoras, participarán  emprendedores presentando as súas experiencias, profesionais dos sectores de interese, realizaranse visitas técnicas a empresas de referencia.
Esta actividade constará de 2 partes :
Sesións teóricas de traballo co grupo nos centros de impartición da actividade: Espazos Xove de Lalín e Carballo, podendo adaptarse segundo a procedencia dos participantes
Sesións prácticas grupais e individuais : saídas ao territorio, visitas, dinámicas grupais.
Fases do Safari:    
- Exploración (8 sesións):  sesións de traballo en grupo, para elaborar un guión/base de traballo analizando as potencialidades, recursos e necesidades do territorio.  Nesta fase, os participantes, acompañados polos técnicos responsables, definirán as rutas a explorar e analizarán os sectores máis proclives a crear emprego na zona de incidencia.
- Descubrimento (4 sesións): sesións de traballo de campo, guiadas polo persoal técnico,  para realizar as accións / tarefas de exploración das rutas definidas na fase anterior:
- Entrevistas a profesionais, emprendedores, axentes do territorio.
- Investigación de mercado, análise dos recursos da contorna.
- Exploración do sector de interese para cada participante (situación actual, empresas existentes, necesidades, ...)

2. Formación para a inserción – grupo
Duración: 2 meses (maio-xuño 2019) – adaptada ás necesidades dos participantes (ata un máximo de 24 sesións).
Trátase de formación básica adaptada ás necesidades do grupo, en eidos nos que se amosen certas necesidades, como poden ser a comunicación, innovación, TIC, normativa, etc,  que son hoxe fundamentais para a  inserción laboral.
Poderá estar organizada en sesións máis continuas, dúas ou tres veces por semana,  para favorecer a adquisición de coñecementos polos participantes (farase en función da demanda ata un máximo de 24 sesións).  
As sesións, impartidas por profesionais/docentes expertos, basearanse na metodoloxía do “learning by doing”, aprendizaxe pola práctica, nas cales, os participantes poderán participar activamente no desenvolvemento das mesmas ( supostos prácticos, dinámicas,..).
Inclúe:
- Formación básica sobre a xestión da actividade comercial e empresarial.
- Formación específica, á demanda dos participantes: loxística, comunicación, xestión empresarial,  busca activa de emprego...

3. Formación na empresa – individual:
Sesións de estadías profesionais en empresas do sector de interese de cada participante, fomentando a aprendizaxe pola práctica e o contacto continuo coa realidade empresarial. Poderán participar aqueles mozos/as que a demanden ou precisen.
Poderanse realizar estadías dentro do período de tempo comprendido entre os meses de maio a outubro de 2019.
Duración das estadías:
Mínimo : 60 h de prácticas.
Máximo  360 h de prácticas.
A xornada de prácticas terá unha duración máxima de 7 horas.
Os participantes contarán cun seguro de R.C. e de accidentes.
As estadías de formación nas empresas serán organizadas en función dos criterios establecidos para cada un dos participantes e segundo as necesidades das empresas de cara a posibles contratacións . Para levar a cabo as estadías, asinaranse convenios cas empresas de acollida nos que se reflecta a duración,  as actividades que realizará o mozo/a, os horarios e se establecerá unha persoa responsable da empresa para o seu seguimento e avaliación .

4. Titorización e seguimento individual
Comezarán  a partir do mes de maio de 2019 e desenvolveranse durante toda a execución do proxecto (novembro) , ao longo das diferentes fases terán lugar reunións do equipo técnico con cada participante para o seguimento do seu itinerario de inserción e a  articulación de medidas adaptadas a cada caso.

5. Captura de proxectos
Duración: 1 mes – último mes do proxecto (novembro 2019)
Trátase da  fase de conclusións, os mozos e mozas terán de xeito individual:
Acadada experiencia laboral nos sectores de interese.
Identificados  nichos de emprego no territorio.
Elaborado un plan de mellora da súa empregabilidade.
Definidas  as  oportunidades/proxectos para emprender.
Identificadas  as necesidades de formación que precisen.

Máis información:  roteiros.ctb@xunta.gal

FORMULARIO DE INSCRICIÓN

A Dirección Xeral de Xuventude, Participación e Voluntariado, oferta a programación de actividades da Campaña de Verán 2019

Servizos ofertados:
a) Un programa de actividades de carácter sociocultural, recreativo, formativo e convivencial, que posibilite a participación do/a mozo/a.
b) Aloxamento en albergue xuvenil, residencia xuvenil ou campamento xuvenil.
c) Manutención en réxime de pensión completa.
d) O material necesario para a actividade.
e) Un equipo técnico de persoal especializado en animación sociocultural e actividades de tempo libre e actividades náuticas, de ser o caso. Así mesmo, e para o caso das persoas con necesidades especiais que por razón da súa discapacidade precisen apoio, disporase de persoal que conte con formación e experiencia para atender as súas necesidades.
f) Atención sanitaria de primeiros auxilios e seguro de accidentes.
g) Nas actividades desenvolvidas noutras comunidades autónomas inclúese o transporte desde Santiago de Compostela, ou lugar que se sinale como punto de saída, ata o lugar de destino, así como o retorno ata Santiago de Compostela.

A incorporación terá lugar o día de inicio da quenda correspondente entre as 11.00 e as 12.30 horas. A recollida terá lugar o último día da quenda entre as 16.00 e as 18.00 horas..
Cando a incorporación aos campamentos e albergues teña lugar fóra de Galicia, será por conta da persoa interesada o traslado desde o seu domicilio ata Santiago de Compostela, ou o lugar que se sinale como punto de saída, tanto o día de ida para a actividade como o día de chegada.

Poden solicitar a súa participación nas actividades ofertadas nesta convocatoria as persoas mozas galegas residentes en Galicia.

Idades:
a) As persoas nacidas no ano 2001 non poderán cumprir 18 anos antes da finalización do campamento.
b) As persoas nacidas no ano 2010 deberán ter cumpridos 9 anos ao inicio do campamento.

Ningún/ningunha participante poderá ser admitido/a en máis dun campamento por ano.

Discapacidades:
As persoas que teñan unha discapacidade igual ou superior ao 33 % poderán participar nesta convocatoria cumprindo os seguintes requisitos:
a) Facer constar a súa condición no seu impreso de solicitude, co fin de planificar os apoios persoais necesarios, se os precisar.
b) Que no certificado de recoñecemento de discapacidade non se recolla a necesidade de axuda de terceira persoa.
c) Ter capacidade de integración nun grupo e que as súas limitacións e/ou necesidades especiais lles permitan participar e beneficiarse das actividades que se van desenvolver no destino que soliciten.

Adxudicación das prazas
a) Por adxudicación directa, no caso de que a demanda non supere o número de prazas dispoñibles.
b) Por sorteo, por medios informáticos, no suposto de que o número de solicitudes supere o número de prazas dispoñibles.

Solicitudes:
As solicitudes poden tramitarse en https://sede.xunta.es cos seguintes códigos:
Solicitude individual: procedemento BS303A.
Solicitude múltiple: procedemento BS303F.
Prazas reservadas para inclusión de persoas con discapacidade:
procedemento BS303G para solicitude individual
procedemento BS303H no caso de solicitude múltiple.

Campamentos e quendas:  http://xuventude.xunta.es/images/accion_de_veran/2019/anexos/gal_2019-ANEXO_IA.pdf

Prezo:
Os membros de familia que teñan o título de numerosa terán un desconto do 50%
As persoas usuarias do Carné xove gozarán dun desconto do 25%

Prazo:
O prazo de presentación de solicitudes estará aberto ato o 7 de maio de 2019
Máis información no DOG do 22 de abril de 2018 e en http://xuventude.xunta.es/accion-de-veran

A Dirección Xeral de Xuventude, Participación e Voluntariado convoca a oferta de uso das súas instalacións xuvenís para a campaña de verán do ano 2019.

O uso das instalacións ofertadas suporá dispoñer:
- Dos servizos de auga, gas, electricidade e alimentación en réxime de pensión completa.
- Do material (excepto o correspondente ás actividades específicas) que, no caso dos campamentos, comprende tamén as tendas de campaña, colchóns e mantas.
- Xerencia e persoal de servizo.

Poderán solicitar o uso das instalacións:
1. As asociacións xuvenís, as entidades prestadoras de servizos á mocidade e as escolas de tempo libre, debidamente constituídas e legalizadas.
2. Os consellos locais e municipais de xuventude.
3. Corporacións locais.
4. Outras entidades públicas ou privadas que realicen actividades coa xuventude.
5. Grupos de mozos e mozas non asociados/as que organicen actividades de tempo libre sen ánimo de lucro e, en todo caso, para efectos de realización dun programa de actividades para un mínimo de 15 persoas.

Aqueles grupos que figuren inscritos no rexistro da Consellería de Política Social como entidades prestadoras de servizos sociais, gozarán dun desconto do 50 % sobre os prezos sinalados.

Os prezos das instalacións están publicados no DOG do 8 de abril de 2016.

Prazas:

2019ofertaconcertada


Solicitudes:
a) Solicitudes presentadas por entidades locais, outras entidades, asociacións e escolas de tempo libre: presentaranse obrigatoriamente por medios electrónicos.
b) Solicitudes presentadas por grupos de persoas mozas non asociadas: As solicitudes deberán presentarse preferiblemente por vía electrónica

As solicitudes están dispoñibles en https://sede.xunta.es co procedemento BS304A.
O prazo de presentación de solicitudes estará aberto ata o día 7 de maio de 2019.
Máis información no DOG do 22 de abril de 2019 e no correo ofertaconcertada.benestar@xunta.es

http://xuventude.xunta.es/accion-de-veran/oferta-concertada-accion-de-veran

O 17 de abril toda Europa celebra o Día Europeo da Información Xuvenil, unha xornada que reivindica a importancia de acompañar aos mozos e mozas no seu camiño cara á emancipación e o seu pleno desenvolvemento como cidadáns.

Para o Injuve e a rede española de Servizos de Información Xuvenil esta é unha data especialmente relevante. Ofrécenos a oportunidade de reforzar os nosos lazos, compartir información e dar a coñecer nosas diferentes iniciativas: concursos, talleres, charlas sobre temas de interese, actividades de lecer e tempo libre, etc.

Desde Injuve prepararon un póster para conmemorar o Día Europeo da Información Xuvenil 2019 e para animar á mocidade para visitar os centros da rede.

Acción "A Información Xuvenil cos Obxectivos de Desenvolvemento Sustentable"

Este é a mensaxe principal da celebración este ano do Día Europeo da Información Xuvenil.

O 25 de setembro de 2015, os líderes mundiais adoptaron un conxunto de obxectivos globais para erradicar a pobreza, protexer o planeta e asegurar a prosperidade para todos como parte dunha nova axenda de desenvolvemento sustentable. Cada obxectivo ten metas específicas que deben alcanzarse ata 2030. Para alcanzar estas metas, todo o mundo ten que facer o seu parte: goberno, sector privado, sociedade civil… Os Servizos de Información Xuvenil podemos dicir aos e as mozas como poden incorporar estes obxectivos no seu día a día.

E para empezar propoñénvos esta acción:
- Descárgate as creatividades que preparamos.
- Imprímeas a cor.
- Elixe o obxectivo co que creas que podes colaborar máis ou co que esteas disposto a realizar accións sinxelas para conseguir a súa consecución.
- Faite un selfie sostendo o folio coa imaxe do obxectivo elixido, para que se vexa ben. Lembra que sorrir é gratis e bo para a saúde.
- Sobe a foto a redes sociais co hashtag #redsijODS para que todos vexan o teu compromiso. Etiqueta a un amigo(s) para que se some á iniciativa.

Entre todos queremos contaxiar ao mundo enteiro para que estas metas fáganse realidade!

Creatividades ODS:  http://www.injuve.es/sites/default/files/2019/12/noticias/17_ods.pdf

CARTA EUROPEA DE INFORMACIÓN XUVENIL

ODS

  ROSALIABETANZOS2VIVEIRO 5VIVEIRO 7VIVEIRO 8VIVEIRO 12VIVEIRO 13VIVEIRO 19

CCOORDINADOR.1CCOORDINADOR.5CCOORDINADOR.4

TUIERYICA VIVEIRO 16

A directora xeral de Xuventude, Participación e Voluntariado, Cristina Pichel, participou xunto con máis de 120 correspondentes xuvenís de distintas comunidades autónomas, nun encontro sobre alberguismo en Gandarío.

A esta primeira iniciativa asistiron mozas e mozos de Galicia, Canarias, Castela-León, Madrid, Murcia e Navarra

Trátase de mellorar a súa capacitación como transmisores de información a outros mozos e promover o alberguismo entre a xente nova

encuentrogandarioestatal2

A directora xeral de Xuventude, Participación e Voluntariado, Cristina Pichel, asistiu ao primeiro encontro de correspondentes e alberguismo xuvenil das diferentes comunidades autónomas, que ata o domingo tivo lugar no albergue de Gandarío. Máis de 120 mozas e mozos procedentes de Galicia, Canarias, Castela-León, Madrid, Murcia e Navarra déronse cita nesta xuntanza organizada pola Rede Española de Encontros Xuvenís (REAJ), en colaboración coa dita Dirección Xeral, e na que se mesturaron aspectos educativos e lúdicos.

Cristina Pichel destacou a importancia destas xornadas para mellorar a capacitación dos participantes como transmisores de información a outras persoas mozas no que respecta aos albergues xuvenís e as súas posibilidades. Trátase, ademais, de promover o alberguismo entre a xuventude de distintas comunidades autónomas, a aprendizaxe mutua e o intercambio de experiencias.

Os participantes neste encontro son, na súa maioría, estudantes de 2º, 3º, 4º de ESO, e 1º de Bacharelato. Cada un deles expuxo como funcionan os correspondentes xuvenís nas súas comunidades de procedencia e como ven eles o alberguismo.

As persoas que asistiron a este encontro foron seleccionadas despois de presentar un vídeo, cunha duración mínima dun minuto e máxima de tres, no que amosaban os atractivos da súa comunidade autónoma e lugares ou puntos de interese, enfocando o proxecto cara a mobilidade xuvenil en Galicia a través dos albergues xuvenís da REAJ existentes como opción de aloxamento

A Dirección Xeral de Xuventude e a Secretaría Xeral de Emigración convocan para o ano 2019 o programa de axudas para a participación no programa Aventúrate con Galicia, dirixido a mozos e mozas de orixe galega ou descendentes de persoas emigrantes galegas e que residan no exterior.
Aventúrate con Galicia ten por finalidade facilitar á mocidade da Galicia exterior o contacto coa realidade galega e o encontro cos seus familiares.

Requisitos:
a) Ter a súa residencia habitual fóra de Galicia.
b) Ter nacido en Galicia ou seren descendente de persoa emigrante galega.
c) As persoas participantes deberán ter, o 30 de xullo de 2019, unha idade comprendida entre os 15 e os 17 anos.

Lugar de realización:
1. Actividades no mar-Gandarío: convócanse 20 prazas, que se realizarán no Albergue Xuvenil de Gandarío (Bergondo).
2. Actividades de natureza, ambiente e mar: convócanse 20 prazas que se realizarán no Albergue Xuvenil de Area (Viveiro).
3. Actividades de aventura T: convócanse 10 prazas que se realizarán no Campamento Xuvenil de Chacotes (Palas de Rei).

Datas:
As datas de realización destas actividades serán as comprendidas entre os días 19 e 28 de xullo de 2019.

Estas actividades van dirixidas a mozos e mozas residentes fóra de Galicia con idades comprendidas entre os 15 e os 17 anos que serán realizadas xunto con mozos e mozas residentes en Galicia participantes da campaña de verán que convoca a Dirección Xeral de Xuventude, Participación e Voluntariado da Consellería de Política Social.

Cada unha das persoas beneficiarias farase cargo da organización e pagamento dos custos da súa viaxe de ida e de volta aos seus lugares de residencia.
A Secretaría Xeral da Emigración farase cargo do seguro de estadía en Galicia, así como do desprazamento das persoas beneficiarias das actividades desde os aeroportos, estacións de tren ou de autobuses de chegada a Galicia ata a instalación que lles sexa asignada. Así mesmo, encargarase dos desprazamentos terrestres desde a instalación asignada ata os aeroportos, estacións de tren ou de autobuses de saída en Galicia de todas as persoas participantes que realicen o retorno ao seu lugar ou país de orixe o día que remate a actividade do campamento.

As solicitudes poden tramitarse en https://sede.xunta.es co procedemento PR930B
O prazo para presentar solicitudes estará aberto ata o 6 de maio de 2019

Máis información no DOG do 4 de abril de 2019 e en http://emigracion.xunta.gal/

A Consellería de Política Social da Xunta de Galicia oferta 185 prazas de campamentos de verán para persoas con discapacidade.

Os campamentos de verán duran 10 días.

Datas e lugares:

2019DISCAPACIDADEcadro

Que necesitas para participar nos campamentos de verán para persoas con discapacidade?
- Ter un certificado de discapacidade de grao 33% ou máis.
- Ter 11 anos ou máis.
- Non pasar dos 40 anos.
- Estar empadroado nun Concello de Galicia.
- Seguir as normas de convivencia do campamento.
- Poder comunicarte coas persoas no campamento.
- Poder participar nas actividades do campamento.
- Ter unha mobilidade axeitada para poder desplazarte polo lugar solicitado.
- Non podes ter unha enfermidade que se poida transmitir por contaxio.

Cando debes solicitar os campamentos de verán para persoas con discapacidade? Podes presentar a solicitude ata o día 3 de maio de 2019.

Para solicitar os campamentos tes que entregar os seguintes documentos:
- Ficha de solicitude.
- Informe médico
- Se a túa familia é unha familia numerosa podes entregar a fotocopia do Certificado de Familia Numerosa.
- Se tes carné xove podes entregar a fotocopia do carné xove.

A Ficha de solicitude e o Informe médico están na páxina web da Consellería de Política Social.

Para máis información: autonomiapersoal.sxps@xunta.gal
Teléfonos:
981 54 74 37
981 54 67 37
981 54 46 40

Podes pedir información xeral sobre os campamentos no teléfono social: 900 333 666. Este teléfono é gratis.

https://politicasocial.xunta.gal/gl/recursos/plans-e-programas/campamentos-de-veran-especificos-para-persoas-con-discapacidade-2019

Que podes estudar o próximo curso? Onde te podes aloxar? Que axudas tes para estudar?

Poñemos a túa disposición información sobre  Estudos dispoñibles en Galicia, aloxamentos e bolsas

O xurado do concurso Lingua de namorar 2019 reuniuse o luns 18 de marzo para elixir, de entre as mensaxes votadas polos usuarios en cada unha das categorías, as mensaxes gañadoras desta edición, que son as seguintes:

Mensaxes gañadoras da categoría A

1º Premio: Máis que choiva, de Nee Barros Fernández
“Comezaches sendo froallo suave, babuña e patiñeira; pero pouco a pouco fuches pasando a chuvascada, arroiada e xistra, rematando nunha auténtica treboada, enxurrada e dioivo. Empapáchesme de pés a cabeza e eu, entre tanto sinónimo, só sei pedirche que non escampes nunca.”

2º premio: Conto contigo, de Irea Cendán Cadahía
“Se teño frío, conto co teu calor; se a tristeza me aborda, conto co teu sorriso; se non me atopo na escuridade, conto coa túa luz. Non teño medo porque sei que se me sinto soa, conto contigo.”

3º premio: Tan guapa, de Yago Rubio Álvarez
“Tan doce que os mosquitos van a ti,
Tan bonita que es fotografada por excursións de xaponeses,
E a túa lingua é o mellor motivo para aprender idiomas.”


Mensaxes gañadoras da categoría B

1º premio: Este, para min, de Navia Rivas de Castro
“Erguerei do chan o meu corpo atropelado pola vida,
aloumiñarei as súas costuras,
coidarei as súas raíces.
Tecerei a miña liberdade en cada novo paso.
e non me renderei,
Querereime. Sempre.”

2º premio: Amor diglósico, de Darío Rodríguez González
“Non se pode vivir así, non é lóxico
O amor bilingüe, o amor diglósico,
É un sinvivir, é un despropósito
E ás veces resulta mesmo un pouco tóxico,
Falar por boca de ganso, falar con lingua de trapo,
Case vai ser millor amar en castrapo.”

3º premio: A discusión: corazón vs. Cabeza, de Cándido Paniagua Pousa
“O corazón dixo: eu non atendo a razoamentos, tan só a impulsos.
A cabeza replicou: eu analizo a situación e busco a mellor opción.
O corazón retrucou: mentres ti perdes o tempo argüíndo, eu latexo desfrutando o momento.
E a cabeza calou, buscando unha boa resposta.
Nese intre, o corazón sorriu, sabedor de que gañara a discusión.”

O xurado do certame decidiu conceder unha mención de honra, pola reflexión sociolingüística de superar a posición como neofalante, de vencer os complexos e decidir empregar a lingua, á mensaxe Escoiteite, de María Inmaculada Rodríguez Marqués (Ribadeo, Lugo):

“Vinte,
escoiteite.
Olleite,
escoiteite.
Sentinte,
escoiteite.
Emocioneime,
escoiteite.
Abrín a boca para falar,
Silencio neofalante.
Atragoáronse as verbas na miña gorxa,
escoiteite.
Pronunciei “quérote” mentres os complexos se esvaecían entre
os meus beizos.
Escoiteite.”

O obxectivo principal de Lingua de namorar, organizado pola Dirección Xeral de Xuventude, Participación e Voluntariado e pola Secretaría Xeral de Política Lingüística, é dinamizar o uso da lingua galega entre a mocidade nas súas relacións persoais e nas novas tecnoloxías, nomeadamente en internet e na mensaxería instantánea.

Os videos e os/as correspondentes xuvenís seleccionados/as para participar no Encontro de Correspondentes e Alberguismo Xuvenil, que terá lugar do 5 ao 7 de abril no Albergue Xuvenil de Gandarío, son os seguintes:

 

1) Sara e Natalia – IES Saturnino Montojo (Ferrol)

2) Yahya e Gabriel – IES Nº 1 (Ordes)

3) Lucía e Saray – IES Val do Tea (Ponteareas)

4) Antón e David – IES Pedra da Auga (Ponteareas)

5) Silvia e Marcos – IES do Camiño (Palas de Rei)

6) Carmen e Nahiara – IES Saturnino Montojo (Ferrol)

7) Paula e Candela – IES Saturnino Montojo (Ferrol)

8) Pablo e Lorenzo – IES Ramón Aller (Lalín)

9) Cecilia e Ainara – IES de Sanxenxo

10) Sabela e Laura – IES Saturnino Montojo (Ferrol)

 

O encontro será totalmente gratuíto para os participantes seleccionados (actividades, manutención e desprazamento).

 

Trátase de formar aos/as correspondentes como transmisores de información a outras persoas mozas no que respecta aos albergues xuvenís e as súas posibilidades, carné de alberguista, REAJ… e así promocionar o alberguismo entre a xuventude de distintas comunidades autónomas a través de actuacións conxuntas entre diferentes mozos e mozas, a aprendizaxe mutua e o intercambio de experiencias.

 

Máis información