A Fundación María José Jove inaugura o que sería o primeiro museo 100% virtual de España.

Consiste nunha plataforma virtual, dixital, interactiva e aberta para a arte, a cultura e a investigación. O MUV foi concibido ademais como un recurso para estreitar a relación entre artistas e entidades culturais de todo o mundo. Deseñado polos arquitectos Creus e Carrasco, o MUV emprázase nun lugar imaxinario de Galicia, recollendo “o espírito da paisaxe e a identidade da terra”.

O MUV pode ser visitado como unha páxina web cunha visualización dixital ou a través de Realidade Virtual (para o que son precisas unhas lentes RV).

A entidade ten na súa sede da Coruña un espazo físico de visualización virtual e outro no espazo Normal da Universidade da Coruña, coincidindo cunha primeira exposición.

O MUV desenvólvese nunha contorna tridimensional e inmersiva xerado por computador para “proporcionar un mundo simulado que facilita a interactuación e a experimentación do usuario”.

Asemade, quérese que manteña vencellos directos cos proxectos asociados ás bolsas, aos premios e ás residencias artísticas promovidas pola Fundación María José Jove, así como coa Colección de Arte FMJJ, contribuíndo ao apoio visualización dos traballos dos artistas apoiados pola entidade.

https://muv.fmjj.org/

O festival de ukelele de Ribadavia, Ukp Day, presenta un proxecto audovisual que se centra na orixe portuguesa do instrumento.

Ruta do Cavaquinho: o son que conecta Braga con Ribadavia é o titulo do documental musical que veñen de presentar esta semana na web e redes sociais do festival. Un proxecto que busca resaltar de maneira simbólica e creativa a conexión que se establece entre a cidade portuguesa de Braga, lugar de orixe do cavaquinho (posteriormente coñecido como ukelele) coa vila galega de Ribadavia, onde se realiza, desde hai 5 anos o Ukp Day, que ten como gran protagonista este popular instrumento.

A iniciativa foi realizada ao abeiro do Fondo de Proxectos Culturais Xacobeo 21.

O festival Ukp Day celébrase cada primeiro sábado de xuño no Castelo de Ribadavia. O ano pasado tiveron que cancelar por mor da COVID-19, este ano están a piques de presentar a nova edición adaptada á situación sanitaria actual.

O vídeo pode verse na súa web: www.ukpday.com

Enlace directo: https://ogatocosmico.wixsite.com/ukp-day/cavaquinho

Organizada pola Dirección Xeral de Xuventude, Participación e Voluntariado de xeito telemático.

Durante os días 22, 23, 24 e 25 de marzo, un grupo de 7 mozos e 17 mozas, voluntarios/as do Corpo Europeo de Solidariedade (CES) están a realizar a súa Formación á Chegada, unha actividade enmarcada no ciclo formativo do CES que ten como propósito introducir aos participantes no país de acollida e nos seus proxectos.

Nesta formación participan un total de 24 mozos e mozas procedentes de Alemaña (4 participantes), Eslovenia (1) Estonia (1), España (8), Francia (1), Grecia (2), Holanda (2), Hungría (1) e Italia (4). As persoas voluntarias, mozos e mozas de entre 18 e 30 anos, realizarán durante un periodo de ata un ano os seus proxectos en Galicia (18), Baleares (4) e Castela e León (2).

Estas actividades formativas á chegada das persoas voluntarias están organizadas pola Dirección Xeral de Xuventude, Participación e Voluntariado da Xunta de Galicia, en colaboración co Injuve, como membros da Axencia Nacional Española do programa europeo CES.
Mediante esta formación impartida en liña, as persoas participantes obterán as ferramentas necesarias para o desenvolvemento do seu voluntariado, ademais de coñecer o papel dos axentes implicados nos seus proxectos, potenciar habilidades sociais e comunicativas, establecer redes de contactos con outros voluntarios e voluntarias e crear, en definitiva, un punto de encontro baseado no intercambio cultural achegándose á cultura en España e progresando na aprendizaxe do idioma no que realizarán a súa actividade.