Novas e actividades (1310)

Un de cada catro adolescentes en Galicia usa de forma intensiva e sen supervisión Internet e as redes sociais; ademais, un de cada cinco podería “ter un certo enganche” aos videoxogos, segundo o informe de UNICEF Comité Galicia, coa colaboración da USC e do Consello Xeral de Colexios de Enxeñaría en Informática (CCII), baixo o título ‘Impacto da Tecnoloxía na Adolescencia en Galicia. Relacións, Riscos e Oportunidades’.

O documento foi presentado na Facultade de Psicoloxía por Antonio Rial, profesor da USC e responsable do estudo; Irene Marín, coordinadora de UNICEF Comité Galicia; e Fernando Suárez, presidente do CCII, que dirixiu o soporte tecnolóxico do estudo.

O estudo recolle as opinións de máis de 3.000 adolescentes de 19 centros de Ensino Secundario Obrigatorio de Galicia, dos que o 90,8% conéctase a Internet todos ou case todos os días. Aínda que recoñecen que a Rede lles pode facer sentir alegría (97,9%), diversión (82,9%), tranquilidade (81,9%) ou apoio e comprensión (71,5%), do informe despréndense tamén conclusións e datos preocupantes. Aqueles/as adolescentes que fan un uso problemático da Internet ou que poderían ter unha posible adicción aos videoxogos presentan niveis máis baixos de integración social e familiar, benestar emocional e satisfacción coa vida, tal e como evidenciaron os responsables do informe.

Redes sociais
Non estar presente en redes sociais é un feito excepcional para os estudantes galegos da ESO: o 97,9% está rexistrado nalgunha rede social e o 80,5%, de feito, está rexistrado en tres ou máis redes sociais. Aínda que cómpre resaltar, tal e como subliña o informe, que seis de cada dez teñen máis dun perfil nunha mesma rede social, perfís que utilizan selectivamente para familia e coñecidos ou para grupos de iguais. Así, cinco de cada dez, un 53,6%, contactaron con descoñecidos a través de Internet, chats ou redes, e un 54,1% aceptou a descoñecidos en redes sociais.
As prácticas do sexting e o ciberacoso son cada vez máis habituais, sendo identificadas polos propios adolescentes como os principais riscos que presenta a tecnoloxía: catro de cada dez dos enquisados asegura recibir algunha vez mensaxes de contido erótico/sexual, un de cada dez recibiu –a través de redes, chats, Internet ou videoxogos– unha proposición sexual por parte dun adulto, e dous de cada dez poderían estar a sufrir ciberacoso.

Videoxogos
Os videoxogos constitúen, de acordo con este estudo, unha importante canle de socialización e interacción social, a través da cal os adolescentes coñecen xente e fan amigos. Para seis de cada dez adolescentes é a súa principal canle de lecer e entretemento, aínda que cinco de cada dez recoñecen xogar a xogos non recomendados para a súa idade. En relación á supervisión parental, só tres de cada dez pais se fixa no PEGI (Pan European Game Information, sistema europeo de clasificación de videoxogos por idade). Tamén preocupan o xogo e as apostas en liña, xa que se estima que 3.000 estudantes de ESO en Galicia fixérono algunha vez na súa vida; o 45,5% deles di que a súa motivación foi gañar diñeiro. E, aínda que un 22,6% das persoas enquisdas asegura ter discusións cos seus pais, nais ou coidadores pola tecnoloxía polo menos unha vez á semana, o informe constata que só ao 34,9% lles poñen límites ou normas os seus pais sobre o uso da Internet e/ou as pantallas.

Conclusións:
Neste sentido, e á vista dos resultados do informe, a loita contra o acoso escolar e o ciberacoso debe ser unha prioridade, debido a que se detectaron taxas de vitimización sensiblemente máis altas que as que ofrecen as estatísticas oficiais, tal e como subliñan os responsables do estudo. É necesario tamén tomar medidas para reducir as preocupantes cifras de sexting, contacto con descoñecidos ou posibles casos de grooming, así como abordar o uso problemático das redes sociais e posibles adiccións a videoxogos.
Entre estas recomendacións do informe, que velan por salvar, protexer e impulsar á infancia tamén na contorna dixital, destaca a necesidade de que as familias conten con ferramentas e apoio para poder exercer o seu labor educativo e de acompañamento; promover a importancia do sistema educativo como ámbito clave para adquirir as pautas e ferramentas necesarias para manexarse en Internet; que os propios adolescentes reciban a información necesaria tanto para poder comprender os riscos como para poder denunciar situacións de abuso; contar con políticas máis contundentes por parte das institucións para a protección dos nenos e a súa imaxe na rede; e que a industria tecnolóxica garanta a protección dos adolescentes a través de, por exemplo, recomendacións claras de uso e privacidade.

Campaña #EducaTRIC
Con motivo da presentación deste informe, UNICEF Galicia pon en marcha unha campaña de sensibilización dirixida aos propios adolescentes, familias, educadores, institucións e industria tecnolóxica co obxectivo de visibilizar os riscos aos que se enfrontan os rapaces e rapazas na contorna dixital. Baixo o cancelo #EducaTRIC, personalidades públicas galegas do mundo da cultura, a sanidade e o deporte quixéronse sumar á campaña e traballar para construír unha contorna dixital segura, saudable e equitativa.

https://www.unicef.es/publicacion/impacto-de-la-tecnologia-en-la-adolescencia

Artigo publicado no diario dixital El Español sobre o Centro QUÉROTE+ de Santiago de Compostela.

O centro QUÉROTE+ é un servizo público de información e formación. A través de redes sociais tentan chegar de forma máis directa aos usuarios

A coordinadora do centro, Paula Fernández Rico, traballadora social, descóbrenos o labor do seu equipo.

image 50440961 1024x768

 

"Quérote+ é un servizo público que é estable e cunha calidade excelente. A diferenza dun centro de planificación familiar asociado ao SERGAS, con persoal sanitario, QUÉROTE+ é un servizo de atención psicosocial e somos traballadores sociais, psicólogos e educadores sociais. Aquí tratamos de que a xente non acuda só cando ten unha urxencia ou un apuro, que tamén, pero queremos un traballo máis profundo, desde un concepto máis amplo do que é a sexualidade. Parámonos moito a escoitar cada caso, cada vivencia e saber ou tentar saber que fallou. Imaxinemos o caso dunha moza que vén facerse unha proba de embarazo e falamos dun embarazo non planificado, tentamos ir á orixe, a cales son as súas circunstancias, se coñece os métodos anticonceptivos, cales son as razóns que lle levaron a esa situación.

E ás veces duns problemas saltan outros, como poden ser abusos ou persoas que padecen falta de autoestima. Eu creo que o bo de que isto sexa un espazo de intervención psicosocial é que podemos detectar carencias na educación sexual dos individuos que ás veces inflúen na nosa forma de reaccionar. Neste centro traballamos diferentes perfís profesionais, e xunto ás miñas compañeiras Isa, Penélope e Lucía tentamos abordar dunha forma completa cada caso".

Coñecendo o Centro QUÉROTE+ de Santiago de Compostela

DigiTalent

Feb 08, 2022

A Axencia para a Modernización Tecnolóxica de Galicia, Amtega, lanza un programa no marco do Plan DigiTalent para fomentar vocacións e adaptar a estudantes, titulados e profesionais aos novos perfís dixitais

Ao longo das sesións abordaranse temáticas relacionadas con tecnoloxías disruptivas que teñen gran impacto na sociedade dixital. O Big Data, a ciberseguridade, a intelixencia artificial, o internet das cousas, a robótica ou as tecnoloxías relacionadas coa xestión medioambiental serán algúns dos temas a tratar, con contidos adaptados aos diferentes públicos: rapaces e rapazas ata 16 anos, centros educativos e profesionais, estudantes e titulados tanto afíns a perfís tecnolóxicos como a non tecnolóxicos.

O ciclo de webinars abre xa a súa inscrición aos primeiros relatorios para os máis novos/as. As xornadas están deseñadas nun formato breve e participativo. Con isto, a Amtega busca achegar as novas tendencias tecnolóxicas aos asistentes dun xeito dinámico, xerando espazos nos que os participantes poden interactuar cos relatores para resolver as súas dúbidas e inquedanzas.

Iniciativas dirixidas á infancia e a adolescencia

A Amtega segue a poñer o foco no fomento das vocacións científico-tecnolóxicas dende idades temperás, onde destacan as actuación dirixidas a centros educativos. Neste eido, DXC Technology impulsa unha nova edición de DXC Iberia Codes, na que os participantes competirán por parellas empregando a tecnoloxía Scratch para programar un videoxogo de aventuras, este ano baixo a temática da loita contra o cambio climático e a protección da biodiversidade.

Pola súa banda, Altia Consultores ven de abrir no mes de xaneiro GenTech, un programa de sesións dixitais que buscan inspirar ao alumnado de 12 a 18 anos sobre as profesións tecnolóxicas da man de expertos da compañía. Ademais, a empresa ofrece este curso a posibilidade de que os centros educativos desfruten ata o mes de xuño dunha visita guiada polas instalacións do Data Center de Altia situado en Vigo.

Este trimestre ven marcado tamén polo lanzamento de talleres de introdución á tecnoloxía LED, ao deseño e impresión 3D e á robótica colaborativa impartidos polos expertos e expertas de Televés e pola apertura de Mentoring Day, co que se busca achegar ao alumnado da ESO e Bacharelato á realidade do mundo laboral acompañados polos profesionais da empresa.

Iniciativas dirixidas á Xuventude

Outro dos bloques prioritarios de actuación do Plan é a adaptación dos estudantes e profesionais ás demandas do mercado laboral, co obxectivo de maximizar as oportunidades de desenvolvemento profesional dos galegos e galegas no eido das novas tecnoloxías.

En liña con este eixe estratéxico, Altia, DXC Technology e NTT DATA suman esforzos coa Amtega para impulsar a formación especializada e achegar a realidade do mundo da empresa á comunidade universitaria e á Formación Profesional nos próximos meses, con iniciativas como Altia FP Dual, AltiaStaging, Altia TechDay, Altia Premia, o Programa UNIQA, o Observatorio DXC ou a celebración de actividades no marco do Foro Tecnolóxico da Universidade de Vigo.

Toda a información sobre estas iniciativas, así como o resto de actuacións recollidas no catálogo DigiTalent encóntrase dispoñible no espazo web DigiTalent, que ofrece as datas, localizacións e instrucións para participar en constante actualización.


Iniciativas dirixidas á infancia e a adolescencia

Iniciativas dirixidas á Xuventude

A Rede Museística Provincial de Lugo, @redemuseisticaprovincial, que agrupa ao Museo Provincial, Museo do Mar, Museo-Fortaleza San Paio de Narla e o Pazo de Tor, ofrece as súas mellores pezas en Tik Tok.

As persoas responsables do museo afirman que Tik Tok é unha ferramenta para chegar a xente que custa captar doutro xeito. "A mocidade ten que participar na institución e nós temos que achegarlles o patrimonio para que o valoren. Non dende o pasado casposo, dende a frescura e a innovación".

Tamén están presentes en Facebook ou Instagram e practicamente todo o persoal dos museos participan dunha forma ou outra na creación do contido. O principal e facer unha conversa coa xente e loitar contra a idea de que as institucións culturais teñen que ter un único discurso.

Tik Tok: @redemuseisticaprovincial

Instagram: @rpmlugo

Páxina web: https://comunidadermpl.es/

"Ni ♀N ni ♂FF" é un programa coeducativo de prevención do (ciber)acoso sexual desenvolvido por investigadoras das universidades de Vigo, universidade de Santiago de Compostela e Carlos III de Madrid e liderado polo Grupo de Investigación en Sexualidade, Xénero e Saúde do campus de Ourense.

Busca fomentar na mocidade a prevención do acoso sexual cara a cara e virtual e propón actividades para desenvolver durante os catro cursos de ESO, de 12 a 16 anos.

Previr dende o ámbito educativo o acoso sexual exercido cara a cara ou de xeito en liña na etapa adolescente é a meta do programa coeducativo de prevención do (ciber)acoso sexual desenvolvido polas investigadoras Patricia Alonso (USC), Yolanda Rodríguez e Rosana Martínez (UVigo), e Alba Adá Lameiras (UC3M)

O acoso sexual, explican as autoras da publicación, “afecta ao benestar de gran parte da sociedade, especialmente das mulleres e doutros colectivos que transgriden as normas de xénero, evolucionando nos últimos anos sobre todo cara un espazo en liña ocupado, en gran parte, polo colectivo adolescente”.

Actividades didácticas

Os contidos de "Ni ♀N ni ♂FF" organízanse en dous grandes bloques. O primeiro está dedicado ao acoso sexual na dimensión off line e segundo ao acoso sexual na dimensión on line. Dentro do primeiro bloque contémplanse tres áreas temáticas: acoso sexual entre iguais no ámbito educativo; acoso sexual no ámbito público e acoso sexual na parella. Dentro do segundo bloque inclúense outras tres áreas temáticas: do sexting á sextorsion e ao grooming; ciberacoso sexual entre iguais e do ciberacoso sexual na parella á vinganza porno.

Cada unha destas áreas inclúe cinco actividades para traballar ao longo dos catro anos da ESO ou para aplicarse de forma independente. Todas as actividades están deseñadas cun formato moi didáctico, que permite a profesorado e alumnado o seu desenvolvemento paso a paso. Co obxectivo de conectar co público adolescente, hai por exemplo actividades nas que se traballa con cancións populares entre este público, con exemplos de stories de redes sociais ou con materiais de TikTok.


“Trátase de fomentar que as e os adolescentes se relacionen de forma axeitada e saudable e que eviten pórse en situacións de vulnerabilidade”, indican as investigadoras. Aínda que deseñado para ser implementado durante o horario de titoría, o material, indican as súas responsables, pode aplicarse dentro da programación doutra materia, desde a transversalidade, especialmente naquelas que inclúa a temática da educación para a saúde, incluída a afectivo-sexual, a igualdade entre homes e mulleres ou a educación para a paz e a non violencia. Tamén se pode utilizar este programa na educación non formal e informal, en intervencións extraescolares. O libro en papel, editado por Aranzadi, incorpora tamén unha versión electrónica, para facilitar o uso e impresión das fichas e materiais por parte dos centros educativos interesados.

Máis información na universidade de Vigo, e na universidade de Santiago de Compostela

Neofalantes

Feb 01, 2022

Neofalantes.gal é un sitio web social centrado nos neofalantes. En concreto, céntrase nas súas traxectorias vitais, nas súas expectativas e nas súas demandas individuais e sociais. En definitiva, as formas de experimentación que atinxen ao cambio que decidiron incorporar na súa vida e que os converte en verdadeiros protagonistas da recuperación do galego.

Calquera persoa que se sinta neofalante e que teña entre os seus obxectivos dinamizar, potenciar, dignificar e crear valor engadido co uso da lingua galega está invitada a participar, contribuíndo de formas diversas a encher de contido esta web social.

O obxectivo principal desta actuación é crear un gran portal web informativa e social para implicar a distintos colectivos pero, sobre todo, á comunidade universitaria que decidiu apropiarse activamente da lingua galega nas súas interaccións cotiás (familia, traballo, negocio, amizades, ocio, etc.) a pesar de que a súa primeira lingua era o castelán. Este obxectivo xeral proxéctase nos seguintes obxectivos específicos:
- Producir, almacenar e distribuír contidos de diversa índole relacionados co neofalantismo (investigación, divulgación, formación).
- Favorecer a creación de espazos físicos e comunidades virtuais que estimulen o neofalantismo.
- Expandir e difundir o interese pola lingua e literatura galega.
- Promover a narración de historias de neofalantes que se criaron lingüísticamente en español.
- Contribuír á creación de redes de negocio arredor do neofalantismo.
- Dinamizar o galego a partir do intercambio de ideas, proxectos, experiencias, propostas de actuación, etc. pensadas dende e sobre o neofalantismo.
- Buscar persoas non galegas que no seu día se achegaron ao noso idioma

https://neofalantes.gal/category/eu-son-neofalante/ 

European Space Camp é un campamento de verán anual dunha semana de duración para mocidade de todo o mundo interesados ​​no espazo e a ciencia.

European Space Camp é unha organización independente sen fins de lucro que organiza un campamento de verán dunha semana para mozas de todo o mundo de entre 17 e 20 anos, onde os participantes aprenden sobre o espazo e a física dos foguetes, ademais de participar nunha campaña práctica de foguetes. A organización está formada por participantes anteriores, que traballan integramente de forma voluntaria como parte do Team Space Camp.

Requisitos:
Idade 17-20 anos. Nacidos entre o 1 de xaneiro de 2002 e o 31 de decembro de 2005 (sen excepcións!).
Interesado na ciencia.
Fluído en inglés. Todo o campamento se leva a cabo en inglés.

O campamento desenvolverase do 1 ao 7 de agosto de 2022 no Centro Espacial Andøya no norte de Noruega.

O prazo para solicitar a participación estará aberto ata o 15 de febreiro de 2022.

Solicitar unha praza en Campamento Espacial Europeo é equivalente a solicitar unha bolsa de participación. Dependendo da bolsa, é posible que o transporte ao campamento non estea cuberto, pero todos os demais custos si o están. Podes atopar máis información sobre as diferentes bolsas na pestana "Bolsa": https://spacecamp.no/apply/

Máis información en:
https://spacecamp.no/ 
contact@spacecamp.no

Diego As, Lula Goce, Mon Devane e Sokram. Estes son os catro grafiteiros/a nomeados/a aos Best Street Art 2021 con algunha das súas creacións, que compiten nunha lista de 100 grafiteiros/as que reflicten a súa arte nas rúas de todo o mundo.

Street Art Cities escanea as redes sociais cada día para localizar as obras de arte máis populares, compartíndoas nas historias de Instagram para que a audiencia escolla ás mellores cada mes. A lista que elabora de forma mensual a maior comunidade de arte urbana do mundo é agora obxecto dunha nova votación, esta vez para elixir o mellor mural de 2021, entre os que se atopan catro propostas galegas.

Poderá votarse ata o 6 de febreiro.

 

Julio César, de Diego As

A Rolda da Muralla, en Lugo, é o escenario do mural Julio César de Diego As, elixido como o mellor grafiti do mundo o pasado mes de agosto. O lucense, ademais, foi proclamado o mellor grafitero de España e recoñece que sente "feliz e atafegado" polos recoñecementos que recibiu ao longo de 2021.

1

 

Lula Goce
Un tributo a todas as mulleres, homes e familias que sofren o cancro de mama en primeira persoa. Esa é a obra de Lula Goce, pintada sobre a fachada dun edificio localizado no municipio de Aranda de Douro (Burgos), que está seleccionada como unha das 100 mellores do mundo. Natural de Baiona (Pontevedra), a artista dá vida e cor aos barrios a través da súa obra.

2

 

As Estrelas do Camiño, de Mon Devane
Unha das "estrelas" do Camiño de Santiago está nomeada a mellor mural do mundo en 2021. Mon Devane é o responsable da exposición artística máis extensa do mundo, con 140 quilómetros nos que se esconden sete murais cuxos protagonistas son cidadáns aos que Estrela Galicia quixo recoñecer a súa xenerosidade e valores. As Estrelas do Camiño recibiu un premio Eficacia 2021 e agora opta co mural de Xermán Arias, en Triacastela, a converterse no mellor o mundo.

3

 

Political correctness, de Sokran
O ordense Sokran pintou o verán pasado na fachada dun edificio da Bañeza (León) a súa obra Political correctness, coa que quixo facer un chamamento á reflexión sobre a "censura e a represión". O artista fai referencia ao encarceramento de Pablo Hasel e aproveitou a celebración do Art Aero Rap para plasmar a súa obra: "A liberdade de expresión é un ben común, pero parece que só uns poucos privilexiados poden exercela. O resto de nós, os simples mortais, corremos o risco de ser borrados ou corrixidos polos poderes fácticos se eliximos facelo".

4

 

Aquí podes votar e ver as 100 obras candidatas ao mellor grafiti de 2021:
https://medium.com/street-art-cities/best-street-art-of-2021-1d524745d3e8 

O proxecto “Calendario Científico Escolar 2022” consistiu na elaboración dun calendario dirixido ao alumnado de educación primaria e ESO.

Cada día recolleuse un aniversario científico ou tecnolóxico como, por exemplo, nacementos de persoas destes ámbitos ou conmemoracións de achados destacables. Ademais, o calendario acompáñase dunha guía didáctica con orientacións para o aproveitamento educativo transversal do calendario nas clases, incluíndo actividades adaptadas a cada rango de idade e ao alumnado con necesidades especiais.

Calendario Científico Escolar 2022 e guía didáctica

Proxector: audiovisuais en galego para a docencia é un espazo web dedicado a compilar, clasificar e difundir recursos audiovisuais que sirvan de apoio á docencia en lingua galega de diversas materias de bacharelato e de ensino universitario.

Recolle vídeos sen audio, ou con audio ou subtítulos en galego ou portugués, para poñelos ao dispor do profesorado de secundaria ou universitario que emprega o galego como idioma da docencia.

Os vídeos están clasificados segundo a súa temática, o idioma no que foron gravados ou subtitulados, e o nivel de ensino no que consideramos que poden ser empregados. A maiores, ofrece unha ficha descritiva coa información básica de cada recurso. Podes acceder aos contidos a través da busca libre e/ou os diferentes despregables que che permitirán filtrar os resultados segundo os criterios de clasificación.

Proxector é un catálogo aberto en continua actualización. Se coñeces algún recurso audiovisual que aínda non estea incluído, podes recomendalo enviando a información a calquera destes enderezos: cdsg@consellodacultura.gal ou snl_lugo@usc.es.

http://consellodacultura.gal/especiais/proxector/acerca-de.php