Novas e actividades (1125)

A Consellería de Cultura e Turismo declara de interese galego a Fundación Museo do Videoxogo de Galicia.

A Fundación Museo do Videoxogo de Galicia ten por obxecto a organización e o desenvolvemento do Museo do Videoxogo (Muvi), que aborde dun xeito integral a historia do videoxogo a través de todos os dispositivos de hardware e software que conforman a súa colección, cunha particular atención ao sector do videoxogo de Galicia, e utilizando o galego como lingua vehicular de todas as actividades desenvolvidas pola entidade.

Podes vistar este museo na Rúa Andalucía 10 de Cangas, na provincia de Pontevedra.
Tamén podes facer unha visita virtual en http://muvi.gal

https://es-es.facebook.com/MuseoDoVideoxogo/

A Universidade de Santiago de Compostela ten unha colección de vídeos didácticos, a cal acolle produtos audiovisuais útiles para a docencia e a divulgación coas que crear novas oportunidades de comunicación entre alumnado e profesorado.

https://www.usc.gal/gl/servizos/snl/videosdidacticos.html

A nosa life story

Xul 17, 2020

Baixo o título A nosa life story e con este enderezo: https://anosalifestory.blogspot.com inicia o blog que decide abrir un grupo de persoas usuarias do Proxecto Innovador de Autonomía Persoal que desenvolve COGAMI nas instalacións do CEGADI de Santiago, para mellorar e posibilitar a inclusión das persoas con discapacidade física e/ou orgánica que precisen de apoios  para unha recuperación funcional e promoción da autonomía persoal,

Tralo decreto de estado de alarma, as persoas usuarias do proxecto empezaron a quedar para participar en videochamadas nas que interactuaban falando das inquedanzas que sentían e nas que tamén se traballaban as habilidades sociais e relacións interpersoais. É a partir de aquí cando xorde a idea de abrir este blog, no que poden expresar e escribir os temas que lles preocupan, as afeccións que teñen, as súas experiencias, rutinas,...

Os nomes que saen publicados son ficticios, elixidos por cada unha das persoas participantes e os textos que publican son previamente revisados polas psicólogas do programa que supervisan e asesoran.  

Aínda que o blog xorde tralo confinamento, a idea é que continúe, para que sigan expresando todo aquelo que lles conmova no seu día a día.

https://anosalifestory.blogspot.com

A Federación Down Galicia vén de lanzar unha campaña de micromecenado co obxectivo de obter fondos para adquirir equipamento tecnolóxico co que intentar reducir a situación de fenda dixital na que se atopan moitas das súas persoas usuarias. Desta forma, a Federación busca crear un banco de recursos para o préstamo temporal de equipos, facilitando ás persoas usuarias máis vulnerables o acceso aos servizos que, desde o peche das entidades Down por mor da crise sanitaria derivada da COVID-19, se prestan a distancia.

Os cartos recadados con esta iniciativa destinaranse á compra de tabletas, computadores, teléfonos móbiles, altofalantes-micrófonos e conexións á Internet que poidan mellorar esta situación.

Nos últimos meses, a fenda dixital existente fíxose máis evidente e un gran número de persoas usuarias dos servizos da Federación e das súas entidades non puideron continuar recibindo sesións de apoio durante este tempo, chegando nalgúns casos a evidenciar un retroceso na súa capacidade cognitiva.

A campaña atópase activa na plataforma GoFundMe, de forma que calquera persoa que o desexe poderá realizar a súa achega a través desta páxina. Neste sentido, o presidente de Down Galicia, Delmiro Prieto, indicou que «buscamos a solidariedade de aquelas persoas que desexan axudarnos a eliminar a fenda dixital na que se atopan as persoas con discapacidade, asegurando deste xeito maiores cotas de inclusión na sociedade para o colectivo».

https://www.gofundme.com/f/ayudanos-a-romper-la-brecha-digital

A Consellería de Política Social acorda a reapertura das residencias xuvenís, albergues e campamentos xuvenís dependentes da Consellería de Política Social e das residencias de tempo libre na Comunidade Autónoma de Galicia a partir do día 15 de xullo de 2020.

DOG do 14 de xullo de 2020

Somos diversidade

Xul 09, 2020

Somos Diversidade é unha guía que se presenta como unha “caixa de ferramentas” onde acudir en busca de recursos e actividades didácticas para elaborar formacións en diversidade sexual, familiar, corporal e de expresión e identidade de xénero, dirixidas a profesionais que traballan con mozos e mozas.

Neste sentido, son materiais que se poden adaptar ás necesidades de cada formación e a distintos niveis de coñecemento, tanto dos grupos participantes, como da persoa que dinamice as actividades e que son o suficientemente flexibles para que poidan ser moldeados e utilizados segundo os recursos temporais e espaciais que presente cada proposta formativa.

http://www.injuve.es/sites/default/files/adjuntos/2020/07/guia_somos_diversidad.pdf

Xa podes consultar o Boletín Eurodesk do mes de xullo de 2020:  http://www.eurodesk.es/noticias/boletin-eurodesk

A partir do día 7 de xullo atendémoste presencialmente nos Espazos Xoves e no Centro Coordinador de información xuvenil.

Chámanos e dámosche cita previa:

Espazos Xoves de Galicia

Centro Coordinador de información xuvenil. R/Ramón Piñeiro 17-19. Santiago de Compostela
   Garantía Xuvenil:   881 997 620
   Carnés:   881 997 622
   Información xeral pola mañá:   881 997 606 e 881 997 608
   Carnés e información xeral pola tarde:   881 997 604

Resolución publicada no DOG do 6 de xullo de 2020

O Instituto Portugués do Deporte e da Mocidade organiza en colaboración, entre outros, coa Dirección Xeral de Xuventude, Participación e Voluntariado, a Webinar Empreeendedorismo.

Da Idea á Concreción, Traballo Remoto, Redes Colaborativas e de Talento

O obxectivo deste webinar é a repartición de experiencias, conceptos e consellos a ter en conta, para axilizar unha idea. Non hai solucións milagrosas, pero hai formas de «facer que aconteza» que poden axudar a chegar onde se pretende.

É posíbel facelo remotamente, auxiliado por redes colaborativas e de talento, nacionais e transfronteirizas, que promoven un troco de ideas e de coñecemento cruciais para o desenvolvemento dun proxecto.

Data e horarios: 30 de xuño de 2020 ás 14:30 e ás 17:00.

Preténdese que o webinar sexa dinámico, coa intervención dos diversos participantes.

A inscrición é gratuíta, de caracter obrigatorio e limitadas a 15 participantes.

Participa e inscríbete aquí: https://ipdj.gov.pt/evento?titulo=webinar-empreendedorismo

iSignos

Xun 18, 2020

A Facultade de Filoloxía e Tradución da Universidade de Vigo puxo en marcha este curso unha páxina web facilitar o ensino e interpretación da lingua de signos. Trátase de iSignos, unha nova ferramenta de consulta, aberta e gratuíta, na que se pon ao dispor de calquera persoa interesada un corpus de anotación da Lingua de Signos Española, coas súas correspondentes glosas identificativas.

O corpus consiste nun conxunto de gravacións en vídeo de signantes que se expresan en LSE, presentadas xunto ás glosas de ambas as mans e a tradución ao español.

Na primeira etapa están dispoñibles un conxunto de vídeos coas súas correspondentes glosas e traducións, que se irá ampliando en fases sucesivas. Pódese consultar a lista de gravacións e seleccionar por criterios de xénero ou tema, e tamén polo sexo ou rango de idade das persoas signantes.

O buscador permite explorar o corpus e observar o contexto no que aparecen as glosas buscadas

O recurso pode ser útil para todas aquelas persoas que necesiten este tipo de datos lingüísticos para o seu traballo, por exemplo, para exercicios de clase, prácticas de interpretación, avaliacións de linguaxe, investigación sobre a LSE, etc.

http://isignos.uvigo.gal/