Novas e actividades (1223)

Desde a Universidade de Xaén (UJA) e o Instituto de Investigación Biomédica de Málaga (IBIMA) ponse en marcha o proxecto DAREMOS (Detección de Adolescentes en alto Risco de Problemas Emocionais: Explorando o papel de Epixenética e Linguaxe para Prevención Indicada en Saúde Mental)

O seu obxectivo é mellorar a detección dos adolescentes con alto risco de desenvolvemento de problemas emocionais como ansiedade ou depresión. O estudo non só considerará aspectos psicosociais senón tamén o papel tanto da linguaxe que utilizan as adolescentes grazas ao traballo realizado desde a Lingüística Aplicada e a Informática, así como o papel da Epixenética. Trátase dun proxecto apoiado polo Ministerio de Ciencia e Innovación e no que o Injuve participa como parte do Consello Asesor Externo.

A participación no estudo está aberta a todos aqueles pais interesados en coñecer de maneira gratuíta se o seu fillo pode presentar algún tipo de problema emocional. Simplemente hai que responder unha enquisa en liña.

Tras a avaliación, aos pais informaráselles sobre os resultados. Desta maneira, os pais poden coñecer como están emocionalmente os seus fillos. Os mozos e mozas ademais poden coñecer como senten e están a vivir estes tempos difíciles.

Requisitos: Esta iniciativa diríxese a pais e nais e aos seus fillos/as adolescentes entre 12 e 18 anos.

https://redproem.es/daremos/ 

Aprobado o Plan de Garantía Xuvenil Plus 2021-2027 de traballo digno para persoas mozas que servirá de referencia para as entidades vinculadas ao Sistema Nacional de Garantía Xuvenil no mesmo período.

O Plan de Garantía Xuvenil Plus inscríbese nun investimento global, o Plan Estratéxico Mocidade Avanza, que, cunha dotación histórica de 4.940 millóns de euros, agrupa o conxunto de accións para o emprego xuvenil.

O plan permitirá axilizar e facilitar unha atención preferente ás persoas mozas. Recolle un compromiso para que nun prazo máximo de catro meses, as persoas mozas reciban unha oferta de formación ou de emprego que conte cun seguimento especial.

O plan permitirá loitar contra a discriminación das persoas LGTBI e poñerá en marcha un programa piloto de inserción sociolaboral para elas.

Identificará oportunidades de emprego e proverá de formación específica aos mozos e mozas en sectores como o dixital, a economía circular, as enerxías renovables, a transición ecolóxica e a economía azul.

Fomentarase a igualdade, a conciliación e a corresponsabilidade combatendo os estereotipos de xénero e adaptando a formación ás necesidades das persoas con responsabilidades familiares.

Coa rexeneración de espazos rurais e urbanos en declive, as persoas mozas poderán ter oportunidades laborais que permitan a substitución xeracional, frear o despoboamento e dar solucións habitacionales a persoas vulnerables.

A través de programas de emprego e formación facilitarase a primeira experiencia profesional para que as persoas mozas poidan acceder a un emprego digno e acorde co seu nivel de formación.

Máis información na web do SEPE

BOE do 25 de xuño de 2021

Esta fin de semana terá lugar a Mostra e Encontro da Xuventude Emprendedora (MEXE), enmarcado no proxecto LIDERA, onde a mocidade terá a oportunidade de dialogar e debater sobre o emprendemento no eido da cooperación transfronteiriza. Por parte da Dirección Xeral de Xuventude, Participación e Voluntariado interverá a directora xeral, Cristina Pichel Toimil.

PROXECTO LIDERA

Aprobado ao amparo do programa Interreg V-A España-Portugal 2014-2020 (POCTEP), este proxecto ten como obxectivo promover o desenvolvemento económico transfronteirizo a través das capacidades laborais e de emprendemento dos mozos e mozas do territorio. Conta cun orzamento de 1.428.692, 93 euros cunha financiación dun 75 % de fondos Feder e unha duración de catro anos, proroogado ata o 30 de xuño de 2021.

Son socios do proxecto: a Dirección Xeral de Xuventude, Participación e Voluntariado, a Fundación Galicia Europa, a Cámara de Comercio de Santiago de Compostela, o Instituto Português do Desporto e da Juventude (IPDJ), a Federación Nacional de Asociaciones Juveniles Portuguesas (FNAJ) e a Comunidade Intermunicipal do Ave.

Xa hai premiados/as da nova edición do certame Enreguéifate, destinado a reivindicar no YouTube, a través dunha canle propia, a longa tradición improvisación oral galega (a regueifa) entre as novas xeracións.

Participaron vídeos nas redes chegados dende Ames, Baio, Cambre, Caldas de Reis, Santiago, Vigo, Mondoñedo, Rianxo, Pontevedra, Moaña, Malpica de Bergantiños, Ponteareas e Tordoia. Houbo doce premios para outras tantas contribucións audiovisuais.

O resultado das votacións pódese ver nun vídeo onde se anuncian as regueifas gañadoras da man de Mariña e Manolo Maseda.

Enreguéifate é un proxecto impulsado polos concellos de Ames, Pontevedra, Rianxo, Santiago de Compostela e Teo que apoia a difusión da improvisación oral en verso (a regueifa) para contribuír, por medio dela, á promoción do uso da lingua galega.

Nesta edición, malia a situación sanitaria, presentouse a cifra nada desprezábel de 42 vídeos, 36 na categoría escolar e 6 na xeral, chegados desde Ames, Baio, Cambre, Caldas de Reis, Santiago, Vigo, Mondoñedo, Rianxo, Pontevedra, Moaña, Malpica de Bergantiños, Ponteareas ou Tordoia.

O xurado estivo composto por María López, concelleira en Teo e profesora; Manolo Maseda, mestre, músico e regueifeiro; Séchu Sende, mestre, escritor e regueifeiro; e A Rabela (rapeira, filóloga e regueifeira).

enregueifate2

Este foi o resultado das votacións que podedes ver nun vídeo onde se anuncian as regueifas gañadoras da man de Mariña e Manolo Maseda:

Categoría Xeral
A máis diversa: Chaminho e Arrieiro - Koruño vs. Rural
A máis reivindicativa: As Canosa - Máxico é o galego
A máis brava: Regheifeiras da Pontragha - Practicando para o vrau
A máis aguda: Patty e Iván - Trocando roles
A mellor falada: Xurxo Souto e Oscar o Arrieiro - Torgho de Bergantiños
A mellor cantada: Os irmáns Tato - Regueifando co protocolo

Categoría Escolar
A máis brava: Patakas Bravas - A guerra do bonito
A máis aguda: As Marías do Lamas - As Marías
A máis diversa: Pitifláuticos - Nós queremos igualdade!!!
A máis reivindicativa: Rimas coma balas - Exprésate rimando
A mellor falada: 21 garabullos - A regueixeira
A mellor cantada: Dúas moi galegas - Sons da aldea

https://www.youtube.com/channel/UCKeXMf-vWyP8cOIr-Cav_7g 

Ata o 5 de xullo estará aberto o prazo para solicitar un ciclo formativo de grao medio ou grao superior ou un curso de especialización si xa cursaches anteriormente un ciclo. Tamén podes optar pola FP dual.

Ata as 13:00 horas!!

A Consellería de Educación actualiza a oferta educativa dos ciclos formativos de grao profesional básico, grao medio e grao superior de formación profesional polo réxime ordinario, por curso completo en modalidade presencial, nos centros públicos da Comunidade Autónoma de Galicia, así como os ciclos formativos polo réxime para as persoas adultas na modalidade dual. Tamén podes optar pola oferta modular de formación profesional do sistema educativo polo réxime de persoas adultas, nas modalidades presencial, semipresencial e a distancia.

Busca ao teu ciclo de grao profesional básico, grao medio, grao superior e FP dualhttp://xuventude.xunta.es/ensino-e-bolsas

https://www.edu.xunta.gal/fp/oferta-fp

A Axencia para a Modernización Tecnolóxica de Galicia (Amtega) e o Colexio Profesional de Enxeñaría en Informática de Galicia (CPEIG) poñen en marcha actividades para o fomento da sociedade dixital no ano 2021.

O convenio, enmarcado dentro da Estratexia Galicia Dixital 2030, recolle a realización de actividades para fomento do talento dixital das persoas máis novas (Tech Kids), formación en Administración electrónica, Block Chain e Ciberseguridade así como a creación de espazos de networking entre profesionais TIC (Programa tres14.pm)

Tech Kids: Fomento do talento dixital da infancia e mocidade

O programa Tech Kids ten como obxectivo identificar e desenvolver o talento dixital e fomentar o interese pola tecnoloxía e a ciencia entre a infancia e a mocidade galega. O programa Tech Kids estruturarase arredor de tres eixos: Encontros con profesionais TIC, Mática e Ciberseguranza-Kids

A través dos encontros con profesionais TIC, nenas e nenos desde 6 a 18 anos poderán interactuar cun experto en temáticas relativas á elaboración de personaxes 3D, creación de videoxogos, robótica, intelixencia artificial, impresión 3D ou industria 4.0, entre outras.

A iniciativa Mática consiste na realización dun programa piloto de carácter específico para crear unha comunidade de xoves de 12 a 18 anos de distintas localidades, a través dun programa de xornadas online que proporcione: Ferramentas e contidos que lles permita ver a tecnoloxía e as súas aplicacións na sociedade, referentes de mulleres do sector TIC de distintos ámbitos (empresarial, administración pública, docente) así como información e coñecemento que lles permita decidir a súa futura carreira profesional.

A actuación Ciberseguranza-Kids desenvolverase a través de 12 xornadas de divulgación en modalidade on line mediante charlas con tipoloxía de contacontos ou outro tipo de actividades de carácter dinámico e participativo. Esta actividade está dirixida a nenos/as de 3 a 12 anos de idade. Ademais, esta iniciativa comprenderá a publicación de vídeos específicos con contido en materia de ciberseguridade para a súa difusión permanente.

Estas tres actuacións tamén forman parte do Plan de Talento Dixital de Galicia, Plan DigiTalent, impulsado pola Amtega para fomentar as vocacións tecnolóxicas entre o alumnado máis novo.

Xornadas formativas sobre Administración electrónica, Block Chain e Ciberseguridade

O convenio contempla formación para o desenvolvemento das potencialidades dos traballadores dos sectores tecnolóxico e das Administracións así como formación específica dirixida aos axentes da Red CeMIT

No marco destas xornadas formativas, cabe salientar a formación en Block Chain, dirixida a un publico técnico e profesional.

Ademais, a formación en Ciberseguridade, enmarcada tamén no Plan de Inclusión Dixital de Galicia, permitirá crear novos recursos formativos e impartir cursos formativos sobre Ciberseguridade dirixidos aos axentes das aulas CeMIT.

Creación de espazos de networking: Programa tres14.pm

Outra das novidades deste convenio céntrase na creación de espazos de debate, opinión, coñecemento e networking para profesionais do ámbito TIC, invitando a expertos/as en distintas materias para que realicen unha exposición sobre a materia e un coloquio posterior,

As actuacións previstas polo CPEIG completaranse con actividades de difusión para a comunidade de colexiados, profesionais, organismos e empresas do sector TIC galego, en temas de investigación, tendencias de mercado, innovación, etc.

https://amtega.xunta.gal/nova/a-amtega-e-o-cpeig-colaboraran-no-fomento-do-talento-dixital-das-persoas-mais-novas-tech-kids-e 

Búscanse heroes

Xun 17, 2021

A Fundación Equipo Humano en Galicia está a executar un programa de mellora de empregabilidade e emprendemento dirixido a menores de 30 anos galegos rexistrados en garantía Xuvenil, coa colaboración do Fondo Social Europeo ( POEJ) e a Fundación Incyde. Por suposto, 100% gratuíto para os participantes.

https://sebuscanheroes.es/

YoEmprendo en economía social 2.0 Galicia é un proxecto de emprendemento en economía social dirixido a favorecer e promover a creación de emprego sostible e de calidade entre aquelas persoas desempregadas que queiran emprender un proxecto para a creación dunha empresa e/ou entidade de economía social, fomentando á súa vez o uso e aproveitamento dos recursos dixitais.

YoEmprendo en economía social Galicia 2.0 desenvolverá accións gratuítas para desempregados, organizado por Cepes, confederación empresarial española en economía social e Rede Española de Entidades polo emprego, Rede Araña, e financiado polo Fondo social europeo no marco do O.T. 8: Promover a sustentabilidade e a calidade no emprego e favorecer a mobilidade laboral.

Accións e servizos ofertados:
- Tutorización e mentoring: Realizaranse entrevistas individuais de diagnóstico inicial para coñecer como é a situación de inicio, desenvolver a idea de negocio e elaborar o plan de empresa.
- Asesoramento grupal sobre emprendemento e creación de empresas de economía social.
- Networking: Encontros virtuais con outros participantes e/ou empresarios interesados no mesmo sector de traballo para a posta en común de ideas e creación de sinerxias .
- Formación: Actividades formativas para a adquisición de coñecementos e habilidades necesarias para emprender en economía social.
- Asesoramento Covid-19: Gabinete de atención telemática para dúbidas relacionadas á situación COVID-19.
- Asesoramento tras a creación da empresa: Ás persoas participantes que cren a súa empresa ofreceráselles asesoramento gratuíto durante os 6 primeiros meses.
- Posicionamento virtual: Publicidade na web das novas empresas, unha vez creadas.
- Posibilidade de bolsa para gastos de constitución: Notario e rexistro.
- Período de execución do proxecto: A execución do proxecto abarca desde maio do 2021 a agosto de 2023.
- A quen vai dirixido o proxecto?: A todas aquelas persoas, que estando rexistradas como demandantes de emprego, estean interesadas en poñer en marcha un proxecto de emprendemento en economía social (cooperativas, asociacións, sociedades laborais, empresas de inserción, centros especiais de emprego)

Máis información e inscrición: a través do formulario de inscrición (pica aquí) ou no teléfono 988 39 15 15

A Federación Autismo Galicia publica a GUÍA CoidamosTEA que xorde a raíz do Proxecto Coidamos-TEA que tivo por obxectivo traballar pola capacitación e apoderamento das familias das persoas con Trastorno do Espectro do Autismo (en diante TEA) e mellorar así a calidade de vida dos seus fillos e fillas e da propia familia.

Para consultar a noticia e descargar a Guía, preme AQUÍ

"A loita contra a violencia na infancia é un imperativo de dereitos humanos. Para promover os dereitos dos nenos, nenas e adolescentes consagrados na Convención sobre os Dereitos do Neno é esencial asegurar e promover o respecto da súa dignidade humana e integridade física e psicolóxica, mediante a prevención de toda forma de violencia".

Así comeza a publicación da Lei de protección integral á infancia e a adolescencia fronte á violencia no BOE do 5 de xuño de 2021

A lei ten por obxecto garantir os dereitos fundamentais dos nenos, nenas e adolescentes á súa integridade física, psíquica, psicolóxica e moral fronte a calquera forma de violencia, asegurando o libre desenvolvemento da súa personalidade e establecendo medidas de protección integral, que inclúan a sensibilización, a prevención, a detección precoz, a protección e a reparación do dano en todos os ámbitos nos que se desenvolve a súa vida.

- título I recolle os dereitos dos nenos, nenas e adolescentes fronte á violencia.
- título II está dedicado a regular o deber de comunicación das situacións de violencia.
- título III, que regula a sensibilización, prevención e detección precoz.
- título IV sobre actuacións en centros de protección de persoas menores de idade.
- título V dedicado á organización administrativa.

Lei de protección integral á infancia e a adolescencia fronte á violencia, BOE do 5 de xuño de 2021