En portada (1167)
A Xunta colabora na Conferencia Internacional sobre Territorios Creativos que se celebra hoxe en Ourense
- Trátase dun encontro de novos creadores, onde as novas tecnoloxías da imaxe terán un lugar preferente
- Este evento está organizado pola Deputación ao abeiro do programa Interreg “Imagina Atlántica” do que é socia a Dirección Xeral de Xuventude e Voluntariado
- O delegado territorial da Xunta en Ourense, Rogelio Martínez, participou na inauguración desta conferencia e subliñou as actuacións do Goberno galego a prol do fomento da creatividade xuvenil
O Centro Cultural Marcos Valcárcel de Ourense acolle hoxe e mañá a Conferencia Internacional sobre Territorios Creativos organizada pola Deputación ourensá e que conta coa colaboración da Xunta de Galicia. Este encontro de novos creadores, onde as novas tecnoloxías da imaxe terán un lugar preferente, está enmarcado dentro do programa Interreg denominado “Imagina Atlántica”, do que é socio a Consellería de Traballo e Benestar, a través da Dirección Xeral de Xuventude e Voluntariado. O evento reúne a profesionais do audiovisual, a ilustración e as novas tecnoloxías procedentes de Galicia, Francia, País de Gales e Portugal.
O delegado territorial da Xunta en Ourense, Rogelio Martínez, participou na inauguración desta conferencia e apuntou que “o fomento da creatividade xuvenil, e a través dela do emprendemento, é un dos sectores básicos da nova Lei de Xuventude de Galicia, porque sen dúbida, as ideas dos novos emprendedores están chamadas a ser as encargadas de impulsar a competitividade”.
Neste senso, Rogelio Martínez lembrou que a Dirección Xeral de Xuventude participa en varios programas que promoven a capacidade creativa da mocidade, dando lugar á creación e promoción do emprego xuvenil neste ámbito. O “Imagina Atlántica” posibilitou a participación de 24 mozos e mozas galegos nun programa de estadías e intercambios profesionais en diferentes empresas dos países participantes para novos técnicos no sector da arte dixital, que inclúe comunicación audiovisual, publicidade, produción artística e cultural e turismo aplicado á arte dixital.
Ademais, este departamento autonómico convoca o certame “Xuventude Crea”, a maior mostra de creatividade xuvenil de Galicia, na que participan máis de 300 novos valores do arte galego en 11 especialidades artísticas. O seu obxectivo é crear un espazo no que os mozos e mozas poidan exercitar as súas habilidades, ensaiar solucións innovadoras e valorar o exame crítico das obras. O prazo para presentar obras a este certame está aberto ata o 31 de xullo.
Na súa intervención, o delegado territorial referiuse aos programas transfronteirizos “Eurocidade” e “Emprende” por tratarse doutras iniciativas nas que colabora a Dirección Xeral de Xuventude e Voluntariado co propósito de apoiar a interacción e colaboración entre a xuventude galega e portuguesa, e de promover actividades que convertan o espazo da eurorrexión nun marco atractivo para novas actividades económicas e empresariais, potenciando o talento xuvenil.
Actividades de verán
Martínez aproveitou o acto para destacar a aposta do Goberno galego para manter, e mesmo incrementar, as actividades de educación non formal que se desenvolven dentro da campaña de verán dirixida á xuventude. Este ano, na provincia de Ourense, ofértanse un total de 785 prazas de campamentos -245 máis que na pasada convocatoria- ademais de ampliarse o número de albergues que acollen estas actividades.
Un total de 192 galegos poderán participar este ano no programa de voluntariado ambiental da Xunta
As actividades celebraranse este ano nas comarcas de Santiago, Allariz-Maceda, Celanova, O Salnés, Verín e Terra de Lemos nos meses de xullo e agosto
Os voluntarios recibirán unha formación inicial e participarán en actuacións de vixilancia ambiental, de control de especies invasoras e labores de limpeza, entre outras
O prazo de inscrición xa está aberto e as solicitudes poden presentarse a través da web www.voluntariadogalego.org
Os participantes recibirán un certificado acreditativo da acción voluntaria que desenvolvan
A Xunta de Galicia convoca por quinto ano consecutivo o programa de voluntariado ambiental a través do que este ano se ofertan un total de 192 prazas para que os galegos e galegas interesadas en colaborar co coidado do medio ambiente poidan desenvolver diferentes actividades, como son vixilancia ambiental, control de especies invasoras que poden aumentar o risco de incendio ou labores de limpeza e rozadura de cortalumes.
O programa desenvolverase este ano nas comarcas de Santiago, Allariz-Maceda, Celanova, O Salnés, Verín e Terra de Lemos. O prazo de inscrición xa está aberto, así que os interesados xa poden presentar a súa solicitude a través da web www.voluntariadogalego.org.
Realizaranse 24 quendas de cinco días. As actividades están concibidas como se dun campo de traballo se tratara, no que en grupos de 8 persoas, xunto cun monitor, levará a cabo as diferentes actividades de sensibilización e información sobre a necesidade de coidado e preservación da masa forestal.
Os obxectivos desta iniciativa, que promoven conxuntamente a Dirección Xeral de Xuventude e Voluntariado e a de Montes, é impulsar entre a cidadanía unha campaña de sensibilización e información no coidado do medio ambiente, colaborar na vixilancia dos montes galegos, reforzar a idea da necesidade de conservar os recursos forestais e fomentar unha actitude de prevención de riscos contra incendios.
Os participantes tamén poderán colaborar na restauración de áreas incendiadas, localizar vertedoiros incontrolados, axudar na limpeza e caracterización de tramos fluviais, facer unha campaña de sensibilización sobre a importancia da conservación da masa forestal ou realizar actividades culturais vinculadas cos montes. Os voluntarios, antes do inicio das actividades, recibirán formación e durante toda a quenda estarán acompañados por monitores especializados na materia. O programa inclúe para os participantes o aloxamento, a pensión completa e un seguro de accidentes e de responsabilidade civil. Poden participar as persoas maiores de idade e tamén mozos e mozas de 16 e 17 anos que conten con autorización.
Ao remate das actividades, os voluntarios obterán por parte da Dirección Xeral de Xuventude e Voluntariado un certificado que acreditará a súa acción voluntaria e será inscrito como experiencia voluntaria no Rexistro de Acción Voluntaria de Galicia.
Aberto o prazo de inscrición para participar nun programa de voluntariado ambiental en sálvora e Cortegada
Esta iniciativa desenvolverase ao longo dos meses de xullo e agosto e os interesados en participar poden apuntarse na páxina web www.voluntariadogalego.org
Este programa naceu co obxectivo principal de sensibilizar e infundir nos participantes criterios e coñecementos básicos sobre a concienciación medioambiental e a recuperación de ecosistemas no Parque Nacional das Illas Atlánticas
As actividades a realizar polos participantes no programa están establecidas polos técnicos do propio parque e centraranse especialmente en traballos de apoio relacionados coa limpeza de praias e na erradicación de plantas invasoras
Ao finalizar a súa participación neste programa de voluntariado ambiental, obterán da Dirección Xeral de Xuventude e Voluntariado un certificado acreditativo da acción voluntaria desenvolvida, que será inscrita como experiencia voluntaria no Rexistro de Acción Voluntaria de Galicia
A Dirección Xeral de Xuventude e Voluntariado, dependente da Consellería de Traballo e Benestar, continúa este verán co programa de Voluntariado Ambiental no Parque Nacional das Illas Atlánticas, en colaboración coa Dirección Xeral de Conservación da Natureza, dependente da Consellería de Medio Ambiente, Territorio e Infraestruturas. Nesta ocasión, o programa de voluntariado desenvolverase nas Illas de Sálvora e Cortegada.
Xa está aberto o prazo de inscrición para esta actividade que se desenvolverá ao longo dos meses de xullo e agosto e os interesados poden apuntarse na páxina web www.voluntariadogalego.org cubrindo un formulario.
Este programa naceu co obxectivo principal de sensibilizar e infundir nos participantes criterios e coñecementos básicos sobre a concienciación medioambiental e a recuperación de ecosistemas no parque nacional.
As actividades a realizar polos participantes no programa están establecidas polos técnicos do propio parque e centraranse especialmente en traballos de apoio relacionados coa limpeza de praias e na erradicación de plantas invasoras.
O programa desenvolverase en grupos de 8 voluntarios, os martes en Cortegada, con saída ás 12,00 horas e regreso ás 19,00 horas, e os xoves en Sálvora, con saída ás 10,00 horas e regreso ás 18,00 horas.
Os voluntarios teñen cubertos tanto os traslados desde os peiraos de Aguiño (Ribeira), no caso de Sálvora, e de Carril, no de Cortegada, como a manutención e un seguro de accidentes e de responsabilidade civil.
Poderán participar no programa voluntarios e voluntarias maiores de idade ou que teñen cumpridos os 16 anos con autorización. As persoas voluntarias que desexen participar, deberán levar unha indumentaria axeitada ás actividades a realizar, unha mochila e protector solar.
Ao finalizar a súa participación neste programa de voluntariado ambiental, obterán da Dirección Xeral de Xuventude e Voluntariado un certificado acreditativo que será inscrito como experiencia voluntaria no Rexistro de Acción Voluntaria de Galicia.
Este programa de voluntariado ambiental no Parque Nacional das Illas Atlánticas comezou nos meses de abril e maio, coa participación de máis de 40 voluntarios, que realizaron tarefas de apoio aos técnicos do parque, relacionados coa oceanografía e recursos mariños, fauna, flora e biodiversidade da illa de Ons.
Xuventude organiza un foro de emprendemento galego-portugués para potenciar as súas relacións empresariais
O director xeral de Xuventude e Voluntariado, Ovidio Rodeiro, inaugurou a xornada de emprendemento ‘Abrindo Fronteiras de Cambio’
Rodeiro apuntou que “no actual contexto social e económico, o emprendemento está a ser unha fonte fundamental de xeración de emprego e riqueza” e opinou que nese punto xorde a importancia das sinerxías para levar adiante proxectos empresariais
Con este encontro preténdese xerar lazos fortes entre emprendedores de ambos os dous territorios e cubrir as súas necesidades, descubrir as oportunidades e propiciar o intercambio de coñecementos e de intelixencia
A Dirección Xeral de Xuventude e Voluntariado, dependente da Consellería de Traballo e Benestar, organizou hoxe en Pontevedra, en colaboración coa Federación de Xoves Empresarios de Galicia e co Instituto Portugués de Deporte e Xuventude, un foro de emprendemento galego-portugués co obxectivo de potenciar as relacións empresariais entre ambos países, ofertar oportunidades de colaboración e compartir proxectos e ideas emprendedoras a ambos lados da fronteira.
O director xeral de Xuventude e Voluntariado, Ovidio Rodeiro, inaugurou a xornada e, na súa intervención, indicou que “as ideas dos novos emprendedores están chamadas a ser as encargadas de impulsar a competitividade”. Así mesmo engadiu que “o Goberno galego ten un firme compromiso con este colectivo, que son os que apostan por crear emprego e riqueza”. A mellor proba dese compromiso e a tramitación pola Xunta de Galicia da nova Lei do Emprendemento, que permite que poñer en marcha un proxecto de negocio sexa máis fácil e menos custoso, cun marco normativo estable e ordenado.
Ovidio Rodeiro apuntou que “no actual contexto social e económico, o emprendemento está a ser unha fonte fundamental de xeración de emprego e riqueza” e opinou que nese punto xorde a importancia das sinerxías para levar adiante proxectos empresariais.
Nese contexto púxose en marcha o foro de emprendemento ‘Abrindo Fronteiras de Cambio’, unha xornada que servirá para potenciar os obxectivos principais do programa ‘Emprende’ de cooperación transfronteirizo Galicia-Norte de Portugal (POCTEP), centrados en fomentar a creación de empresas e o emprego e autoemprego para mozos e mozas, promovendo actividades que convertan o espazo de cooperación transfronteirizo nun marco atractivo para novas actividades económicas e empresariais
Con este encontro preténdese xerar lazos fortes entre emprendedores de ambos os dous territorios e cubrir as necesidades, descubrir as oportunidades e propiciar o intercambio de coñecementos e de intelixencia. Para isto están presentes voces destacadas do panorama emprendedor e asociativo galego-portugués, así como unha parte importante de inversores. Así mesmo, os participantes terán a oportunidade de facer unha rede de contactos profesionais única.
Entre os relatores están recoñecidos profesionais como Pablo López Guitiérrez, CEO de Thinking Business; Gustavo Marcos, experto en innovación e ex xerente de Uninova; Avelino Pinto, “Business angel” portugués; Pelayo Novoa, promotor de Invierta e RedInvest; ou Ricardo Luz, presidente da rede de “business angels” Invicta Angels Portugal, que falou das posibilidades de financiar proxectos empresariais en Galicia e en Portugal.
Contouse ademais con representantes de entidades como o Consorcio da Zona Franca de Vigo, a Cámara Hispano Portuguesa, ou a Asociación Empresarial de Portugal (AEP). A xornada rematará con tres experiencias únicas de emprendemento e éxito galegas e portuguesas contadas polos seus protagonistas.
O público ao que se dirixe o foro é un perfil emprendedor, empresario ou inversor que quere ampliar o seu campo de traballo entre Galicia e Portugal, buscar novas oportunidades e medrar.
Segundo publica hoxe o Diario Oficial de Galicia (DOG), no mesmo poderán participar mozos e mozas galegos ou residentes en Galicia, non profesionais, con idades comprendidas entre os 16 e os 30 anos cumpridos no ano 2013
Como novidade e co obxectivo de axudar á mocidade na súa inserción laboral, o xurado estará composto por profesionais que ocupan postos de decisión en cada un dos sectores implicados no concurso
O prazo de participación estará aberto ata o 31 de xullo de 2013 e cada unha das especialidades contará con tres premios
A Dirección Xeral de Xuventude e Voluntariado, dependente da Consellería de Traballo e Benestar, vén de convocar o programa ‘Xuventude Crea’ nas especialidades de teatro, artes plásticas, música, relato breve, poesía, videocreación, banda deseñada, graffiti, carteis, moda e deseño de xoias.
Segundo publica hoxe o Diario Oficial de Galicia (DOG), no mesmo poderán participar mozos e mozas galegos ou residentes en Galicia, non profesionais, con idades comprendidas entre os 16 e os 30 anos cumpridos no ano 2013. Salvo no caso das especialidades de teatro, música, banda deseñada e graffiti, a participación será sempre a título individual. Todas as obras terán que ser en galego, orixinais e inéditas.
Como novidade e co obxectivo de axudar á mocidade na súa inserción laboral, o xurado estará composto por profesionais que ocupan postos de decisión en cada un dos sectores implicados no concurso, o que permitirá aos participantes poñer as súas creacións en contacto co mundo empresarial dun xeito directo.
O prazo de participación estará aberto ata o 31 de xullo de 2013 e cada unha das especialidades contará con tres premios: o primeiro, de 3.000 euros; o segundo, de 1.500; e o terceiro, de 1.000 euros. As obras dos premiados quedarán en posesión da Dirección Xeral de Xuventude e Voluntariado.
No ámbito musical poderán participar solistas e grupos de pop, folk, rock, hip-hop e demais variedades de música contemporánea. Admitirase que ata un 25% dos compoñentes do grupo supere os 30 anos, o mesmo que ocorre para teatro, e poderá superar a idade máxima a persoa que desenvolva a función de acompañamento musical cos participantes que se presenten como solistas.
En canto ao relato breve, as obras deberán estar feitas a ordenador, terán unha extensión mínima de 5 páxinas e máxima de 10, mecanografadas a dobre espazo e por unha soa cara; mentres que para poesía o tema e a técnica serán libres. As obras, que deberán estar feitas a ordenador, terán unha extensión mínima de 50 versos e máxima de 100.
Os participantes de videocreación só poderán presentar obras que non teñan concedidas axudas económicas da Administración autonómica para a súa realización, no momento do remate do prazo de presentación de solicitudes. O tema será libre, mais deberá dar prioridade aos contidos artísticos e culturais dunha maneira innovadora e experimental. Enténdese por experimental a obra que se sitúa fora dos códigos convencionais, que aposta por fórmulas audiovisuais onde se dá prioridade á subxectividade.
En canto á banda deseñada, de temática libre, a técnica pode ser calquera, feita en branco e negro ou en cor e a extensión mínima terá que ser de 10 páxinas. En caso de que a obra fose en formato dixital, a parte dunha versión impresa deberá xuntarse un CD ou DVD cos arquivos orixinais. Cada obra deberá levar pseudónimo e título.
Nas obras de graffiti o tema e a técnica serán libres e os traballos poderán ser individuais ou en grupo, neste último caso poderán ter un máximo de 3 membros.
Para os carteis a participación será a título individual. O tema do cartel será: "As redes sociais e as novas tecnoloxías". A técnica será libre dentro dos límites usuais, para permitir unha normal reprodución fotomecánica.
Para acceder á categoría de deseño de xoias a colección estará composta por tres pezas. Xunto coa documentación os participantes presentarán unha fotografía de cada unha das tres xoias, que poderán ser tanto para home como para muller.
No apartado de moda os participantes presentarán unha colección coherente de 5 modelos de home ou muller. Terá que definir o tecido utilizado e os complementos para cada un dos modelos presentados. Presentaranse estes deseños en láminas con deseño de fronte e de costas. Así mesmo, haberá que engadir unha ficha técnica da colección e mostras dos tecidos que se empregarán na súa confección.
Benestar solicita a Europa un programa pioneiro para apoiar o traballo e o autoemprego da mocidade no rural galego
A Consellería de Traballo e Benestar vén de solicitar á Unión Europea, ao abeiro dunha orde pioneira en materia de garantía xuvenil, un programa para apoiar o traballo dos mozos e mozas nas PEMES locais ou para fomentar o seu autoemprego no marco do rural galego.
Nesta primeira quenda de proxectos, só se financiarán uns quince en toda Europa, pero servirá para establecer a base para futuras ordes de axudas. A proposta que presenta Galicia ten como obxectivo último cualificar aos participantes como emprendedores ou experimentados en descubrir oportunidades, promover iniciativas e abrir novas vías empresariais. En definitiva, perséguese que se identifiquen cos valores dos seus territorios e recoñezan cales poden ser as súas contribucións para elevar as cotas actuais de renovación e progreso.
Así o explicou hoxe a conselleira de Traballo e Benestar, Beatriz Mato, tras manter unha xuntanza coa comisaria europea de Educación, Cultura, Multilingüismo e Xuventude, Androulla Vassiliou, onde abordaron as distintas actuacións no eido da mocidade postas en marcha polo Goberno galego ao abeiro do programa europeo Xuventude en Acción, así como avaliaron novas propostas.
A conselleira pediulle á responsable europea o seu apoio para realizar un proxecto, dentro do Xuventude en Acción, para o envío e acollida de voluntarios xuvenís entre Galicia e Latinoamérica. Esta iniciativa permitiría que os voluntarios puidesen colaborar coas asociacións de emigrantes e buscar futuras vías de colaboración e viabilidade empresarial, ao tempo que realizan actividades de carácter cultural que acheguen á comunidade galega no exterior as tradicións da nosa comunidade.
Presentoulle tamén un programa de educación para adultos para o que se está a colaborar con varios socios europeos (Reino Unido, Grecia, Austria, Noruega, Eslovenia e Italia).
Na xuntanza tamén aproveitou para invitar a Androulla Vassiliou a impartir a conferencia inaugural do Congreso Internacional de Xuventude, que se celebrará no último trimestre do ano en Galicia, organizado pola Consellería de Traballo e Benestar
Balance dos programas
Durante a reunión, ambas responsables abordaron os éxitos acadados nos programas levados a cabo coa colaboración europea. Ao respecto, Mato subliñou que “só en 2012, en Galicia realizáronse 60 proxectos no marco do Xuventude en Acción, o que nos converte na terceira comunidade autónoma cun maior número de proxectos: o 10 por cento do total estatal, malia que os nosos mozos representan o 5,3 por cento da xuventude nacional”.
Precisou que ao abeiro desta liña de financiamento puxéronse en marcha tres programas en Galicia, baseados nas seguintes liñas fundamentais: a mobilidade, a iniciativa e o voluntariado.
O primeiro deles, Iniciativa Xove, é unha liña de axudas que ten como fin estimular o protagonismo, o talento e a capacidade de liderado da mocidade. Desde 2010 xa se financiaron 650 proxectos, cun investimento de 1,8 millóns de euros. En 2013, o seu orzamento ascenderá a 730.000 euros (3,5 por cento máis que en 2012), para chegar a 250 iniciativas xuvenís.
Desde 2011 iniciouse o Servizo de Voluntariado Xuvenil, que se ocupa de subvencionar proxectos de entidades galegas de acción voluntaria nos que participan activamente mozos e mozas. Conta cun orzamento de 375.000 euros para 2013, o que permitirá a incorporación de 3.000 voluntarios
O terceiro eixo é a mobilidade xuvenil, para facilitar o coñecemento doutras culturas, favorecer a diversidade e potenciar as habilidades e competencias non formais da mocidade. Neste eido, estase a levar o programa a Xuventude no mundo, que oferta 400 prazas de intercambio con 15 países diferentes nos últimos tres anos.
Ademais, Mato avanzou que este ano vaise consolidar Galeuropa, que permitirá que 250 mozos e mozas galegos realicen prácticas laborais en países europeos durante 8 semanas.
Reunión co FEAG
Na xornada de hoxe, Mato reuniuse cos responsables do Fondo Europeo de Adaptación á Globalización (FEAG) para presentarlles o programa de recolocación de desempregados do sector bancario, que se adiantou onte ao comisario europeo de emprego, László Andor.
A conselleira, xunto co director Xeral de Xuventude e Voluntariado, Ovidio Rodeiro, que está en Bruxelas en calidade de embaixador español da mocidade, participaron tamén na cerimonia oficial do 25 aniversario dos programas de xuventude da Unión Europea
Trátase do primeiro programa en toda España que aposta polo compromiso social directo da mocidade
Os participantes do Servizo de Voluntariado Xuvenil recibirán unha certificación oficial da experiencia adquirida, segundo establece a nova Lei Galega de Acción Voluntaria, aprobada por unanimidade en 2011
Os programas que ten en marcha este área do departamento autonómico constitúen ferramentas de gran utilidade para facer da participación activa dos mozos e mozas a primeira fase do emprendemento
O Diario Oficial de Galicia (DOG) publica hoxe a orde que regula o Servizo de Voluntariado Xuvenil da Dirección Xeral de Xuventude e Voluntariado, dependente da Consellería de Traballo e Benestar. Esta iniciativa, que conta cun orzamento de 375.800 euros, permitirá incorporar a 3.000 mozos e mozas de entre 16 e 30 anos como voluntarios nos proxectos solidarios de entidades de acción voluntaria e concellos.
Trátase do primeiro programa en toda España que aposta polo compromiso social directo da mocidade. Os participantes recibirán unha certificación oficial da experiencia adquirida, segundo establece a nova Lei Galega de Acción Voluntaria, aprobada por unanimidade en 2011.
Este tipo de iniciativas constitúen un exemplo da evolución que nos últimos catro anos ten experimentado a programación da Dirección Xeral de Xuventude, dun modelo baseado case en exclusiva na xestión do ocio e tempo libre, a programas vinculados á participación activa, ao emprendemento, á empregabilidade e á educación non formal da mocidade, puntos estratéxicos da primeira Lei de Xuventude de Galicia.
Os programas que ten en marcha este área do departamento autonómico constitúen ferramentas de gran utilidade para facer da participación activa dos mozos e mozas a primeira fase do emprendemento.
Cada unha das xornadas de voluntariado contará con 6 euros en concepto de transporte e manutención do voluntario. Para as entidades de acción voluntaria a axuda diaria será de 4 euros, para cubrir os gastos de seguro e de xestión.
O director Xeral de Xuventude e Voluntariado, Ovidio Rodeiro, participou hoxe no programa ‘Os Xoves Emprende’
Os participantes do Servizo de Voluntariado Xuvenil recibirán unha certificación oficial da experiencia adquirida, segundo establece a nova Lei Galega de Acción Voluntaria, aprobada por unanimidade en 2011
Para o director xeral, os programas que ten en marcha esta área do departamento autonómico “constitúen ferramentas de gran utilidade para facer da participación activa dos mozos e mozas a primeira fase do emprendemento”
O Servizo de Voluntariado Xuvenil da Dirección Xeral de Xuventude e Voluntariado, dependente da Consellería de Traballo e Benestar, permitirá incorporar a 3.000 mozos e mozas de entre 16 e 30 anos como voluntarios nos proxectos solidarios de entidades de acción voluntaria e concellos.
O director Xeral de Xuventude e Voluntariado, Ovidio Rodeiro, participou hoxe no programa ‘Os Xoves Emprende’, que organiza o concello de Santiago, e avanzou que o luns o Diario Oficial de Galicia publicará a orde que regula este programa, o primeiro en toda España que aposta polo compromiso social directo da mocidade. Os participantes recibirán unha certificación oficial da experiencia adquirida, segundo establece a nova Lei Galega de Acción Voluntaria, aprobada por unanimidade en 2011.
Ovidio Rodeiro afirmou que iniciativas como esta constitúen un exemplo da evolución que nos últimos catro anos ten experimentado a programación da Dirección Xeral de Xuventude, “dun modelo baseado case en exclusiva na xestión do ocio e tempo libre, a programas vinculados á participación activa, ao emprendemento, á empregabilidade e á educación non formal da mocidade, puntos estratéxicos da primeira Lei de Xuventude de Galicia”.
Para o director xeral, os programas que ten en marcha este área do departamento autonómico “constitúen ferramentas de gran utilidade para facer da participación activa dos mozos e mozas a primeira fase do emprendemento”.
Galeuropa
Doutra banda, Rodeiro recordou que continúa aberto ata o día 29 de maio o prazo para participar no programa Galeuropa, unha iniciativa de mobilidade que lle facilita aos mozos e mozas realizar prácticas laborais en países da Unión Europea e así mellorar o currículo.
Galeuropa conta con 600.000 euros de orzamento, o que permitirá que 250 mozos e mozas perciban unha beca de 2.400 euros para que poidan realizar prácticas formativas de 8 semanas de duración en países da Unión Europea. Poden participar neste programa mozos e mozas de entre 18 e 30 anos, con título de Formación Profesional ou Universitario e con coñecementos lingüísticos suficientes segundo o país de destino.
Esta iniciativa permitirá que os descendentes de galegos poidan coñecer a realidade da mocidade galega a través da convivencia e das experiencias que lles aportarán as actividades que protagonizarán nos campamentos
Xa está aberto o prazo para poder participar en calquera destas iniciativas, os interesados poderán realizar a inscrición seguindo as instrucións publicadas na web http://xuventude.xunta.es
Terán lugar nas residencias xuvenís LUG II de Lugo e Florentino López Cuevillas de Ourense, así como no albergue de Gandarío da Coruña durante dúas quendas de 12 días no mes de xullo
Ademais, mozos e mozas de entre 18 e 35 anos poden participar noutras tres actividades da campaña de verán que organiza a Dirección Xeral de Xuventude e Voluntariado
O programa rotatorio de convivencia entre participantes galegos e da Galicia exterior, organizado pola Dirección Xeral de Xuventude e Voluntariado da Consellería de Traballo e Benestar, permitirá que un total de 80 galegos de entre 18 e 30 anos participen nas actividades dos campamentos xuvenís xunto con outros 160 mozos e mozas descendentes de emigrantes.
Esta iniciativa permitirá que os descendentes de galegos poidan coñecer a realidade da mocidade galega a través da convivencia e das experiencias que lles aportarán as actividades que protagonizarán nos campamentos.
Estas actividades terán lugar nas residencias xuvenís LUG II de Lugo e Florentino López Cuevillas de Ourense, así como no albergue de Gandarío da Coruña durante dúas quendas de 12 días no mes de xullo.
Nas dúas primeiras ubicacións, os participantes poderán coñecer o patrimonio histórico e cultural destas dúas zonas, así como percorrer varios tramos do Camiño Francés e da Ruta da Prata ata Compostela. No albergue de Gandarío realizarán actividades relacionadas co mar.
Actividades para maiores de 18 anos
Ademais, mozos e mozas de entre 18 e 35 anos poden participar noutras tres actividades da campaña de verán que organiza a Dirección Xeral de Xuventude e Voluntariado. A primeira delas titúlase ‘Barrancos do Miño’ e conta con actividades deportivas como o barranquismo en Portomarín, kaiak polo río ou rotas BTT. O aloxamento dos participantes será no Complexo Xuvenil LUGII e as quendas no mes de xullo.
A segunda actividade, "Surfeando no Cantábrico" será no Campamento Xuvenil A Devesa de Ribadeo durante o mes de agosto e ten como obxectivo iniciar aos participantes no mundo do surf e do bodyboard. Tamén poderán realizar rotas de sendeirismo e escalada en rocódromo.
A última actividade, “Ruta en kaiak de mar - emprende no mar", tratará de fomentar o respecto polo medio mariño a través de actividades marítimas, ao tempo que se realizarán charlas e seminarios sobre emprendedurismo e innovación. Terá lugar nas instalacións da fundación Illa de San Simón entre os días 2 e 6 de agosto. O número total de prazas para as tres actividades é de 153.
Para poder participar en calquera destas iniciativas, os interesados poderán realizar a inscrición seguindo as instrucións publicadas na web http://xuventude.xunta.es
A Dirección Xeral de Xuventude e Voluntariado, dependente da Consellería de Traballo e Benestar, financia este ano con 600.000 euros o programa Galeuropa
A área autonómica está a desenvolver foros informativos nas principais cidades galegas para difundir esta iniciativa e resolver as dúbidas da mocidade
As xornadas terán lugar hoxe en Santiago e Ferrol e mañá en Pontevedra e Vigo
As estancias no país europeo terán unha duración de 8 semanas, entre o 1 de xulo e o 15 de novembro
O prazo para solicitar unha praza rematará o próximo 29 de maio
A Consellería de Traballo e Benestar, a través da Dirección Xeral de Xuventude e Voluntariado, destinará este ano un total de 600.000 euros ao programa Galeuropa co que os mozos e mozas galegos poderán facer prácticas formativas en empresas de calquera dos estados membros da Unión Europea. O prazo para solicitar unha praza xa está aberto e rematará o próximo 29 de maio. O orzamento da Xunta para esta iniciativa permitirá becar con 2.400 euros a 250 mozos e mozas.
Para difundir este programa, Xuventude está a desenvolver foros informativos nos que a mocidade pode resolver as súas dúbidas. Estas xornadas celebraranse hoxe en Santiago e Ferrol e mañá en Pontevedra e Vigo.
Poderán participar nesta iniciativa os mozos e mozas de entre 18 e 30 anos que estean en posesión dun título de formación profesional ou universitario e que, ademais, conten con coñecementos lingüísticos en inglés, italiano, francés ou alemán, segundo o país no que se pretenda realizar as prácticas. As estancias no país serán de 8 semanas, entre o 1 de xuño e o 15 de novembro.
O obxectivo desta actuación é apoiar a formación da mocidade galega mediante a mellora da súa empregabilidade, favorecendo a adquisición de novos coñecementos, habilidades, capacidades e cualificacións para facilitar a súa inclusión no mercado de traballo, de xeito que poidan constatar unha práctica formativa no estranxeiro como parte do currículo.
O que se pretende, en definitiva, é dotar a Galicia de profesionais que poidan coñecer unha organización do traballo diferente, novos sectores empresariais para implantar na Comunidade galega, así como tamén descubrir novas posibilidades para a internacionalización das empresas galegas.