En portada (1104)

O 12 de decembro a Federación EFA Galicia (titular xuridico da EFA PIÑEIRAL de Arzúa), organizou un encontro no Espazo xove de Curtis de 11:30 a 16:30, en colaboración ca dirección xeral dentro do programa LIDERA

Participan nesta actividade mozos e mozas do medio rural que se están a cualificar profesionalmente.

· A primeira actividade é MARKETING SOCIAL APLICADO A UN RECURSO DA HOSTALERÍA O CAFÉ; participan aquí os responsables de Marketin de CAFENTO e tamén de DOWN COMPOSTELA
· A segunda actividade é MESA DE EXPERIENCIAS NO SECTOR DO TURISMO – APROVEITAMENTO DO RECURSO “CAMIÑO DE SANTIAGO”, asisten Pepe Formoso (albergue de Muxía) e Raquel Carregal (Albergue Ultreia)
· A terceira actividade; xa despois de comer, vai ser un OBRADOIRO DE COMUNICACIÓN para a venta e a interpretación dun produto turístico

Proxecto LEWO

Dec 05, 2017

Proxecto LEWO “ Vida permanente con voluntarios” -  LIFE16 ESC -: un proxecto para a xuventude que desfruta e coida a natureza

Queres participar nun proxecto de voluntariado na Comunidade Autónoma de Galicia?
Tes interese pola natureza e a contorna na que vives?
Presta atención.....

A Dirección Xeral de Xuventude, Participación e Voluntariado (DXXPV), en colaboración coa Dirección Xeral de Patrimonio Natural (DXPN) poñen en marcha o proxecto “Vida permanente con voluntarios” (Evergreen With volunteer) -acrónimo LEWO-, ao abeiro do programa LIFE 2016 do Corpo de Solidariedade Europeo.

Con este proxecto preténdese:

- Contribuír á redución do impacto que a acción humana ten sobre o Patrimonio Natural.
- Facer sustentable  o uso de recursos naturais.
- Promover a educación ambiental  e a participación cidadá no coidado da natureza.

O obxectivo final é potenciar  o patrimonio natural de Galicia  a través da creación dun grupo de mocidade voluntaria que ata xuño de 2019 realizará diferentes actividades dentro de 17 dos hábitats naturais da rede Natura 2000 e áreas especiais de protección de aves en Galicia.

As persoas voluntarias desenvolverán actividades de:

- Preservación e conservación de 17 áreas Natura 2000 de Galicia.
- Investigación (catalogación de flora e fauna de Galicia)
- Educación (Sensibilización, formación, exposición)


Se tes entre 18 e 30 anos e interésache participar nesta actividade de voluntariado ambiental, primeiro debes inscribirte como persoa voluntaria no Corpo Europeo de Solidariedade:

 http://europa.eu/youth/SOLIdARity_es

 (Portal Europeo da Xuventude)

Prazas: 300. Prevese unha reserva dun 10% das prazas para mozos e mozas con diversidade funcional.

Podes solicitar máis información:

No correo electrónico erasmus.xuventude@xunta.gal
No teléfono 881 999 567

life

 LIFE16 ESC ES 001

A titular do departamento autonómico asegurou que este tipo de certames fomentan ‘a apertura dos nosos mozos e mozas cara á novidade da creación, a invención ou o descubrimento’

Na edición do 2017 presentáronse 299 proxectos individuais e en grupo, para as 12 especialidades previstas: teatro, cociña, música, artes plásticas, fotografía, deseño de xoias, banda deseñada, relato breve, poesía, moda, videocreación e graffiti

A directora xeral de Xuventude, Participación e Voluntariado, Cecilia Vázquez, inaugurou hoxe na Igrexa da Universidade de Santiago de Compostela a exposición dos proxectos finalistas das especialidades de fotografía e artes plásticas (pintura e escultura).

A exposición composta por 32 proxectos, 17 da especialidade de fotografía e 15 da especialidade de artes plásticas -cinco esculturas e dez pinturas-, permanecerá aberta ata o 28 de decembro.

Cecilia Vázquez sinalou que “as administracións públicas temos que insistir na posta en marcha de solucións e ferramentas como Xuventude Crea, que permitan a apertura dos nosos mozos e mozas cara á novidade da creación, a invención ou o descubrimento”. “Avanzar neste terreo axuda a que os novos creadores descubran o potencial das súas aptitudes e fortalecen a súa confianza, para que se animen a elaborar proxectos e se preparen para ser os emprendedores do futuro creativo de Galicia”, engadiu a titular do departamento autonómico.

En escultura, a exposición mostra os traballos de Marcia Martínez García (Abegondo) con Relieve de luz, Jonatan Blanco Pensado (Santa Comba) con As curvas que a vida dá, María del Mar Ramón Soriano (Ourense) con Desnudo 12, Miguel Aurelio Cajaraville Mosquera (Baiona) con Autorretrato e Adrián Penido Núñez (Silleda) con Biblioteca de artista.

En pintura os traballos que inclúe a exposición son: Linda Maestra (homenaje a Francisco de Goya)#3 de Rebeca López Villar (Vigo), El estereotipo del artista de Sara Piñeiro Fernández (Lalín), Cidade da Cultura de Galicia de Daniel Cerecedo Bretal (A Pobra do Caramiñal), Profanaciones de Sara Álvarez Otero (Monforte), Huída de Sara Pena Zamorano (Vigo), A-temporalidade de Tania Vázquez Buján (Lugo), Estudio del lobo de Arantza Pardo Barbeito (Abegondo), O fulgor de Ana María González Zapata (A Coruña), En la mesa de mi cuarto soy menos despreciable de Gema López González (Lugo) e Autorretrato de Alexandre Sequeiros Camiña (Vigo).

Na modalidade de fotografía, a exposición inclúe 17 proxectos: Fases dunha opresión de Estefanía André Feijoó (Vigo), Guardián de Rebeca López Villar (Vigo), Corazón de garganta de Sergio Fernando Villar Penas (Santiago), Para a lembranza de Sonia Vázquez Abelleiro (Teo), Por el amor de Dios! de María Vérez Escudero (A Coruña), Andrea de Eva Neira Carballo (Santiago), O paso do tempo: a miña nena interior de Nerea Salgado González (Marín), Muller na paisaxe de María do Mar Suárez Canosa (Santiago), Phantom Limb de Antía Monroy Rivas (Redondela), Acceso restrinxido de Pablo Mendizábal Recuna (Ferrol), Utopía de Marta León Martínez (Vigo), Ataraxia de Andrea Rodríguez López (A Coruña), Retrato para un aniversario de Ana María González Zapata (A Coruña), Anatomía salvaxe de Carla Piñeiro Gómez (Mos), Inc(red)ible de Paloma Argüello Rodríguez (Santiago), Retratos da natureza de Marina García Cabanas (Santiago) e 2017: un verán máis na Mariña de Mateo Guerreiro Rodríguez (Xove).

Os premios son 3000 euros para o proxecto gañador, 1500 euros para o segundo, e 1000 euros para o terceiro. Os premios poden ser compartidos. E por outra banda, o xurado tamén pode outorgar mencións de honra, sen dotación económica.

Na edición do 2017 presentáronse 299 proxectos individuais e en grupo, para as 12 especialidades previstas: teatro, cociña, música, artes plásticas, fotografía, deseño de xoias, banda deseñada, relato breve, poesía, moda, videocreación e graffiti. Este ano, participaron 376 mozos e mozas galegos, ou residentes en Galicia, non profesionais, con idades comprendidas entre os 16 e 30 anos, con dúas excepcións: a especialidade de música na que ata o 25% do grupo pode superar os 30 anos; e a especialidade de teatro, na que ata o 25% dos compoñentes do grupo pode superar os 30 anos ou poden ter entre 14 e 16 anos.


Premiados noutras especialidades

En banda deseñada, o primeiro premio recaeu en Beatriz Rodríguez Gregores (Vigo) pola obra Ellipsism; o segundo, en Zaida Novoa González (Pontevedra) co proxecto Noite meiga, e o terceiro, en Uxía Larrosa Villanueva (Cambre) por O outro lado da auga.

Na especialidade de cociña, a receita Costelas de porco celta agridoces con puré de castañas e queixo do Cebreiro e emulsión de pementos de Padrón de Andrés Díaz Pérez (Paradela) levou o primeiro premio; o segundo recaeu en María José Losada Acero (Vilagarcía de Arousa) por Taco de aquí e de acolá; e o terceiro premio foi compartido entre as receitas O mar nunha botella de Eva Correa Fontán (Gondomar) e Figadallo de Luis López Fernández (Pontevedra).

En deseño de xoias, Eva Baqueiro Gil (Cangas) gañou coa colección Cando a marea baixa...; o segundo premio recaeu en Sonia Fernández Gandásegui (Oleiros) por Acción- reacción e o terceiro premio foi compartido entre Daniel Martínez González (A Coruña) por Tañidos e Xana Villalobos Salgado (Teo) coa colección Escornabois.

Na especialidade de graffiti, o primeiro galardón foi para Brais Rodríguez Trigo (A Coruña) polo proxecto Verde luz; o segundo, para Aldara Rodríguez Patiño (A Coruña) pola obra Entre realidade e fantasía; e o terceiro, para Miguel Aurelio Cajaraville Mosquera (Baiona) por Encaixado. Así mesmo, o xurado outorgou mencións de honra a Iria Fafián Alonso (Culleredo) por Un sorriso e a Víctor Incio del Río (A Coruña) por Letras.


Na modalidade de música os galardóns foron compartidos. Así o primeiro recaeu en Aida Blanco (Ourense) e MJ Pérez (Arzúa); o segundo, en Dioivo (Vigo) e Postal (Santiago); e o terceiro, en Brotasol (Pontevedra) e Atdeton (O Carballiño).

Na especialidade de relato breve, a obra Angelus Novus de Brais Lamela Gómez (Vilalba) acadou o primeiro premio; O visitante nunca marcha só de Hugo Lozano Hermida (Vilalba) o segundo; e Fado:0103 de Cándido Paniagua Pousa (Vigo) o terceiro.

En poesía, Sonia Martínez López (Sarria) acadou o primeiro premio polo proxecto O abeiro; Arancha Rodríguez Fernández (Arancha Nogueira) (Santiago) o segundo por Romaría; e o terceiro premio foi compartido entre Nuria Mosqueira Varela (A Coruña) por Anguías e Tamara Andrés Padín (Poio) por A lingua secreta dos nenos franceses.

En teatro, a obra Non hai que ser unha casa para ter pantasmas, de Prácido Domingo (Pontevedra), acadou o primeiro premio; Cinco mulleres que comen tortilla da Compañía Señora Supina (Vigo), o segundo; e Sonche bicos de Escola de teatro (Aula de teatro da USC), o terceiro.

Na especialidade de videocreación, María de las Nieves Iglesias Rodríguez (Pontevedra) acadou o primeiro premio co proxecto Narrealidade; Gabriel Vázquez Fernández (Vigo), o segundo pola obra Likenali; e Alba Rodríguez Villar (Cedeira) o terceiro por Alborada.

Arranca a novena edición de Parlamento Xove!!!

A Dirección Xeral de Xuventude, Participación e Voluntariado abre o prazo para a inscrición na novena edición de Parlamento Xove.
Destinatarios: centros educativos de 1º e 2º de Bacharelato e 3º e 4º de Educación Secundaria Obrigatoria.
O Parlamento Xove é unha competición na que os diversos equipos inscritos, formados por catro alumnos/a e un profesor que será o coordinador,  investigarán e debaterán sobre un tema formulado pola organización. O programa realizarase en dúas fases, unha primeira clasificatoria da que xurdirán oito equipos gañadores, que se enfrontarán nunha segunda fase final. Paralelamente, se desenvolverá un concurso voluntario de artigos de investigación sobre o tema formulado. A dificultade da actividade está en que só cinco minutos antes de cada encontro dialéctico procederase ao sorteo da postura a adoptar por cada equipo, ‘a favor’ ou ‘en contra’, en relación á cuestión formulada.

O obxectivo desta iniciativa é fomentar entre a xuventude o diálogo como ferramenta para argumentar razoadamente as ideas propias; ao tempo que se potencian as habilidades individuais e grupais promovendo a selección de información, a expresión oral e escrita, as competencias básicas, a orixinalidade, a argumentación razoada, o traballo en equipo e a convivencia. Tamén se fomenta a tolerancia, a toma de conciencia no comportamento democrático e respecto polas ideas dos demais.


Toda a  información no seguinte enlace:
http://www.parlamentoxove.com/

Preto de 50 alumnos do ciclo de animación sociocultural e turística asistiron ao encontro no que coñeceron as accións levadas a cabo pola administración autonómica no ámbito da mocidade

Os asistentes realizaron aportacións para avanzar na redacción do novo Decreto de desenvolvemento da Lei de xuventude de Galicia

A directora xeral de Xuventude, Participación e Voluntariado, Cecilia Vázquez, asistiu hoxe á xornada Políticas de información xuvenil que está a celebrar a Xunta de Galicia ao longo do día no centro coordinador de Santiago.

O obxectivo deste encontro é achegar aos futuros profesionais da información xuvenil, como técnicos superiores en animación sociocultural e turística, unha visión das políticas de levadas a cabo pola administración autonómica no ámbito da mocidade, así como dar a coñecer a rede galega de información xuvenil.

Deste xeito, pola mañá asistiron á xornada 23 alumnos do ciclo de animación sociocultural e turística do CIFP de Portovello de Ourense, e pola tarde acudirán outros 25 alumnos da mesma especialidade do IES Rosalía de Castro de Santiago.

Os asistentes obterán información de diversas actuacións da Consellería de Política Social, como Correspondentes xuvenís, o programa de Garantía xuvenil+SIX, Galeuropa, Xuventude Crea, Iniciativa Xove ou Interactuando no tempo libre entre outros.

Así mesmo, os participantes nesta xornada poderán realizar aportacións para avanzar na redacción do novo Decreto de desenvolvemento da Lei de Xuventude de Galicia, que compete aos estudantes que están a participar na xornada, tanto no que se refire ao ámbito da información xuvenil como no de dirección e coordinación de actividades de lecer e tempo libre infantil e xuvenil.

A titular do departamento autonómico destacou durante a súa intervención a importancia da celebración deste tipo de encontros para traballar de xeito conxunto cos mozos e mozas na creación e desenvolvemento de políticas efectivas para a xuventude galega.

O día 18 de novembro podes asistir á final da especialidade de Música de Xuventude Crea 2017

Onde?:  La Espina. Lugar de Cornide 18. Bergondo. A Coruña
Hora:  ás 21:00
Entrada libre ata completar aforo

As directoras xerais de Xuventude, Participación e Voluntariado, Cecilia Vázquez, e de Turismo de Galicia, Nava Castro, participaron hoxe nunha andaina polas Fragas do Eume con 18 mozos e mozas participantes do programa XuvenTur, que busca a súa aprendizaxe en competencias para emprender así como en coñecementos sobre a riqueza patrimonial de Galicia a través de actividades desenvolvidas en establecementos rurais durante as fin de semana.

A actividade enmárcase no acordo de colaboración entre Xuventude e Turismo para que a mocidade de 18 a 30 anos de idade poda sumar ao seu currículo vital e académico experiencias de cooperación, emprendemento e motivación á vez que coñece a xeografía e o patrimonio natural, cultural e etnográfico de Galicia.

A saída da andaina foi desde as inmediacións do mosteiro de Caaveiro, en A Capela, e durante o percorrido Cecilia Vázquez e Nava Castro animaron aos participantes a seguir apostando por este tipo de programas de educación non formal, que a Xunta impulsa tanto en Galicia como a través de experiencias europeas como o Erasmus + ou Galeuropa co obxectivo de que a mocidade creza en capacidades e habilidades.

Os mozos e mozas estiveron aloxados no Hotel Fraga do Eume e desenvolveron prácticas de cooperación, dinámicas de PNL (Programación Neurolingüística) e motivacións e emprendemento a través do modelo Lean Startup, así como actividades de sendeirismo en equipo e xogos.

XuvenTur é un programa de educación non formal gratuíto que se desenvolve a través de estancias de fin de semana, ademais de nas Fragas do Eume, en Carnota, Ancares-Courel, Seoane do Courel, Manzaneda e Xurés, e no que participarán cando finalice máis de 400 xóvenes.
 

- O Instituto Galego do Consumo e da Competencia imparte un curso sobre consumo e xénero destinado ao persoal que traballa nos distintos servizos de información xuvenil
- O curso, cunha duración total de 20 horas, impártese na modalidade de teleformación pola Escola Galega do Consumo e da Competencia

A Consellería de Economía, Emprego e Industria, a través do Instituto Galego do Consumo e da Competencia e a Consellería de Política Social, a través da Dirección Xeral de Xuventude, Participación e Voluntariado colaboran para impartir un curso de formación específico sobre consumo e xénero dirixido ao persoal de información xuvenil que traballa nos distintos servizos autonómicos, municipais e doutras entidades de iniciativa social.

O curso, cunha duración total de 20 horas, impártese na modalidade de teleformación para facilitar a participación con independencia da localización do posto de traballo e consta dun total de 5 módulos, que se desenvolverán desde o 27 de outubro de 2017 ata o 1 de decembro de 2017.

O obxectivo principal do curso é promover a reflexión en torno ao consumo e o xénero, filtrado polo papel crucial da educación. Para acadar este obxectivo ao longo do curso reflexionarase sobre a relación entre o consumo e o xénero como elementos de desigualdade social, cuestionando os estereotipos de xénero asociados ao consumo e analizando os roles de homes e mulleres neste ámbito. Ademais, proporcionaranse as ferramentas necesarias para introducir a perspectiva, tanto de consumo responsable como de xénero, nas dinámicas de cada posto de traballo, contribuíndo deste xeito a unha mellora da atención prestada á xuventude.

A realización do curso ven motivada pola necesidade de complementar a formación dos técnicos e técnicas que traballan no ámbito da mocidade, que está en constante cambio e actualización. Ante esta realidade é necesario ofrecer unha formación actualizada, polo que os departamentos de xuventude e de consumo establecen sinerxías de traballo para facilitarlle aos asistentes as ferramentas que lles permitan coñecer a relación indisociable entre o consumo e o xénero. O curso incide na necesidade de afrontar este tema de xeito transversal, garantindo unha visión de conxunto, onde se traballe o consumo e o xénero de forma interrelacionada.

A directora xeral de Xuventude, Participación e Voluntariado, Cecilia Vázquez, asistiu hoxe á apertura da asemblea de Didania, a rede de entidades que aglutina escolas de tempo libre educativo, entre as que se atopa Don Bosco Santiago de Compostela.

A titular autonómica definiu estas escolas como un instrumento fundamental para a dinamización da mocidade destacou a importancia da celebración deste tipo de xuntanzas para intercambiar experiencias e traballar conxuntamente na implantación de medidas e programas que beneficien aos mozos e mozas galegos. E, ao fío, lembrou que a Consellería de Política Social ten aberto un proceso de participación para escoitar a todos os axentes de cara á elaboración do novo Decreto en materia de xuventude que vai supoñer tamén un impulso para a educación no tempo libre cunha nova regulación da formación das persoas educadoras no tempo libre infantil e xuvenil e das escolas de educación no tempo libre.
 

 

 

INTERACTUANDO NO TEMPO LIBRE 2017

XI xornadas galegas de actualización de coñecementos e intercambio de experiencias

3, 4 e 5 de novembro

Albergue Xuvenil de Gandarío, Bergondo, A Coruña

A Dirección Xeral de Xuventude, Participación e Voluntariado da Consellería de Política Social pon en marcha unha nova edición de Interactuando no tempo libre, que nesta ocasión ven marcada polo reto de avanzar no consenso de cara á elaboración do Decreto de desenvolvemento da Lei 6/2012, do 19 de xuño, de xuventude de Galicia.

Téñense dado varios pasos neste camiño partindo daquel II Foro aberto do Tempo Libre celebrado en novembro de 2016, e logo de todo o proceso participativo levado a cabo para a renovación da normativa en materia de xuventude, o XI Interactuando supón un espazo de avance de cara a pechar participadamente un borrador de Decreto e como encontro aberto para ir anticipando, debatendo, imaxinando e construíndo horizontes novos.

Unha vez máis o obxectivo último é o de crear un espazo de reflexión e debate entre os profesionais do sector acerca da importancia da educación non formal como acción educativa e transformadora no eido do tempo libre, a través dunha metodoloxía activa e participativa.

Interactuando é

• Un foro para o intercambio de experiencias e para a actualización de coñecementos

• Un espazo para a formación e a aprendizaxe

• A oportunidade para o encontro e a convivencia.

• Un tempo para reflexionar e vivir o tempo libre en clave educativa

• Unha fin de semana para achegarnos a diferentes maneiras de traballar e para tecer redes

Os seus obxectivos son:

• Dar a oportunidade de encontrarse e de establecer contactos.

• Promover o diálogo entre todas as persoas que traballan neste ámbito.

• Reflexionar e analizar a acción educativa no tempo libre.

Definir as liñas de acción e compromisos para poñer en práctica nas diferentes realidades de cadaquén.

Destinatarios:

Monitores/as e directores/as de actividades de educación notempo libre.

Técnicos/as de xuventude e dinamizadores/as xuvenís.

Profesionais do ámbito (animadores/as socioculturais, educadores/as sociais, pedagogos/as, dinamizadores/as de actividades de educación no tempo libre).

Membros de asociacións xuvenís, grupos informais que realicen actividades de educación no tempo libre e voluntarios/as.

Interactuando no tempo libre artellarase en faladoiros como espazos para a aprendizaxe, a reflexión e o debate sobre os seguintes temas:

  • Formación e escolas de educación no tempo libre: están as escolas de tempo libre cumprindo a súa función? Que formación precisamos? Como debe ser esa formación? Formación por competencias. Futuro das ETL
  • Emprego no tempo libre: Profesionais de actividades de educación no tempo libre. Relación entre empresas, monitores, escolas e administración.
  • Campamentos e instalacións xuvenís: En instalacións xuvenís fixas ou móbiles, os campamentos de verán son un dos alicerces da educación no tempo libre en Galicia.
  • Educación no tempo libre: Entreter? Educar? Aprender xogando? Educación global? Valores transversais e aprendizaxe hoxe en Galicia.

 

Cada un dos faladoiros estará constituído por un máximo de 25 persoas. Cando se realice a inscrición cómpre indicar a preferencia do faladoiro no que se desexa participar. A organización adscribirá os/as participantes nos faladoiros atendendo ás súas preferencias e á orde de inscrición.

Achegas na rede ao novo decreto

O borrador do decreto está dispoñible na rede para que calquera persoa o consulte e elabore achegas que o poidan mellorar. Non é necesario asistir ás xornadas para facer chegar achegas ao borrador.

Antes do 31 de outubro enviaranse ao enderezo de correo electrónico decreto.xuventude@xunta.gal indicando o artigo que se quer mellorar, o texto que se propón e, se se quer, unha xustificación da proposta de mellora.

As achegas recollidas de antemán serán a base de traballo da maña de sábado.

Panel de Experiencias. Comunicacións e experiencias

Calquera persoa ou entidade que desexe compartir unha experiencia realizada no ámbito da educación no tempo libre poderá solicitar a súa inclusión no Panel de experiencias. Isto implicará dispor de 7-10 minutos para a súa presentación.

Para iso enviarase antes do 31 de outubro ao email institutoxuventude.ctb@xunta.gal un arquivo de texto de entre 7 e 20 páxinas, tipo de fonte “Arial”, tamaño 12, espazado entre liñas de 1'5. É posible incluír imaxes, sempre e cando non superen o 30% do espazo. A comisión organizadora fará a selección e comunicará a inclusión ou non no panel de experiencias das distintas propostas achegadas.

Xunto coa experiencia achegarase un resumo dela, dun máximo de 10 liñas, incluíndo o título da comunicación, o nome dos/as autores/as e o nome da entidade/grupo onde se desenvolveu a iniciativa.

Inscrición: a través do seguinte formulario. A inscrición estará aberta ata o 1 de novembro inclusive.

Se para participares activamente no Interactuando precisas traer á túa cativa ou ao teu cativo, fáinolo saber.

PROGRAMA

Venres, 3 de novembro

17.00 h Acollida e entrega de documentación

17.30 h Benvida e sesión plenaria

18.30 h Descanso

19.00 h Faladoiros

20.30 h Cea

22.00 h Actividade nocturna: coñecemento e creación de grupo

Sábado, 4 de novembro

9:30 h Faladoiros

11:30 h Descanso

12: 00 h Faladoiros

14.00 h Xantar

16.00 h Faladoiros

18.00 h Panel de experiencias

20.00 h Tempo libre

20.30 h Cea

22.00 h Interacción nocturna: presentación en vivo de boas prácticas

Domingo, 5 de novembro

09.30 h Faladoiros

11.00 h Presentación de conclusións

13.00 h Clausura e despedida.