En portada (1148)

Os mozos e mozas galegos contarán cun novo Plan estratéxico de xuventude dotado de 125 medidas pensadas para e coa xuventude, en seis ámbitos prioritarios de actuación: emprego e emprendemento, rural, talento e creatividade, formación, participación e Xacobeo 2021.

Na elaboración deste plan se tiveron en conta as prioridades da mocidade a través de encontros provinciais e de cuestionarios de valoración das políticas da Administración autonómica, que supuxeron contar coa opinión de máis dun milleiro de mozos e mozas.

Entre as novas iniciativas que contempla o Plan estratéxico de xuventude de Galicia 2021, podemos destacar a convocatoria nas vindeiras semanas dunha nova liña de axudas para a obtención do carné de conducir de tipo B (de turismo) e C (de camión), un dos principais requisitos para acceder a un posto de traballo. Estas axudas poderán beneficiar a 1.500 mozas que, neste momento, non estean nin estudando nin traballando.

Tamén neste eido do emprego, crearase a nova Oficina virtual de Emancipación Xuvenil, que ofrecerá información e asesoramento; e porase en marcha a iniciativa Talento Mozo, que contará, entre outras medidas cunha serie de obradoiros e charlas de xuventude relevante e destacada , así como cos Premios Talento Mozo.

Por outra banda, e no ámbito da acción voluntaria, o plan consolidará Galicia como a comunidade autónoma de referencia na organización de campos de voluntariado ampliando a oferta durante os meses de verán e poñendo tamén en marcha campos fóra da época estival ademais de levarse a cabo un gran proxecto de voluntariado xuvenil para o Xacobeo 2021.

O Plan tamén incorpora a posta en marcha dunha estratexia de comunicación máis directa coa mocidade a través do canal de whatsapp e foros de debate territoriais.

Se queres consultar o documento íntegro do Plan pincha aquí

A Dirección Xeral de Xuventude, Participación e Voluntariado concede os premios Talento Mozo Galicia ás seguintes candidaturas:

Na modalidade de Ciencia a Christian Vidal Vides, dado que o transcurso da súa traxectoria científica representa un alto grao de innovación e orixinalidade e gran calidade, con investigacións en entidades tanto nacionais como internacionais, formándose e achegando valor investigador no eido tanto da química orgánica sintética como na química organometálica, sendo un investigador mozo que destacou pola súa gran habilidade en cálculos teóricos e de análise de raios X.

Na modalidade de Rural a Paula Rodríguez Villamayor, por ser a candidata que representa unha importante traxectoria na profundización do coñecemento no eido da cunicultura, contribuíndo a mellorar as producións e a converter o medio rural nun espazo de oportunidades e de dinamización económica, incidindo positivamente na fixación de poboación neste ámbito.

Na modalidade de Deporte a Ana Peleteiro Brión, como candidata que mellor representa e reúne na súa traxectoria a excelencia no ámbito deportivo, un maior impacto positivo entre a sociedade e cun gran efecto multiplicador entre a xuventude. Tamén é a candidatura que ten unha indubidable consideración como exemplo de éxito e de carreira deportiva de traballo e superación. A súa traxectoria, as múltiples distincións recibidas e o seu palmarés tanto nacional como internacional así o acreditan (récords, campionatos e medallas ao máis alto nivel de competición).

Na modalidade de Empresa a Jorge López Rodríguez, dado que se trata do proxecto con maior grao de innovación e orixinalidade así como o que se considera con maior potencial de crecemento e por tanto de producir melloras no tecido produtivo galego e na creación de emprego.

Na modalidade de Cultura e Creación a Sara Donoso Calvo, en atención á súa traxectoria marcada pola constancia e pola excelencia e á súa consideración como exemplo de éxito, que combina unha dobre formación académica (graduada en Belas Artes e doutora en Historia da Arte), completando a súa formación en crítica e en xestión con dous mestrados e por desenvolver proxectos en múltiples áreas de traballo dentro do ámbito da cultura contemporánea, facendo comisariado, crítica, investigación, divulgación, xestión cultural, comunicación, educación, etc.; poñendo en valor a arte contemporánea, apostando especialmente polos novos valores galegos e facendo da xestión cultural un ámbito transversal de coñecemento e investigación e como recoñecemento do labor das persoas que desenvolven o seu traballo no eido do comisariado, da crítica e da xestión cultural, e a posta en valor de perfís profesionais que tamén son importantes no ecosistema da cultura contemporánea, trazando pontes e xerando escenarios para a creación.

Publicado no DOG do 27 de febreiro de 2020

A Dirección Xeral de Xuventude, Participación e Voluntariado no marco do proxecto LEWO - LIFE Evergreen with volunteer- LIFE16 ESC ES001 organiza actividades de voluntariado ambiental nos meses de marzo, abril, maio e xuño de 2020.

O principal obxectivo do proxecto é sensibilizar e fomentar o respecto polo rico patrimonio natural de Galicia así como preservar e potenciar estas zonas coa contribución dos mozos e mozas voluntarias.

Ao abeiro deste proxecto desenvólvense actividades de tres tipos: preservación e conservación; investigación ou catalogación de flora e fauna da zona; e accións educativas de información e sensibilización.

Requisitos para participar:
-Ter entre 18 e 30 anos
- Residir en Galicia
- Estar rexistrado/a no Corpo Europeo de Solidariedade; se non o estás, podes facelo aquí de xeito sinxelo: https://europa.eu/youth/solidarity_es
- Cumprimentar o formulario de participación da zona ou zonas de interese: http://www.voluntariadogalego.org/web/modulo.php?mod=ppr&idc=405

As persoas voluntarias poden participar en todas as actividades programadas. En todo caso, se o grupo das persoas apuntadas excede do máximo permitido na zona, serán seleccionadas por rigoroso orde de inscrición.

Así mesmo, a Dirección Xeral de Xuventude, Participación e Voluntariado resérvase o dereito de anular a actividade por causas climatolóxicas ou no caso de non apuntarse un mínimo de persoas que garanta un correcto funcionamento do proxecto.

Cobertura: desprazamento, manutención, aloxamento en habitacións de uso múltiple, seguros e actividades formativas.

Observacións: cada participante deberá levar os úteis de aseo persoal e toalla así como calzado e roupa axeitada para actividades ao aire libre.

Máis información:
Tfno: 881 999 567
Correo: erasmus.xuventude@xunta.gal

CALENDARIO DE ACTIVIDADES NO 2020

PARQUE NATURAL MONTE ALOIA 
Días 6, 7 e 8 de marzo de 2020:
Actividades: adecuación da muralla cicoplea, limpeza na contorna do castro do Alto dos Cubos, e do Rego da Pedra
Punto de encontro e aloxamento: Seminario de Tui
Hora de chegada: 19:00 do día 6
Hora de regreso: 17:00h do día 8

RESERVA DA BIOSFERA TERRAS DO MIÑO
Días 13, 14 e 15 de marzo de 2020
Actividades: preservación e conservación de espazos naturais.
Punto de encontro e aloxamento: por determinar
Hora de chegada: 19:00 do día 13
Hora de regreso: 17:00h do día 15

PARQUE NATURAL BAIXA LIMIA- SERRA DO XURÉS
Días 20, 21 e 22 de marzo de 2020
Actividades: adecuación no encoro e no río Salas, retirada de especies exóticas.
Punto de encontro e aloxamento: albergue O Corgo- Muíños
Hora de chegada: 19:00 do día 20 de marzo
Hora de regreso: 17:00h do día 22 de marzo

Días 17, 18 e 19 de abril de 2020:
Actividades: adecuación do tramo do río Limia desde Ponte Liñares ata Ponte de Nigueiroá, eliminación de especies exóticas.
Punto de encontro e aloxamento: por determinar
Hora de chegada 19:00 do día 17 de abril
Hora de regreso: 17:00h do día 19 de abril

RESERVA DA BIOSFERA MARIÑAS CORUÑESAS E TERRAS DO MANDEO
Días 20, 21 e 22 de marzo de 2020
Actividades: preservación e conservación de espazos naturais.
Punto de encontro e aloxamento: Centro Etnográfico Río Mandeo. Teixeiro-Curtis
Hora de chegada: 19:00 do día 20 de marzo
Hora de regreso: 17:00h do día 22 de marzo

RIBEIRA SACRA-CANÓN DO SIL
Días 27, 28 e 29 de marzo de 2020
Actividades: preservación e conservación de espazos naturais.
Punto de encontro e aloxamento: albergue A Fábrica da Luz. Parada de Sil
Hora de chegada 19:00 do día 27 de marzo
Hora de regreso: 17:00h do día 29 de marzo

Días 29, 30 e 31 de maio de 2020
Actividades: preservación e conservación de espazos naturais.
Punto de encontro e aloxamento: por determinar
Hora de chegada 19:00 do día 29 de maio
Hora de regreso: 17:00h do día 31 de maio

ZEC ANCARES-COUREL
Días 8, 9, 10, 11 e 12 de abril de 2020
Actividades: preservación e conservación de espazos naturais.
Punto de encontro e aloxamento: Campa da Braña. Cervantes
Hora de chegada 19:00 do día 8 de abril
Hora de regreso: 17:00h do día 12 de abril

PARQUE NACIONAL ILLAS ATLÁNTICAS (ILLAS CÍES)
Días 8, 9,10,11 e 12 de abril de 2020
Actividades: eliminación de especies invasoras, adecuación de ecosistemas e praias.
Punto de encontro: por determinar
Aloxamento: nas propias illas
Hora de chegada 19:00 do día 8 de abril
Hora de regreso: 17:00h do día 12 de abril

PARQUE NACIONAL ILLAS ATLÁNTICAS (ILLA DE ONS)
Días 17, 18 e 19 de abril de 2020
Actividades: eliminación de especies invasoras, adecuación de ecosistemas e praias.
Punto de encontro: por determinar
Aloxamento: na propia illa
Hora de chegada 19:00 do día 17 de abril
Hora de regreso: 17:00h do día 19 de abril

Días 24, 25 e 26 de abril de 2020
Actividades: eliminación de especies invasoras, adecuación de ecosistemas e praias.
Punto de encontro: por determinar
Aloxamento na propia illa.
Hora de chegada 19:00h do día 24 de abril
Hora de regreso: 17:00h do 26 de abril

O COUREL-TRIACASTELA
Días 24, 25 e 26 de abril de 2020
Actividades: preservación e conservación de espazos naturais.
Punto de encontro e aloxamento: por determinar
Hora de chegada 19:00 do día 24 de abril
Hora de regreso: 17:00h do día 26 de abril

PARQUE NATURAL O INVERNADEIRO
Días 1, 2 e 3 de maio de 2020
Actividades: colocación de protectores de fauna, colaboración na vixilancia e prevención de incendios.
Punto de encontro e aloxamento: por determinar
Hora de chegada 19:00 do día 1 de maio
Hora de regreso: 17:00h do día 3 de maio

Días 5, 6 e 7 de xuño de 2020
Actividades: colocación de protectores de fauna, colaboración na vixilancia e prevención de incendios.
Punto de encontro e aloxamento: Por determinar
Hora de chegada 19:00 do día 5 de xuño
Hora de regreso: 17:00h do día 7 de xuño

PARQUE NACIONAL ILLAS ATLÁNTICAS (ILLA DE CORTEGADA)
Días 1, 2 e 3 de maio de 2020
Actividades: eliminación de especies invasoras, adecuación de ecosistemas e praias.
Punto de encontro e aloxamento: por determinar
Hora de chegada 19:00 do día 1 de maio
Hora de regreso: 17:00h do día 3 de maio

Días 8, 9 e 10 de maio de 2020
Actividades: eliminación de especies invasoras, adecuación de ecosistemas e praias.
Punto de encontro e aloxamento: por determinar
Hora de chegada 19:00 do día 8 de maio
Hora de regreso: 17:00h do día 10 de maio

O COUREL-FOLGOSO DO COUREL
Días 8, 9 e 10 de maio de 2020
Actividades: preservación e conservación de espazos naturais.
Punto de encontro e aloxamento: por determinar
Hora de chegada 19:00 do día 8 de maio
Hora de regreso: 17:00h do día 10 de maio

PARQUE NATURAL SERRA DA ENCIÑA DA LASTRA
Días 15, 16 e 17 de maio de 2020
Actividades: adecuación de miradoiros e rutas do parque, inventario e eliminación de flora invasora. Seguimento de rutas de aves e outra fauna do parque.
Punto de encontro e aloxamento: por determinar
Hora de chegada 10:00 do día 15 de maio
Hora de regreso: 19:00h do día 17 de maio

PARQUE NACIONAL ILLAS ATLÁNTICAS (ILLA DE SÁLVORA)
Días: 15, 16 e 17 de maio de 2020
Actividades: eliminación de especies invasoras, adecuación de ecosistemas e praias
Punto de encontro: por determinar
Aloxamento na propia illa.
Hora de chegada: 17:30 do día 15 de maio
Hora de regreso: 17:00h do día 17 de maio

Días 29, 30 e 31 de maio de 2020
Actividades: eliminación de especies invasoras, adecuación de ecosistemas e praias
Punto de encontro: por determinar
Aloxamento na propia illa.
Hora de chegada: 17:30 do día 29 de maio
Hora de regreso: 17:00h do día 31 de maio

PARQUE NATURAL COMPLEXO DUNAR DE CORRUBEDO E LAGOAS DE CARREGAL E VIXÁN
Días 5, 6 e 7 de xuño de 2020
Actividades: eliminación de especies invasoras, adecuación de ecosistemas e praias.
Punto de encontro e aloxamento: Por determinar
Hora de chegada 19:00 do día 5 de xuño
Hora de regreso: 17:00h do día 7 de xuño

O COUREL-QUIROGA
Días 12,13 e 14 de xuño de 2020
Actividades: preservación e conservación de espazos naturais.
Punto de encontro e aloxamento: albergue de Quiroga.
Hora de chegada 19:00 do día 12 de xuño
Hora de regreso: 17:00h do día 14 de xuño

Inscricións:  http://www.voluntariadogalego.org/web/modulo.php?mod=ppr&idc=405

Cntravel ofrece un desconto do 5% no Programa Galicia Elixe Galicia, da Xunta de Galicia, para as persoas titulares de Carné xove.

Se te atopas entre os destinatarios (xente nova entre 18 e 30 anos ou familia con fillos menores de idade), podes participar no programa Galicia Elixe Galicia para pasar as mellores vacacións e disfrutar da paisaxe, o termalismo, o patrimonio cultural ou o turismo enogastronómico nas catro provincias galegas e, co teu Carné xove, beneficiarte dun desconto do 5% adicional no prezo do programa, que xa conta cunha subvención de ata o 40% por parte de Xunta de Galicia.  

Tes de prazo ata o 3 de marzo para solicitar a túa praza para viaxar en 2020. A promoción é válida tamén para viaxar en 2021 (as solicitudes para esta tempada realizarase entre o 1 e 30 de setembro).

¿Como facer a solicitude?

  • A través de sede.xunta.gal (formulario TU404)
  • Presencialmente, entregando o formulario en papel en calquera dos lugares e rexistros establecidos na normativa reguladora do procedemento administrativo común.
  • Infórmate na túa axencia de viaxes de confianza (todas as axencias de Galicia están acreditadas para a comercialización do programa)

Se resultas beneficiario do programa, debes formalizar a reserva da praza na túa axencia de viaxes de confianza, amosando o teu Carné xove, para beneficiarse do desconto.  

Consulta toda a información sobre os viaxes subvencionados do programa Galicia Elixe Galicia en: https://www.turismo.gal/que-facer/promocions-para-gozar-agora/elixe-galicia?

 

A Dirección Xeral de Xuventude, Participación e Voluntariado pon a disposición de concellos, asociacións e grupos informais de mozos e mozas un servizo de información e asesoramento sobre os seguintes programas:

 

  • INICIATIVA XOVE: programa de axudas de ata 5.000€ para financiar ideas lideradas por mozos e mozas 

 

  • GALEUROPA: programa de prácticas laborais de ata 3 meses nalgún país da Unión Europea

 

A través deste servizo, que terá un formato de charla explicativa, expoñeranse as principais características dos programas e ofrecerase información práctica sobre a presentación de solicitudes. O obxectivo desta iniciativa é facer accesible a información e o asesoramento sobre os principais programas desta dirección xeral a todos os potenciais beneficiarios, independentemente da súa localización xeográfica.

Os concellos e entidades, así como grupos informais ou mozos e mozas  interesados  nesta charla deberán cumprimentar o formulario que figura ao final deste texto. 

Recibida a referida solicitude, o dinamizador ou dinamizadora responsable da zona porase en contacto coa persoa indicada na solicitude para concretar os datos relativos ao lugar, data e horario da charla informativa.

No caso de haber varias solicitudes dentro do mesmo concello tratarase de fixar unha data común para os interesados e interesadas.

As charlas levaranse a cabo mentres estén abertos os prazos de presentación das diferentes axudas.

A inscripción realizarase a través deste formulario electrónico

A Dirección Xeral de Xuventude, Participación e Voluntariado convoca o programa Iniciativa Xove que consiste en axudas económicas para a posta en marcha de iniciativas xuvenís, entendidas estas como proxectos liderados pola mocidade de Galicia, que se desenvolvan durante o ano 2020, e nos cales as persoas novas sexan as verdadeiras protagonistas, que participarán activamente na planificación e na realización das actividades deseñadas por elas mesmas.

A finalidade das subvencións é fomentar e consolidar a participación libre e eficaz da mocidade no desenvolvemento político, social, económico e cultural, así como promover a adecuada utilización do lecer, a calidade de vida e o benestar dos mozos e mozas da nosa comunidade autónoma, a través de proxectos integrais e específicos de actuación.

Áreas de atención prioritaria:
a) Iniciativa Xove Emprendedora: proxectos que lle permitan á mocidade poñer en marcha as súas ideas no ámbito do emprendemento e da empregabilidade.
b) Promoción de hábitos saudables e prevención de condutas de risco ou violentas entre a poboación xuvenil, así como sensibilización e loita contra calquera forma de discriminación, en especial contra a violencia de xénero.
c) Posta en valor e promoción do Camiño de Santiago e do fenómeno xacobeo.
d) Fomento de actitudes creativas e innovadoras da mocidade na súa comunidade e na súa contorna.
e) Fomento da inclusión social e laboral e da accesibilidade dos mozos e mozas pertencentes a colectivos con dificultades de integración ou especialmente vulnerables.
f) Promoción de sectores emerxentes vinculados ao sector TIC.
g) Fomento da participación e do empoderamento das mulleres novas galegas.
h) Promoción de actitudes e hábitos sustentables e de concienciación sobre o cambio climático, así como de posta en valor do patrimonio cultural e natural.
i) Desenvolvemento e dinamización do medio rural.
j) Dinamización da lingua galega entre a mocidade.

Destinatarios/as:
a) Os grupos informais de mozos e mozas que desexen realizar unha iniciativa xuvenil.
b) As asociacións xuvenís, as entidades prestadoras de servizos á mocidade e as súas respectivas federacións, sempre que, no caso destas últimas, o proxecto que presenten sexa diferente do que presenten, se é o caso, as asociacións xuvenís ou entidades prestadoras que formen parte da federación.

Requisitos:
- As asociacións xuvenís e as entidades prestadoras de servizos á xuventude e as súas respectivas federacións deberán estar inscritas no censo oficial dependente organicamente da Dirección Xeral de Xuventude, Participación e Voluntariado.
- Os grupos informais deberán estar formados por un mínimo de 5 e un máximo de 8 mozas ou mozos con idades comprendidas entre os 18 e os 30 anos, debidamente identificados. Unha destas persoas asumirá o papel de representante único do grupo e con poderes suficientes para cumprir as obrigas que, como beneficiario, lle corresponden ao grupo. Será obrigatorio que o grupo teña unha denominación que o identifique. As persoas que o compoñan deberán de estar empadroadas nalgún dos municipios pertencentes á Comunidade Autónoma de Galicia no momento de presentación da solicitude. Non poderá modificarse a composición do grupo unha vez rematado o prazo de presentación de solicitudes.
Non se admitirá que a mesma persoa forme parte ou pertenza a outro grupo ou asociación, de ámbito autonómico ou provincial, solicitante destas axudas.

Proxectos:
Os proxectos deberán levarse a cabo no ámbito territorial da Comunidade Autónoma de Galicia.
Só se poderá presentar un proxecto por solicitante e o seu orzamento total non poderá ser superior a 5.000 €.
Considéranse gastos subvencionables aqueles que de xeito indubidable respondan á natureza do proxecto presentado, resulten estritamente necesarios para levalo a cabo e financien actividades realizadas desde o 1 de xaneiro ata o 15 de outubro de 2020.

Neste enlace podedes ver proxectos subvencionados en edicións anteriores: http://xuventude.xunta.es/iniciativa-xove

O prazo para presentar solicitudes estará aberto ata o 10 de marzo de 2020.
Solicitudes:  https://sede.xunta.es co procedemento BS306B.
Máis información no DOG do 10 de febreiro de 2020 e en http://xuventude.xunta.es/iniciativa-xove

No marco do programa “A Xuventude no mundo” ao abeiro das relacións bilaterais que a Xunta de Galicia mantén con entidades doutros países, a Dirección Xeral de Xuventude, Participación e Voluntariado da Consellería de Política Social convoca tres intercambios xuvenís:

cadro1

 

 

 

 

Obxectivos: facilitar o coñecemento doutras realidades socioculturais e lingüísticas para a comprensión da diversidade cultural e favorecer e potenciar a adquisición de habilidades e competencias non formais que faciliten o desenvolvemento persoal dos mozos e mozas.

Destinatarios/as: mozos e mozas galegos residentes en Galicia con idades comprendidas entre os 18 e 30 anos no momento de realizarse o intercambio.
Non poderán participar no/s intercambio/s, os mozos e mozas que participaran noutro intercambio ao mesmo país no marco do programa A Xuventude no mundo nos últimos tres anos (2017-2019). Así, neste caso, poderán participar nos intercambios a un país diferente do que xa participaran nos referidos tres últimos anos.

Prazo de inscrición: do 5 ao 10 de febreiro de 2020. (Pechado o prazo de inscrición)
Inscrición:  mediante envío de formulario electrónico dentro do prazo establecido. Só se admitirá unha solicitude por participante.
Os erros nos datos facilitados na solicitude de participación ou a omisión dalgún deles pode ocasionar a desestimación da solicitude.
Admítese a inscrición nos tres intercambios, tendo en conta os requisitos de participación en cada un deles. No caso de inscrición dobre ou tripla o/a solicitante deberá indicar a orde de preferencia de participación.

Admisión: será por rigoroso orde de inscrición, ata cubrir a totalidade de prazas convocadas para o intercambio. Os/as solicitantes seleccionados/as recibirán un correo electrónico de confirmación da praza. Unha vez finalizado o prazo de inscrición, de non recibir comunicación nos tres días seguintes, entenderase que non obtivo praza.
No caso de que unha persoa solicite participar en dous ou tres intercambios, a admisión nun intercambio exclúe a admisión nos outros, salvo que non se cubran as prazas destes últimos.
De producirse baixas despois de adxudicarse as prazas, ofertaránselle aos/as solicitantes da lista de agarda, tendo que presentar o billete e demais documentación nos 5 días (naturais) seguintes da comunicación.
No caso de que o billete de transporte adquirido fose anulado posteriormente a súa remisión á Dirección Xeral de Xuventude, Participación e Voluntariado, a praza para o intercambio será anulada e considerada non adxudicada.
Recibidos correctamente os documentos requiridos, aos seleccionados/as seralles facilitado, posteriormente, o nome do/a coordinador/a que acompañará ao grupo, así como o lugar de encontro no lugar de realización do intercambio.
Realizarase o intercambio se existe un mínimo da metade das prazas convocadas para cada un.

Documentación a remitir: confirmada a praza, nos 5 días (naturais) seguintes, as persoas seleccionadas deberán remitir a galeuropa@xunta.gal:
1. Documentación xenérica para os tres intercambios:
- Unha copia do/s billete/s de transporte adquirido/s para desprazarse ata a cidade do país de realización do intercambio. Non é documento válido a/s reserva/s de voo ou medio de transporte elixido.
- Copia do Documento Nacional de Identidade.
2. Documentación específica para os tres intercambios:
a) Unha copia do seguro de viaxe, de accidentes e de enfermidade.
Para acreditar cobertura de viaxe e accidentes a Venecia admítese copia do Carné Xove.
Para acreditar asistencia sanitaria admítese copia Tarxeta Sanitaria Europea ou certificado sustitutorio.
A non remisión destes documentos no prazo establecido supón a perda da praza no intercambio.
No caso de que a persoa seleccionada queira xestionar a súa viaxe con outras persoas participantes no intercambio deberá autorizar á Dirección Xeral de Xuventude, Participación e Voluntariado a facilitar os seus datos de contacto aos demais participantes, cumprimentado o cadro  habilitado a tal efecto no formulario de inscrición.
b) Unha copia do pasaporte, no caso do intercambio a Xapón.

INTERCAMBIO XUVENIL A VENECIA (ITALIA)

Título:  “Venecia, Patrimonio Mundial”.
Datas de realización do intercambio:   do 2 ao 9 de xullo  de 2020. É obrigatorio participar no intercambio a totalidade dos días.
Prazas:  20 (acompañados/as dun/ha/s coordinador/a/s).
Cobertura do intercambio:
- Aloxamento en réxime de pensión completa en cuarto de uso múltiple.
- Transporte no ámbito do intercambio.
- Actividades organizadas pola entidade de acollida.
Será a cargo do/a participante:
- Os gastos de desprazamento ata o lugar de aloxamento do intercambio en Italia. Nos días anteriores ao inicio do intercambio comunicarase ás persoas participantes o lugar de aloxamento en Venecia.
- Os gastos do seguro de viaxe, de accidente e de enfermidade.
Actividades provisionais previstas:  entre outras, actividades de ocio educativo e culturais, visita á Basílica e Praza de San Marcos, ao Palacio Ducal, illas de Murano e Burano, ao Teatro La Fenice, Museo de Historia Natural, workshops, encontros con mozos e mozas venecianos/as e cea intercultural.
Recomendación de aeroportos máis pretos para chegar ao lugar de destino do país de realización do intercambio:
- Aeroporto Internacional Marco Polo - Venecia.
- Aeroporto de Sant´Angelo – Treviso.

INTERCAMBIO XUVENIL A TBILISI (XEORXIA)

Título:  “Encontro entre culturas”.
Datas de realización do intercambio:  do 13 ao 20 de xullo de 2020. É obrigatorio participar no intercambio a totalidade dos días.
Prazas:  20 (acompañados/as dun/ha/s coordinador/a/s).
Cobertura do intercambio:
- Aloxamento en réxime de pensión completa en cuarto de uso múltiple.
- Transporte no ámbito do intercambio.
- Actividades organizadas pola entidade de acollida.
Será a cargo do/a participante:
- Os gastos de desprazamento ata o lugar de aloxamento do intercambio en Xeorxia. Nos días anteriores ao inicio do intercambio comunicarase ás persoas participantes o lugar de aloxamento en Tbilisi.
- Os gastos do seguro de viaxe, de accidente e de enfermidade.
Actividades provisionais previstas:  entre outras, actividades de ocio educativo e culturais, visita a Mtskheta, Capital antigua de Xeorxia, o Museo Nacional, a Universidade Agraria, Catedral de Svetitskhoveli, Monasterio de Shiomgvime, Tblisi antiguo. Catedral “Sameba”, Castelo de Narikala, Baños vellos, Igrexa “Sioni”, Visita a Mtasminda e Mama Daviti, entre outros lugares.
Recomendación de aeroporto máis preto para chegar ao lugar de destino do país de realización do intercambio:
- Aeroporto de Tbilisi.

INTERCAMBIO XUVENIL Á PREFECTURA DE WAKAYAMA (XAPÓN)

Título:  “O Camiño  Kumano Kodo irmandado co Camiño de Santiago”.
Datas de realización do intercambio:  do 16 ao 22 de xullo de 2020.
Observacións:
O 16 de xullo, entre as 17.00 h e as 18.00 horas (hora xaponesa) todos os mozos e mozas participantes deberán estar  no punto de encontro sinalado no aeroporto de Kansai - Wakayama.
É obrigatorio participar no intercambio a totalidade dos días, é dicir, ata o 22 de xullo.
Prazas:  20 (acompañados/as dun/ha coordinador/a).
Cobertura do intercambio:
- Aloxamento en réxime de pensión completa en cuarto de uso múltiple.
- Trasporte no ámbito do intercambio.
- Actividades organizadas pola entidade de acollida.
Será a cargo do/a participante:
- Os gastos de desprazamento ata o lugar de aloxamento do intercambio en Xapón.
- Os gastos do seguro de viaxe, de accidente e de enfermidade.
Actividades provisionais previstas:  percorrido un tramo do Camiño Kumano Kodo, visita a lugares tradicionais da cultura xaponesa, encontros con mozos e mozas xaponeses,  audiencia con autoridades.
Reunión previa á saída:  Os /as mozos/as seleccionados/as serán convocados a unha reunión preparatoria do intercambio previo ao inicio do intercambio, no día e lugar que determine a Dirección Xeral de Xuventude, Participación e Voluntariado. A asistencia será obrigatoria, agás causa de forza maior debidamente xustificada. A data de realización desta reunión será comunicada por correo electrónico con antelación suficiente.
Recomendación de aeroporto máis preto para chegar ao lugar de destino do país de realización do intercambio:  Aeroporto de Kansai.

FORMULARIO DE INSCRICIÓN  (Pechado o prazo de inscrición)

Máis información na Dirección Xeral de Xuventude, Participación e Voluntariado, teléfono 981 545 702
galeuropa@xunta.gal

 

CUMPRIMENTO DA NORMATIVA DE PROTECCIÓN DE DATOS

Os datos persoais recadados neste programa serán tratados na súa condición de responsable pola Consellería de Política Social coas finalidades de levar a cabo a tramitación administrativa que se derive da xestión deste programa.
O tratamento dos datos baséase no cumprimento dunha misión de interese público ou no exercicio de poderes públicos, conforme as referencias recollidas en https://www.xunta.gal/informacion-xeral-proteccion-datos.
A Dirección Xeral de Xuventude, Participación e Voluntariado comprométese ao cumprimento da súa obriga de segredo dos datos de carácter persoal e adoptará todas as medidas técnicas e de seguridade para asegurar a confidencialidade dos devanditos datos, así como evitar a súa alteración, perda, tratamento ou acceso non autorizado, habida conta, en todo momento, do estado da tecnoloxía.

A Dirección Xeral de Xuventude, Participación e Voluntariado  convoca subvencións dirixidas a entidades de acción voluntaria de carácter privado para o fomento e a realización de actividades de voluntariado durante o ano 2020 nas seguintes áreas:

a) Área de sensibilización: o obxectivo destes programas será o de difundir entre toda a sociedade galega a importancia e o valor da participación solidaria de carácter voluntario. Trátase de fomentar o voluntariado a través de actividades de sensibilización como:
- Desenvolvemento de xornadas, seminarios, charlas e actividades dirixidas a dar a coñecer a realidade das entidades de acción voluntaria, así como á promoción e captación de voluntariado.
- Realización de campañas que fomenten a sensibilización da sociedade galega cara ao voluntariado e ás súas organizacións.
- Estudos encamiñados a coñecer a realidade do voluntariado galego nos seus diferentes niveis de actuación: local, comarcal, etc.
b) Área de formación: persegue unha modernización e adaptación permanente das entidades de acción voluntaria á realidade social a través destas liñas fundamentais:
- Formación de persoas responsables de voluntariado e das persoas voluntarias.
- Fomento e incorporación de novas tecnoloxías dentro das entidades como, por exemplo, o deseño e mantemento de páxinas web.
c) Área de coordinación: as accións fomentarán o traballo en rede e a coordinación entre as diferentes entidades incorporando, de xeito transversal, as actuacións desenvolvidas nos diferentes eidos do voluntariado.

Beneficiarias/os
Entidades de acción voluntaria de carácter privado de Galicia que realicen proxectos de voluntariado durante o ano 2020, desde o 1 de xaneiro ata o 31 de outubro, e que se desenvolvan dentro das áreas de intervención previstas na Estratexia de acción voluntaria 2016-2018.

Requisitos:
a) Que as entidades de acción voluntaria de carácter privado estean legalmente constituídas e inscritas no Rexistro de Acción Voluntaria de Galicia.
b) Ter sede permanente ou domicilio social en Galicia e desenvolver os programas subvencionables na Comunidade Autónoma galega a través de voluntarios ou voluntarias.
c) Ter debidamente contratados todos os seguros de responsabilidade civil e de accidentes de todas as persoas voluntarias que participen no proxecto presentado, durante todo o tempo de execución deste.

Os trámites poden facerse en http://sede.xunta.es co procedemento BS508B
O prazo para a presentación das solicitudes estará aberto ata o 3 de marzo de 2020.
Máis información no DOG do 3 de febreiro de 2020 e en www.voluntariadogalego.org

A Consellería de Economía, Emprego e Industria convoca axudas e subvencións para o fomento do emprego e mellora da empregabilidade no ámbito de colaboración coas entidades locais a través da contratación de persoas traballadoras desempregadas para a realización de obras ou servizos de interese xeral e social.

Entre outros terán preferencias os seguintes proxectos:

- Proxectos que establezan servizos dirixidos as persoas mozas e ás mulleres, tendentes a favorecer a súa participación social e laboral.
- Proxectos que consistan no establecemento de oficinas municipais de información xuvenil, mediante a contratación de mozos e mozas desempregados menores de 30 anos para realizar as funcións de información, animación ou dinamización xuvenil.

As solicitudes presentaranse obrigatoriamente por medios electrónicos a través do formulario TR351A dispoñible na sede electrónica da Xunta de Galicia, https://sede.xunta.gal
O prazo para a presentación de solicitudes estará aberto ata o 28 de febreiro de 2020
Máis información no DOG do 28 de xaneiro de 2020.