En portada (1129)

  • A directora xeral de Xuventude, Participación e Voluntariado, Cecilia Vázquez, visitou a lonxa do municipio pontevedrés con participantes nesta iniciativa
  • Un grupo de 15 persoas de entre 14 e 18 anos de idade coñeceron mellor a realidade laboral con estancias-visitas en distintas empresas da zona
  • O obxectivo deste programa é poñer a disposición da xente nova unha ferramenta que lle facilite ou clarifique a toma de decisións de cara á súa futura traxectoria formativa e profesional

A directora xeral de Xuventude, Participación e Voluntariado da Xunta de Galicia, Cecilia Vázquez, acompañou hoxe aos participantes no proxecto promovido polo Concello de Cambados no marco do programa ‘Deseñando o teu futuro’ nunha visita á lonxa deste municipio pontevedrés. O proxecto permitiu que un grupo de 15 mozos e mozas con idades comprendidas entre os 14 e 18 anos se achegaran á realidade do ámbito laboral con estancias-visitas en distintas empresas da zona.

A iniciativa, cun orzamento de 2.580 euros, contou coa colaboración do IES Ramón Cabanillas, o IES Francisco Asorey e a entidade Cambados Zona Centro. As estancias-visitas tiveron unha duración de doce días, cunha xornada diaria de catro horas e durante as que coñeceron varios proxectos empresariais en diversos sectores: agricultura, gandería, silvicultura e pesca; educación, comercio ao por maior e ao por menor; e actividades artísticas, recreativas e de tempo libre.

Así, desde o 18 de agosto e ata a xornada de hoxe os participantes coñeceron de primeira man varios proxectos empresariais, en concreto: Horsal, SCG, a Asociación Cultural Mulleres do Mar de Cambados (Guimatur), Bodegas Martín Codax, SAV, Bodegas Paco e Lola Deportes Piñeiro. Tamén tiveron a opción de comprobar de primeira man como é o funcionamento e a xestión da escola infantil municipal.

Cecilia Vázquez sinalou que no marco de ‘Deseñando o teu futuro’ no 2017 se financian 25 proxectos presentados por concellos e entidades sen ánimo de lucro, que facilitarán que un total de 358 mozos e mozas realicen estadías-visitas en empresas.“Esta iniciativa ofrécelle á xente nova alternativas para aprender, fomenta o seu autocoñecemento e os motiva no seu proceso de formación e actualización de competencias e habilidades”, apuntou.

Neste sentido, a directora xeral engadiu que “este programa ofrece unha plataforma para que os mozos e mozas adquiran coñecementos e habilidades que axudan a completar o seu desenvolvemento persoal e futura formación académica e profesional” . Así mesmo, engadiu que “a finalidade deste programa é ofrecer á mocidade unha experiencia de educación non formal e poñer a súa disposición unha ferramenta que lle facilite e clarifique a toma de decisión do seu futuro perfil profesional, para que coñezan a realidade da empresa previamente a decidir a súa traxectoria formativa profesional”.

As estadías-visitas en empresas teñen unha duración mínima de cinco días e máxima de quince días hábiles e se establece unha xornada mínima diaria de catro horas. o número máximo de mozos participantes por proxecto non pode exceder de 15.

A cantidade subvencionable a cada entidade e concello ou agrupación de concellos se calcula a razón de 6 euros por participante e día para cubrir os gastos de manutención e desprazamento

  • Cecilia Vázquez, que amosou a súa satisfacción polo éxito da campaña de verán na que se enmarca esta actividade, asegurou que a programación estival “chegou a máis mozos e mozas e transcorreu sen incidencias”
  • Antonio Rodríguez Miranda, destacou a importancia da convivencia entre a mocidade galega do exterior e a residente no territorio


A directora xeral de Xuventude, Participación e Voluntariado, Cecilia Vázquez, xunto co secretario xeral de Emigración, Antonio Rodríguez Miranda, visitaron esta mañá o campo de traballo A esencia galega, emprazado na localidade lucense de Portomarín e co que a Xunta de Galicia quere pór en valor a cultura popular galega. A actividade está incluída na campaña O teu verán colle nunha mochila e nela están a participar 30 mozos e mozas galegos e da Galicia exterior, con idades comprendidas entre os 18 e 30 anos.

Neste contexto, Cecilia Vázquez sinalou a importancia que ten recordar e por en valor a nosa historia ao tempo que lembraba que con esta actividade, os participantes recuperaron tradicións e acontecementos da vida no rural galego dos nosos antepasados para, posteriormente, teatralizalas e gravalas, e así máis adiante difundir este material audiovisual nos centros galegos no exterior e nas residencias de maiores do noso contorno.

A directora xeral de Xuventude aproveitou a súa estadía en Portomarín para lembrar o remate da campaña de verán. “Unha campaña – sinalaba – na que chegamos a máis xente, 526 mozos e mozas máis que o ano anterior; máis inclusiva e participativa e que hoxe remata sen incidencias salientables”. E, ao fío, lembraba que o investimento destinado polo Goberno galego a esta actividade ascendeu a 2,9 millóns de euros.

Pola súa banda, Antonio Rodríguez Miranda salientou o feito de que a convivencia entre a mocidade galega residente no estranxeiro e no propio territorio "constrúe novas pontes persoais de comunicación, que se engaden as ligazóns familiares e culturais que as e os rapaces da diáspora teñen con Galicia, e que fan que, malia a distancia, se sintan tan galegos coma calquera de nós", asegurou Miranda.

‘O teu verán colle nunha mochila’


A Campaña de Verán 2017 estruturouse en seis eixes: os campamentos para menores de 18 anos, campamentos noutras comunidades autónomas, as actividades para maiores de 18 anos, a oferta concertada, os campos de traballo e a programación para mozos e mozas descendentes de galegos residentes no exterior. O maior investimento económico na iniciativa permitiu incrementar o número de prazas, abarcando deste xeito a máis interesados.

Así, os campamentos organizados nas instalacións xuvenís galegas para mozos e mozas entre nove e 17 anos ofertaron 6.400 prazas, aumentando un 3% con respecto á convocatoria do verán pasado e un 20% en relación a do ano 2015. A natureza, o deporte, o voluntariado foros as principais actividades realizadas nestes campamentos.

En canto a campamentos noutras comunidades autónomas, a Xunta puxo a disposición dos interesados 298 prazas, 90 máis que en 2016, o que supuxo un incremento do 40%. Ademais a oferta deste verán incluíu a País Vasco, Castela e León, Estremadura, A Rioxa, Madrid e, como novidade, Cantabria.

Os campos de traballo estiveron encamiñados a favorecer e fomentar a convivencia, a participación, a tolerancia e a solidariedade entre a mocidade e o seu contorno a través de actividades levadas a cabo en todas as rexións de España e noutros países como Francia, Alemaña, Grecia, Italia, Corea do Sur ou Xapón. Nestes campos ofrecéuselles aos mozos e mozas unha alternativa de lecer e tempo libre baseada no intercambio de coñecementos e culturas, na práctica de deportes e na visita a lugares de interese turístico, histórico ou cultural. A oferta de prazas dos 28 campos de traballo situados en Galicia medrou un 25% nas últimas dúas convocatorias, ata acadar un total de 598. A estas prazas hai que sumar as 298 que se ofertaron en campos no estranxeiro e noutras comunidades autónomas.

Así mesmo, a Xunta mantivo o número de prazas reservadas para descendentes de galegos residentes no exterior, cun total de 230 ao abeiro do programa Conecta con Galicia que organizou a Secretaría Xeral de Emigración e que tivo como principais actividades Cultura e Camiño e O mar de Galicia.

A programación dirixida a mozos e mozas con idades comprendidas entre 18 e 30 anos mantívose intacta neste 2017 ao continuar ofertando as 240 prazas que xa se puxeron a disposición na convocatoria de 2016.

E, por último, a oferta en prazas concertadas aumentou de maneira considerable, 295 máis que na anterior campaña de verán ata alcanzar un total de 1.195, o que supuxo unha subida do 33%.

  • Un total de 115 persoas con diferentes capacidades desfrutaron da programación elaborada pola Consellería de Política Social no marco da iniciativa ‘O teu verán colle nunha mochila’
  • O departamento autonómico realizou diversas obras de mellora da accesibilidade no Albergue Xuvenil de Gandarío para garantir a autonomía dos usuarios con discapacidade

 

A directora xeral de Maiores e Persoas con Discapacidade, Fabiola García e a directora xeral de Xuventude, Participación e Voluntariado, Cecilia Vázquez, realizaron esta mañá unha visita ao Albergue Xuvenil de Gandarío, onde os participantes da quenda específica para persoas con discapacidade da campaña de verán da Xunta de Galicia apuran as súas últimas horas antes de partir cara aos seus fogares. Unha actividade que se enmarca no amplo abano de propostas elaboradas pola Consellería de Política Social no marco da campaña estival “O teu verán colle unha mochila”.

As directoras xerais visitaron as instalacións recentemente melloradas mentres está a ter lugar a última quenda para persoas con discapacidade do campamento e no que un total de 30 mozos e mozas de entre 26 e 40 anos están a desfrutar destas instalacións dende o pasado 20 de agosto. Entre as actividades programadas para este colectivo están exercicios de ximnasia adaptada, deporte na praia, actividades de iniciación ao teatro ao aire libre, actividades acuáticas, risoterapia e a construción de castelos na area, entre outras cousas, e sempre que o tempo o permita.

Cecilia Vázquez, subliñou a importancia de desenvolver este tipo de estadías na que os participantes gozan dunha programación de ocio educativo e tempo libre nun entorno incomparable como é o Albergue Xuvenil de Gandario. E, ao fío, lembrou que durante a campaña de verán un total de 115 persoas con discapacidade desfrutaron dos campamentos tanto nas quendas específicas como nas ordinarias.

Obras de mellora na accesibilidade no albergue de Gandarío

A finais do pasado 2016 a Consellería de Política Social realizou diversas actuacións de mellora que se centraron na adquisición de equipamento de soporte e axuda ás transferencias para persoas con mobilidade reducida, así como equipamento de soporte posicional dos usuarios tales como guindastres, cadeiras de rodas para ducha, cadeiras anfibias para piscina e praia e coxíns posicionais.

A este respecto, Fabiola García apuntaba logo da visita a importancia que ten impulsar este tipo de obras de adaptación para así fomentar a integración e insistiu que “os traballos realizados son un paso adiante na loita en favor da igualdade de oportunidades e como garante dunha correcta autonomía para os usuarios das quendas específicas dos campamentos nestas instalacións”. Unhas actuacións cuxo custo ascendeu a 230.000 euros.

O teu verán colle nunha mochila

Os campamentos específicos para persoas con discapacidade están incluídos dentro da Campaña de verán 2017 da Xunta de Galicia. Unha campaña na que están a tomar parte 9.572 persoas, 526 máis que en 2016. As actividades están dirixidas a mozos e mozas de entre 9 e 30 anos, e están divididas en actividades específicas para os distintos grupos de idade.

O departamento autonómico inviste 2,9 millóns de euros na posta en marcha destas actividades, que permitiron a contratación dunhas 1000 persoas entre monitores e directores de tempo libre.

 

 



  • Un total de 160 rapaces e rapazas menores de 30 anos e inscritas no Sistema Nacional de Garantía Xuvenil recibirán axudas individuais para financiar a viaxe, estancia e manutención no estranxeiro durante os dous ou tres meses que durará a súa formación
  • O programa Galeuropa conta este ano cun orzamento global superior aos 2 millóns de euros, que se distribúen entre achegas individuais, a proxectos de mobilidade de entidades sen ánimo de lucro ou a proxectos de concellos, agrupacións de concellos ou mancomunidades

 

A directora xeral de Xuventude, Participación e Voluntariado da Xunta de Galicia, Cecilia Vázquez, participou esta mañá nun encontro informativo cos beneficiarios do programa de mobilidade trasnacional xuvenil Galeuropa 2017 no apartado de axudas individuais. A este encontro, que tivo lugar nas dependencias administrativas de San Caetano, estaban citados 160 mozos e mozas menores de 30 anos inscritos no ficheiro do Sistema Nacional de Garantía Xuvenil no ámbito da Comunidade Autónoma que participarán neste programa.

Trátase dunha xornada previa ao inicio das prácticas formativas non retribuídas en empresas e entidades públicas ou privadas de países europeos dunha duración entre dous e tres meses. A contía da axuda por beneficiario depende tanto do país de realización da práctica formativa como da duración da mesma. O importe da axuda total inclúe unha achega para os gastos de aloxamento e manutención, así como para a viaxe e para apoio lingüístico.

Na modalidade de axudas individuais, recibíronse un total de 286 solicitudes e resultaron beneficiarios 160 mozos e mozas cun orzamento adxudicado de 674.527,26 euros. Segundo o país de realización das prácticas, estes 160 mozos e mozas realizarán a súa mobilidade nun total de 18 países: 53 no Reino Unido; 38 en Portugal; 16 en Irlanda; 11 en Malta; 10 en Alemaña; cinco en Francia; cinco en Grecia; catro en Italia; tres en Bélxica, Países Baixos e Polonia, respectivamente; dous en Dinamarca e dous en Eslovaquia; e un respectivamente en Austria, Eslovenia, Hungría, Letonia e Suecia.

Neste ano 2017, o programa Galeuropa conta cun orzamento global de 2.176.515,40 euros es está cofinanciado pola Iniciativa de Emprego Xuvenil e o Fondo Social Europeo. A iniciativa, que forma parte do Programa Operativo de Emprego Xuvenil, ten por finalidade financiar e apoiar á mobilidade da mocidade galega para que realice estadías de prácticas formativas non remuneradas entre dous e tres meses de duración en entidades ou empresas públicas ou privadas de 27 países da Unión Europea. Así mesmo e ao respecto das achegas económicas, estás poden ser individuais aos mozos e mozas así como a proxectos de mobilidade de entidades sen ánimo de lucro que desenvolvan a súa actividade no eixo da xuventude ou a proxectos de concellos, agrupacións de concellos ou mancomunidades.


Mellora da empregabilidade


A directora xeral salientou que “un eixe prioritario das políticas de Xuventude desta administración é o destinado ao fomento da mobilidade xuvenil”. Nesta liña de traballo enmárcase o programa Galeuropa, xa que ten como finalidade apoiar a formación da mocidade galega mediante a mellora da súa empregabilidade, favorecendo a adquisición de novos coñecementos, habilidades, capacidades e cualificacións para facilitar a súa inclusión no mercado de traballo, de xeito que poidan constatar unha práctica formativa no estranxeiro como parte do currículo.

Así, con estas mobilidades se intenta dotar á comunidade de profesionais con coñecementos non só das habilidades propiamente da súa titulación senón tamén que coñezan o funcionamento do mundo empresarial internacional e á súa vez con dominio de idiomas estranxeiros. Preténdese que os mozos e mozas alcancen e asimilen unha visión a nivel persoal e profesional que contribuirá á mellora da súa vida persoal e profesional á vez que se dota de recursos humanos de calidade ao tecido empresarial galego, así como tamén contribúe a descubrir novas posibilidades para a internacionalización das empresas galegas.

Cecilia Vázquez sinalou que segundo un estudo da Universidade de Santiago de Compostela sobre Os programas de Educación non formal e a empregabilidade da xuventude en Galicia, presentado en 2016 e que analizou os resultados de tres programas da Dirección Xeral de Xuventude, Participación e Voluntariado, o desemprego entre os participantes en Galeuropa diminuíu nun 67%. O estudo destaca que antes das prácticas, un 70,4% dos participantes estaba no paro, cifra que se reduciu posteriormente ata o 23,4%.

De conformidade co Programa Operativo de Emprego Xuvenil, a mobilidade, transnacional, pode constituír un elemento fundamental na formación dos mozos e mozas, tanto pola experiencia adquirida como polo apoio que pode supoñer a aprendizaxe dun idioma estranxeiro. Desta maneira, pode aportar un valor engadido á formación permanente dos mozos e a súa traxectoria profesional e proporcionarlle máis oportunidades de emprego.

A Consellería de Política Social considera prioritario apoiar medidas que incrementen as oportunidades de emprego para os mozos e mozas, medidas que deben contribuír a facilitar o seu acceso ao mercado de traballo, reducir os obstáculos lingüísticos e fomentar a súa autonomía persoal mediante a mellora da súa empregabilidade.

A responsable de Xuventude finalizou a súa intervención recordando que unha vez finalizados os proxectos, os participantes poden obter un certificado oficial de experiencias de educación non formal en materia de xuventude, como instrumento que permite confirmar a participación nos programas de educación non formal e sobre todo validar as competencias adquiridas.

  • A directora xeral de Xuventude, Participación e Voluntariado, Cecilia Vázquez, visitou o campamento de Viveiro
  • Cecilia Vázquez saudou aos rapaces e rapazas que participan no campamento ‘NaturArea: medioambiente mariño e náutica’ en Viveiro
  • Este ano na Campaña de verán están a tomar parte 9.572 persoas, 526 máis que en 2016 con actividades dirixidas a mozos de 9 a 30 anos

A directora xeral de Xuventude, Participación e Voluntariado, Cecilia Vázquez, visitou hoxe o campamentos da localidade lucense de Viveiro. Unha actividade enmarcada na campaña O teu verán colle nunha mochila, que a Consellería de Política Social pon a disposición da xuventude galega para o período estival.

O campamento NaturArea: medioambiente mariño e náutica ofrece aos seus participantes a posibilidade de practicar diferentes actividades no entorno acuático entre as que se atopan a práctica de vela, windsurf, wakeboard, kaiak, snorkel, skimboard e paddlesurf ademais do desenvolvemento doutras actividades coma unha aula de natureza mariña, volei praia, tiro con arco e xeocaptura. Cecilia Vázquez tivo a oportunidade de saudar aos 100 mozos e mozas de entre 13 e 15 anos que desfrutan deste campamento.

Durante a visita, Cecilia Vázquez dedicou unhas palabras á importancia que ten a realización de este tipo programas destinados aos máis novos. Deste xeito, destacou a influencia positiva que teñen estas actividades no plano persoal ao gozar dunha programación de ocio educativo e de tempo libre de primeiro nivel. Así mesmo, lembrou que no que respecta ao total provincial, Lugo oferta este ano 2155 prazas: 1985 nos campamentos de verán para rapaces e rapazas con idades de 10 a 17 anos, e 170 prazas nos campos de traballo.

'O teu verán colle nunha mochila'

En total, en toda a Campaña de verán están a tomar parte 9.572 persoas, 526 máis que en 2016. As actividades están dirixidas a mozos e mozas de entre 9 e 30 anos, e están divididas en actividades específicas para os distintos grupos de idade.
Na programación estival inclúense campamentos xuvenís para menores de 18 anos en Galicia e noutras comunidades autónomas; o uso en oferta concertada das instalacións xuvenís; as actividades para maiores de 18 anos; campos de traballo en España e no estranxeiro; e accións de reencontro con mozos e mozas descendentes de galegos residentes no exterior.

O departamento autonómico inviste 2,9 millóns de euros na posta en marcha destas actividades, que permitiron a contratación dunhas 1000 persoas entre monitores e directores de tempo libre.

  • O conselleiro de Política Social, José Manuel Rey Varela, estivo esta mañá cos participantes no campo que hoxe se clausura no municipio coruñés de Ponteceso
  • Un grupo de rapaces e rapazas galegos, procedentes doutras comunidades autónomas e do estranxeiro realizaron tarefas de acondicionamento e recuperación ambiental da praia de Valarés e do seu entorno
  • Galicia é referente na programación de campos de traballo ao desenvolverse entre os meses de xullo e agosto 25 distribuídos por toda a xeografía galega, ademais de ofertar prazas noutros que teñen lugar en diferentes zonas de España e no estranxeiro

O conselleiro de Política Social, José Manuel Rey Varela, acompañado da directora xeral de Xuventude, Participación e Voluntariado, Cecilia Vázquez, visitou esta mañá aos participantes no campo de traballo que a Xunta de Galicia organiza no municipio coruñés de Ponteceso en colaboración coa Fundación Eduardo Pondal e que remata na xornada de hoxe. Un grupo de 20 persoas, entre as que se encontran mozos e mozas doutras comunidades autónomas e catro procedentes do estranxeiro (un de Rusia, outro de Alemaña e dous de Francia), participaron nesta actividade que forma parte da programación da Campaña de Verán 2017.

Durante os dez días que durou esta convivencia os rapaces e rapazas levaron a cabo diferentes traballos ambientais: limpeza de maleza e de restrollos no contorno natural da praia de Valarés, identificación do patrimonio natural e sinalizaron da zona e recollida de lixo e limpeza do areal. Ademais, participaron na montaxe do festival xuvenil V de Valarés que se celebrou a pasada fin de semana. Tamén se programaron actividades complementarias, como xogos dinámicos, cooperativos e de orientación; obradoiros de relaxación e de instrumentos musicais, entre outros; rutas pola Costa da Morte; eventos culturais, como vídeo-foro ou relatos de contos e lendas galegas; visitas de grupos de música tradicional; e a realización de deporte con saídas en canoa e piraguas, entre outras prácticas.

Rey Varela salientou que actividades como este campo de Ponteceso “contribúen á difusión de valores como a participación, a solidariedade, o coñecemento do contorno, o traballo en equipo e a convivencia entre mozos e mozas doutras comunidades e países”. Así mesmo, “son unha excelente ferramenta de educación non formal, ao tempo que tamén favorecen a participación, o voluntariado e a mobilidade”, engadiu.

Ademais, o conselleiro apuntou que Galicia é referencia en España na organización de campos de traballo, desenvolvendo durante os meses de xullo e agosto un total de 28, dos cales dez teñen lugar na provincia da Coruña e en concreto nos concellos de Laracha, Betanzos, Boqueixón, Coirós, Curtis, Ordes, Ribeira, Rois, Vedra, Serra de Outes e Ponteceso. A oferta de prazas ascendeu este verán a preto de 900, entre campos que teñen lugar en Galicia e as reservadas para os que se desenvolven noutras zonas de España e no estranxeiro.

Campaña de Verán 2017

Os campos de traballo forman parte da programación da Campaña de Verán 2017 realizada pola Dirección Xeral de Xuventude, Participación e Voluntariado. A edición deste ano é a máis importante dos últimos anos no que atinxe ao número de prazas ofertadas cun total de 9572, 526 máis que en 2016.

Ademais destes campos, a campaña inclúe campamentos para menores de 18 anos e actividades para maiores de 18, a oferta concertada das instalacións e albegues xuvenís e accións de reencontro para descendentes de galegos residentes no exterior. A Consellería de Política Social destina un orzamento de 2,9 millóns de euros a esta campaña, o que supón un 11% máis que o exercicio anterior.

Cómpre destacar que as accións de verán traen aparellado un impulso do emprego vinculado ao sector do ocio e o tempo libre. Así, estímase que o desenvolvemento desta campaña supón a xeración de 900 empregos de monitores e directores de campamentos e actividades de lecer.

  • A Consellería de Política Social e Turismo de Galicia asinaron hoxe en San Caetano o convenio de colaboración para a posta en marcha deste novo programa
  • O programa permitirá que 480 mozos e mozas vivan unha experiencia de turismo rural ao tempo que desenvolven un programa formativo no que abordarán diferentes temáticas: creatividade, coaching e motivación, enfrontarse a unha entrevista de traballo ou accións relacionadas co coñecemento e coidado do patrimonio natural, cultural e etnográfico de Galicia
  • A iniciativa desenvolverase durante os fins de semana do vindeiro mes de outubro en aloxamentos turísticos de Carnota, Os Ancares, Eume, O Courel, Manzaneda e Xurés

O conselleiro de Política Social, José Manuel Rey Varela, e a directora de Turismo de Galicia, Nava Castro, asinaron esta mañá un convenio de colaboración co dobre obxectivo de impulsar o coñecemento do turismo rural entre a xuventude e, ao mesmo tempo, mellorar as súas competencias a través da educación non formal. O acto de sinatura tivo lugar nas dependencias administrativas da Xunta en San Caetano e tamén contou coa asistencia da directora xeral de Xuventude, Participación e Voluntariado, Cecilia Vázquez Suárez.

Esta nova iniciativa está dirixida a rapaces e rapazas con idades comprendidas entre os 18 e os 30 anos. Os participantes levarán a cabo actividades relacionadas co coñecemento da riqueza natural, seu coidado e o contacto coa natureza, durante estadías de fin de semana en aloxamentos turísticos no medio rural, emprazados tanto no interior como en zonas costeiras. Ademais, recibirán formación en temáticas como creatividade, coaching e motivación, como enfrontarse a unha entrevista de traballo e realizarán accións relacionadas co medio ambiente.

O conselleiro José Manuel Rey Varela destacou deste programa conxunto con Turismo de Galicia o feito de que “permitirá á mocidade adquirir novas competencias e habilidades e ter un mellor coñecemento do patrimonio natural, cultural e etnográfico de Galicia, ao tempo que se promove o respecto polo mesmo”. Neste sentido, engadiu que con esta iniciativa “ademais de proporcionar aos mozos e mozas a posibilidade de vivir unha experiencia de turismo rural, promovemos a educación ambiental e o ocio sostible, así como a mellora das súas competencias e aptitudes”.

Pola súa banda, a directora de Turismo de Galicia sinalou que para respectar o noso patrimonio “é imprescindible coñecelo e saber valoralo, de aí a relevancia desta actuación conxunta”. Nava Castro subliñou que este acordo permite afondar nun dos obxectivos da Estratexia do turismo de Galicia 2020, que propón medidas para sensibilizar as novas xeracións sobre o turismo e a súa capacidade como motor de desenvolvemento. “Sexa como turistas ou como anfitrións, desexamos que os máis novos compartan os valores intrínsecos de Galicia como destino”.

O programa desenvolverase durante as catro fins de semana do mes de outubro en seis aloxamentos rurais situados en Carnota, Os Ancares, Eume, O Courel, Manzaneda e Xurés. Ofertaranse un total de 480 prazas, a razón de 20 prazas por fin de semana e instalación.

O presuposto para a realización desta iniciativa ascende a 80.000 euros, sufragados a partes iguais entre Política Social e Turismo de Galicia, e que se destinarán a abonar os custes de aloxamento e manutención dos participantes, así como do persoal técnico que se encargará de impartir o programa formativo e á compra do material que sexa preciso para o seu desenvolvemento.

  • O conselleiro de Política Social, José Manuel Rey Varela, visitou hoxe aos participantes no campamento de Furelos, no municipio coruñés de Melide
  • Nas diferentes quendas de xullo e agosto pasarán polas instalacións xuvenís de Melide 240 rapaces e rapazas menores de 18 anos, que realizarán actividades realizadas co medio ambiente e o deporte de natureza
  • Este é o sexto ano consecutivo que o Goberno galego incrementa as prazas na Campaña de Verán, ofertando neste verán un total de 9572, 526 máis que na edición de 2016

O conselleiro de Política Social, José Manuel Rey Varela, visitou esta mañá o campamento xuvenil Furelos, en Melide, onde un grupo de 60 mozos e mozas de 12 a 14 anos de idade están a participar estes días en diversas actividades relacionadas coa natureza e de carácter deportivo. A directora xeral de Xuventude, Participación e Voluntariado, Cecilia Vázquez, tamén participou na visita a este campamento denominado Natureza no camiño e que se desenvolve ao abeiro da Campaña de Verán 2017.

De feito, este campamento é un dos seis que se desenvolven ao longo dos meses de xullo e agosto en diversas instalacións xuvenís da provincia da Coruña: Sada, Bergondo, Porto do Son, Boiro, Sobrado dos Monxes e Melide. Cando remate o actual período estival terán pasado por este albergue melidense 240 rapaces e rapazas menores de 18 anos, en catro quendas distintas. Rutas en bicicleta, sendeirismo, tiro con arco, kaiak, biomergullo fluvial, longboard, xeocaptura e a realización de obradoiros de temática variada son algunhas das actividades nas que participan os integrantes deste campamento.

Campamentos xuvenís como o de Furelos teñen lugar nun total de 22 albergues e instalacións por toda a xeografía galega. Tamén se ofertan prazas que os mozos e mozas galegos poidan participar en campamentos de intercambio nas comunidades autónomas do País Vasco, Castela e León, Estremadura, Madrid, A Rioxa e Cantabria. Así mesmo, mozos e mozas desas comunidades tamén veñen a Galicia para participar nos nosos campamentos. No caso concreto deste campamento de Melide, na anterior contou coa presenza dun grupo de 30 raparigos e raparigas de Cantabria.

Rey Varela fixo fincapé durante a súa visita a ampla oferta para a mocidade que contén a Campaña de Verán deste ano, cunha programación de ocio educativo e de tempo libre de primeiro nivel. Así mesmo, salientou que esta campaña tamén constitúe un recurso de conciliación estival para as familias, así como unha fonte de xeración de emprego no sector debido á necesidade de contar con monitores e directores de tempo libre para desenvolver esta programación.

Este é o sexto ano consecutivo que a Xunta de Galicia incrementa as prazas da Campaña de Verán e a actual é a máis ambiciosa ao ofertar un total de 9572, 526 máis que no exercicio anterior, e ao incrementar nun 11% o orzamento ata acadar os 2,9 millóns de euros.

  • A directora xeral de Xuventude, Participación e Voluntariado recibiu hoxe aos 14 mozos que participarán a vindeira semana nun intercambio con xaponeses
  • Cecilia Vázquez resaltou que os intercambios “consolidan valores como a solidariedade, a democracia e a amizade e facilitan a concienciación intercultural e a mellora das competencias lingüísticas”
  • A Xunta de Galicia pon en marcha o programa ‘A Xuventude no mundo’ para cumprir o seu obxectivo de promoción da mobilidade xuvenil

A directora xeral de Xuventude, Participación e Voluntariado, Cecilia Vázquez, recibiu hoxe aos 14 mozos e mozas de entre 18 e 30 anos que participarán no intercambio de ida á Prefectura de Wakayama (Xapón) do 29 de agosto ao 5 de setembro, no marco do programa de mobilidade xuvenil A Xuventude no mundo.

Cecilia Vázquez resaltou que durante a semana de duración do intercambio, “os participantes galegos serán os embaixadores da cultura galega no Xapón, ao tempo que coñecerán a cultura e lingua xaponesa, as súas costumes, interactuarán con mozos e mozas xaponeses en distintas actividades e durante tres días convivirán con familias xaponesas de acollida”.

O programa que desenvolverán estes 14 mozos e mozas combina actividades educativas e culturais como a recepción polas autoridades da Prefectura de Wakayama; unha reunión de traballo na universidade, na que os mozos, galegos e xaponeses, traballarán conxuntamente para coñecer e dar a coñecer as súas rexións; a visita á cidade de Tanabe e ao Mosteiro de Koyasan Nishimuroin: ou o percorrido dunha parte do Camiño Kumano Doso no que visitarán o Centro do Patrimonio Kumano Hungu e o santuario sintoísta Kumano Hongo Taisya.

A titular do departamento autonómico fixo especial fincapé na realización deste percorrido, pois “a cultura galega e a xaponesa se ben son moi distintas, están unidas por un vínculo, os dous itinerarios de peregrinación: o Camiño de Santiago en Galicia e o Camiño Kumano Kodo en Wakayama, dúas rutas recoñecidas pola Unesco como Patrimonio da Humanidade, puntos de referencia no que converxe a pluralidade de concepción de distintos pobos, culturas, linguas e relixións”.

Vázquez resaltou que os intercambios xuvenís “permiten aos mozos e mozas participantes desenvolver habilidades, competencias e coñecementos, descubrir novas culturas, costumes e estilos de vida, consolidar valores como a solidariedade, a democracia e a amizade e facilitar a concienciación intercultural e a mellora das competencias lingüísticas”. O proceso de aprendizaxe realízase a través de métodos de educación non formal. Neste senso, recordou que, ao abeiro da Orde do 26 de febreiro de 2015, da participación no programa A Xuventude no mundo derívase o dereito á expedición do certificado de educación non formal en materia de xuventude, certificado a través do que se lle da visibilidade á aprendizaxe non formal adquirida e se validan as competencias asumidas, contribuíndo así á mellora das posibilidades de emprego da mocidade galega.

A Prefectura de Wakayama e a Xunta de Galicia comparten vínculos desde a sinatura do seu irmandamento en 1998. A partir dese ano estanse a realizar distintos programas conxuntos, en especial centrados no turismo e na cultura. No que respecta á xuventude, en 2009 estableceuse un protocolo de traballo entre as dúas administracións rexionais para favorecer os lazos de unión entre as entidades xuvenís de Wakayama e Galicia. Así con este grupo de mozos e mozas galegas esta será a décimo cuarta experiencia de intercambio xuvenil entre a Xunta de Galicia e a Prefectura de Wakayama, sumando un total de 215 participantes.

Horizonte 2020

A Xunta de Galicia ten como un dos seus eixos prioritarios das políticas de xuventude a promoción da mobilidade xuvenil. Deste xeito, o Plan estratéxico de Xuventude de Galicia 2014-2020, Horizonte 2020, inclúe 20 medidas de fomento da mobilidade xuvenil. Unha mobilidade que se debe entender non coma a participación pasiva en meros viaxes turísticos ou vacacionais, xa que os mozos e mozas son acollidos por unha entidade xuvenil do país de referencia e comparten un amplo programa de actividades, o que supón unha implicación activa dos mozos na vida social, cultural e educativa, da rexión á que temporalmente se van a desprazar.

  • A Dirección Xeral de Xuventude, Participación e Voluntariado adxudicou as axudas para esta iniciativa de mobilidade transnacional e de mellora da empregabilidade
  • Galeuropa, incluído no Programa Operativo de Emprego Xuvenil e cofinanciado pola Iniciativa de Emprego Xuvenil e o Fondo Social Europeo, destina máis de dous millóns de euros para axudar a financiar a estadía dos participantes nos países onde completarán a súa formación

A Dirección Xeral de Xuventude, Participación e Voluntariado da Xunta de Galicia vén de adxudicar as axudas para a iniciativa de mobilidade transnacional xuvenil Galeuropa, incluída no Programa Operativo de Emprego Xuvenil e cofinanciada pola Iniciativa de Emprego Xuvenil e o Fondo Social Europeo. Esta proposta, dirixida aos mozos e mozas inscritos no Sistema Nacional de Garantía Xuvenil, ten como obxectivo mellorar a súa empregabilidade ao facilitarlles a realización de prácticas formativas non retribuídas no estranxeiro e ampliar así os seus currículos.

Ao respecto das achegas económicas, estás poden ser individuais aos mozos e mozas así como a proxectos de mobilidade de entidades sen ánimo de lucro que desenvolvan a súa actividade no eixo da xuventude ou a proxectos de concellos, agrupacións de concellos ou mancomunidades. O que se procura é financiar e apoiar a mobilidade da mocidade galega para que realice estadías de prácticas formativas non remuneradas entre dous e tres meses de duración en entidades ou en empresas tanto públicas como privadas de 27 países da Unión Europea (UE).

Así, e cun orzamento adxudicado inicialmente por riba dos dous millóns de euros, un total de 415 mozos e mozas realizarán prácticas nos vindeiros meses no marco do programa Galeuropa. O período de realización destas prácticas rematará o 30 de novembro.

No caso das entidades locais, foron aprobados os catro proxectos presentados cun orzamento adxudicado 356.419,09 € e un total de 67 mobilidades aprobadas distribuídas da seguinte maneira 31 para Reino Unido, 13 para Irlanda, 9 para Italia, 9 para Finlandia e 5 para Portugal. As entidades locais beneficiarias son: a agrupación de concellos de Boqueixón, Vedra e Vila de Cruces, con 20 mobilidades de tres meses de duración; a agrupación de concellos Negreira-Val do Dubra con 18 mobilidades de tres meses de duración; a Mancomunidade de concellos de Ordes con 20 mobilidades de dous meses de duración; e o Concello de Ourense con 9 mobilidades de dous meses de duración.

E no que atinxe ás entidades sen ánimo de lucro foron presentados 26 proxectos dos que resultaron beneficiarios 15, cun orzamento adxudicado dun millón de euros e un total de 188 mobilidades aprobadas: 72 para Italia, 45 para Portugal, 23 para Irlanda, 12 para Bulgaria, 11 para Reino Unido, 5 para Malta, 4 para Polonia, 4 para Alemaña, 4 para Francia, 4 para Chipre e 4 para República Checa.

As entidades sen ánimo de lucro beneficiarias con 15 mobilidades aprobadas de tres meses de duración son: Asociación Erasmus Compostela (Santiago), Xeración Asociación Cultural (Narón), Sustinea (Ourense), Euroxuventude (A Coruña), Asociación Foro, LC (Oleiros) e a Asociación cultural Ingalicia (A Coruña). Así mesmo, con 14 mobilidades de tres meses de duración resultaron beneficiarias a Asociación Sociocultural Luenda (A Baña) e a Asociación Cultural, Recreativa, Deportiva e Xuvenil Muxema (Negreira). Con 12 mobilidades de tres meses de duración foron adxudicatarias a Asociación Universitaria Ciencias da Educación (Ourense) e Amigos da Terra (Ourense); con 8 mobilidades de tres meses de duración: Fundación Paideia Galiza (A Coruña), Asociación Fogart (Santiago), Asociación Xuvenil e Deportiva Joy (Ames) e a ONG Mestura (Culleredo); e finalmente a Federación EFA Galicia obtivo 14 mobilidades de dous meses e sete días de duración.

Na modalidade de axudas individuais, recibíronse un total de 286 solicitudes das que resultaron beneficiarios 160 mozos e mozas cun orzamento adxudicado de 674.527,26 euros. Segundo o país de realización das prácticas, estes 160 mozos e mozas realizarán a súa mobilidade nun total de 18 países: 53 no Reino Unido; 38 en Portugal; 16 en Irlanda; 11 en Malta; 10 en Alemaña; 5 en Francia; 5 en Grecia; 4 en Italia; 3 en Bélxica, Países Baixos e Polonia, respectivamente; 2 en Dinamarca e 2 en Eslovaquia; e 1 respectivamente en Austria, Eslovenia, Hungría, Letonia e Suecia.
A contía da axuda por mozo/a está en función do país de realización da práctica formativa e en función da duración da mesma; e inclúe unha axuda para os gastos de aloxamento e manutención e axuda para a viaxe, e axuda para apoio lingüístico (150 euros) para as mobilidades individuais. No caso de proxectos de mobilidade de concellos e entidades sen ánimo de lucro, o importe total da axuda inclúe para a entidade de envío unha axuda á organización da mobilidade (550 euros por participante) e a súa execución, así como unha axuda á entidade de acollida. Está previsto un anticipo do 80 % do importe da axuda.