En portada (1167)
Encontro de Correspondentes Xuvenís
Día internacional do Voluntariado
O 5 de decembro conmemórase o Día Internacional do Voluntariado, unha data que busca resaltar o importante labor que realizan todas aquelas persoas que deciden de forma desinteresada tender unha man amiga para facer do noso mundo un lugar
mellor.
Por que ser voluntario/a?
1. Fainos sentir mellor con nós mesmos/as.
2. Alimenta a creatividade.
3. Aumenta o grao de motivación e de autoestima.
4. Acrecenta o sentimento de pertenza.
5. Aporta habilidades de traballo en equipo.
6. Mellora as nosas capacidades profesionais.
7. Dá acceso ao Certificado de Experiencias Voluntarias, cada vez máis valorado no mercado laboral.
Queres ser unha persoa voluntaria? Explora as oportunidades que ofrece a Xunta de Galicia.
Día mundial da Sida
A Xunta prepara a xente nova a enfrontarse a procesos de selección de personal a través do Xuventude Mentoring
O obxectivo é que coñezan como enfocan as empresas a captación de talento, as fases dun proceso de selección e que gañen seguridade á hora de enfrontar a procura de emprego
A directora xeral de Xuventude, Participación e Voluntariado, Cristina Pichel, destacou a boa acollida que están a ter entre a mocidade, as empresas e as entidades os programas Xuventude Mentoring e Xuventude Mentoring na Empresa e sinalou que están a demostrar serlles útiles á xuventude para os seus inicios profesionais. Así o dixo no inicio dunha nova xornada de networking dirixida aos participantes na cuarta edición do Xuventude Mentoring, que se celebrou no Centro coordinador de información xuvenil.
Esta actividade formativa de seis horas de duración desenvolveuse en dúas sesións, unha primeira teórica e unha segunda de contido máis práctico. Ambas as dúas, protagonizadas polo impulsor de talento Josiño Pérez e a responsable de Relacións Humanas de Galchimia, Antía Blanco. Os participantes aprenderon a realizar unha estratexia de carreira profesional e enfrontáronse á experiencia de pasar un proceso de selección.
Os obxectivos desta sesión foron que os participantes obtiveran unha idea clara de como as empresas enfocan a captación de talento, coñeceran as fases polas que pasa un proceso de selección, descubriran ferramentas e consellos facilmente aplicables nestes procesos e gañaran seguridade á hora de enfrontar a procura de emprego.
ERYICA, a Axencia Europea de Información Xuvenil da que Galicia forma parte, vén de publicar unha guía de utilidade para profesionais do eido da información xuvenil: "Dinámicas entre iguales o pares en el ámbito de la información juvenil".
Este documento pretende axudar a deseñar e implementar proxectos de educación entre iguais baseándose en exemplos de boas prácticas.
A Xunta compromete unha cuarta edición da liga de Break para o ano 2024 tras o éxito das anteriores
O Goberno galego comprometeu unha cuarta edición da Liga Xunta de Galicia de Break para o ano 2024 tras o éxito das anteriores. Así se lles comunicou aos premiados da terceira edición, que recibiron os seus galardóns tras unha final celebrada no centro comercial Área Central de Santiago. Esta iniciativa é froito da colaboración entre a Dirección xeral de Xuventude, Participación e Voluntariado, a Secretaría Xeral para o Deporte e a Asociación cultural e deportiva Vella Escola.
Na categoría avanzada resultou gañador o B-Boy Retrokid, procedente de Santiago e de 29 anos de idade. Así mesmo, o segundo e terceiro premio recaeu nos campións de España en sub-21 e xuvenil Amor, natural do concello de Neda (A Coruña) e de 17 anos, e en Mini Ali, de Ourense e de 12 anos.
Na categoría intermedia os gañadores foron tres vigueses: Charlos, Chang e Pedrosa, de entre 13 e 16 anos. Por último, os gañadores na categoría de iniciación foron: os vigueses Gael e Roi e o coruñés Chris, de entre 8 e 12 anos. Todos os participantes da Liga recibiron un diploma do circuíto, mentres que os tres gañadores de cada categoría un trofeo e unha medalla.
O Goberno galego aposta por ofrecer alternativas de ocio e saudables á xuventude coma esta liga galega. Esta competición percorreu dez localidades e contou coa participación de máis de 120 mozas e mozos. En concreto, as localidades polas que pasou esta terceira edición foron: Lalín, Pontedeume, Noia, Porto do Son, Verín, Vigo, A Coruña, Pontevedra, Ourense e, finalmente, esta final en Santiago de Compostela.
A Xunta de Galicia defendeu ante o Consello de Ministros de Xuventude do Consello da Unión Europea as propostas acordadas coas Comunidades Autónomas en materia de participación da mocidade. A conselleira de Política Social e Xuventude, Fabiola García e a Directora xeral de Xuventude, Participación e Voluntariado, Cristina Pichel participaron neste encontro en Bruxelas no que trasladaron as medidas acordadas co resto de comunidades durante os últimos meses.
Galicia ostenta a coordinación a nivel autonómico neste segundo semestre do ano. Entre as medidas recollidas no documento acordado coas comunidades autónomas establécese un maior coñecemento por parte da mocidade das institucións europeas, o fomento do intercambio cultural e a tolerancia e unha maior atención a temas que están a afectar directamente á xuventude como é a saúde mental.
A conselleira lembrou que o Goberno galego aposta por unha mocidade con voz propia, participativa e implicada na construción da Galicia do futuro. A Xunta contou co punto de vista da xuventude na elaboración do Plan Estratéxico de Xuventude de Galicia que se presentará nos próximos meses; na posta en marcha de charlas e formación en materia de saúde mental a través do Quérote+; e mediante a posta en marcha de programas como o Parlamento Xove, que os anima a investigar, dialogar e formar a súa propia opinión.
Premios en Cociña de Xuventude Crea 2023
A Xunta de Galicia premia o talento e a creatividade da mocidade galega na final de Cociña do programa Xuventude Crea 2023. A final desenvolveuse na praza de Abastos de Santiago de Compostela na que o santiagués Víctor Frank Calvo Estévez resultou o gañador polo seu prato ‘Bao de mar con mariscos do mercado e emulsión de limón’.
O segundo premio foi para a noiesa Tania Castelo Martínez pola súa elaboración de ‘Filloas de Treboada’ e o terceiro galardón recaeu no coruñés Ramón Calvo Estévez e o seu prato ‘Carpaccio de volandeira y fresas en textura’ e irmán do gañador. O xurado puido escoller entre oito pratos que foron elaborados en directo na propia praza de Abastos.
Durante estes días o Goberno galego está a entregar os galardóns desta nova edición do Xuventude Crea que premia o talento da mocidade en catorce disciplinas. Os gañadores recibirán un premio en metálico de 3.000 euros, o segundo clasificado levará 1.500 euros e a dotación económica para o terceiro é de 1.000 euros.
As obras e artistas máis recentes de Xuventude Crea poden consultarse no museo web do programa: https://www.museoxuventudecrea.gal/
http://xuventude.xunta.es/xuventude-crea
A Xunta de Galicia premia as mellores creacións en Fotografía e Artes Plásticas co programa Xuventude Crea 2023. Lucia Castro Álvarez, con ‘Todos levamos sal nos ollos’, fíxose co primeiro posto no certame de Fotografía; mentres que Abraham Alonso Méndez, coa súa pintura ‘IA 1993’, venceu na modalidade de Artes Plásticas.
As outras creacións galardoadas polo xurado do Xuventude Crea foron en Fotografía as seguintes: ‘Ellipsism’ de Iria Álvarez Liñares resultou segunda clasificada e ‘Persoas’ de Alejandra del Carmen Vera Echegaray quedou en terceiro lugar. Tamén houbo dúas mención de honra para Naiara Ayelen Carrazza Ibáñez por ‘Paisaxes da alma’ e Rodrigo Cruz Gómez, pola súa obra ‘Desarraigo’.
No que atinxe ao apartado de Artes Plásticas, en segundo lugar quedou a proposta escultórica titulada ‘Cestas Corpo’ de Yuxara Covelo Camesell, e o terceiro premio recaeu en Nerea Cordeiro Cerviño pola súa creación pictórica ‘Cidades telaraña’. Ademais, concedéronse dúas mencións de honra a Iago Fontoira Araujo, que presentou a escultura ‘Reflexos de encontro’ e a Nerea Gundín Fraga pola pintura ‘Bandeira’.
Todas estas obras gañadoras máis as finalistas desta edición poden apreciarse ata o vindeiro 9 de decembro nunha exposición aberta ao público na Igrexa da Universidade de Santiago de Compostela. A esta última fase do certame chegaron 30 propostas: 16 na categoría de Fotografía e 14 na de Artes Plásticas.
As persoas gañadoras recibirán un premio en metálico de 3.000 euros, os segundos clasificados levarán 1.500 euros e a dotación económica para os terceiros é de 1.000 euros.
As obras e artistas máis recentes de Xuventude Crea poden consultarse no museo web do programa: https://www.museoxuventudecrea.gal/
http://xuventude.xunta.es/xuventude-crea
A Xunta premia o talento musical da mocidade galega na final do programa Xuventude Crea
A Xunta de Galicia premia o talento e a creatividade de Eloy Vidal Varela (Corme, Ponteceso), Antía Vázquez Pantín (Vimianzo) e Pablo Castro Lema (Oleiros), que conforman o grupo Alana, gañadores do programa Xuventude Crea 2023 na
categoría de Música. Os títulos das creacións musicais coas que estes mozos se fixeron co primeiro lugar foron ‘Liñares’ e ‘Consuelo de Muiñeira’.
En segunda posición quedou Juan Arca Figueroa (Santiago de Compostela), coas pezas de música ‘Cinco fiestras e ‘Dúas lontras’; e Estela Rodríguez Rodríguez (Ourense) resultou a terceira clasificada tras interpretar dúas pezas clásicas ‘Só de Concours de André Messager’ e ‘Homenaxe a Bach de Béla Kovacs’. Ademais, o xurado concedeu unha mención de honra a Daniel Fernández Filloy (O Carballiño) polas obras ‘Tráxicos’ e ‘El tercer impacto’.
A final desta especialidade, unha das catorce que contempla o programa Xuventude Crea, celebrouse o domingo 12 de novembro no Playa Club da Coruña, onde o público desfrutou dun concerto coas 16 obras que chegaron a esta fase. Os gañadores recibirán un premio en metálico de 3.000 euros, o segundo clasificado levará 1.500 euros e a dotación económica para o terceiro é de 1.000 euros.
As obras e artistas máis recentes de Xuventude Crea poden consultarse no museo web do programa: https://www.museoxuventudecrea.gal/