En portada (1104)

  • O conselleiro de Política Social, José Manuel Rey Varela, visitou hoxe aos participantes no campamento de Furelos, no municipio coruñés de Melide
  • Nas diferentes quendas de xullo e agosto pasarán polas instalacións xuvenís de Melide 240 rapaces e rapazas menores de 18 anos, que realizarán actividades realizadas co medio ambiente e o deporte de natureza
  • Este é o sexto ano consecutivo que o Goberno galego incrementa as prazas na Campaña de Verán, ofertando neste verán un total de 9572, 526 máis que na edición de 2016

O conselleiro de Política Social, José Manuel Rey Varela, visitou esta mañá o campamento xuvenil Furelos, en Melide, onde un grupo de 60 mozos e mozas de 12 a 14 anos de idade están a participar estes días en diversas actividades relacionadas coa natureza e de carácter deportivo. A directora xeral de Xuventude, Participación e Voluntariado, Cecilia Vázquez, tamén participou na visita a este campamento denominado Natureza no camiño e que se desenvolve ao abeiro da Campaña de Verán 2017.

De feito, este campamento é un dos seis que se desenvolven ao longo dos meses de xullo e agosto en diversas instalacións xuvenís da provincia da Coruña: Sada, Bergondo, Porto do Son, Boiro, Sobrado dos Monxes e Melide. Cando remate o actual período estival terán pasado por este albergue melidense 240 rapaces e rapazas menores de 18 anos, en catro quendas distintas. Rutas en bicicleta, sendeirismo, tiro con arco, kaiak, biomergullo fluvial, longboard, xeocaptura e a realización de obradoiros de temática variada son algunhas das actividades nas que participan os integrantes deste campamento.

Campamentos xuvenís como o de Furelos teñen lugar nun total de 22 albergues e instalacións por toda a xeografía galega. Tamén se ofertan prazas que os mozos e mozas galegos poidan participar en campamentos de intercambio nas comunidades autónomas do País Vasco, Castela e León, Estremadura, Madrid, A Rioxa e Cantabria. Así mesmo, mozos e mozas desas comunidades tamén veñen a Galicia para participar nos nosos campamentos. No caso concreto deste campamento de Melide, na anterior contou coa presenza dun grupo de 30 raparigos e raparigas de Cantabria.

Rey Varela fixo fincapé durante a súa visita a ampla oferta para a mocidade que contén a Campaña de Verán deste ano, cunha programación de ocio educativo e de tempo libre de primeiro nivel. Así mesmo, salientou que esta campaña tamén constitúe un recurso de conciliación estival para as familias, así como unha fonte de xeración de emprego no sector debido á necesidade de contar con monitores e directores de tempo libre para desenvolver esta programación.

Este é o sexto ano consecutivo que a Xunta de Galicia incrementa as prazas da Campaña de Verán e a actual é a máis ambiciosa ao ofertar un total de 9572, 526 máis que no exercicio anterior, e ao incrementar nun 11% o orzamento ata acadar os 2,9 millóns de euros.

  • A directora xeral de Xuventude, Participación e Voluntariado recibiu hoxe aos 14 mozos que participarán a vindeira semana nun intercambio con xaponeses
  • Cecilia Vázquez resaltou que os intercambios “consolidan valores como a solidariedade, a democracia e a amizade e facilitan a concienciación intercultural e a mellora das competencias lingüísticas”
  • A Xunta de Galicia pon en marcha o programa ‘A Xuventude no mundo’ para cumprir o seu obxectivo de promoción da mobilidade xuvenil

A directora xeral de Xuventude, Participación e Voluntariado, Cecilia Vázquez, recibiu hoxe aos 14 mozos e mozas de entre 18 e 30 anos que participarán no intercambio de ida á Prefectura de Wakayama (Xapón) do 29 de agosto ao 5 de setembro, no marco do programa de mobilidade xuvenil A Xuventude no mundo.

Cecilia Vázquez resaltou que durante a semana de duración do intercambio, “os participantes galegos serán os embaixadores da cultura galega no Xapón, ao tempo que coñecerán a cultura e lingua xaponesa, as súas costumes, interactuarán con mozos e mozas xaponeses en distintas actividades e durante tres días convivirán con familias xaponesas de acollida”.

O programa que desenvolverán estes 14 mozos e mozas combina actividades educativas e culturais como a recepción polas autoridades da Prefectura de Wakayama; unha reunión de traballo na universidade, na que os mozos, galegos e xaponeses, traballarán conxuntamente para coñecer e dar a coñecer as súas rexións; a visita á cidade de Tanabe e ao Mosteiro de Koyasan Nishimuroin: ou o percorrido dunha parte do Camiño Kumano Doso no que visitarán o Centro do Patrimonio Kumano Hungu e o santuario sintoísta Kumano Hongo Taisya.

A titular do departamento autonómico fixo especial fincapé na realización deste percorrido, pois “a cultura galega e a xaponesa se ben son moi distintas, están unidas por un vínculo, os dous itinerarios de peregrinación: o Camiño de Santiago en Galicia e o Camiño Kumano Kodo en Wakayama, dúas rutas recoñecidas pola Unesco como Patrimonio da Humanidade, puntos de referencia no que converxe a pluralidade de concepción de distintos pobos, culturas, linguas e relixións”.

Vázquez resaltou que os intercambios xuvenís “permiten aos mozos e mozas participantes desenvolver habilidades, competencias e coñecementos, descubrir novas culturas, costumes e estilos de vida, consolidar valores como a solidariedade, a democracia e a amizade e facilitar a concienciación intercultural e a mellora das competencias lingüísticas”. O proceso de aprendizaxe realízase a través de métodos de educación non formal. Neste senso, recordou que, ao abeiro da Orde do 26 de febreiro de 2015, da participación no programa A Xuventude no mundo derívase o dereito á expedición do certificado de educación non formal en materia de xuventude, certificado a través do que se lle da visibilidade á aprendizaxe non formal adquirida e se validan as competencias asumidas, contribuíndo así á mellora das posibilidades de emprego da mocidade galega.

A Prefectura de Wakayama e a Xunta de Galicia comparten vínculos desde a sinatura do seu irmandamento en 1998. A partir dese ano estanse a realizar distintos programas conxuntos, en especial centrados no turismo e na cultura. No que respecta á xuventude, en 2009 estableceuse un protocolo de traballo entre as dúas administracións rexionais para favorecer os lazos de unión entre as entidades xuvenís de Wakayama e Galicia. Así con este grupo de mozos e mozas galegas esta será a décimo cuarta experiencia de intercambio xuvenil entre a Xunta de Galicia e a Prefectura de Wakayama, sumando un total de 215 participantes.

Horizonte 2020

A Xunta de Galicia ten como un dos seus eixos prioritarios das políticas de xuventude a promoción da mobilidade xuvenil. Deste xeito, o Plan estratéxico de Xuventude de Galicia 2014-2020, Horizonte 2020, inclúe 20 medidas de fomento da mobilidade xuvenil. Unha mobilidade que se debe entender non coma a participación pasiva en meros viaxes turísticos ou vacacionais, xa que os mozos e mozas son acollidos por unha entidade xuvenil do país de referencia e comparten un amplo programa de actividades, o que supón unha implicación activa dos mozos na vida social, cultural e educativa, da rexión á que temporalmente se van a desprazar.

  • A Dirección Xeral de Xuventude, Participación e Voluntariado adxudicou as axudas para esta iniciativa de mobilidade transnacional e de mellora da empregabilidade
  • Galeuropa, incluído no Programa Operativo de Emprego Xuvenil e cofinanciado pola Iniciativa de Emprego Xuvenil e o Fondo Social Europeo, destina máis de dous millóns de euros para axudar a financiar a estadía dos participantes nos países onde completarán a súa formación

A Dirección Xeral de Xuventude, Participación e Voluntariado da Xunta de Galicia vén de adxudicar as axudas para a iniciativa de mobilidade transnacional xuvenil Galeuropa, incluída no Programa Operativo de Emprego Xuvenil e cofinanciada pola Iniciativa de Emprego Xuvenil e o Fondo Social Europeo. Esta proposta, dirixida aos mozos e mozas inscritos no Sistema Nacional de Garantía Xuvenil, ten como obxectivo mellorar a súa empregabilidade ao facilitarlles a realización de prácticas formativas non retribuídas no estranxeiro e ampliar así os seus currículos.

Ao respecto das achegas económicas, estás poden ser individuais aos mozos e mozas así como a proxectos de mobilidade de entidades sen ánimo de lucro que desenvolvan a súa actividade no eixo da xuventude ou a proxectos de concellos, agrupacións de concellos ou mancomunidades. O que se procura é financiar e apoiar a mobilidade da mocidade galega para que realice estadías de prácticas formativas non remuneradas entre dous e tres meses de duración en entidades ou en empresas tanto públicas como privadas de 27 países da Unión Europea (UE).

Así, e cun orzamento adxudicado inicialmente por riba dos dous millóns de euros, un total de 415 mozos e mozas realizarán prácticas nos vindeiros meses no marco do programa Galeuropa. O período de realización destas prácticas rematará o 30 de novembro.

No caso das entidades locais, foron aprobados os catro proxectos presentados cun orzamento adxudicado 356.419,09 € e un total de 67 mobilidades aprobadas distribuídas da seguinte maneira 31 para Reino Unido, 13 para Irlanda, 9 para Italia, 9 para Finlandia e 5 para Portugal. As entidades locais beneficiarias son: a agrupación de concellos de Boqueixón, Vedra e Vila de Cruces, con 20 mobilidades de tres meses de duración; a agrupación de concellos Negreira-Val do Dubra con 18 mobilidades de tres meses de duración; a Mancomunidade de concellos de Ordes con 20 mobilidades de dous meses de duración; e o Concello de Ourense con 9 mobilidades de dous meses de duración.

E no que atinxe ás entidades sen ánimo de lucro foron presentados 26 proxectos dos que resultaron beneficiarios 15, cun orzamento adxudicado dun millón de euros e un total de 188 mobilidades aprobadas: 72 para Italia, 45 para Portugal, 23 para Irlanda, 12 para Bulgaria, 11 para Reino Unido, 5 para Malta, 4 para Polonia, 4 para Alemaña, 4 para Francia, 4 para Chipre e 4 para República Checa.

As entidades sen ánimo de lucro beneficiarias con 15 mobilidades aprobadas de tres meses de duración son: Asociación Erasmus Compostela (Santiago), Xeración Asociación Cultural (Narón), Sustinea (Ourense), Euroxuventude (A Coruña), Asociación Foro, LC (Oleiros) e a Asociación cultural Ingalicia (A Coruña). Así mesmo, con 14 mobilidades de tres meses de duración resultaron beneficiarias a Asociación Sociocultural Luenda (A Baña) e a Asociación Cultural, Recreativa, Deportiva e Xuvenil Muxema (Negreira). Con 12 mobilidades de tres meses de duración foron adxudicatarias a Asociación Universitaria Ciencias da Educación (Ourense) e Amigos da Terra (Ourense); con 8 mobilidades de tres meses de duración: Fundación Paideia Galiza (A Coruña), Asociación Fogart (Santiago), Asociación Xuvenil e Deportiva Joy (Ames) e a ONG Mestura (Culleredo); e finalmente a Federación EFA Galicia obtivo 14 mobilidades de dous meses e sete días de duración.

Na modalidade de axudas individuais, recibíronse un total de 286 solicitudes das que resultaron beneficiarios 160 mozos e mozas cun orzamento adxudicado de 674.527,26 euros. Segundo o país de realización das prácticas, estes 160 mozos e mozas realizarán a súa mobilidade nun total de 18 países: 53 no Reino Unido; 38 en Portugal; 16 en Irlanda; 11 en Malta; 10 en Alemaña; 5 en Francia; 5 en Grecia; 4 en Italia; 3 en Bélxica, Países Baixos e Polonia, respectivamente; 2 en Dinamarca e 2 en Eslovaquia; e 1 respectivamente en Austria, Eslovenia, Hungría, Letonia e Suecia.
A contía da axuda por mozo/a está en función do país de realización da práctica formativa e en función da duración da mesma; e inclúe unha axuda para os gastos de aloxamento e manutención e axuda para a viaxe, e axuda para apoio lingüístico (150 euros) para as mobilidades individuais. No caso de proxectos de mobilidade de concellos e entidades sen ánimo de lucro, o importe total da axuda inclúe para a entidade de envío unha axuda á organización da mobilidade (550 euros por participante) e a súa execución, así como unha axuda á entidade de acollida. Está previsto un anticipo do 80 % do importe da axuda.

  • A directora xeral de Xuventude, Participación e Voluntariado, Cecilia Vázquez, visitou hoxe aos participantes nesta actividade
  • Os rapaces e rapazas que toman parte nesta acción da campaña de verán, con idades comprendidas entre os 13 e 17 anos, están a realizar actividades como paddle surf, biomergullo mariño ou surf entre outras
  • Ofertáronse un total de 660 prazas para este campamento dividido en oito quendas ao longo da tempada estival

A directora xeral de Xuventude, Participación e Voluntariado, Cecilia Vázquez, visitou hoxe o campamento Natureza xunto ao mar, emprazado na localidade coruñesa de Porto do Son, onde 60 mozos e mozas con idades comprendidas entre os 13 e os 17 anos, están a disfrutar estes días dun tempo de ocio e lecer en contacto co medio natural. A actividade está enmarcada na campaña O teu verán colle nunha mochila, que a Consellería de Política Social pon a disposición da mocidade cun amplo abano de actividades de carácter cultural, ambiental, deportivo, de ocio e tempo libre ou de voluntariado, entre outras.

Durante a visita, Cecilia Vázquez saudou aos rapaces e rapazas que toman parte nesta acción da campaña de verán aos que sinalou a importancia de desenvolver este tipo de estadías na que os participantes gozan dunha programación de ocio educativo e tempo libre, moi importantes para o seu desenvolvemento persoal. De feito, os participantes deste campamento Natureza xunto ao mar están a realizar diferentes actividades como surf, escalada, paddle surf, canoa, biomergullo mariño, bodyboard, orientación, bicicleta, rapel, xeocaptura, tiro con arco e slack-line. En total, 660 mozos e mozas pasarán polas instalacións de Porto do Son no marco deste programa da Dirección Xeral de Xuventude, Participación e Voluntariado.

A Campaña de verán da Xunta de Galicia conta coa participación de 9.572 mozos e mozas, 526 máis que en 2016. As actividades están dirixidas a rapaces e rapazas de entre nove e 30 anos, e están divididas en actividades específicas para os distintos grupos de idade. Na programación estival inclúense campamentos xuvenís para menores de 18 anos en Galicia e noutras comunidades autónomas; o uso en oferta concertada das instalacións xuvenís; as actividades para maiores de 18 anos; campos de traballo en España e no estranxeiro; e accións de reencontro con mozos e mozas descendentes de galegos residentes no exterior.

O departamento autonómico inviste 2,9 millóns de euros na posta en marcha destas actividades, que están a permitir a contratación dunhas 1000 persoas entre monitores e directores de tempo libre.

Os campos centraranse no medio ambiente, na etnografía e no mundo audiovisual

Esta iniciativa promove valores como o traballo en equipo, a convivencia e o respecto a axuda a dinamizar a vida xuvenil nos concellos galegos

Galicia acollerá durante a tempada estival 28 campos de traballo, nos que os participantes desenvolverán actividades relacionadas co medio ambiente, a recuperación patrimonial e etnográfica, a arqueoloxía, a restauración e cos ámbitos cultural e social

A Consellería de Política Social subscribiu os convenios que permitirán a organización dos campos de traballo en Riós, Celanova, Ourense e Esgos, ao abeiro da campaña de verán 2017 da Xunta de Galicia. Esta iniciativa é unha ferramenta de educación non formal para a xente nova con idades comprendidas entre os 18 e os 30 anos, xa que engloba experiencias de participación, de voluntariado e de mobilidade, e ademais axudan a dinamizar a vida xuvenil nos concellos galegos onde teñen lugar.

Nesta liña, destaca o carácter altruísta e solidario das actividades que se desenvolven nestes campos, o que permite aos participantes poñer o seu grao de area á sociedade. Este programa de verán promove valores como o traballo en equipo, a convivencia e o respecto, así como a implicación da xuventude na sociedade ao afondar en materias que son do seu interese e lles abren novos camiños para a súa realización persoal.

Os convenios asinados hoxe permitirán levar a cabo campos de traballo en catro municipios da provincia lucense. Cada un deles ofrece 20 prazas e todos son de ámbito internacional, ofrecendo así a oportunidade aos participantes de estar en contacto con mozos e mozas doutros países.

O campo de traballo de Riós é o primeiro dos catro que se celebre na provincia, entre o 11 e o 21 de xullo, e terá carácter medioambiental. Nel, os voluntarios realizarán traballos de cultivo de soutos, achegaranse ás novas tendencias no aproveitamento dos terreos e coñecerán a cultura do castiñeiro participando en obradoiros sobre tradicións, música e mitoloxía popular. Así mesmo, participarán en dinámicas de grupo, e realizarán rutas de sendeirismo e orientación entre outras actividades.

Celanova acollerá un campo de traballo do 16 ao 30 de xullo centrado no mundo audiovisual. Durante eses 12 días, os participantes acudirán a obradoiros prácticos de formación sobre as distintas disciplinas que se conxugan para poder levar a cabo un audiovisual express. Deste xeito, realizarán tarefas de redacción do guión, produción, rodaxe, montaxe, posprodución e principios da interpretación. Ademais, participarán nalgunhas conferencias do curso de verán sobre o audiovisual da Universidade de Vigo e terán a oportunidade de coñecer o patrimonio arquitectónico e monumental de Celanova.

O medio ambiente e o eido social serán os eixos que vertebren o campo de traballo de Ourense, que terá lugar do 1 ao 11 de agosto. Os voluntarios acondicionarán terreos para uso agroecolóxico, o que está enmarcado nun programa ecosocial para persoas en risco de exclusión social e recibirán formación e asesoramento sobre a comercialización de produtos agrícolas entre outras accións. Os mozos e mozas tamén realizarán actividades complementarias que comprenden unha visita ás termas de cidade, baños no río e xeolocalización na urbe, así como charlas de carácter social coas entidades colaboradoras do proxecto.

O último dos campos de traballo celebrarase do 2 ao 13 de agosto en Esgos. Na modalidade de campo medioambiental e etnográfico, esta iniciativa permitirá aos participantes limpar e acondicionar a ruta do río Grañal, crear unha páxina web e unha ruta virtual sobre a mesma, elaborar un documental onde se amosarán as testemuñas patrimoniais e etnográficas para a posta en valor desta zona e tamén dinamizarán o Mosteiro de San Pedro de Rocas a través da dramatización da súa historia ao longo do tempo. Os asistentes a este campo de traballo tamén poderán realizar tiro con arco, acudir á piscina, participar en carreiras de orientación ou visitar as termas de Outariz entre outras experiencias.

Actividades nas catro provincias galegas
Esta actividade enmárcase na Campaña de Verán 2017 que organiza a Dirección Xeral de Xuventude, Participación e Voluntariado baixo a lenda O teu verán colle nunha mochila nas catro provincias galegas. Esta campaña é a máis inclusiva e importante dos últimos anos no que se refire a número de prazas ofertadas. En total, son 9572 as prazas que se ofrecen, o que significa incrementar nun 6% as prazas dispoñibles no ano pasado.

Ademais destes campos, a campaña de verán inclúe albergues, campamentos e actividades de ocio e tempo libre para a mocidade. A Consellería de Política Social destina un orzamento de 2,9 millóns de euros a esta campaña.

Cómpre destacar que outro dos aspectos positivos da campaña está no impulso ao emprego que leva aparellada. Grazas ao desenvolvemento destas actividades, as empresas de ocio e tempo libre de Galicia darán traballo a máis de 900 monitores e directores de campamentos.

Estes números consolidan Galicia como a comunidade autónoma que máis prazas en campamentos de verán oferta para a mocidade. Deste xeito, blíndase a posibilidade de que a xuventude empregue o seu tempo libre nos meses de xullo e agosto participando en actividades de educación non formal de moi diversa índole: cultural, medioambiental, deportivo, de voluntariado etc., que lles servirán para divertirse e tamén para o seu enriquecemento persoal e vital.

Uxía López, Correspondente Xuvenil no IES Saturnino Montojo de Ferrol redactou un artigo sobre a reciente visita da Directora Xeral de Xuventude, Cecilia Vázquez ao centro.
O artigo publicouse na revista Nós, Tamén, do equipo de Dinamización da lingua galega do IES Saturnino Montojo.


VISITA DA DIRECTORA XERAL

O luns, 22 de maio  Cecilia Vázquez Suárez, Directora Xeral de Xuventude, e Jesús Antelo García, Director do Centro Coordinador de Información Xuvenil, visitaron o equipo de Correspondentes Xuvenís. Mantiveron unha reunión cos dezasete alumnos e catro profesores que forman o equipo durante a cal expuxemos as liñas de actuación que seguimos no centro para o desenvolvemento do proxecto que se integra no Plan Proxecta, coordinado pola Dirección Xeral de Xuventude e a Consellaría de Cultura e Educación.  


O alumnado participante ten un recoñecemento oficial  importante para o seu currículo, posto que a Dirección Xeral de Xuventude lles certifica cen horas de voluntariado e ademais os convida a participar en campamentos que combinan formación e diversión e nos que se reúnen todos os correspondentes de Galicia

No noso instituto os correspondentes realizan outros labores de voluntariado que presentamos á Directora Xeral (Pódense ver na seguinte presentación: https://1drv.ms/p/s!AvLhZvl9dEUIgagvJsCSMjIkuHY0KA).  

Os correspondentes expuxeron o que implica ser correspondentes para eles: voluntariado, traballo colaborativo e interdisciplianr, implicación nas actividades de Vicedirección, Dinamización Lingüística e  Biblioteca, recoñecemento, solialización e realización persoal ... (https://goo.gl/SGThhL )


Uxía López, unha das nosas correspondentes máis activas asina o seguinte artigo que vai seguido pola entrevista que amablemente nos concedeu a Directora Xeral.

"A Directora Xeral de Xuventude e Voluntariado, Dna. Cecilia Vázquez Suárez decidiu vir ao noso instituto para ver de cerca o noso proxecto de Correspondentes Xuvenís, xa que lle interesaban moito as nosas propostas e todas as actividades que estamos a facer durante o curso.

Cando chegou fomos todos os correspondentes e as coordinadoras do programa á biblioteca, onde cada un de nós falou sobre o que significaba ser correspondente segundo o noso punto de vista e segundo a nosa experiencia. Cando todos rematamos, ela felicitounos porque valoraba moi positivamente tanto as nosas propostas como o noso programa. Ademais ela louvou a nosa implicación nas diferentes tarefas de voluntariado que desenvolvemos.

Despois fomos á cafetería onde lle puidemos facer cada un unhas preguntas que xa tiñamos preparadas, e ela entregounos o diploma onde se certifican as 100 horas de voluntariado por parte de cada un de nós.

Eu persoalmente estou encantada co proxecto, xa que me deu moitas oportunidades, e axudoume moito a soltarme cando falo en público, e non só para os meus compañeiros de aula, senón que tamén, no meu caso, ante o teatro Xofre e na radio COPE. Espero seguir neste programa moitos máis cursos porque sen dúbida é unha experiencia inesquecible para todos nós.


Os correspondentes fixéronlle unha entrevista que reproducimos a continuación:

Cal é a importancia do voluntariado no mundo actual?

Paréceme moi importante que a mocidade se implique e se enriqueza ao comprometerse. Ademais a DXXV da Xunta de Galicia certifica oficialmente as horas de voluntariado para poder facer que o seu traballo se tome en conta para bolsas ou para conseguir emprego. Nos últimos anos cambiou moito o sistema de acceder aos traballos e Galicia foi a primeira en convalidar actividades voluntarias para mellorar os currículos e propiciar a inserción no mercado laboral con axudas coma a dos diplomas. Estes certificados fan que os participantes nos programas, como o de Correspondentes,  acaden unha distinción persoal que completa o seu currículo.  

Por que considera que os mozos teñen que desenvolver actividades con persoas con necesidades especiais?

Porque os mozos sodes máis sensibles con colectivos con necesidades especiais e estades nunha parte da vida onde tedes que comprender as dificultades dalgunha xente e comezar a valorar máis o que vos tedes.

Como chegou ao seu posto de Directora Xeral de Xuventude?

A min propuxéronmo debido a que eu son unha persoa relativamente nova e con experiencia en programas coma Erasmus, en voluntariado, fun presidenta dunha asociación xuvenil… Despois, a través do partido, a Conselleira deume a oportunidade de chegar ao posto de Directora.

Cal é a parte do seu traballo que lle proporciona maior satisfacción ?

Actividades coma a de agora son realmente o que nos satisfai máis. Poder contactar de xeito directo cos mozos e saber que, a pesar dos orzamentos limitados que dificultan a xestión, os programas funcionan con tanta ilusión coma a que vemos é o que máis nos alegra.  Felicítovos novamente polo traballo realizado no voso centro.

Cal sería a solución ao problema do avellentamento en Galicia?

Sen dúbida é unha  das maiores dificultades ás que nos enfrontamos, para o que fan falla medidas específicas, xa que estamos ante un serio problema demográfico. Temos que ter en conta que non somos a única rexión de Europa que sofre isto e consideramos que debido á gran cantidade de recursos necesarios a solución debería acadarse a través dun pacto a nivel europeo.

Considera relevante a colaboración con ONG, coma a que se fai neste centro?

Considero que ten unha gran importancia ao ser unha actividade de voluntariado e que todo o mundo debería probar. Ademais de axudar aos demais, permite que nos sintamos útiles e apreciados pola oportunidade de axudar á xente.

Cal é a súa opinión respecto á LOMCE?

Penso que é unha lei positiva, aínda que non sei, non son unha experta no tema. Trata de solucionar problemas coma o abandono escolar. Ademais daralle máis valor ás actividades extracurriculares e posiblemente axude a programas coma o de Correspondentes.

É adecuado o investimento en xuventude?

Nunca é suficiente. Trala crise do 2008, que fixo que os orzamentos fosen recortados, as actividades e programas desenvolvidos diminuíron. Agora os orzamentos volven subir e esta tendencia revértese.

A responsabilidade de informar das actividades de quen é, dos profesores ou do alumnado?

Considero que debe recaer tanto nos profesores coma nos alumnos, formando un bo equipo de información, que é importante para o traballo voluntario. Cantas máis persoas colaboren, máis se enriquecerá".

Uxía López Expósito CX-3ºESO

 

Artigo na revista Nós, Tamén

O novo documento dará continuidade ao anterior plan, que estivo en vigor entre os anos 2014 e 2016 e que permitiu o desenvolvemento de 240 medidas cun orzamento de 343 millóns de euros

A directora xeral de Xuventude, Participación e Voluntariado, Cecilia Vázquez Suárez, presidiu hoxe a sesión de lanzamento do novo Plan estratéxico de Xuventude para o período 2018-2020. A sala Eisenman da Cidade da Cultura acolleu esta mañá a presentación deste proceso de participación e consulta que ten como finalidade incorporar a voz dos mozos e mozas, así como dos axentes, colectivos e asociacións que os representan na definición dos obxectivos e accións do devandito plan estratéxico.

Na súa intervención, Cecilia Vázquez sostivo que a intención da Xunta é iniciar outro ciclo tras a planificación desenvolvida desde 2014 recollendo nun novo documento as demandas actualizadas e as aspiracións da xuventude. Ao respecto, recordou que no plan anterior “xa contamos coa mocidade, aínda que cremos necesario reforzar e sistematizar as canles de escoita activa e participación para adaptar os programas ou pór en marcha novas iniciativas que dean resposta ás inquietudes e necesidades da xente nova".

O propósito da Dirección xeral de Xuventude, Participación e Voluntariado é que as distintas partes involucradas coñezan que poden achegar ao Plan Estratéxico e a sistemática prevista para a súa elaboración, así como cal será o sentido da súa contribución. O documento final recollerá os obxectivos e as actuacións plurianuais das políticas para a mocidade que se implementarán e executarán de maneira transversal e coordinada entre todas as Consellerías da Xunta de Galicia, tal e como marca a Lei de Xuventude de Galicia.

A responsable do departamento autonómico de Xuventude sostivo que, fronte ás afirmacións sobre o desinterese dos mozos polas políticas activas, “nós vimos constatando todo o contrario a través da súa complicidade e a súa participación nos nosos programas de formación tanto en Galicia como noutros países europeos, de emprendemento, de voluntariado e tamén de tempo libre”. Ademais, subliñou que esta demostrada a escasa eficacia das accións e programas que pretenden incidir na xuventude se contar coa ela nas tomas de decisións previas. Por iso, a Xunta ten sempre en conta nas súas iniciativas as inquedanzas da xente nova e para seguir potenciando este diálogo co sector se reforzarán as canles xa existentes de contacto coa mocidade e avanzarase na creación de novos espazos e relacións.

Á presentación do que será este proceso de participación e reflexión que tivo lugar na xornada de hoxe asistiron membros do Comité Galego de Políticas de Xuventude, concelleiros de xuventude, membros de asociacións xuvenís e entidades prestadoras de servizos á mocidade, entidades de voluntariado, escolas de tempo libre, informadores xuvenís, persoal dos espazos Xove e residencias xuvenís, así como mozos e mozas interesados en participar.

Cecilia Vázquez falou dunha nova etapa no horizonte 2020 e lembrou que o anterior plan de xuventude 2014-2016 se estruturou en once eixos de acción. Estes foron: educación, emprego, vivenda, creatividade e espírito emprendedor, saúde e deporte, participación e asociacionismo, voluntariado, información e formación, mobilidade e turismo, dinamización lingüística e igualdade. O anterior plan estratéxico supuxo o desenvolvemento de 240 medidas cun orzamento de 343 millóns de euros

A directora xeral de Xuventude, Participación e Voluntariado, Cecilia Vázquez Suárez, estivo hoxe cos participantes no campamento tecnolóxico A Molinera Kids, que a Xunta de Galicia impulsa co Concello de Ourense co obxectivo de apostar por unha nova perspectiva de relacións entre as artes, as novas tecnoloxías, a infancia e a mocidade. Na visita tamén participou o alcalde ourensán, Xesús Vázquez, así como o concelleiro de Promoción Económica, Jorge Pumar.

Os menores de entre 8 e 15 anos de idade que están inscritos nesta convivencia, que se desenvolve no Centro de Innovación e Coñecemento A Molinera, desenvolven actividades relacionadas con temáticas como a arquitectura 3D, a realidade aumentada e virtual, os drones, robótica, creación de videoxogos e cinema de animación 3D, entre outras. A responsable autonómica e o dirixente local coñeceron durante a visita como os os nenos e nenas levan a cabo proxectos innovadores como o deseño dunha vivenda futurista, robots ou proxectos de hologramas, ou como producen a súa propia música e crean as súas propias curtametraxes en 3D.

Cecilia Vázquez destacou esta iniciativa como “unha fórmula creativa para potenciar o traballo colaborativo entre os máis novos, a súa capacidade de descubrir, pensar e idear e a súa preparación para o futuro, non só persoal senón tamén profesional porque non podemos perder de vista que estas tendencias tecnolóxicas marcarán as novas profesións así como as vindeiras relacións comerciais”.

A Molinera Kids é un proxecto que, ademais do aprendizaxe colaborativo e divertido, quere impulsar entre os nenos e nenas as súas posibilidades creativas e emprendedoras a través do uso de ferramentas de expresión que posibiliten a súa comunicación artística.

Este campamento experimental inclúese entre as apostas de verán nas que colabora a Dirección Xeral de Xuventude, Participación e Voluntariado e que complementan a oferta que activou este ano para os meses de xullo e agosto cun total de 9.572 prazas en campamentos e campos de traballo, o que supón un aumento de 526 con respecto a 2016, con máis de 1.000 postos de traballo para monitores.

“Centramos este ano as actividades na natureza, cultura e deporte, entre outros, coa novidade de contar cun destinado ao emprendemento”, lembrou a directora xeral, que fixo fincapé no interese do seu departamento por apoiar todo tipo de proxectos que acheguen novos enfoques que combinen a formación e o lecer para os máis novos.

Esta iniciativa promove valores como o traballo en equipo, a convivencia e o respecto a axuda a dinamizar a vida xuvenil nos concellos galegos

Galicia acollerá durante a tempada estival 28 campos de traballo, nos que os participantes desenvolverán actividades relacionadas co medioambiente, a recuperación patrimonial e etnográfica, a arqueoloxía, a restauración e cos ámbitos cultural e social

A Consellería de Política Social subscribiu os convenios que permitirán a organización dos campos de traballo en Xermade, Folgoso do Courel, Pantón e Quiroga, ao abeiro da campaña de verán 2017 da Xunta de Galicia. Esta iniciativa é unha ferramenta de educación non formal para a xente nova con idades comprendidas entre os 18 e os 30 anos, xa que engloba experiencias de participación, de voluntariado e de mobilidade, e ademais axudan a dinamizar a vida xuvenil nos concellos galegos onde teñen lugar.

Nesta liña, destaca o carácter altruísta e solidario das actividades que se desenvolven nestes campos, o que permite aos participantes poñer o seu grao de area á sociedade. Este programa de verán promove valores como o traballo en equipo, a convivencia e o respecto, así como a implicación da xuventude na sociedade ao afondar en materias que son do seu interese e lles abren novos camiños para a súa realización persoal.

Os convenios asinados hoxe permitirán levar a cabo campos de traballo en catro municipios da provincia lucense. Todos eles son de ámbito internacional, ofrecendo así a oportunidade aos participantes de estar en contacto con mozos e mozas doutros países.

O campo de traballo de Xermade terá carácter arqueolóxico e centrarase na protección, recuperación do patrimonio inmaterial e conservación do ben etnográfico A Neveira. Desenvolverase do 4 ao 15 de xullo e os 20 mozos e mozas que participen realizarán tarefas de reconstrución de parte dos elementos dos muros descubertos e documentarán baixo metodoloxía antropolóxica a estrutura e a súa relación co Camiño Real da Carba. Así mesmo, farán unha recollida da toponimia da contorna, difundirán a cultura galega a través do traballo realizado e sensibilizarán e formarán á poboación local e foránea para garantir a valoración do patrimonio natural e cultural. Os participantes tamén realizarán outras actividades complementarias como rutas de sendeirismo, excursións e actividades deportivas.

En Quiroga terá lugar un campo de traballo medioambiental e de dinamización entre do 1 ao 12 de xullo. Tamén para 20 persoas, as actividades que se realizarán terán que ver coa limpeza e acondicionamento da Rota da Encomenda. Así mesmo, crearán unha páxina web e unha ruta virtual onde se amosará a cartografía, planimetría e perfil da ruta Por outra banda, porán en valor a Ponte do Rego do Castelo e dinamizarán o xeoparque coa creación de xornadas divulgativas no propio concello e nas localidades limítrofes.

No concello de Folgoso do Courel desenvolverase un campo de traballo medioambiental e arqueolóxico tamén para 20 rapaces e rapazas. As actividades que desenvolverán consistirán na conservación e na mellora dos contornos onde se sitúa o campo, ademais de colaborar en intervencións arqueolóxicas nos castros e xacementos de importante valor patrimonial e turístico existentes na zona. Tamén limparán o Castro de Vilar dado que se trata dun castro emblemático situado nunha de sendeirismo moi concorrida. Este campo terá lugar entre o 14 e o 26 de xullo.

Pantón acollerá do 1 ao 15 de agosto un campo de traballo cultural para 20 persoas que se encargarán da limpeza e acondicionamento exterior da Rota do Románico a través da intervención dos seus monumentos e da posta en valor da mesma coa participación na organización das XXIX Xornadas da Rota. Así mesmo, os participantes acondicionarán diferentes espazos urbanos a través de murais ou graffitis e realizarán diversas actividades como kaiak, tiro con arco ou xeolocalización entre outras.

Actividades nas catro provincias galegas
Este verán, os mozos e mozas galegos poderán escoller entre participar nos 28 campos de traballo que se organizan nas catro provincias galegas ou ben elixir entre as prazas que se ofertan en campos no estranxeiro e noutras Comunidades Autónomas.

Esta actividade enmárcase na Campaña de Verán 2017 que organiza a Dirección Xeral de Xuventude, Participación e Voluntariado baixo a lenda “O teu verán colle nunha mochila”. Esta campaña é a máis inclusiva e importante dos últimos anos no que se refire a número de prazas ofertadas. En total, son 9.572 as prazas que se ofrecen, o que significa incrementar nun 6% as prazas dispoñibles no ano pasado.

Ademais destes campos, a campaña de verán inclúe albergues, campamentos e actividades de ocio e tempo libre para a mocidade. A Consellería de Política Social destina un orzamento de 2,9 millóns de euros a esta campaña.

Cómpre destacar que, outro dos aspectos positivos da campaña está no impulso ao emprego que leva aparellada. Grazas ao desenvolvemento destas actividades, as empresas de ocio e tempo libre de Galicia darán traballo a máis de 900 monitores/as e directores/as de campamentos.

Estes números consolidan a Galicia como a Comunidade Autónoma que máis prazas en campamentos de verán oferta para a mocidade. Deste xeito, blíndase a posibilidade de que a xuventude empregue o seu tempo libre nos meses de xullo e agosto participando en actividades de educación non formal de moi diversa índole: cultural, medioambiental, deportivo, de voluntariado, etc., que lles servirán para divertirse e tamén para o seu enriquecemento persoal e vital.