Escola de Tempo Libre ALOUMIÑA

A Escola de Tempo Libre Aloumiña nace do desexo dun grupo multidisciplinar de profesionais, con máis de 20 anos de experiencia no eido do tempo libre e a educación non formal, de ofertar unha formación de calidade centrada en catro eixos transversais: a interculturalidade, a perspectiva de xénero, a diversidade funcional, e a educación para o desenvolvemento sostible.

O equipo formativo da Escola propoñemos un programa educativo que se centra na diversidade cultural e na igualdade de oportunidades para todas as persoas, independentemente do seu xénero ou das súas capacidades. A metodoloxía educativa aplicada busca axudar ás persoas a desenvolver actitudes e a adquirir coñecementos e competencias que lles permitan tomar e poñer en práctica decisións fundamentais, en beneficio propio e dos demais, para o momento presente pero coa mirada posta nas futuras xeracións.

A ETL Aloumiña ofrece a posibilidade de realizar as prácticas dos seus respectivos cursos en diversas entidades públicas e privadas de acción social cos que a Escola estableceu acordos de colaboración. Ademais, facilita a formación permanente no tempo libre e a educación non formal a través de cursos monográficos propios, con ofertas especiais para o seu alumnado.

Un programa de accións teórico-prácticas organizadas pola propia escola, como campamentos, intercambios xuvenís, xornadas temáticas, etc., permite ofertar aos/ás futuros/as profesionais do tempo libre un amplo abano de experiencias que favorezan o seu acceso no mercado laboral. ALOUMIÑA