A Consellería de Traballo e Benestar da Xunta de Galicia, por medio da Dirección Xeral de Xuventude e Voluntariado, dispón de instalacións que durante o curso académico funcionan como residencias xuvenís, para estudantes de ata 30 anos, matriculados en ciclos formativos de grao medio, bacharelato, ciclos formativos de grao superior, estudos universitarios tendentes á obtención de título de grao ou equivalente, ou ben, mentres non se xeralice a implantación dos novos títulos universitarios, estudos universitarios de 1º, 2º ou 3º ciclo nunha facultade ou escola universitaria, ou estudos superiores en ensinanzas artísticas.

A convocatoria de prazas é pública e faise a través do DOG, son indispensables os seguintes requisitos:

• Posuír nacionalidade española ou ser nacional dun país membro da Comunidade Europea, ou ser estranxeiro residente en España no momento da solicitude de praza.
• Non superar os 30 anos de idade antes da data en que remate o prazo de presentación de solicitudes.
• Que no concello onde radique a súa residencia familiar non exista oferta de centros públicos para realizar o curso, nivel ou grao correspondente aos estudos que vai a cursar o/a solicitante.
  (Exceptúanse do anterior, a realización de estudos universitarios nos que o solicitante non acade a nota de corte ou puntuación académica mínima esixida para o ingreso nas facultades ou escolas universitarias da localidade da residencia familiar.)
• Non ter perdido a condición de residente por causa imputable ao solicitante.

As instalacións a disposición dos mozos e mozas residentes durante o curso académico ofrecen aloxamento e mantenza, nelas desenvólvese unha serie de actividades e convivencias educativas a través das que se intenta fomentar valores sociais, culturais e deportivos. Para solicitar praza nalgunha destas residencias, infórmate aquí.