O Centro Coordinador de Información e Documentación Xuvenil, dependente da Dirección Xeral de Xuventude e Voluntariado, atendeu durante o ano 2011 a 44.340 mozos e mozas, con un total de 48.266 consultas. A esto hai que engadir 20.011 mozos e mozas que acudiron ao centro para utilizar o programa ‘Comunícate’, que lles permite utilizar durante unha hora de forma gratuíta un ordenador do centro con acceso a internet.

As consultas máis solicitadas tiveron relación con programas da Dirección Xeral de Xuventude (28%), seguíndolle a demanda de cursos (12%), actividades (10%), bolsas (9%), oposicións (9%), e vivenda, con un 8%.

En canto á idade dos usuarios por tramos, a franxa de 19 a 25 anos representa o 28% das consultas; seguido dos mozos e mozas de 26 a 30 anos (24%); os de máis de 30 anos (22%); de 14 a 18 anos (17%); e un 9% os menores de 14 anos.

Por apartados, na oficina de información xeral, atendéronse 33.895 usuarios, dos cales 22.204 foron de forma presencial e por teléfono e 11.631 por correo electrónico, o que supuxo a resposta a 36.386 consultas.

Así mesmo, realizáronse 3.862 carnés para a mocidade, sendo o máis demandado o carné xove, con 2.855 expedicións, e 1.007 no resto de carnés, como o de albergues. As consultas atendidas relacionadas con carnés foron un total de 11.042, delas 8.940 foron directas e 1.689 por vía telefónica. Tamén se levaron a cabo 55 cursos de distinta temática nos que participaron 1.026 mozos e mozas.

En canto á asesoría de programas europeos, o centro tivo 271 visitas presenciais e 523 consultas. Así mesmo coordinou un total de 32 programas europeos e 12 do programa galego de mobilidade, no que participaron 209 mozos e mozas galegos. A través da Rede Eurodesk realizáronse 51 consultas relacionadas con diversos temas sobre xuventude.

Desde o Observatorio Galego de Xuventude desenvolveuse, en colaboración coa universidade de Santiago de Compostela, o Informe sobre a Xuventude Galega 2010, así como distintos informes sobre temas diversos, entre os que destacan a siniestralidade nas estradas, mobilidade, o Carné Xove, a situación demográfica da mocidade en Galicia, ou o Programa Comunícate. Así mesmo, realizouse un monográfico sobre o Día das Letras Galegas adicado ao poeta Lois Pereiro.

En canto á Oficina de Emancipación Xuvenil, no ámbito de emprego tivo 230 usuarios e 257 consultas, das que o 55,25% foron de mulleres e o 44,75% de homes. En materia de vivenda, o número de usuarios ascendeu a 234 e o número de consultas a 264 persoas.