•Esta iniciativa da Rede de Dinamización Xuvenil, e integrada no programa Participa, pretende achegar a tódolos mozos e mozas emprendedores no mundo asociativo xuvenil a información precisa para fomentar e promover actividades de aprendizaxe non formal.

Santiago, 25 de xaneiro. A Consellería de Traballo e Benestar está a desenvolver ao longo do mes de xaneiro 25 encontros informativos nas comarcas e nos campus universitarios para achegar á mocidade galega o programa de emprendemento e empoderamento xuvenil ‘Iniciativa Xove’.

Estos encontros teñen como obxectivo achegar á mocidade emprendedora no tecido asociativo xuvenil a información precisa para fomentar e promover actividades de aprendizaxe non formal que lles permitan desenvolver as súas capacidades, talento  e espírito emprendedor involucrándose na posta en marcha dos seus propios proxectos con ‘Iniciativa Xove 2012’.

Os destinatarios dos encontros son os mozos e mozas menores de 30 anos, concelleiros de xuventude ou con competencias na materia, técnicos de xuventude ou cultura, membros de asociacións xuvenís ou colectivos de mozos e mozas que poidan conformarse nun grupo informal.

Nestas citas, a Dirección Xeral de Xuventude leva a cada comarca un encontro informativo onde todos aqueles mozos e mozas que o desexen poderán obter tanto información como asesoramento do programa e as novidades que este ano aparecen na convocatoria das axudas.

Onte,  ás 12.00 horas, na Aula Magna de Económicas ao que asistiron máis dunha veintena de persoas,  mozos e mozas de entidades xuvenís e grupos informais da comarca. Hoxe, xoves, ás 12.00 hs a iniciativa trasladarase á Facultade de Turismo de Ourense e ás 18.00 hs á facultade de Ciencias Económicas de Vigo.